| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
4. பரிஸாஸுத்தவண்ணனா
4. Parisāsuttavaṇṇanā
96. சதுத்தே² பச்சயபா³ஹுல்லிகாதி சீவராதி³பா³ஹுல்லாய படிபன்னா. அவீததண்ஹதாய ஹி தங் தங் பரிக்கா²ரஜாதங் ப³ஹுங் லந்தி ஆதி³யந்தீதி ப³ஹுலா, தே ஏவ பா³ஹுலிகா யதா² ‘‘வேனயிகோ’’தி (ம॰ நி॰ 1.246; அ॰ நி॰ 8.11; பாரா॰ 8). தே பச்சயபா³ஹுல்லாய யுத்தப்பயுத்தா ஹொந்தீதி சீவராதி³பா³ஹுல்லாய படிபன்னா நாம ஹொந்தி. ஸிக்கா²ய அகா³ரவபா⁴வதோ ஸிதி²லங் அகா³ள்ஹங் க³ண்ஹந்தீதி ஸாத²லிகா. ஸிதி²லந்தி ச பா⁴வனபுங்ஸகனித்³தே³ஸோ. ஸிதி²லஸத்³தே³ன ஸமானத்த²ஸ்ஸ ஸத²லஸத்³த³ஸ்ஸ வஸேன ஸாத²லிகாதி பத³ஸித்³தி⁴ வேதி³தப்³பா³. அவக³மனட்டே²னாதி அதோ⁴க³மனட்டே²ன, ஓரம்பா⁴கி³யபா⁴வேனாதி அத்தோ². நிக்கி²த்தது⁴ராதி ஓரோபிதது⁴ரா உஜ்ஜிதுஸ்ஸாஹா. உபதி⁴விவேகோ நிப்³பா³னங். து³வித⁴ம்பி வீரியந்தி காயிகங் சேதஸிகஞ்ச வீரியங்.
96. Catutthe paccayabāhullikāti cīvarādibāhullāya paṭipannā. Avītataṇhatāya hi taṃ taṃ parikkhārajātaṃ bahuṃ lanti ādiyantīti bahulā, te eva bāhulikā yathā ‘‘venayiko’’ti (ma. ni. 1.246; a. ni. 8.11; pārā. 8). Te paccayabāhullāya yuttappayuttā hontīti cīvarādibāhullāya paṭipannā nāma honti. Sikkhāya agāravabhāvato sithilaṃ agāḷhaṃ gaṇhantīti sāthalikā. Sithilanti ca bhāvanapuṃsakaniddeso. Sithilasaddena samānatthassa sathalasaddassa vasena sāthalikāti padasiddhi veditabbā. Avagamanaṭṭhenāti adhogamanaṭṭhena, orambhāgiyabhāvenāti attho. Nikkhittadhurāti oropitadhurā ujjitussāhā. Upadhiviveko nibbānaṃ. Duvidhampi vīriyanti kāyikaṃ cetasikañca vīriyaṃ.
ப⁴ண்ட³னங் ஜாதங் ஏதேஸந்தி ப⁴ண்ட³னஜாதா. விஸேஸனஸ்ஸ பரனிபாதவஸேன சேதங் வுத்தங். அட்ட²கதா²யங் பன விஸேஸனஸ்ஸ புப்³ப³னிபாதவஸேனேவ அத்த²ங் த³ஸ்ஸெந்தோ ‘‘ஜாதப⁴ண்ட³னா’’தி ஆஹ. கலஹோ ஜாதோ ஏதேஸந்தி கலஹஜாதாதி எத்தா²பி ஏஸேவ நயோ. கலஹஸ்ஸ புப்³ப³பா⁴கோ³தி கலஹஸ்ஸ ஹேதுபூ⁴தா படிபா⁴கா³ தங்ஸதி³ஸீ ச அனிட்ட²கிரியா. ஹத்த²பராமாஸாதி³வஸேனாதி குஜ்ஜி²த்வா அஞ்ஞமஞ்ஞஸ்ஸ ஹத்தே² க³ஹெத்வா பலபனஅச்சி²ந்த³னாதி³வஸேன. ‘‘அயங் த⁴ம்மோ, நாயங் த⁴ம்மோ’’திஆதி³னா விருத்³த⁴வாத³பூ⁴தங் விவாத³ங் ஆபன்னாதி விவாத³பன்னா. தேனாஹ ‘‘விருத்³த⁴வாத³ங் ஆபன்னா’’தி. முக²ஸன்னிஸ்ஸிததாய வாசா இத⁴ ‘‘முக²’’ந்தி அதி⁴ப்பேதாதி ஆஹ ‘‘ப²ருஸா வாசா முக²ஸத்தியோ’’தி.
Bhaṇḍanaṃ jātaṃ etesanti bhaṇḍanajātā. Visesanassa paranipātavasena cetaṃ vuttaṃ. Aṭṭhakathāyaṃ pana visesanassa pubbanipātavaseneva atthaṃ dassento ‘‘jātabhaṇḍanā’’ti āha. Kalaho jāto etesanti kalahajātāti etthāpi eseva nayo. Kalahassa pubbabhāgoti kalahassa hetubhūtā paṭibhāgā taṃsadisī ca aniṭṭhakiriyā. Hatthaparāmāsādivasenāti kujjhitvā aññamaññassa hatthe gahetvā palapanaacchindanādivasena. ‘‘Ayaṃ dhammo, nāyaṃ dhammo’’tiādinā viruddhavādabhūtaṃ vivādaṃ āpannāti vivādapannā. Tenāha ‘‘viruddhavādaṃ āpannā’’ti. Mukhasannissitatāya vācā idha ‘‘mukha’’nti adhippetāti āha ‘‘pharusā vācā mukhasattiyo’’ti.
ஸதிபி உப⁴யேஸங் கலாபானங் பரமத்த²தோ பே⁴தே³ பசுரஜனேஹி பன து³விஞ்ஞெய்யனானத்தங் கீ²ரோத³கஸம்மோதி³தங் அச்சந்தமேதங் ஸங்ஸட்ட²ங் விய ஹுத்வா திட்ட²தீதி ஆஹ ‘‘கீ²ரோத³கங் விய பூ⁴தா’’தி. யதா² கீ²ரஞ்ச உத³கஞ்ச அஞ்ஞமஞ்ஞங் ஸங்ஸந்த³தி, விஸுங் ந ஹோதி, ஏகத்தங் விய உபேதி, ஏவங் ஸாமக்³கி³வஸேன ஏகத்தூபக³தசித்துப்பாதா³தி அத்தோ². மெத்தசித்தங் பச்சுபட்டா²பெத்வா ஓலோகனங் சக்கூ²னி விய சக்கூ²னி நாமாதி ஆஹ ‘‘உபஸந்தேஹி மெத்தசக்கூ²ஹீ’’தி. பியபா⁴வதீ³பகானி ஹி சக்கூ²னி பியசக்கூ²னி. பமுதி³தஸ்ஸ பீதி ஜாயதீதி பமோத³பச்சயப³லவபீதிமாஹ. பஞ்சவண்ணா பீதி உப்பஜ்ஜதீதி கு²த்³தி³காதி³பே⁴தே³ன பஞ்சப்பகாரா பீதி உப்பஜ்ஜதி. பீதிமனஸ்ஸாதி தாய பீதியா பீணிதமனஸ்ஸ, பஸ்ஸத்³தி⁴ஆவஹேஹி உளாரேஹி பீதிவேகே³ஹி திந்தசித்தஸ்ஸாதி அத்தோ². விக³தத³ரதோ²தி கிலேஸபரிளாஹானங் தூ³ரீபா⁴வேன வூபஸந்தத³ரதோ².
Satipi ubhayesaṃ kalāpānaṃ paramatthato bhede pacurajanehi pana duviññeyyanānattaṃ khīrodakasammoditaṃ accantametaṃ saṃsaṭṭhaṃ viya hutvā tiṭṭhatīti āha ‘‘khīrodakaṃ viya bhūtā’’ti. Yathā khīrañca udakañca aññamaññaṃ saṃsandati, visuṃ na hoti, ekattaṃ viya upeti, evaṃ sāmaggivasena ekattūpagatacittuppādāti attho. Mettacittaṃ paccupaṭṭhāpetvā olokanaṃ cakkhūni viya cakkhūni nāmāti āha ‘‘upasantehi mettacakkhūhī’’ti. Piyabhāvadīpakāni hi cakkhūni piyacakkhūni. Pamuditassa pīti jāyatīti pamodapaccayabalavapītimāha. Pañcavaṇṇā pīti uppajjatīti khuddikādibhedena pañcappakārā pīti uppajjati. Pītimanassāti tāya pītiyā pīṇitamanassa, passaddhiāvahehi uḷārehi pītivegehi tintacittassāti attho. Vigatadarathoti kilesapariḷāhānaṃ dūrībhāvena vūpasantadaratho.
கேன உத³கேன தா³ரிதோ பப்³ப³தப்பதே³ஸோதி கத்வா ஆஹ ‘‘கந்த³ரோ நாமா’’திஆதி³. உத³கஸ்ஸ யதா²னின்னங் பவத்தியா நதி³னிப்³ப³த்தனபா⁴வேன ‘‘நதி³குஞ்ஜோ’’திபி வுச்சதி. ஸாவட்டா நதி³யோ பத³ரா. அட்ட² மாஸேதி ஹேமந்தகி³ம்ஹஉதுவஸேன அட்ட² மாஸே. கு²த்³த³கா உத³கவாஹினியோ ஸாகா² வியாதி ஸாகா². கு²த்³த³கஸொப்³பா⁴ குஸுப்³பா⁴ ஓகாரஸ்ஸ உகாரங் கத்வா. யத்த² உபரி உன்னதப்பதே³ஸதோ உத³கங் ஆக³ந்த்வா திட்ட²தி சேவ ஸந்த³தி ச, தே குஸுப்³பா⁴ கு²த்³த³கஆவாடா. கு²த்³த³கனதி³யோதி பப்³ப³தபாதா³தி³தோ நிக்க²ந்தா கு²த்³த³கா நதி³யோ.
Kena udakena dārito pabbatappadesoti katvā āha ‘‘kandaro nāmā’’tiādi. Udakassa yathāninnaṃ pavattiyā nadinibbattanabhāvena ‘‘nadikuñjo’’tipi vuccati. Sāvaṭṭā nadiyo padarā. Aṭṭha māseti hemantagimhautuvasena aṭṭha māse. Khuddakā udakavāhiniyo sākhā viyāti sākhā. Khuddakasobbhā kusubbhā okārassa ukāraṃ katvā. Yattha upari unnatappadesato udakaṃ āgantvā tiṭṭhati ceva sandati ca, te kusubbhā khuddakaāvāṭā. Khuddakanadiyoti pabbatapādādito nikkhantā khuddakā nadiyo.
பரிஸாஸுத்தவண்ணனா நிட்டி²தா.
Parisāsuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 4. பரிஸாஸுத்தங் • 4. Parisāsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 4. பரிஸாஸுத்தவண்ணனா • 4. Parisāsuttavaṇṇanā
