| Library / Tipiṭaka / තිපිටක • Tipiṭaka / මහාවිභඞ්‌ග-අට්‌ඨකථා • Mahāvibhaṅga-aṭṭhakathā |
9. පරිපාචිතසික්‌ඛාපදවණ්‌ණනා
9. Paripācitasikkhāpadavaṇṇanā
192. නවමසික්‌ඛාපදෙ – මහානාගෙ තිට්‌ඨමානෙති භුම්‌මත්‌ථෙ උපයොගවචනං, මහානාගෙසු තිට්‌ඨමානෙසූති අත්‌ථො. අථ වා මහානාගෙ තිට්‌ඨමානෙ ‘‘අදිස්‌වා’’ති අයමෙත්‌ථ පාඨසෙසො දට්‌ඨබ්‌බො. ඉතරථා හි අත්‌ථො න යුජ්‌ජති. අන්‌තරාකථාති අවසානං අප්‌පත්‌වා ආරම්‌භස්‌ස ච අවසානස්‌ස ච වෙමජ්‌ඣට්‌ඨානං පත්‌තකථා. විප්‌පකතාති කයිරමානා හොති. සච්‌චං මහානාගා ඛො තයා ගහපතීති අද්‌ධච්‌ඡිකෙන ඔලොකයමානා ථෙරෙ පවිසන්‌තෙ දිස්‌වා තෙහි සුතභාවං ඤත්‌වා එවමාහ.
192. Navamasikkhāpade – mahānāge tiṭṭhamāneti bhummatthe upayogavacanaṃ, mahānāgesu tiṭṭhamānesūti attho. Atha vā mahānāge tiṭṭhamāne ‘‘adisvā’’ti ayamettha pāṭhaseso daṭṭhabbo. Itarathā hi attho na yujjati. Antarākathāti avasānaṃ appatvā ārambhassa ca avasānassa ca vemajjhaṭṭhānaṃ pattakathā. Vippakatāti kayiramānā hoti. Saccaṃ mahānāgā kho tayā gahapatīti addhacchikena olokayamānā there pavisante disvā tehi sutabhāvaṃ ñatvā evamāha.
194. භික්‌ඛුනිපරිපාචිතන්‌ති භික්‌ඛුනියා පරිපාචිතං, ගුණප්‌පකාසනෙන නිප්‌ඵාදිතං; ලද්‌ධබ්‌බං කතන්‌ති අත්‌ථො. පදභාජනෙ පනස්‌ස භික්‌ඛුනිඤ්‌ච තස්‌සා පරිපාචනාකාරඤ්‌ච දස්‌සෙතුං ‘‘භික්‌ඛුනී නාම උභතොසඞ්‌ඝෙ උපසම්‌පන්‌නා, පරිපාචෙති නාම පුබ්‌බෙ අදාතුකාමාන’’න්‌තිආදි වුත්‌තං. පුබ්‌බෙ ගිහිසමාරම්‌භාති එත්‌ථ පුබ්‌බෙති පඨමං. සමාරම්‌භොති සමාරද්‌ධං වුච්‌චති, පටියාදිතස්‌සෙතං අධිවචනං. ගිහීනං සමාරම්‌භො ගිහිසමාරම්‌භො. භික්‌ඛුනියා පරිපාචනතො පඨමමෙව යං ගිහීනං පටියාදිතං භත්‌තං, තතො අඤ්‌ඤත්‍ර තං පිණ්‌ඩපාතං ඨපෙත්‌වා අඤ්‌ඤං භුඤ්‌ජන්‌තස්‌ස ආපත්‌ති, තං පන භුඤ්‌ජන්‌තස්‌ස අනාපත්‌තීති වුත්‌තං හොති. පදභාජනෙ පන යස්‌මා ඤාතකපවාරිතෙහි භික්‌ඛුස්‌සත්‌ථාය අසමාරද්‌ධොපි පිණ්‌ඩපාතො අත්‌ථතො සමාරද්‌ධොව හොති, යථාසුඛං ආහරාපෙතබ්‌බතො, තස්‌මා බ්‍යඤ්‌ජනං අනාදියිත්‌වා අත්‌ථමෙව දස්‌සෙතුං ‘‘ගිහිසමාරම්‌භො නාම ඤාතකා වා හොන්‌ති පවාරිතා වා’’ති වුත්‌තං.
194.Bhikkhuniparipācitanti bhikkhuniyā paripācitaṃ, guṇappakāsanena nipphāditaṃ; laddhabbaṃ katanti attho. Padabhājane panassa bhikkhuniñca tassā paripācanākārañca dassetuṃ ‘‘bhikkhunī nāma ubhatosaṅghe upasampannā, paripāceti nāma pubbe adātukāmāna’’ntiādi vuttaṃ. Pubbe gihisamārambhāti ettha pubbeti paṭhamaṃ. Samārambhoti samāraddhaṃ vuccati, paṭiyāditassetaṃ adhivacanaṃ. Gihīnaṃ samārambho gihisamārambho. Bhikkhuniyā paripācanato paṭhamameva yaṃ gihīnaṃ paṭiyāditaṃ bhattaṃ, tato aññatra taṃ piṇḍapātaṃ ṭhapetvā aññaṃ bhuñjantassa āpatti, taṃ pana bhuñjantassa anāpattīti vuttaṃ hoti. Padabhājane pana yasmā ñātakapavāritehi bhikkhussatthāya asamāraddhopi piṇḍapāto atthato samāraddhova hoti, yathāsukhaṃ āharāpetabbato, tasmā byañjanaṃ anādiyitvā atthameva dassetuṃ ‘‘gihisamārambho nāma ñātakā vā honti pavāritā vā’’ti vuttaṃ.
195. පකතිපටියත්‌තන්‌ති පකතියා තස්‌සෙව භික්‌ඛුනො අත්‌ථාය පටියාදිතං හොති ‘‘ථෙරස්‌ස දස්‌සාමා’’ති. මහාපච්‌චරියං පන ‘‘තස්‌ස අඤ්‌ඤස්‌සා’’ති අවත්‌වා ‘‘භික්‌ඛූනං දස්‌සාමාති පටියත්‌තං හොතී’’ති අවිසෙසෙන වුත්‌තං.
195.Pakatipaṭiyattanti pakatiyā tasseva bhikkhuno atthāya paṭiyāditaṃ hoti ‘‘therassa dassāmā’’ti. Mahāpaccariyaṃ pana ‘‘tassa aññassā’’ti avatvā ‘‘bhikkhūnaṃ dassāmāti paṭiyattaṃ hotī’’ti avisesena vuttaṃ.
197. පඤ්‌ච භොජනානි ඨපෙත්‌වා සබ්‌බත්‌ථ අනාපත්‌තීති යාගුඛජ්‌ජකඵලාඵලෙ සබ්‌බත්‌ථ භික්‌ඛුනිපරිපාචිතෙපි අනාපත්‌ති. සෙසං උත්‌තානමෙව. පඨමපාරාජිකසමුට්‌ඨානං – කායචිත්‌තතො සමුට්‌ඨාති, කිරියං, සඤ්‌ඤාවිමොක්‌ඛං, සචිත්‌තකං, පණ්‌ණත්‌තිවජ්‌ජං, කායකම්‌මං, තිචිත්‌තං, තිවෙදනන්‌ති.
197.Pañca bhojanāni ṭhapetvā sabbattha anāpattīti yāgukhajjakaphalāphale sabbattha bhikkhuniparipācitepi anāpatti. Sesaṃ uttānameva. Paṭhamapārājikasamuṭṭhānaṃ – kāyacittato samuṭṭhāti, kiriyaṃ, saññāvimokkhaṃ, sacittakaṃ, paṇṇattivajjaṃ, kāyakammaṃ, ticittaṃ, tivedananti.
පරිපාචිතසික්‌ඛාපදං නවමං.
Paripācitasikkhāpadaṃ navamaṃ.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 3. ඔවාදවග්‌ගො • 3. Ovādavaggo
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 9. පරිපාචිතසික්‌ඛාපදවණ්‌ණනා • 9. Paripācitasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 9. පරිපාචිතසික්‌ඛාපදවණ්‌ණනා • 9. Paripācitasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 9. පරිපාචිතසික්‌ඛාපදවණ්‌ණනා • 9. Paripācitasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 9. පරිපාචිතසික්‌ඛාපදං • 9. Paripācitasikkhāpadaṃ
