| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
5. பரிஸவக்³க³வண்ணனா
5. Parisavaggavaṇṇanā
43. பஞ்சமஸ்ஸ பட²மே உத்தானாதி பாகடா அப்படிச்ச²ன்னா. க³ம்பீ⁴ராதி கு³ள்ஹா படிச்ச²ன்னா. உத்³த⁴தாதி உத்³த⁴ச்சேன ஸமன்னாக³தா. உன்னளாதி உக்³க³தனளா, உட்டி²ததுச்ச²மானாதி வுத்தங் ஹோதி. சபலாதி பத்தசீவரமண்ட³னாதி³னா சாபல்லேன யுத்தா. முக²ராதி முக²க²ரா க²ரவசனா. விகிண்ணவாசாதி அஸங்யதவசனா தி³வஸம்பி நிரத்த²கவசனபலாபினோ. முட்ட²ஸ்ஸதீதி விஸ்ஸட்ட²ஸதினோ. அஸம்பஜானாதி நிப்பஞ்ஞா. அஸமாஹிதாதி சித்தேகக்³க³தாமத்தஸ்ஸாபி அலாபி⁴னோ. பாகதிந்த்³ரியாதி பகதியா டி²தேஹி விவடேஹி அரக்கி²தேஹி இந்த்³ரியேஹி ஸமன்னாக³தா. ஸுக்கபக்கோ² வுத்தவிபல்லாஸேன வேதி³தப்³போ³.
43. Pañcamassa paṭhame uttānāti pākaṭā appaṭicchannā. Gambhīrāti guḷhā paṭicchannā. Uddhatāti uddhaccena samannāgatā. Unnaḷāti uggatanaḷā, uṭṭhitatucchamānāti vuttaṃ hoti. Capalāti pattacīvaramaṇḍanādinā cāpallena yuttā. Mukharāti mukhakharā kharavacanā. Vikiṇṇavācāti asaṃyatavacanā divasampi niratthakavacanapalāpino. Muṭṭhassatīti vissaṭṭhasatino. Asampajānāti nippaññā. Asamāhitāti cittekaggatāmattassāpi alābhino. Pākatindriyāti pakatiyā ṭhitehi vivaṭehi arakkhitehi indriyehi samannāgatā. Sukkapakkho vuttavipallāsena veditabbo.
44. து³தியே ப⁴ண்ட³னஜாதாதி ப⁴ண்ட³னங் வுச்சதி கலஹஸ்ஸ புப்³ப³பா⁴கோ³, தங் தேஸங் ஜாதந்தி ப⁴ண்ட³னஜாதா. ததா² ‘‘மயங் தும்ஹே த³ண்டா³பெஸ்ஸாம ப³ந்தா⁴பெஸ்ஸாமா’’திஆதி³வசனப்பவத்தியா ஸஞ்ஜாதகலஹா. அயங் தாவ கி³ஹீஸு நயோ. பப்³ப³ஜிதா பன ஆபத்திவீதிக்கமவாசங் வத³ந்தா கலஹஜாதா நாம. விவாதா³பன்னாதி விருத்³த⁴வாத³ங் ஆபன்னா. முக²ஸத்தீஹி விதுத³ந்தாதி கு³ணானங் சி²ந்த³னட்டே²ன து³ப்³பா⁴ஸிதா வாசா முக²ஸத்தியோதி வுச்சந்தி, தாஹி விதுத³ந்தா விஜ்ஜ²ந்தா. ஸமக்³கா³தி ஏககம்மங் ஏகுத்³தே³ஸோ ஸமஸிக்க²தாதி ஏதேஸங் கரணேன ஸமக்³க³தாய ஸஹிதா. பியசக்கூ²ஹீதி மெத்தாசக்கூ²ஹி.
44. Dutiye bhaṇḍanajātāti bhaṇḍanaṃ vuccati kalahassa pubbabhāgo, taṃ tesaṃ jātanti bhaṇḍanajātā. Tathā ‘‘mayaṃ tumhe daṇḍāpessāma bandhāpessāmā’’tiādivacanappavattiyā sañjātakalahā. Ayaṃ tāva gihīsu nayo. Pabbajitā pana āpattivītikkamavācaṃ vadantā kalahajātā nāma. Vivādāpannāti viruddhavādaṃ āpannā. Mukhasattīhi vitudantāti guṇānaṃ chindanaṭṭhena dubbhāsitā vācā mukhasattiyoti vuccanti, tāhi vitudantā vijjhantā. Samaggāti ekakammaṃ ekuddeso samasikkhatāti etesaṃ karaṇena samaggatāya sahitā. Piyacakkhūhīti mettācakkhūhi.
45. ததியே அக்³க³வதீதி உத்தமபுக்³க³லவதீ, அக்³கா³ய வா உத்தமாய படிபத்தியா ஸமன்னாக³தா. ததோ விபரீதா அனக்³க³வதீ. பா³ஹுலிகாதி சீவராதி³பா³ஹுல்லாய படிபன்னா. ஸாஸனங் ஸிதி²லங் க³ண்ஹந்தீதி ஸாத²லிகா. ஓக்கமனே புப்³ப³ங்க³மாதி எத்த² ஓக்கமனங் வுச்சதி அவக³மனட்டே²ன பஞ்ச நீவரணானி, தேன பஞ்சனீவரணபூரணே புப்³ப³ங்க³மாதி வுத்தங் ஹோதி. பவிவேகேதி உபதி⁴விவேகே நிப்³பா³னே. நிக்கி²த்தது⁴ராதி திவிதே⁴பி விவேகே ஓரோபிதது⁴ரா. ந வீரியங் ஆரப⁴ந்தீதி து³வித⁴ம்பி வீரியங் ந கரொந்தி. அப்பத்தஸ்ஸ பத்தியாதி புப்³பே³ அப்பத்தஸ்ஸ ஜா²னவிபஸ்ஸனாமக்³க³ப²லவிஸேஸஸ்ஸ பத்திஅத்தா²ய. இதரங் பத³த்³வயங் தஸ்ஸேவ வேவசனங். பச்சி²மா ஜனதாதி ஸத்³தி⁴விஹாரிகஅந்தேவாஸிகஜனோ . தி³ட்டா²னுக³திங் ஆபஜ்ஜதீதி ஆசரியுபஜ்ஜா²யேஹி கதங் அனுகரொந்தோ தி³ட்ட²ஸ்ஸ தேஸங் ஆசாரஸ்ஸ அனுக³திங் ஆபஜ்ஜதி நாம. ஸேஸங் வுத்தபடிபக்க²னயேன வேதி³தப்³ப³ங்.
45. Tatiye aggavatīti uttamapuggalavatī, aggāya vā uttamāya paṭipattiyā samannāgatā. Tato viparītā anaggavatī. Bāhulikāti cīvarādibāhullāya paṭipannā. Sāsanaṃ sithilaṃ gaṇhantīti sāthalikā. Okkamane pubbaṅgamāti ettha okkamanaṃ vuccati avagamanaṭṭhena pañca nīvaraṇāni, tena pañcanīvaraṇapūraṇe pubbaṅgamāti vuttaṃ hoti. Paviveketi upadhiviveke nibbāne. Nikkhittadhurāti tividhepi viveke oropitadhurā. Na vīriyaṃ ārabhantīti duvidhampi vīriyaṃ na karonti. Appattassa pattiyāti pubbe appattassa jhānavipassanāmaggaphalavisesassa pattiatthāya. Itaraṃ padadvayaṃ tasseva vevacanaṃ. Pacchimā janatāti saddhivihārikaantevāsikajano . Diṭṭhānugatiṃ āpajjatīti ācariyupajjhāyehi kataṃ anukaronto diṭṭhassa tesaṃ ācārassa anugatiṃ āpajjati nāma. Sesaṃ vuttapaṭipakkhanayena veditabbaṃ.
46. சதுத்தே² அரியாதி அரியஸாவகபரிஸா. அனரியாதி புது²ஜ்ஜனபரிஸா. ‘‘இத³ங் து³க்க²’’ந்தி யதா²பூ⁴தங் நப்பஜானந்தீதி ட²பெத்வா தண்ஹங் தேபூ⁴மகா பஞ்சக்க²ந்தா⁴ து³க்க²ஸச்சங் நாம, எத்தகமேவ து³க்க²ங், இதோ உத்³த⁴ங் து³க்க²ங் நத்தீ²தி யதா²ஸபா⁴வதோ நப்பஜானந்தி. ஏஸ நயோ ஸப்³ப³த்த². ஸேஸபதே³ஸு பன தஸ்ஸ து³க்க²ஸ்ஸ ஸமுட்டா²பிகா புரிமதண்ஹா ஸமுத³யோ நாம, தஸ்ஸாயேவ தண்ஹாய, த்³வின்னம்பி வா தேஸங் ஸச்சானங் அச்சந்தக்க²யோ அஸமுப்பத்தி து³க்க²னிரோதோ⁴ நாம, அட்ட²ங்கி³கோ அரியமக்³கோ³ து³க்க²னிரோத⁴கா³மினீ படிபதா³ நாமாதி ஏவங் இமஸ்மிங் ஸுத்தே சதூஹி ஸச்சேஹி சத்தாரோ மக்³கா³ ச சத்தாரி ச ப²லானி கதி²தானி.
46. Catutthe ariyāti ariyasāvakaparisā. Anariyāti puthujjanaparisā. ‘‘Idaṃ dukkha’’nti yathābhūtaṃ nappajānantīti ṭhapetvā taṇhaṃ tebhūmakā pañcakkhandhā dukkhasaccaṃ nāma, ettakameva dukkhaṃ, ito uddhaṃ dukkhaṃ natthīti yathāsabhāvato nappajānanti. Esa nayo sabbattha. Sesapadesu pana tassa dukkhassa samuṭṭhāpikā purimataṇhā samudayo nāma, tassāyeva taṇhāya, dvinnampi vā tesaṃ saccānaṃ accantakkhayo asamuppatti dukkhanirodho nāma, aṭṭhaṅgiko ariyamaggo dukkhanirodhagāminī paṭipadā nāmāti evaṃ imasmiṃ sutte catūhi saccehi cattāro maggā ca cattāri ca phalāni kathitāni.
47. பஞ்சமே பரிஸாகஸடோதி கஸடபரிஸா கசவரபரிஸா பலாபபரிஸாதி அத்தோ². பரிஸாமண்டோ³தி பஸன்னபரிஸா ஸாரபரிஸாதி அத்தோ². ச²ந்தா³க³திங் க³ச்ச²ந்தீதி ச²ந்தே³ன அக³திங் க³ச்ச²ந்தி, அகத்தப்³ப³ங் கரொந்தீதி அத்தோ². ஸேஸபதே³ஸுபி ஏஸேவ நயோ. இமானி பன சத்தாரி அக³திக³மனானி ப⁴ண்ட³பா⁴ஜனீயே ச வினிச்ச²யட்டா²னே ச லப்³ப⁴ந்தி. தத்த² ப⁴ண்ட³பா⁴ஜனீயே தாவ அத்தனோ பா⁴ரபூ⁴தானங் பி⁴க்கூ²னங் அமனாபே ப⁴ண்ட³கே பத்தே தங் பரிவத்தெத்வா மனாபங் தெ³ந்தோ ச²ந்தா³க³திங் க³ச்ச²தி நாம. அத்தனோ பன அபா⁴ரபூ⁴தானங் மனாபே ப⁴ண்ட³கே பத்தே தங் பரிவத்தெத்வா அமனாபங் தெ³ந்தோ தோ³ஸாக³திங் க³ச்ச²தி நாம. ப⁴ண்ட³கபா⁴ஜனீயவத்து²ஞ்ச டி²திகஞ்ச அஜானந்தோ மோஹாக³திங் க³ச்ச²தி நாம. முக²ரானங் வா ராஜாதி³னிஸ்ஸிதானங் வா ‘‘இமே மே அமனாபே ப⁴ண்ட³கே தி³ன்னே அனத்த²ம்பி கரெய்யு’’ந்தி ப⁴யேன பரிவத்தெத்வா மனாபங் தெ³ந்தோ ப⁴யாக³திங் க³ச்ச²தி நாம. யோ பன ஏவங் ந க³ச்ச²தி, ஸப்³பே³ஸங் துலாபூ⁴தோ பமாணபூ⁴தோ மஜ்ஜ²த்தோ ஹுத்வா யங் யஸ்ஸ பாபுணாதி, தஞ்ஞேவ தஸ்ஸ தே³தி, அயங் சதுப்³பி³த⁴ம்பி அக³திக³மனங் ந க³ச்ச²தி நாம. வினிச்ச²யட்டா²னே பன அத்தனோ பா⁴ரபூ⁴தஸ்ஸ க³ருகாபத்திங் லஹுகாபத்தீதி கத்வா கதெ²ந்தோ ச²ந்தா³க³திங் க³ச்ச²தி நாம. இதரஸ்ஸ லஹுகாபத்திங் க³ருகாபத்தீதி கத்வா கதெ²ந்தோ தோ³ஸாக³திங் க³ச்ச²தி நாம. ஆபத்திவுட்டா²னங் பன ஸமுச்சயக்க²ந்த⁴கஞ்ச அஜானந்தோ மோஹாக³திங் க³ச்ச²தி நாம. முக²ரஸ்ஸ வா ராஜபூஜிதஸ்ஸ வா ‘‘அயங் மே க³ருகங் கத்வா ஆபத்திங் கதெ²ந்தஸ்ஸ அனத்த²ம்பி கரெய்யா’’தி க³ருகமேவ லஹுகாதி கத்வா கதெ²ந்தோ ப⁴யாக³திங் க³ச்ச²தி நாம. யோ பன ஸப்³பே³ஸங் யதா²பூ⁴தமேவ கதே²தி, அயங் சதுப்³பி³த⁴ம்பி அக³திக³மனங் ந க³ச்ச²தி நாம.
47. Pañcame parisākasaṭoti kasaṭaparisā kacavaraparisā palāpaparisāti attho. Parisāmaṇḍoti pasannaparisā sāraparisāti attho. Chandāgatiṃ gacchantīti chandena agatiṃ gacchanti, akattabbaṃ karontīti attho. Sesapadesupi eseva nayo. Imāni pana cattāri agatigamanāni bhaṇḍabhājanīye ca vinicchayaṭṭhāne ca labbhanti. Tattha bhaṇḍabhājanīye tāva attano bhārabhūtānaṃ bhikkhūnaṃ amanāpe bhaṇḍake patte taṃ parivattetvā manāpaṃ dento chandāgatiṃ gacchati nāma. Attano pana abhārabhūtānaṃ manāpe bhaṇḍake patte taṃ parivattetvā amanāpaṃ dento dosāgatiṃ gacchati nāma. Bhaṇḍakabhājanīyavatthuñca ṭhitikañca ajānanto mohāgatiṃgacchati nāma. Mukharānaṃ vā rājādinissitānaṃ vā ‘‘ime me amanāpe bhaṇḍake dinne anatthampi kareyyu’’nti bhayena parivattetvā manāpaṃ dento bhayāgatiṃ gacchati nāma. Yo pana evaṃ na gacchati, sabbesaṃ tulābhūto pamāṇabhūto majjhatto hutvā yaṃ yassa pāpuṇāti, taññeva tassa deti, ayaṃ catubbidhampi agatigamanaṃ na gacchati nāma. Vinicchayaṭṭhāne pana attano bhārabhūtassa garukāpattiṃ lahukāpattīti katvā kathento chandāgatiṃ gacchati nāma. Itarassa lahukāpattiṃ garukāpattīti katvā kathento dosāgatiṃ gacchati nāma. Āpattivuṭṭhānaṃ pana samuccayakkhandhakañca ajānanto mohāgatiṃ gacchati nāma. Mukharassa vā rājapūjitassa vā ‘‘ayaṃ me garukaṃ katvā āpattiṃ kathentassa anatthampi kareyyā’’ti garukameva lahukāti katvā kathento bhayāgatiṃ gacchati nāma. Yo pana sabbesaṃ yathābhūtameva katheti, ayaṃ catubbidhampi agatigamanaṃ na gacchati nāma.
48. ச²ட்டே² ஓக்காசிதவினீதாதி து³ப்³பி³னீதா. நோ படிபுச்சா²வினீதாதி ந புச்சி²த்வா வினீதா. க³ம்பீ⁴ராதி பாளிவஸேன க³ம்பீ⁴ரா ஸல்லஸுத்தஸதி³ஸா. க³ம்பீ⁴ரத்தா²தி அத்த²வஸேன க³ம்பீ⁴ரா மஹாவேத³ல்லஸுத்தஸதி³ஸா. லோகுத்தராதி லோகுத்தரஅத்த²தீ³பகா . ஸுஞ்ஞதாபடிஸங்யுத்தாதி ஸத்தஸுஞ்ஞங் த⁴ம்மமத்தமேவ பகாஸகா அஸங்க²தஸங்யுத்தஸதி³ஸா. ந அஞ்ஞா சித்தங் உபட்ட²பெந்தீதி விஜானநத்தா²ய சித்தங் ந உபட்ட²பெந்தி, நித்³தா³யந்தி வா அஞ்ஞவிஹிதா வா ஹொந்தி. உக்³க³ஹேதப்³ப³ங் பரியாபுணிதப்³ப³ந்தி உக்³க³ஹேதப்³பே³ ச பரியாபுணிதப்³பே³ ச. கவிதாதி கவீஹி கதா. இதரங் தஸ்ஸேவ வேவசனங். சித்தக்க²ராதி விசித்ரஅக்க²ரா. இதரங் தஸ்ஸேவ வேவசனங். பா³ஹிரகாதி ஸாஸனதோ ப³ஹிபூ⁴தா. ஸாவகபா⁴ஸிதாதி தேஸங் தேஸங் ஸாவகேஹி பா⁴ஸிதா. ஸுஸ்ஸூஸந்தீதி அக்க²ரசித்ததாய சேவ ஸரஸம்பத்தியா ச அத்தமனா ஹுத்வா ஸுணந்தி. ந சேவ அஞ்ஞமஞ்ஞங் படிபுச்ச²ந்தீதி அஞ்ஞமஞ்ஞங் அத்த²ங் வா அனுஸந்தி⁴ங் வா புப்³பா³பரங் வா ந புச்ச²ந்தி. ந ச படிவிசரந்தீதி புச்ச²னத்தா²ய சாரிகங் ந விசரந்தி. இத³ங் கத²ந்தி இத³ங் ப்³யஞ்ஜனங் கத²ங் ரோபேதப்³ப³ங் கிந்தி ரோபேதப்³ப³ங்? இமஸ்ஸ கோ அத்தோ²தி இமஸ்ஸ பா⁴ஸிதஸ்ஸ கோ அத்தோ², கா அனுஸந்தி⁴, கிங் புப்³பா³பரங்? அவிவடந்தி படிச்ச²ன்னங். ந விவரந்தீதி ந உக்³கா⁴டெந்தி. அனுத்தானீகதந்தி அபாகடங் கதங். ந உத்தானிங் கரொந்தீதி பாகடங் ந கரொந்தி. கங்கா²டா²னியேஸூதி கங்கா²ய காரணபூ⁴தேஸு. ஸுக்கபக்கோ² வுத்தவிபல்லாஸேன வேதி³தப்³போ³.
48. Chaṭṭhe okkācitavinītāti dubbinītā. No paṭipucchāvinītāti na pucchitvā vinītā. Gambhīrāti pāḷivasena gambhīrā sallasuttasadisā. Gambhīratthāti atthavasena gambhīrā mahāvedallasuttasadisā. Lokuttarāti lokuttaraatthadīpakā . Suññatāpaṭisaṃyuttāti sattasuññaṃ dhammamattameva pakāsakā asaṅkhatasaṃyuttasadisā. Na aññā cittaṃ upaṭṭhapentīti vijānanatthāya cittaṃ na upaṭṭhapenti, niddāyanti vā aññavihitā vā honti. Uggahetabbaṃ pariyāpuṇitabbanti uggahetabbe ca pariyāpuṇitabbe ca. Kavitāti kavīhi katā. Itaraṃ tasseva vevacanaṃ. Cittakkharāti vicitraakkharā. Itaraṃ tasseva vevacanaṃ. Bāhirakāti sāsanato bahibhūtā. Sāvakabhāsitāti tesaṃ tesaṃ sāvakehi bhāsitā. Sussūsantīti akkharacittatāya ceva sarasampattiyā ca attamanā hutvā suṇanti. Na ceva aññamaññaṃ paṭipucchantīti aññamaññaṃ atthaṃ vā anusandhiṃ vā pubbāparaṃ vā na pucchanti. Na ca paṭivicarantīti pucchanatthāya cārikaṃ na vicaranti. Idaṃ kathanti idaṃ byañjanaṃ kathaṃ ropetabbaṃ kinti ropetabbaṃ? Imassa ko atthoti imassa bhāsitassa ko attho, kā anusandhi, kiṃ pubbāparaṃ? Avivaṭanti paṭicchannaṃ. Na vivarantīti na ugghāṭenti. Anuttānīkatanti apākaṭaṃ kataṃ. Na uttāniṃ karontīti pākaṭaṃ na karonti. Kaṅkhāṭhāniyesūti kaṅkhāya kāraṇabhūtesu. Sukkapakkho vuttavipallāsena veditabbo.
49. ஸத்தமே ஆமிஸக³ரூதி சதுபச்சயக³ருகா லோகுத்தரத⁴ம்மங் லாமகதோ க³ஹெத்வா டி²தபரிஸா. ஸத்³த⁴ம்மக³ரூதி நவ லோகுத்தரத⁴ம்மே க³ருகே கத்வா சத்தாரோ பச்சயே லாமகதோ க³ஹெத்வா டி²தபரிஸா. உப⁴தோபா⁴க³விமுத்தோதி த்³வீஹி பா⁴கே³ஹி விமுத்தோ. பஞ்ஞாவிமுத்தோதி பஞ்ஞாய விமுத்தோ ஸுக்க²விபஸ்ஸககீ²ணாஸவோ. காயஸக்கீ²தி காயேன ஜா²னப²ஸ்ஸங் பு²ஸித்வா பச்சா² நிரோத⁴ங் நிப்³பா³னங் ஸச்சி²கத்வா டி²தோ. தி³ட்டி²ப்பத்தோதி தி³ட்ட²ந்தங் பத்தோ. இமே த்³வேபி ச²ஸு டா²னேஸு லப்³ப⁴ந்தி. ஸத்³தா⁴விமுத்தோதி ஸத்³த³ஹந்தோ விமுத்தோ. அயம்பி ச²ஸு டா²னேஸு லப்³ப⁴தி. த⁴ம்மங் அனுஸ்ஸரதீதி த⁴ம்மானுஸாரீ. ஸத்³த⁴ங் அனுஸ்ஸரதீதி ஸத்³தா⁴னுஸாரீ. இமே த்³வேபி பட²மமக்³க³ஸமங்கி³னோ. கல்யாணத⁴ம்மோதி ஸுந்த³ரத⁴ம்மோ. து³ஸ்ஸீலோ பாபத⁴ம்மோதி நிஸ்ஸீலோ லாமகத⁴ம்மோ. இமங் கஸ்மா க³ண்ஹந்தி? ஸப்³பே³ஸு ஹி ஏகஸதி³ஸேஸு ஜாதேஸு ஸீலவந்தேஸு ப³லவகா³ரவங் ந ஹோதி, ஏகச்சேஸு பன து³ஸ்ஸீலேஸு ஸதி ஸீலவந்தானங் உபரி ப³லவகா³ரவங் ஹோதீதி மஞ்ஞந்தா க³ண்ஹந்தி. தே தேன லாப⁴ங் லப⁴ந்தீதி தே பி⁴க்கூ² ஏகச்சானங் வண்ணங் ஏகச்சானங் அவண்ணங் கதெ²த்வா சத்தாரோ பச்சயே லப⁴ந்தி. க³தி²தாதி தண்ஹாய க³ந்தி²தா. முச்சி²தாதி தண்ஹாவஸேனேவ முச்சி²தா. அஜ்ஜோ²பன்னாதி அஜ்ஜோ²ஸாய கி³லித்வா பரினிட்ட²பெத்வா டி²தா. அனாதீ³னவத³ஸ்ஸாவினோதி அபச்சவெக்கி²தபரிபோ⁴கே³ ஆதீ³னவங் அபஸ்ஸந்தா. அனிஸ்ஸரணபஞ்ஞாதி சதூஸு பச்சயேஸு ச²ந்த³ராக³அபகட்³ட⁴னாய நிஸ்ஸரணபஞ்ஞாய விரஹிதா இத³மத்த²ங் ஏதந்தி அஜானந்தா. பரிபு⁴ஞ்ஜந்தீதி ஸச்ச²ந்த³ராகா³ ஹுத்வா பரிபு⁴ஞ்ஜந்தி.
49. Sattame āmisagarūti catupaccayagarukā lokuttaradhammaṃ lāmakato gahetvā ṭhitaparisā. Saddhammagarūti nava lokuttaradhamme garuke katvā cattāro paccaye lāmakato gahetvā ṭhitaparisā. Ubhatobhāgavimuttoti dvīhi bhāgehi vimutto. Paññāvimuttoti paññāya vimutto sukkhavipassakakhīṇāsavo. Kāyasakkhīti kāyena jhānaphassaṃ phusitvā pacchā nirodhaṃ nibbānaṃ sacchikatvā ṭhito. Diṭṭhippattoti diṭṭhantaṃ patto. Ime dvepi chasu ṭhānesu labbhanti. Saddhāvimuttoti saddahanto vimutto. Ayampi chasu ṭhānesu labbhati. Dhammaṃ anussaratīti dhammānusārī. Saddhaṃ anussaratīti saddhānusārī. Ime dvepi paṭhamamaggasamaṅgino. Kalyāṇadhammoti sundaradhammo. Dussīlo pāpadhammoti nissīlo lāmakadhammo. Imaṃ kasmā gaṇhanti? Sabbesu hi ekasadisesu jātesu sīlavantesu balavagāravaṃ na hoti, ekaccesu pana dussīlesu sati sīlavantānaṃ upari balavagāravaṃ hotīti maññantā gaṇhanti. Te tena lābhaṃ labhantīti te bhikkhū ekaccānaṃ vaṇṇaṃ ekaccānaṃ avaṇṇaṃ kathetvā cattāro paccaye labhanti. Gathitāti taṇhāya ganthitā. Mucchitāti taṇhāvaseneva mucchitā. Ajjhopannāti ajjhosāya gilitvā pariniṭṭhapetvā ṭhitā. Anādīnavadassāvinoti apaccavekkhitaparibhoge ādīnavaṃ apassantā. Anissaraṇapaññāti catūsu paccayesu chandarāgaapakaḍḍhanāya nissaraṇapaññāya virahitā idamatthaṃ etanti ajānantā. Paribhuñjantīti sacchandarāgā hutvā paribhuñjanti.
ஸுக்கபக்கே² உப⁴தோபா⁴க³விமுத்தோதிஆதீ³ஸு அயங் ஸத்தன்னம்பி அரியபுக்³க³லானங் ஸங்கே²பபகாஸனா – ஏகோ பி⁴க்கு² பஞ்ஞாது⁴ரேன அபி⁴னிவிட்டோ² அட்ட² ஸமாபத்தியோ நிப்³ப³த்தெத்வா ஸோதாபத்திமக்³க³ங் பாபுணாதி. ஸோ தஸ்மிங் க²ணே த⁴ம்மானுஸாரீ நாம ஹோதி, ஸோதாபத்திப²லாதீ³ஸு ச²ஸு டா²னேஸு காயஸக்கி² நாம, அரஹத்தப²லக்க²ணே உப⁴தோபா⁴க³விமுத்தோ நாம. ஸமாபத்தீஹி விக்க²ம்ப⁴னவிமுத்தியா மக்³கே³ன ஸமுச்சே²த³விமுத்தியாதி த்³விக்க²த்துங் வா த்³வீஹி வா பா⁴கே³ஹி விமுத்தோதி அத்தோ². அபரோ பஞ்ஞாது⁴ரேன அபி⁴னிவிட்டோ² ஸமாபத்தியோ நிப்³ப³த்தேதுங் அஸக்கொந்தோ ஸுக்க²விபஸ்ஸகோவ ஹுத்வா ஸோதாபத்திமக்³க³ங் பாபுணாதி. ஸோ தஸ்மிங் க²ணே த⁴ம்மானுஸாரீ நாம ஹோதி, ஸோதாபத்திப²லாதீ³ஸு ச²ஸு டா²னேஸு தி³ட்டி²ப்பத்தோ நாம, அரஹத்தப²லக்க²ணே பஞ்ஞாவிமுத்தோ நாம. அபரோ ஸத்³தா⁴து⁴ரேன அபி⁴னிவிட்டோ² அட்ட² ஸமாபத்தியோ நிப்³ப³த்தெத்வா ஸோதாபத்திமக்³க³ங் பாபுணாதி. ஸோ தஸ்மிங் க²ணே ஸத்³தா⁴னுஸாரீ நாம ஹோதி, ஸோதாபத்திப²லாதீ³ஸு ச²ஸு டா²னேஸு காயஸக்கி² நாம, அரஹத்தப²லக்க²ணே உப⁴தோபா⁴க³விமுத்தோ நாம. அபரோ ஸத்³தா⁴து⁴ரேன அபி⁴னிவிட்டோ² ஸமாபத்தியோ நிப்³ப³த்தேதுங் அஸக்கொந்தோ ஸுக்க²விபஸ்ஸகோவ ஹுத்வா ஸோதாபத்திமக்³க³ங் பாபுணாதி. ஸோ தஸ்மிங் க²ணே ஸத்³தா⁴னுஸாரீ நாம ஹோதி, ஸோதாபத்திப²லாதீ³ஸு ச²ஸு டா²னேஸு ஸத்³தா⁴விமுத்தோ நாம, அரஹத்தப²லக்க²ணே பஞ்ஞாவிமுத்தோ நாம.
Sukkapakkhe ubhatobhāgavimuttotiādīsu ayaṃ sattannampi ariyapuggalānaṃ saṅkhepapakāsanā – eko bhikkhu paññādhurena abhiniviṭṭho aṭṭha samāpattiyo nibbattetvā sotāpattimaggaṃ pāpuṇāti. So tasmiṃ khaṇe dhammānusārī nāma hoti, sotāpattiphalādīsu chasu ṭhānesu kāyasakkhi nāma, arahattaphalakkhaṇe ubhatobhāgavimutto nāma. Samāpattīhi vikkhambhanavimuttiyā maggena samucchedavimuttiyāti dvikkhattuṃ vā dvīhi vā bhāgehi vimuttoti attho. Aparo paññādhurena abhiniviṭṭho samāpattiyo nibbattetuṃ asakkonto sukkhavipassakova hutvā sotāpattimaggaṃ pāpuṇāti. So tasmiṃ khaṇe dhammānusārī nāma hoti, sotāpattiphalādīsu chasu ṭhānesu diṭṭhippatto nāma, arahattaphalakkhaṇe paññāvimutto nāma. Aparo saddhādhurena abhiniviṭṭho aṭṭha samāpattiyo nibbattetvā sotāpattimaggaṃ pāpuṇāti. So tasmiṃ khaṇe saddhānusārī nāma hoti, sotāpattiphalādīsu chasu ṭhānesu kāyasakkhi nāma, arahattaphalakkhaṇe ubhatobhāgavimutto nāma. Aparo saddhādhurena abhiniviṭṭho samāpattiyo nibbattetuṃ asakkonto sukkhavipassakova hutvā sotāpattimaggaṃ pāpuṇāti. So tasmiṃ khaṇe saddhānusārī nāma hoti, sotāpattiphalādīsu chasu ṭhānesu saddhāvimutto nāma, arahattaphalakkhaṇe paññāvimutto nāma.
50. அட்ட²மே விஸமாதி ஸபக்க²லனட்டே²ன விஸமா. ஸமாதி நிபக்க²லனட்டே²ன ஸமா. அத⁴ம்மகம்மானீதி உத்³த⁴ம்மானி கம்மானி. அவினயகம்மானீதி உப்³பி³னயானி கம்மானி.
50. Aṭṭhame visamāti sapakkhalanaṭṭhena visamā. Samāti nipakkhalanaṭṭhena samā. Adhammakammānīti uddhammāni kammāni. Avinayakammānīti ubbinayāni kammāni.
51. நவமே அத⁴ம்மிகாதி நித்³த⁴ம்மா. த⁴ம்மிகாதி த⁴ம்மயுத்தா.
51. Navame adhammikāti niddhammā. Dhammikāti dhammayuttā.
52. த³ஸமே அதி⁴கரணந்தி விவாதா³தி⁴கரணாதி³சதுப்³பி³த⁴ங் அதி⁴கரணங். ஆதி³யந்தீதி க³ண்ஹந்தி. ஸஞ்ஞாபெந்தீதி ஜானாபெந்தி. ந ச ஸஞ்ஞத்திங் உபக³ச்ச²ந்தீதி ஸஞ்ஞாபனத்த²ங் ந ஸன்னிபதந்தி. ந ச நிஜ்ஜா²பெந்தீதி ந பெக்கா²பெந்தி. ந ச நிஜ்ஜ²த்திங் உபக³ச்ச²ந்தீதி அஞ்ஞமஞ்ஞங் நிஜ்ஜா²பனத்தா²ய ந ஸன்னிபதந்தி. அஸஞ்ஞத்திப³லாதி அஸஞ்ஞத்தியேவ ப³லங் ஏதேஸந்தி அஸஞ்ஞத்திப³லா . அப்படினிஸ்ஸக்³க³மந்தினோதி யேஸங் ஹி ஏவங் ஹோதி – ‘‘ஸசே அம்ஹேஹி க³ஹிதங் அதி⁴கரணங் த⁴ம்மிகங் ப⁴விஸ்ஸதி, க³ண்ஹிஸ்ஸாம. ஸசே அத⁴ம்மிகங், விஸ்ஸஜ்ஜெஸ்ஸாமா’’தி, தே படினிஸ்ஸக்³க³மந்தினோ நாம ஹொந்தி. இமே பன ந ததா² மந்தெந்தீதி அப்படினிஸ்ஸக்³க³மந்தினோ. தா²மஸா பராமாஸா அபி⁴னிவிஸ்ஸாதி தி³ட்டி²தா²மேன ச தி³ட்டி²பராமாஸேன ச அபி⁴னிவிஸித்வா. இத³மேவ ஸச்சந்தி இத³ங் அம்ஹாகங் வசனமேவ ஸச்சங். மோக⁴மஞ்ஞந்தி அவஸேஸானங் வசனங் மோக⁴ங் துச்ச²ங். ஸுக்கபக்கோ² உத்தானத்தோ²யேவாதி.
52. Dasame adhikaraṇanti vivādādhikaraṇādicatubbidhaṃ adhikaraṇaṃ. Ādiyantīti gaṇhanti. Saññāpentīti jānāpenti. Na ca saññattiṃ upagacchantīti saññāpanatthaṃ na sannipatanti. Na ca nijjhāpentīti na pekkhāpenti. Na ca nijjhattiṃ upagacchantīti aññamaññaṃ nijjhāpanatthāya na sannipatanti. Asaññattibalāti asaññattiyeva balaṃ etesanti asaññattibalā . Appaṭinissaggamantinoti yesaṃ hi evaṃ hoti – ‘‘sace amhehi gahitaṃ adhikaraṇaṃ dhammikaṃ bhavissati, gaṇhissāma. Sace adhammikaṃ, vissajjessāmā’’ti, te paṭinissaggamantino nāma honti. Ime pana na tathā mantentīti appaṭinissaggamantino. Thāmasā parāmāsā abhinivissāti diṭṭhithāmena ca diṭṭhiparāmāsena ca abhinivisitvā. Idameva saccanti idaṃ amhākaṃ vacanameva saccaṃ. Moghamaññanti avasesānaṃ vacanaṃ moghaṃ tucchaṃ. Sukkapakkho uttānatthoyevāti.
பரிஸவக்³கோ³ பஞ்சமோ.
Parisavaggo pañcamo.
பட²மபண்ணாஸகங் நிட்டி²தங்.
Paṭhamapaṇṇāsakaṃ niṭṭhitaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. பரிஸவக்³கோ³ • 5. Parisavaggo
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 5. பரிஸவக்³க³வண்ணனா • 5. Parisavaggavaṇṇanā
