| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
5. பரிஸவக்³க³வண்ணனா
5. Parisavaggavaṇṇanā
43. பஞ்சமஸ்ஸ பட²மே உத்³த⁴ச்சேன ஸமன்னாக³தாதி அகப்பியே கப்பியஸஞ்ஞிதாய, கப்பியே அகப்பியஸஞ்ஞிதாய, அவஜ்ஜே வஜ்ஜஸஞ்ஞிதாய, வஜ்ஜே அவஜ்ஜஸஞ்ஞிதாய உத்³த⁴ச்சப்பகதிகா. யே ஹி வினயே அபகதஞ்ஞுனோ ஸங்கிலேஸவோதா³னியேஸு த⁴ம்மேஸு ந குஸலா ஸகிஞ்சனகாரினோ விப்படிஸாரப³ஹுலா, தேஸங் அனுப்பன்னஞ்ச உத்³த⁴ச்சங் உப்பஜ்ஜதி, உப்பன்னஞ்ச பி⁴ய்யோபா⁴வங் வேபுல்லங் ஆபஜ்ஜதி. ஸாராபா⁴வேன துச்ச²த்தா நளோ வியாதி நளோ, மானோதி ஆஹ ‘‘உன்னளாதி உக்³க³தனளா’’தி. தேனாஹ ‘‘உட்டி²ததுச்ச²மானா’’தி. மானோ ஹி ஸெய்யஸ்ஸ ஸெய்யோதி ஸதி³ஸோதி ச பவத்தியா விஸேஸதோ துச்சோ². சாபல்லேனாதி சபலபா⁴வேன, தண்ஹாலோலுப்பேனாதி அத்தோ². முக²க²ராதி முகே²ன ப²ருஸா, ப²ருஸவாதி³னோதி அத்தோ².
43. Pañcamassa paṭhame uddhaccena samannāgatāti akappiye kappiyasaññitāya, kappiye akappiyasaññitāya, avajje vajjasaññitāya, vajje avajjasaññitāya uddhaccappakatikā. Ye hi vinaye apakataññuno saṃkilesavodāniyesu dhammesu na kusalā sakiñcanakārino vippaṭisārabahulā, tesaṃ anuppannañca uddhaccaṃ uppajjati, uppannañca bhiyyobhāvaṃ vepullaṃ āpajjati. Sārābhāvena tucchattā naḷo viyāti naḷo, mānoti āha ‘‘unnaḷāti uggatanaḷā’’ti. Tenāha ‘‘uṭṭhitatucchamānā’’ti. Māno hi seyyassa seyyoti sadisoti ca pavattiyā visesato tuccho. Cāpallenāti capalabhāvena, taṇhāloluppenāti attho. Mukhakharāti mukhena pharusā, pharusavādinoti attho.
விகிண்ணவாசாதி விஸ்ஸடவசனா ஸம்ப²ப்பலாபிதாய அபரியந்தவசனா. தேனாஹ ‘‘அஸங்யதவசனா’’திஆதி³. விஸ்ஸட்ட²ஸதினோதி ஸதிவிரஹிதா. பச்சயவேகல்லேன விஜ்ஜமானாயபி ஸதியா ஸதிகிச்சங் காதுங் அஸமத்த²தாய ஏவங் வுத்தா. ந ஸம்பஜானந்தீதி அஸம்பஜானா, தங்யோக³னிவத்தியங் சாயங் அகாரோ ‘‘அஹேதுகா த⁴ம்மா (த⁴॰ ஸ॰ து³கமாதிகா 2), அபி⁴க்கு²கோ ஆவாஸோ’’திஆதீ³ஸு (சூளவ॰ 76) வியாதி ஆஹ ‘‘நிப்பஞ்ஞா’’தி, பஞ்ஞாரஹிதாதி அத்தோ². பாளியங் விப்³ப⁴ந்தசித்தாதி உப்³ப⁴ந்தசித்தா. ஸமாதி⁴விரஹேன லத்³தோ⁴காஸேன உத்³த⁴ச்சேன தேஸங் ஸமாதி⁴விரஹானங் சித்தங் நானாரம்மணேஸு பரிப்³ப⁴மதி வனமக்கடோ விய வனஸாகா²ஸு. பாகதிந்த்³ரியாதி ஸங்வராபா⁴வேன கி³ஹிகாலே விய விவடஇந்த்³ரியா. தேனாஹ ‘‘பகதியா டி²தேஹீ’’திஆதி³. விவடேஹீதி அஸங்வுதேஹி.
Vikiṇṇavācāti vissaṭavacanā samphappalāpitāya apariyantavacanā. Tenāha ‘‘asaṃyatavacanā’’tiādi. Vissaṭṭhasatinoti sativirahitā. Paccayavekallena vijjamānāyapi satiyā satikiccaṃ kātuṃ asamatthatāya evaṃ vuttā. Na sampajānantīti asampajānā, taṃyoganivattiyaṃ cāyaṃ akāro ‘‘ahetukā dhammā (dha. sa. dukamātikā 2), abhikkhuko āvāso’’tiādīsu (cūḷava. 76) viyāti āha ‘‘nippaññā’’ti, paññārahitāti attho. Pāḷiyaṃ vibbhantacittāti ubbhantacittā. Samādhivirahena laddhokāsena uddhaccena tesaṃ samādhivirahānaṃ cittaṃ nānārammaṇesu paribbhamati vanamakkaṭo viya vanasākhāsu. Pākatindriyāti saṃvarābhāvena gihikāle viya vivaṭaindriyā. Tenāha ‘‘pakatiyā ṭhitehī’’tiādi. Vivaṭehīti asaṃvutehi.
44. து³தியே ப⁴ண்ட³னங் வுச்சதி கலஹஸ்ஸ புப்³ப³பா⁴கோ³தி கலஹஸ்ஸ ஹேதுபூ⁴தா பரிபா⁴ஸா தங்ஸதி³ஸீ ச அனிட்ட²கிரியா ப⁴ண்ட³னங் நாம. கலஹஜாதாதி ஹத்த²பராமாஸாதி³வஸேன மத்த²கப்பத்தோ கலஹோ ஜாதோ ஏதேஸந்தி கலஹஜாதாதி ஏவமெத்த² அத்தோ² த³ட்ட²ப்³போ³. விருத்³த⁴வாத³ந்தி ‘‘அயங் த⁴ம்மோ, நாயங் த⁴ம்மோ’’திஆதி³னா விருத்³த⁴வாத³பூ⁴தங் விவாத³ங். முக²ஸன்னிஸ்ஸிததாய வாசா இத⁴ ‘‘முக²’’ந்தி அதி⁴ப்பேதாதி ஆஹ ‘‘து³ப்³பா⁴ஸிதா வாசா முக²ஸத்தியோதி வுச்சந்தீ’’தி. சதுப்³பி³த⁴ம்பி ஸங்க⁴கம்மங் ஸீமாபரிச்சி²ன்னேஹி பகதத்தேஹி பி⁴க்கூ²ஹி ஏகதோ கத்தப்³ப³த்தா ஏககம்மங் நாம. பஞ்சவிதோ⁴பி பாதிமொக்கு²த்³தே³ஸோ ஏகதோ உத்³தி³ஸிதப்³ப³த்தா ஏகுத்³தே³ஸோ நாம. பஞ்ஞத்தங் பன ஸிக்கா²பத³ங் ஸப்³பே³ஹிபி லஜ்ஜீபுக்³க³லேஹி ஸமங் ஸிக்கி²தப்³ப³பா⁴வதோ ஸமஸிக்க²தா நாம . பாளியங் கீ²ரோத³கீபூ⁴தாதி யதா² கீ²ரஞ்ச உத³கஞ்ச அஞ்ஞமஞ்ஞங் ஸங்ஸந்த³தி, விஸுங் ந ஹோதி, ஏகத்தங் விய உபேதி. ஸதிபி ஹி உப⁴யேஸங் கலாபானங் பரமத்த²தோ பே⁴தே³ பசுரஜனேஹி பன து³விஞ்ஞெய்யனானத்தங் கீ²ரோத³கங் ஸமோதி³தங் அச்சந்தமேவ ஸங்ஸட்ட²ங் விய ஹுத்வா திட்ட²தி, ஏவங் ஸாமக்³கி³வஸேன ஏகத்தூபக³தசித்துப்பாதா³ வியாதி கீ²ரோத³கீபூ⁴தாதி ஏவமெத்த² அத்தோ² த³ட்ட²ப்³போ³. மெத்தாசக்கூ²ஹீதி மெத்தாசித்தங் பச்சுபட்ட²பெத்வா ஓலோகனசக்கூ²ஹி. தானி ஹி பியபா⁴வதீ³பனதோ ‘‘பியசக்கூ²னீ’’தி வுச்சந்தி.
44. Dutiye bhaṇḍanaṃ vuccati kalahassa pubbabhāgoti kalahassa hetubhūtā paribhāsā taṃsadisī ca aniṭṭhakiriyā bhaṇḍanaṃ nāma. Kalahajātāti hatthaparāmāsādivasena matthakappatto kalaho jāto etesanti kalahajātāti evamettha attho daṭṭhabbo. Viruddhavādanti ‘‘ayaṃ dhammo, nāyaṃ dhammo’’tiādinā viruddhavādabhūtaṃ vivādaṃ. Mukhasannissitatāya vācā idha ‘‘mukha’’nti adhippetāti āha ‘‘dubbhāsitā vācā mukhasattiyoti vuccantī’’ti. Catubbidhampi saṅghakammaṃ sīmāparicchinnehi pakatattehi bhikkhūhi ekato kattabbattā ekakammaṃ nāma. Pañcavidhopi pātimokkhuddeso ekato uddisitabbattā ekuddeso nāma. Paññattaṃ pana sikkhāpadaṃ sabbehipi lajjīpuggalehi samaṃ sikkhitabbabhāvato samasikkhatā nāma . Pāḷiyaṃ khīrodakībhūtāti yathā khīrañca udakañca aññamaññaṃ saṃsandati, visuṃ na hoti, ekattaṃ viya upeti. Satipi hi ubhayesaṃ kalāpānaṃ paramatthato bhede pacurajanehi pana duviññeyyanānattaṃ khīrodakaṃ samoditaṃ accantameva saṃsaṭṭhaṃ viya hutvā tiṭṭhati, evaṃ sāmaggivasena ekattūpagatacittuppādā viyāti khīrodakībhūtāti evamettha attho daṭṭhabbo. Mettācakkhūhīti mettācittaṃ paccupaṭṭhapetvā olokanacakkhūhi. Tāni hi piyabhāvadīpanato ‘‘piyacakkhūnī’’ti vuccanti.
45. ததியே அக்³க³வதீதி எத்த² அக்³க³-ஸத்³தோ³ உத்தமபரியாயோ, தேன விஸிட்ட²ஸ்ஸ புக்³க³லஸ்ஸ, விஸிட்டா²ய வா படிபத்தியா க³ஹணங் இதா⁴தி⁴ப்பேதந்தி ஆஹ ‘‘அக்³க³வதீதி உத்தமபுக்³க³லவதீ’’திஆதி³. அவிக³ததண்ஹதாய தங் தங் பரிக்கா²ரஜாதங் ப³ஹுங் லந்தி ஆதி³யந்தீதி ப³ஹுலா, ப³ஹுலா ஏவ பா³ஹுலிகா யதா² ‘‘வேனயிகோ’’தி (அ॰ நி॰ 8.11; பாரா॰ 8; ம॰ நி॰ 1.246). தே பன யஸ்மா பச்சயப³ஹுபா⁴வாய யுத்தப்பயுத்தா நாம ஹொந்தி, தஸ்மா ஆஹ ‘‘சீவராதி³பா³ஹுல்லாய படிபன்னா’’தி. ஸிக்கா²ய ஆத³ரகா³ரவாபா⁴வதோ ஸிதி²லங் அத³ள்ஹங் க³ண்ஹந்தீதி ஸாத²லிகாதி வுத்தங். ஸிதி²லந்தி ச பா⁴வனபுங்ஸகனித்³தே³ஸோ, ஸிதி²லஸத்³தே³ன வா ஸமானத்த²ஸ்ஸ ஸாத²லஸத்³த³ஸ்ஸ வஸேன ஸாத²லிகாதி பத³ஸித்³தி⁴ வேதி³தப்³பா³. அவக³மனட்டே²னாதி அதோ⁴க³மனட்டே²ன, ஓரம்பா⁴கி³யபா⁴வேனாதி அத்தோ². உபதி⁴விவேகேதி ஸப்³பூ³பதி⁴படினிஸ்ஸக்³க³தாய உபதி⁴விவித்தே. ஓரோபிதது⁴ராதி உஜ்ஜி²துஸ்ஸாஹா. து³வித⁴ம்பி வீரியந்தி காயிகங் சேதஸிகஞ்ச வீரியங்.
45. Tatiye aggavatīti ettha agga-saddo uttamapariyāyo, tena visiṭṭhassa puggalassa, visiṭṭhāya vā paṭipattiyā gahaṇaṃ idhādhippetanti āha ‘‘aggavatīti uttamapuggalavatī’’tiādi. Avigatataṇhatāya taṃ taṃ parikkhārajātaṃ bahuṃ lanti ādiyantīti bahulā, bahulā eva bāhulikā yathā ‘‘venayiko’’ti (a. ni. 8.11; pārā. 8; ma. ni. 1.246). Te pana yasmā paccayabahubhāvāya yuttappayuttā nāma honti, tasmā āha ‘‘cīvarādibāhullāya paṭipannā’’ti. Sikkhāya ādaragāravābhāvato sithilaṃ adaḷhaṃ gaṇhantīti sāthalikāti vuttaṃ. Sithilanti ca bhāvanapuṃsakaniddeso, sithilasaddena vā samānatthassa sāthalasaddassa vasena sāthalikāti padasiddhi veditabbā. Avagamanaṭṭhenāti adhogamanaṭṭhena, orambhāgiyabhāvenāti attho. Upadhiviveketi sabbūpadhipaṭinissaggatāya upadhivivitte. Oropitadhurāti ujjhitussāhā. Duvidhampi vīriyanti kāyikaṃ cetasikañca vīriyaṃ.
46. சதுத்தே² இத³ங் து³க்க²ந்தி து³க்க²ஸ்ஸ அரியஸச்சஸ்ஸ பச்சக்க²தோ அக்³க³ஹிதபா⁴வத³ஸ்ஸனத்த²ங் வுத்தங். எத்தகமேவ து³க்க²ந்தி தஸ்ஸ பரிச்சி²ஜ்ஜ அக்³க³ஹிதபா⁴வத³ஸ்ஸனத்த²ங். இதோ உத்³த⁴ங் து³க்க²ங் நத்தீ²தி அனவஸேஸெத்வா அக்³க³ஹிதபா⁴வத³ஸ்ஸனத்த²ங். யதா²ஸபா⁴வதோ நப்பஜானந்தீதி ஸரஸலக்க²ணப்படிவேதே⁴ன அஸம்மோஹதோ நப்படிவிஜ்ஜ²ந்தி. அஸம்மோஹபடிவேதோ⁴ ச யதா² தஸ்மிங் ஞாணே பவத்தே பச்சா து³க்க²ஸ்ஸ ரூபாதி³பரிச்சே²தே³ ஸம்மோஹோ ந ஹோதி, ததா² பவத்தி. அச்சந்தக்க²யோதி அச்சந்தக்க²யனிமித்தங் நிப்³பா³னங். அஸமுப்பத்தீதி எத்தா²பி ஏஸேவ நயோ. யங் நிப்³பா³னங் மக்³க³ஸ்ஸ ஆரம்மணபச்சயட்டே²ன காரணபூ⁴தங் ஆக³ம்ம தது³ப⁴யம்பி நிருஜ்ஜ²தி, தங் தேஸங் அஸமுப்பத்தி நிப்³பா³னங் து³க்க²னிரோதோ⁴தி வுச்சதி.
46. Catutthe idaṃ dukkhanti dukkhassa ariyasaccassa paccakkhato aggahitabhāvadassanatthaṃ vuttaṃ. Ettakameva dukkhanti tassa paricchijja aggahitabhāvadassanatthaṃ. Ito uddhaṃ dukkhaṃ natthīti anavasesetvā aggahitabhāvadassanatthaṃ. Yathāsabhāvato nappajānantīti sarasalakkhaṇappaṭivedhena asammohato nappaṭivijjhanti. Asammohapaṭivedho ca yathā tasmiṃ ñāṇe pavatte paccā dukkhassa rūpādiparicchede sammoho na hoti, tathā pavatti. Accantakkhayoti accantakkhayanimittaṃ nibbānaṃ. Asamuppattīti etthāpi eseva nayo. Yaṃ nibbānaṃ maggassa ārammaṇapaccayaṭṭhena kāraṇabhūtaṃ āgamma tadubhayampi nirujjhati, taṃ tesaṃ asamuppatti nibbānaṃ dukkhanirodhoti vuccati.
47. பஞ்சமே விஸேஸனஸ்ஸ பரனிபாதேன ‘‘பரிஸாகஸடோ’’தி வுத்தந்தி ஆஹ ‘‘கஸடபரிஸா’’திஆதி³. ‘‘கஸடபரிஸா’’தி ஹி வத்தப்³பே³ ‘‘பரிஸாகஸடோ’’தி வுத்தங். பரிஸாமண்டோ³தி எத்தா²பி ஏஸேவ நயோ. ஸேஸமெத்த² உத்தானமேவ.
47. Pañcame visesanassa paranipātena ‘‘parisākasaṭo’’ti vuttanti āha ‘‘kasaṭaparisā’’tiādi. ‘‘Kasaṭaparisā’’ti hi vattabbe ‘‘parisākasaṭo’’ti vuttaṃ. Parisāmaṇḍoti etthāpi eseva nayo. Sesamettha uttānameva.
48. ச²ட்டே² க³ம்பீ⁴ராதி அகா³தா⁴ து³க்கோ²கா³ள்ஹா. பாளிவஸேனாதி இமினா யோ த⁴ம்மபடிஸம்பி⁴தா³ய விஸயோ க³ம்பீ⁴ரபா⁴வோ, தமாஹ. த⁴ம்மப்படிவேத⁴ஸ்ஸ ஹி து³க்கரபா⁴வதோ த⁴ம்மஸ்ஸ பாளியா து³க்கோ²கா³ள்ஹதாய க³ம்பீ⁴ரபா⁴வோ. ‘‘பாளிவஸேன க³ம்பீ⁴ரா’’தி வத்வா ‘‘ஸல்லஸுத்தஸதி³ஸா’’தி வுத்தங் தஸ்ஸ ‘‘அனிமித்தமனஞ்ஞாத’’ந்திஆதி³னா (ஸு॰ நி॰ 579) பாளிவஸேன க³ம்பீ⁴ரதாய லப்³ப⁴னதோ. ததா² ஹி தத்த² தா கா³தா² து³விஞ்ஞெய்யரூபா திட்ட²ந்தி. து³விஞ்ஞெய்யஞ்ஹி ஞாணேன து³க்கோ²கா³ள்ஹந்தி கத்வா ‘‘க³ம்பீ⁴ர’’ந்தி வுச்சதி. புப்³பா³பரம்பெத்த² காஸஞ்சி கா³தா²னங் து³விஞ்ஞெய்யதாய து³க்கோ²கா³ள்ஹமேவ, தஸ்மா தங் ‘‘பாளிவஸேன க³ம்பீ⁴ரா’’தி வுத்தங். இமினாவ நயேன ‘‘அத்த²வஸேன க³ம்பீ⁴ரா’’தி எத்தா²பி அத்தோ² வேதி³தப்³போ³. மஹாவேத³ல்லஸுத்தஸ்ஸ (ம॰ நி॰ 1.449 ஆத³யோ) அத்த²வஸேன க³ம்பீ⁴ரதா ஸுவிஞ்ஞெய்யாவ. லோகங் உத்தரதீதி லோகுத்தரோ, நவவிதோ⁴ அப்பமாணத⁴ம்மோ. ஸோ அத்த²பூ⁴தோ ஏதேஸங் அத்தீ²தி லோகுத்தரா. தேனாஹ ‘‘லோகுத்தரஅத்த²தீ³பகா’’தி.
48. Chaṭṭhe gambhīrāti agādhā dukkhogāḷhā. Pāḷivasenāti iminā yo dhammapaṭisambhidāya visayo gambhīrabhāvo, tamāha. Dhammappaṭivedhassa hi dukkarabhāvato dhammassa pāḷiyā dukkhogāḷhatāya gambhīrabhāvo. ‘‘Pāḷivasena gambhīrā’’ti vatvā ‘‘sallasuttasadisā’’ti vuttaṃ tassa ‘‘animittamanaññāta’’ntiādinā (su. ni. 579) pāḷivasena gambhīratāya labbhanato. Tathā hi tattha tā gāthā duviññeyyarūpā tiṭṭhanti. Duviññeyyañhi ñāṇena dukkhogāḷhanti katvā ‘‘gambhīra’’nti vuccati. Pubbāparampettha kāsañci gāthānaṃ duviññeyyatāya dukkhogāḷhameva, tasmā taṃ ‘‘pāḷivasena gambhīrā’’ti vuttaṃ. Imināva nayena ‘‘atthavasena gambhīrā’’ti etthāpi attho veditabbo. Mahāvedallasuttassa (ma. ni. 1.449 ādayo) atthavasena gambhīratā suviññeyyāva. Lokaṃ uttaratīti lokuttaro, navavidho appamāṇadhammo. So atthabhūto etesaṃ atthīti lokuttarā. Tenāha ‘‘lokuttaraatthadīpakā’’ti.
ஸத்தஸுஞ்ஞங் த⁴ம்மமத்தமேவாதி ஸத்தேன அத்தனா ஸுஞ்ஞங் கேவலங் த⁴ம்மமத்தமேவ. உக்³க³ஹேதப்³ப³ங் பரியாபுணிதப்³ப³ந்தி லிங்க³வசனவிபல்லாஸேன வுத்தந்தி ஆஹ ‘‘உக்³க³ஹேதப்³பே³ ச பரியாபுணிதப்³பே³ சா’’தி. கவினோ கம்மங் கவிதா. யங் பனஸ்ஸ கம்மங், தங் தேன கதந்தி வுச்சதீதி ஆஹ ‘‘கவிதாதி கவீஹி கதா’’தி. இதரந்தி காவெய்யாதி பத³ங், காப்³யந்தி வுத்தங் ஹோதி. காப்³யந்தி ச கவினா வுத்தந்தி அத்தோ². தேனாஹ ‘‘தஸ்ஸேவ வேவசன’’ந்தி. விசித்ரஅக்க²ராதி விசித்தாகாரக்க²ரா விஞ்ஞாபனீயா. ஸாஸனதோ ப³ஹிபூ⁴தாதி ந ஸாஸனாவசரா. தேஸங் ஸாவகேஹீதி பு³த்³தா⁴னங் ஸாவகாதி அபஞ்ஞாதானங் யேஸங் கேஸஞ்சி ஸாவகேஹி. ந சேவ அஞ்ஞமஞ்ஞங் படிபுச்ச²ந்தீதி யே வாசெந்தி, யே ச ஸுணந்தி, தே அஞ்ஞமஞ்ஞங் அத்தா²தி³ங் நப்படிபுச்ச²ந்தி, கேவலங் வாசனஸவனமத்தேனேவ பரிதுட்டா² ஹொந்தி. சாரிகங் ந விசரந்தீதி அஸுகஸ்மிங் டா²னே அத்தா²தி³ங் ஜானந்தா அத்தீ²தி புச்ச²னத்தா²ய சாரிகங் ந க³ச்ச²ந்தி தாதி³ஸஸ்ஸ புக்³க³லஸ்ஸ அபா⁴வதோ தஸ்ஸ ச புப்³பா³பரவிரோத⁴தோ. கத²ங் ரோபேதப்³ப³ந்தி கேன பகாரேன நிக்கி²பிதப்³ப³ங். அத்தோ² நாம ஸபா⁴வதோ அனுஸந்தி⁴தோ ஸம்ப³ந்த⁴தோ புப்³பா³பரதோ ஆதி³பரியோஸானதோ ச ஞாதோ ஸம்மாஞாதோ ஹோதீதி ஆஹ ‘‘கோ அத்தோ²’’திஆதி³. அனுத்தானீகதந்தி அக்க²ரஸன்னிவேஸாதி³னா அனுத்தானீகதங். கங்கா²யாதி ஸங்ஸயஸ்ஸ.
Sattasuññaṃ dhammamattamevāti sattena attanā suññaṃ kevalaṃ dhammamattameva. Uggahetabbaṃ pariyāpuṇitabbanti liṅgavacanavipallāsena vuttanti āha ‘‘uggahetabbe ca pariyāpuṇitabbe cā’’ti. Kavino kammaṃ kavitā. Yaṃ panassa kammaṃ, taṃ tena katanti vuccatīti āha ‘‘kavitāti kavīhi katā’’ti. Itaranti kāveyyāti padaṃ, kābyanti vuttaṃ hoti. Kābyanti ca kavinā vuttanti attho. Tenāha ‘‘tasseva vevacana’’nti. Vicitraakkharāti vicittākārakkharā viññāpanīyā. Sāsanato bahibhūtāti na sāsanāvacarā. Tesaṃ sāvakehīti buddhānaṃ sāvakāti apaññātānaṃ yesaṃ kesañci sāvakehi. Na ceva aññamaññaṃ paṭipucchantīti ye vācenti, ye ca suṇanti, te aññamaññaṃ atthādiṃ nappaṭipucchanti, kevalaṃ vācanasavanamatteneva parituṭṭhā honti. Cārikaṃ na vicarantīti asukasmiṃ ṭhāne atthādiṃ jānantā atthīti pucchanatthāya cārikaṃ na gacchanti tādisassa puggalassa abhāvato tassa ca pubbāparavirodhato. Kathaṃ ropetabbanti kena pakārena nikkhipitabbaṃ. Attho nāma sabhāvato anusandhito sambandhato pubbāparato ādipariyosānato ca ñāto sammāñāto hotīti āha ‘‘ko attho’’tiādi. Anuttānīkatanti akkharasannivesādinā anuttānīkataṃ. Kaṅkhāyāti saṃsayassa.
49. ஸத்தமே கிலேஸேஹீ ஆமஸிதப்³ப³தோ ஆமிஸங், சத்தாரோ பச்சயா. ததே³வ க³ரு க³ருகாதப்³ப³ங் ஏதேஸங், ந த⁴ம்மோதி ஆமிஸக³ரூ. தேனாஹ ‘‘லோகுத்தரத⁴ம்மங் லாமகதோ க³ஹெத்வா டி²தபரிஸா’’தி. உப⁴தோ பா⁴க³தோ விமுத்தோதி உப⁴தோபா⁴க³விமுத்தோ. த்³வீஹி பா⁴கே³ஹி த்³வே வாரே விமுத்தோ. பஞ்ஞாய விமுத்தோதி ஸமத²ஸன்னிஸ்ஸயேன வினா அக்³க³மக்³க³பஞ்ஞாய விமுத்தோ. தேனாஹ ‘‘ஸுக்க²விபஸ்ஸககீ²ணாஸவோ’’தி . காயேனாதி நாமகாயேன. ஜா²னப²ஸ்ஸங் பு²ஸித்வாதி அட்ட²ஸமாபத்திஸஞ்ஞிதங் ஜா²னப²ஸ்ஸங் அதி⁴க³மவஸேன பு²ஸித்வா. பச்சா² நிரோத⁴ங் நிப்³பா³னங் யதா² ஆலோசிதங் நாமகாயேன ஸச்சி²கரோதீதி காயஸக்கீ². ந து விமுத்தோ ஏகச்சானங் ஆஸவானங் அபரிக்கீ²ணத்தா. தி³ட்ட²ந்தங் பத்தோதி தி³ட்ட²ஸ்ஸ அந்தோ அனந்தரோ காலோ தி³ட்ட²ந்தோ, த³ஸ்ஸனஸங்கா²தஸ்ஸ ஸோதாபத்திமக்³க³ஞாணஸ்ஸ அனந்தரங் பத்தோதி அத்தோ². பட²மப²லதோ பட்டா²ய ஹி யாவ அக்³க³மக்³கா³ தி³ட்டி²ப்பத்தோ. தேனாஹ ‘‘இமே த்³வேபி ச²ஸு டா²னேஸு லப்³ப⁴ந்தீ’’தி.
49. Sattame kilesehī āmasitabbato āmisaṃ, cattāro paccayā. Tadeva garu garukātabbaṃ etesaṃ, na dhammoti āmisagarū. Tenāha ‘‘lokuttaradhammaṃ lāmakato gahetvā ṭhitaparisā’’ti. Ubhato bhāgato vimuttoti ubhatobhāgavimutto. Dvīhi bhāgehi dve vāre vimutto. Paññāya vimuttoti samathasannissayena vinā aggamaggapaññāya vimutto. Tenāha ‘‘sukkhavipassakakhīṇāsavo’’ti . Kāyenāti nāmakāyena. Jhānaphassaṃ phusitvāti aṭṭhasamāpattisaññitaṃ jhānaphassaṃ adhigamavasena phusitvā. Pacchā nirodhaṃ nibbānaṃ yathā ālocitaṃ nāmakāyena sacchikarotīti kāyasakkhī. Na tu vimutto ekaccānaṃ āsavānaṃ aparikkhīṇattā. Diṭṭhantaṃ pattoti diṭṭhassa anto anantaro kālo diṭṭhanto, dassanasaṅkhātassa sotāpattimaggañāṇassa anantaraṃ pattoti attho. Paṭhamaphalato paṭṭhāya hi yāva aggamaggā diṭṭhippatto. Tenāha ‘‘ime dvepi chasu ṭhānesu labbhantī’’ti.
ஸத்³த³ஹந்தோ விமுத்தோதி ஏதேன ஸப்³ப³தா² அவிமுத்தஸ்ஸ ஸத்³தா⁴மத்தேன விமுத்தபா⁴வத³ஸ்ஸனேன ஸத்³தா⁴விமுத்தஸ்ஸ ஸெக்க²பா⁴வமேவ விபா⁴வேதி. ஸத்³தா⁴விமுத்தோதி வா ஸத்³தா⁴ய அவிமுத்தோதி அத்தோ². ச²ஸு டா²னேஸூதி பட²மப²லதோ பட்டா²ய ச²ஸு டா²னேஸு. த⁴ம்மங் அனுஸ்ஸரதீதி பட²மமக்³க³பஞ்ஞாஸங்கா²தங் த⁴ம்மங் அனுஸ்ஸரதி. ஸத்³த⁴ங் அனுஸ்ஸரதீதி எத்தா²பி ஏஸேவ நயோ. உபோ⁴பி ஹேதே ஸோதாபத்திமக்³க³ட்டா²யேவ. இமங் கஸ்மா க³ண்ஹந்தீதி ஏவங் ஏகந்தபாஸங்ஸேஸு அரியேஸு க³ய்ஹமானேஸு இமங் ஏகந்தனிந்தி³தங் லாமகங் து³ஸ்ஸீலங் கஸ்மா க³ண்ஹந்தி. ஸப்³பே³ஸு ஸப்³ப³தா ஸதி³ஸேஸு லப்³ப⁴மானோபி விஸேஸோ ந பஞ்ஞாயதி, விஸபா⁴கே³ பன ஸதி ஏவ பஞ்ஞாயதி படபா⁴வேன விய சித்தபடஸ்ஸாதி ஆஹ ‘‘ஏகச்சேஸு பனா’’திஆதி³. க³ந்தி²தாதி அவப³த்³தா⁴. முச்சி²தாதி முச்ச²ங் ஸம்மோஹங் ஆபன்னா. ச²ந்த³ராக³அபகட்³ட⁴னாயாதி ச²ந்த³ராக³ஸ்ஸ அபனயனத்த²ங். நிஸ்ஸரணபஞ்ஞாயாதி ததோ நிஸ்ஸரணாவஹாய பஞ்ஞாய விரஹிதா.
Saddahanto vimuttoti etena sabbathā avimuttassa saddhāmattena vimuttabhāvadassanena saddhāvimuttassa sekkhabhāvameva vibhāveti. Saddhāvimuttoti vā saddhāya avimuttoti attho. Chasu ṭhānesūti paṭhamaphalato paṭṭhāya chasu ṭhānesu. Dhammaṃ anussaratīti paṭhamamaggapaññāsaṅkhātaṃ dhammaṃ anussarati. Saddhaṃ anussaratīti etthāpi eseva nayo. Ubhopi hete sotāpattimaggaṭṭhāyeva. Imaṃ kasmā gaṇhantīti evaṃ ekantapāsaṃsesu ariyesu gayhamānesu imaṃ ekantaninditaṃ lāmakaṃ dussīlaṃ kasmā gaṇhanti. Sabbesu sabbatā sadisesu labbhamānopi viseso na paññāyati, visabhāge pana sati eva paññāyati paṭabhāvena viya cittapaṭassāti āha ‘‘ekaccesu panā’’tiādi. Ganthitāti avabaddhā. Mucchitāti mucchaṃ sammohaṃ āpannā. Chandarāgaapakaḍḍhanāyāti chandarāgassa apanayanatthaṃ. Nissaraṇapaññāyāti tato nissaraṇāvahāya paññāya virahitā.
பஞ்ஞாது⁴ரேனாதி விபஸ்ஸனாபி⁴னிவேஸேன. அபி⁴னிவிட்டோ²தி விபஸ்ஸனாமக்³க³ங் ஓதிண்ணோ. தஸ்மிங் க²ணேதி ஸோதாபத்திமக்³க³க்க²ணே. த⁴ம்மானுஸாரீ நாம பஞ்ஞாஸங்கா²தேன த⁴ம்மேன அரியமக்³க³ஸோதஸ்ஸ அனுஸ்ஸரணதோ. காயஸக்கீ² நாம நாமகாயேன ஸச்சி²காதப்³ப³ஸ்ஸ நிப்³பா³னஸ்ஸ ஸச்சி²கரணதோ. விக்க²ம்ப⁴னஸமுச்சே²தா³னங் வஸேன த்³விக்க²த்துங். அரூபஜ்ஜா²னேஹி ரூபகாயதோ, அக்³க³மக்³கே³ன ஸேஸகாயதோதி த்³வீஹி பா⁴கே³ஹி நிஸ்ஸக்கவசனஞ்சேதங். தி³ட்ட²ந்தங் பத்தோ, தி³ட்ட²த்தா வா பத்தோதி தி³ட்டி²ப்பத்தோ. தத்த² தி³ட்ட²ந்தங் பத்தோதி த³ஸ்ஸனஸங்கா²தஸ்ஸ ஸோதாபத்திமக்³க³ஞாணஸ்ஸ அனந்தரங் பத்தோதி அத்தோ². தி³ட்ட²த்தாதி சதுஸச்சத³ஸ்ஸனஸங்கா²தாய பஞ்ஞாய நிரோத⁴ஸ்ஸ தி³ட்ட²த்தா. ஜா²னப²ஸ்ஸரஹிதாய ஸாதிஸயாய பஞ்ஞாய ஏவ விமுத்தோதி பஞ்ஞாவிமுத்தோ. ஸேஸங் வுத்தனயத்தா ஸுவிஞ்ஞெய்யமேவ.
Paññādhurenāti vipassanābhinivesena. Abhiniviṭṭhoti vipassanāmaggaṃ otiṇṇo. Tasmiṃ khaṇeti sotāpattimaggakkhaṇe. Dhammānusārī nāma paññāsaṅkhātena dhammena ariyamaggasotassa anussaraṇato. Kāyasakkhī nāma nāmakāyena sacchikātabbassa nibbānassa sacchikaraṇato. Vikkhambhanasamucchedānaṃ vasena dvikkhattuṃ. Arūpajjhānehi rūpakāyato, aggamaggena sesakāyatoti dvīhi bhāgehi nissakkavacanañcetaṃ. Diṭṭhantaṃ patto, diṭṭhattā vā pattoti diṭṭhippatto. Tattha diṭṭhantaṃ pattoti dassanasaṅkhātassa sotāpattimaggañāṇassa anantaraṃ pattoti attho. Diṭṭhattāti catusaccadassanasaṅkhātāya paññāya nirodhassa diṭṭhattā. Jhānaphassarahitāya sātisayāya paññāya eva vimuttoti paññāvimutto. Sesaṃ vuttanayattā suviññeyyameva.
50. அட்ட²மே ந ஸமாதி விஸமா. காயகம்மாதீ³னங் விஸமத்தா ததோ ஏவ தத்த² பக்க²லனங் ஸுலப⁴ந்தி ஆஹ ‘‘ஸபக்க²லனட்டே²னா’’தி. நிப்பக்க²லனட்டே²னாதி பக்க²லனாபா⁴வேன. உத்³த⁴ம்மானீதி த⁴ம்மதோ அபேதானி. உப்³பி³னயானீதி எத்தா²பி ஏஸேவ நயோ.
50. Aṭṭhame na samāti visamā. Kāyakammādīnaṃ visamattā tato eva tattha pakkhalanaṃ sulabhanti āha ‘‘sapakkhalanaṭṭhenā’’ti. Nippakkhalanaṭṭhenāti pakkhalanābhāvena. Uddhammānīti dhammato apetāni. Ubbinayānīti etthāpi eseva nayo.
51. நவமே அத⁴ம்மிகாதி அத⁴ம்மே நியுத்தா. தேனாஹ ‘‘நித்³த⁴ம்மா’’தி, த⁴ம்மரஹிதாதி அத்தோ².
51. Navame adhammikāti adhamme niyuttā. Tenāha ‘‘niddhammā’’ti, dhammarahitāti attho.
52. த³ஸமே க³ண்ஹந்தீதி பவத்தெந்தி. ந சேவ அஞ்ஞமஞ்ஞங் ஸஞ்ஞாபெந்தீதி மூலதோ பட்டா²ய தங் அதி⁴கரணங் யதா² வூபஸம்மதி, ஏவங் அஞ்ஞமஞ்ஞங் இதரீதரே ந ஸம்மா ஜானாபெந்தி. ஸஞ்ஞாபனத்த²ங் ஸன்னிபாதே ஸதி தத்த² யுத்தபத்தகரணேன ஸஞ்ஞத்தியா ப⁴விதப்³ப³ங், தே பன ஸஞ்ஞாபனத்த²ங் ந ஸன்னிபதந்தி. ந பெக்கா²பெந்தீதி தங் அதி⁴கரணங் மூலதோ பட்டா²ய அஞ்ஞமஞ்ஞங் ந பெக்கா²பெந்தி. அஸஞ்ஞத்தியேவ அத்தனா க³ஹிதபக்க²ஸ்ஸ ப³லங் ஏதேஸந்தி அஸஞ்ஞத்திப³லா. ந ததா² மந்தெந்தீதி ஸந்தி³ட்டி²பராமாஸிஆதா⁴னக்³கா³ஹிது³ப்படினிஸ்ஸக்³கி³பா⁴வேன ததா² ந மந்தெந்தி. தேனாஹ ‘‘தா²மஸா’’திஆதி³. உத்தானத்தோ²யேவ கண்ஹபக்கே² வுத்தப்படிபக்கே²ன க³ஹேதப்³ப³த்தா.
52. Dasame gaṇhantīti pavattenti. Na ceva aññamaññaṃ saññāpentīti mūlato paṭṭhāya taṃ adhikaraṇaṃ yathā vūpasammati, evaṃ aññamaññaṃ itarītare na sammā jānāpenti. Saññāpanatthaṃ sannipāte sati tattha yuttapattakaraṇena saññattiyā bhavitabbaṃ, te pana saññāpanatthaṃ na sannipatanti. Na pekkhāpentīti taṃ adhikaraṇaṃ mūlato paṭṭhāya aññamaññaṃ na pekkhāpenti. Asaññattiyeva attanā gahitapakkhassa balaṃ etesanti asaññattibalā. Na tathā mantentīti sandiṭṭhiparāmāsiādhānaggāhiduppaṭinissaggibhāvena tathā na mantenti. Tenāha ‘‘thāmasā’’tiādi. Uttānatthoyeva kaṇhapakkhe vuttappaṭipakkhena gahetabbattā.
பரிஸவக்³க³வண்ணனா நிட்டி²தா.
Parisavaggavaṇṇanā niṭṭhitā.
பட²மபண்ணாஸகங் நிட்டி²தங்.
Paṭhamapaṇṇāsakaṃ niṭṭhitaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. பரிஸவக்³கோ³ • 5. Parisavaggo
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 5. பரிஸவக்³க³வண்ணனா • 5. Parisavaggavaṇṇanā
