| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
4. පරිසාසුත්‌තවණ්‌ණනා
4. Parisāsuttavaṇṇanā
96. චතුත්‌ථෙ න බාහුලිකා හොන්‌තීති පච්‌චයබාහුල්‌ලිකා න හොන්‌ති. න සාථලිකාති තිස්‌සො සික්‌ඛා සිථිලං කත්‌වා න ගණ්‌හන්‌ති. ඔක්‌කමනෙ නික්‌ඛිත්‌තධුරාති ඔක්‌කමනං වුච්‌චති අවගමනට්‌ඨෙන පඤ්‌ච නීවරණානි, තෙසු නික්‌ඛිත්‌තධුරා. පවිවෙකෙ පුබ්‌බඞ්‌ගමාති කායචිත්‌තඋපධිවිවෙකසඞ්‌ඛාතෙ තිවිධෙපි විවෙකෙ පුබ්‌බඞ්‌ගමා. වීරියං ආරභන්‌තීති දුවිධම්‌පි වීරියං පග්‌ගණ්‌හන්‌ති. අප්‌පත්‌තස්‌සාති ඣානවිපස්‌සනාමග්‌ගඵලසඞ්‌ඛාතස්‌ස අප්‌පත්‌තවිසෙසස්‌ස. සෙසපදද්‌වයෙපි එසෙව නයො. පච්‌ඡිමා ජනතාති සද්‌ධිවිහාරිකඅන්‌තෙවාසිකාදයො. දිට්‌ඨානුගතිං ආපජ්‌ජතීති ආචරියුපජ්‌ඣායෙහි කතං අනුකරොති. යං තාය ජනතාය ආචරියුපජ්‌ඣායෙසු දිට්‌ඨං, තස්‌ස අනුගතිං ආපජ්‌ජති නාම. අයං වුච්‌චති, භික්‌ඛවෙ, අග්‌ගවතී පරිසාති, භික්‌ඛවෙ, අයං පරිසා අග්‌ගපුග්‌ගලවතී නාම වුච්‌චති.
96. Catutthe na bāhulikā hontīti paccayabāhullikā na honti. Na sāthalikāti tisso sikkhā sithilaṃ katvā na gaṇhanti. Okkamane nikkhittadhurāti okkamanaṃ vuccati avagamanaṭṭhena pañca nīvaraṇāni, tesu nikkhittadhurā. Paviveke pubbaṅgamāti kāyacittaupadhivivekasaṅkhāte tividhepi viveke pubbaṅgamā. Vīriyaṃ ārabhantīti duvidhampi vīriyaṃ paggaṇhanti. Appattassāti jhānavipassanāmaggaphalasaṅkhātassa appattavisesassa. Sesapadadvayepi eseva nayo. Pacchimājanatāti saddhivihārikaantevāsikādayo. Diṭṭhānugatiṃ āpajjatīti ācariyupajjhāyehi kataṃ anukaroti. Yaṃ tāya janatāya ācariyupajjhāyesu diṭṭhaṃ, tassa anugatiṃ āpajjati nāma. Ayaṃ vuccati, bhikkhave, aggavatī parisāti, bhikkhave, ayaṃ parisā aggapuggalavatī nāma vuccati.
භණ්‌ඩනජාතාති ජාතභණ්‌ඩනා. කලහජාතාති ජාතකලහා. භණ්‌ඩනන්‌ති චෙත්‌ථ කලහස්‌ස පුබ්‌බභාගො, හත්‌ථපරාමාසාදිවසෙන වීතික්‌කමො කලහො නාම. විවාදාපන්‌නාති විරුද්‌ධවාදං ආපන්‌නා. මුඛසත්‌තීහීති ගුණවිජ්‌ඣනට්‌ඨෙන ඵරුසා වාචා ‘‘මුඛසත්‌තියො’’ති වුච්‌චන්‌ති, තාහි මුඛසත්‌තීහි. විතුදන්‌තා විහරන්‌තීති විජ්‌ඣන්‌තා විචරන්‌ති.
Bhaṇḍanajātāti jātabhaṇḍanā. Kalahajātāti jātakalahā. Bhaṇḍananti cettha kalahassa pubbabhāgo, hatthaparāmāsādivasena vītikkamo kalaho nāma. Vivādāpannāti viruddhavādaṃ āpannā. Mukhasattīhīti guṇavijjhanaṭṭhena pharusā vācā ‘‘mukhasattiyo’’ti vuccanti, tāhi mukhasattīhi. Vitudantā viharantīti vijjhantā vicaranti.
සමග්‌ගාති සහිතා. සම්‌මොදමානාති සමප්‌පවත්‌තමොදා. ඛීරොදකීභූතාති ඛීරොදකං විය භූතා. පියචක්‌ඛූහීති උපසන්‌තෙහි මෙත්‌තචක්‌ඛූහි. පීති ජායතීති පඤ්‌චවණ්‌ණා පීති උප්‌පජ්‌ජති. කායො පස්‌සම්‌භතීති නාමකායොපි රූපකායොපි විගතදරථො හොති. පස්‌සද්‌ධකායොති අසාරද්‌ධකායො. සුඛං වෙදියතීති කායිකචෙතසිකසුඛං වෙදියති. සමාධියතීති ආරම්‌මණෙ සම්‌මා ඨපීයති.
Samaggāti sahitā. Sammodamānāti samappavattamodā. Khīrodakībhūtāti khīrodakaṃ viya bhūtā. Piyacakkhūhīti upasantehi mettacakkhūhi. Pīti jāyatīti pañcavaṇṇā pīti uppajjati. Kāyo passambhatīti nāmakāyopi rūpakāyopi vigatadaratho hoti. Passaddhakāyoti asāraddhakāyo. Sukhaṃ vediyatīti kāyikacetasikasukhaṃ vediyati. Samādhiyatīti ārammaṇe sammā ṭhapīyati.
ථුල්‌ලඵුසිතකෙති මහාඵුසිතකෙ. පබ්‌බතකන්‌දරපදරසාඛාති එත්‌ථ කන්‌දරො නාම ‘‘ක’’න්‌ති ලද්‌ධනාමෙන උදකෙන දාරිතො උදකභින්‌නො පබ්‌බතප්‌පදෙසො, යො ‘‘නිතම්‌භො’’තිපි ‘‘නදිකුඤ්‌ජො’’තිපි වුච්‌චති. පදරං නාම අට්‌ඨ මාසෙ දෙවෙ අවස්‌සන්‌තෙ ඵලිතො භූමිප්‌පදෙසො. සාඛාති කුසොබ්‌භගාමිනියො ඛුද්‌දකමාතිකායො. කුසොබ්‌භාති ඛුද්‌දකආවාටා. මහාසොබ්‌භාති මහාආවාටා. කුන්‌නදියොති ඛුද්‌දකනදියො. මහානදියොති ගඞ්‌ගායමුනාදිකා මහාසරිතා.
Thullaphusitaketi mahāphusitake. Pabbatakandarapadarasākhāti ettha kandaro nāma ‘‘ka’’nti laddhanāmena udakena dārito udakabhinno pabbatappadeso, yo ‘‘nitambho’’tipi ‘‘nadikuñjo’’tipi vuccati. Padaraṃ nāma aṭṭha māse deve avassante phalito bhūmippadeso. Sākhāti kusobbhagāminiyo khuddakamātikāyo. Kusobbhāti khuddakaāvāṭā. Mahāsobbhāti mahāāvāṭā. Kunnadiyoti khuddakanadiyo. Mahānadiyoti gaṅgāyamunādikā mahāsaritā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 4. පරිසාසුත්‌තං • 4. Parisāsuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 4. පරිසාසුත්‌තවණ්‌ණනා • 4. Parisāsuttavaṇṇanā
