| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (дийгаа) • Aṅguttaranikāya (ṭīkā) |
5. барисаваг̇г̇аван̣н̣анаа
5. Parisavaggavaṇṇanā
43. бан̃жамасса батамз уд̣̇д̇хажжзна саманнааг̇ад̇аад̇и агаббияз габбияасан̃н̃ид̇ааяа, габбияз агаббияасан̃н̃ид̇ааяа, аваж̇ж̇з важ̇ж̇асан̃н̃ид̇ааяа, важ̇ж̇з аваж̇ж̇асан̃н̃ид̇ааяа уд̣̇д̇хажжаббагад̇игаа. яз хи винаяз абагад̇ан̃н̃уно сам̣гилзсавод̣̇ааниязсу д̇хаммзсу на гусалаа сагин̃жанагаарино виббадисаараб̣ахулаа, д̇зсам̣ ануббаннан̃жа уд̣̇д̇хажжам̣ уббаж̇ж̇ад̇и, уббаннан̃жа бхияяобхаавам̣ взбуллам̣ аабаж̇ж̇ад̇и. саараабхаавзна д̇ужчад̇д̇аа нал̣о вияаад̇и нал̣о, маанод̇и ааха ‘‘уннал̣аад̇и уг̇г̇ад̇анал̣аа’’д̇и. д̇знааха ‘‘удтид̇ад̇ужчамаанаа’’д̇и. маано хи сзяяасса сзяяод̇и сад̣̇исод̇и жа бавад̇д̇ияаа висзсад̇о д̇ужчо. жаабаллзнаад̇и жабалабхаавзна, д̇ан̣хаалолуббзнаад̇и ад̇т̇о. мукакараад̇и мукзна парусаа, парусаваад̣̇инод̇и ад̇т̇о.
43. Pañcamassa paṭhame uddhaccena samannāgatāti akappiye kappiyasaññitāya, kappiye akappiyasaññitāya, avajje vajjasaññitāya, vajje avajjasaññitāya uddhaccappakatikā. Ye hi vinaye apakataññuno saṃkilesavodāniyesu dhammesu na kusalā sakiñcanakārino vippaṭisārabahulā, tesaṃ anuppannañca uddhaccaṃ uppajjati, uppannañca bhiyyobhāvaṃ vepullaṃ āpajjati. Sārābhāvena tucchattā naḷo viyāti naḷo, mānoti āha ‘‘unnaḷāti uggatanaḷā’’ti. Tenāha ‘‘uṭṭhitatucchamānā’’ti. Māno hi seyyassa seyyoti sadisoti ca pavattiyā visesato tuccho. Cāpallenāti capalabhāvena, taṇhāloluppenāti attho. Mukhakharāti mukhena pharusā, pharusavādinoti attho.
вигин̣н̣аваажаад̇и виссадаважанаа сампаббалаабид̇ааяа абарияанд̇аважанаа. д̇знааха ‘‘асам̣яад̇аважанаа’’д̇иаад̣̇и. виссадтасад̇инод̇и сад̇ивирахид̇аа. бажжаяавзгаллзна виж̇ж̇амаанааяаби сад̇ияаа сад̇игижжам̣ гаад̇ум̣ асамад̇т̇ад̇ааяа звам̣ вуд̇д̇аа. на самбаж̇аананд̇ийд̇и асамбаж̇аанаа, д̇ам̣яог̇анивад̇д̇ияам̣ жааяам̣ агааро ‘‘ахзд̇угаа д̇хаммаа (д̇ха. са. д̣̇угамаад̇игаа 2), абхигкуго ааваасо’’д̇иаад̣̇ийсу (жуул̣ава. 76) вияаад̇и ааха ‘‘ниббан̃н̃аа’’д̇и, бан̃н̃аарахид̇аад̇и ад̇т̇о. баал̣ияам̣ виб̣бханд̇ажид̇д̇аад̇и уб̣бханд̇ажид̇д̇аа. самаад̇хивирахзна лад̣̇д̇хогаасзна уд̣̇д̇хажжзна д̇зсам̣ самаад̇хивирахаанам̣ жид̇д̇ам̣ наанаарамман̣зсу бариб̣бхамад̇и ванамаггадо вияа ванасаакаасу. баагад̇инд̣̇рияаад̇и сам̣вараабхаавзна г̇ихигаалз вияа вивадаинд̣̇рияаа. д̇знааха ‘‘багад̇ияаа тид̇зхий’’д̇иаад̣̇и. вивадзхийд̇и асам̣вуд̇зхи.
Vikiṇṇavācāti vissaṭavacanā samphappalāpitāya apariyantavacanā. Tenāha ‘‘asaṃyatavacanā’’tiādi. Vissaṭṭhasatinoti sativirahitā. Paccayavekallena vijjamānāyapi satiyā satikiccaṃ kātuṃ asamatthatāya evaṃ vuttā. Na sampajānantīti asampajānā, taṃyoganivattiyaṃ cāyaṃ akāro ‘‘ahetukā dhammā (dha. sa. dukamātikā 2), abhikkhuko āvāso’’tiādīsu (cūḷava. 76) viyāti āha ‘‘nippaññā’’ti, paññārahitāti attho. Pāḷiyaṃ vibbhantacittāti ubbhantacittā. Samādhivirahena laddhokāsena uddhaccena tesaṃ samādhivirahānaṃ cittaṃ nānārammaṇesu paribbhamati vanamakkaṭo viya vanasākhāsu. Pākatindriyāti saṃvarābhāvena gihikāle viya vivaṭaindriyā. Tenāha ‘‘pakatiyā ṭhitehī’’tiādi. Vivaṭehīti asaṃvutehi.
44. д̣̇уд̇ияз бхан̣д̣анам̣ вужжад̇и галахасса буб̣б̣абхааг̇од̇и галахасса хзд̇убхууд̇аа барибхаасаа д̇ам̣сад̣̇исий жа анидтагирияаа бхан̣д̣анам̣ наама. галахаж̇аад̇аад̇и хад̇т̇абараамаасаад̣̇ивасзна мад̇т̇агаббад̇д̇о галахо ж̇аад̇о зд̇зсанд̇и галахаж̇аад̇аад̇и звамзд̇т̇а ад̇т̇о д̣̇адтаб̣б̣о. вируд̣̇д̇хаваад̣̇анд̇и ‘‘аяам̣ д̇хаммо, нааяам̣ д̇хаммо’’д̇иаад̣̇инаа вируд̣̇д̇хаваад̣̇абхууд̇ам̣ виваад̣̇ам̣. мукасанниссид̇ад̇ааяа ваажаа ид̇ха ‘‘мука’’нд̇и ад̇хиббзд̇аад̇и ааха ‘‘д̣̇уб̣бхаасид̇аа ваажаа мукасад̇д̇ияод̇и вужжанд̇ий’’д̇и. жад̇уб̣б̣ид̇хамби сан̇гхагаммам̣ сиймаабарижчиннзхи багад̇ад̇д̇зхи бхигкуухи згад̇о гад̇д̇аб̣б̣ад̇д̇аа згагаммам̣ наама. бан̃жавид̇хоби баад̇имогкуд̣̇д̣̇зсо згад̇о уд̣̇д̣̇исид̇аб̣б̣ад̇д̇аа згуд̣̇д̣̇зсо наама. бан̃н̃ад̇д̇ам̣ бана сигкаабад̣̇ам̣ саб̣б̣зхиби лаж̇ж̇ийбуг̇г̇алзхи самам̣ сигкид̇аб̣б̣абхаавад̇о самасигкад̇аа наама . баал̣ияам̣ кийрод̣̇агийбхууд̇аад̇и яат̇аа кийран̃жа уд̣̇аган̃жа ан̃н̃аман̃н̃ам̣ сам̣санд̣̇ад̇и, висум̣ на ход̇и, згад̇д̇ам̣ вияа убзд̇и. сад̇иби хи убхаязсам̣ галаабаанам̣ барамад̇т̇ад̇о бхзд̣̇з бажураж̇анзхи бана д̣̇увин̃н̃зяяанаанад̇д̇ам̣ кийрод̣̇агам̣ самод̣̇ид̇ам̣ ажжанд̇амзва сам̣садтам̣ вияа худ̇ваа д̇идтад̇и, звам̣ саамаг̇г̇ивасзна згад̇д̇уубаг̇ад̇ажид̇д̇уббаад̣̇аа вияаад̇и кийрод̣̇агийбхууд̇аад̇и звамзд̇т̇а ад̇т̇о д̣̇адтаб̣б̣о. мзд̇д̇аажагкуухийд̇и мзд̇д̇аажид̇д̇ам̣ бажжубадтабзд̇ваа ологанажагкуухи. д̇аани хи бияабхаавад̣̇ийбанад̇о ‘‘бияажагкууний’’д̇и вужжанд̇и.
44. Dutiye bhaṇḍanaṃ vuccati kalahassa pubbabhāgoti kalahassa hetubhūtā paribhāsā taṃsadisī ca aniṭṭhakiriyā bhaṇḍanaṃ nāma. Kalahajātāti hatthaparāmāsādivasena matthakappatto kalaho jāto etesanti kalahajātāti evamettha attho daṭṭhabbo. Viruddhavādanti ‘‘ayaṃ dhammo, nāyaṃ dhammo’’tiādinā viruddhavādabhūtaṃ vivādaṃ. Mukhasannissitatāya vācā idha ‘‘mukha’’nti adhippetāti āha ‘‘dubbhāsitā vācā mukhasattiyoti vuccantī’’ti. Catubbidhampi saṅghakammaṃ sīmāparicchinnehi pakatattehi bhikkhūhi ekato kattabbattā ekakammaṃ nāma. Pañcavidhopi pātimokkhuddeso ekato uddisitabbattā ekuddeso nāma. Paññattaṃ pana sikkhāpadaṃ sabbehipi lajjīpuggalehi samaṃ sikkhitabbabhāvato samasikkhatā nāma . Pāḷiyaṃ khīrodakībhūtāti yathā khīrañca udakañca aññamaññaṃ saṃsandati, visuṃ na hoti, ekattaṃ viya upeti. Satipi hi ubhayesaṃ kalāpānaṃ paramatthato bhede pacurajanehi pana duviññeyyanānattaṃ khīrodakaṃ samoditaṃ accantameva saṃsaṭṭhaṃ viya hutvā tiṭṭhati, evaṃ sāmaggivasena ekattūpagatacittuppādā viyāti khīrodakībhūtāti evamettha attho daṭṭhabbo. Mettācakkhūhīti mettācittaṃ paccupaṭṭhapetvā olokanacakkhūhi. Tāni hi piyabhāvadīpanato ‘‘piyacakkhūnī’’ti vuccanti.
45. д̇ад̇ияз аг̇г̇авад̇ийд̇и зд̇т̇а аг̇г̇а-сад̣̇д̣̇о уд̇д̇амабарияааяо, д̇зна висидтасса буг̇г̇аласса, висидтааяа ваа бадибад̇д̇ияаа г̇ахан̣ам̣ ид̇хаад̇хиббзд̇анд̇и ааха ‘‘аг̇г̇авад̇ийд̇и уд̇д̇амабуг̇г̇алавад̇ий’’д̇иаад̣̇и. авиг̇ад̇ад̇ан̣хад̇ааяа д̇ам̣ д̇ам̣ баригкаараж̇аад̇ам̣ б̣ахум̣ ланд̇и аад̣̇ияанд̇ийд̇и б̣ахулаа, б̣ахулаа зва б̣аахулигаа яат̇аа ‘‘взнаяиго’’д̇и (а. ни. 8.11; баараа. 8; ма. ни. 1.246). д̇з бана яасмаа бажжаяаб̣ахубхаавааяа яуд̇д̇аббаяуд̇д̇аа наама хонд̇и, д̇асмаа ааха ‘‘жийвараад̣̇иб̣аахуллааяа бадибаннаа’’д̇и. сигкааяа аад̣̇араг̇аараваабхаавад̇о сит̇илам̣ ад̣̇ал̣хам̣ г̇ан̣ханд̇ийд̇и саат̇алигаад̇и вуд̇д̇ам̣. сит̇иланд̇и жа бхааванабум̣саганид̣̇д̣̇зсо, сит̇иласад̣̇д̣̇зна ваа самаанад̇т̇асса саат̇аласад̣̇д̣̇асса васзна саат̇алигаад̇и бад̣̇асид̣̇д̇хи взд̣̇ид̇аб̣б̣аа. аваг̇аманадтзнаад̇и ад̇хог̇аманадтзна, орамбхааг̇ияабхаавзнаад̇и ад̇т̇о. убад̇хививзгзд̇и саб̣б̣уубад̇хибадиниссаг̇г̇ад̇ааяа убад̇хививид̇д̇з. оробид̇ад̇хураад̇и уж̇жхид̇уссаахаа. д̣̇увид̇хамби вийрияанд̇и гааяигам̣ жзд̇асиган̃жа вийрияам̣.
45. Tatiye aggavatīti ettha agga-saddo uttamapariyāyo, tena visiṭṭhassa puggalassa, visiṭṭhāya vā paṭipattiyā gahaṇaṃ idhādhippetanti āha ‘‘aggavatīti uttamapuggalavatī’’tiādi. Avigatataṇhatāya taṃ taṃ parikkhārajātaṃ bahuṃ lanti ādiyantīti bahulā, bahulā eva bāhulikā yathā ‘‘venayiko’’ti (a. ni. 8.11; pārā. 8; ma. ni. 1.246). Te pana yasmā paccayabahubhāvāya yuttappayuttā nāma honti, tasmā āha ‘‘cīvarādibāhullāya paṭipannā’’ti. Sikkhāya ādaragāravābhāvato sithilaṃ adaḷhaṃ gaṇhantīti sāthalikāti vuttaṃ. Sithilanti ca bhāvanapuṃsakaniddeso, sithilasaddena vā samānatthassa sāthalasaddassa vasena sāthalikāti padasiddhi veditabbā. Avagamanaṭṭhenāti adhogamanaṭṭhena, orambhāgiyabhāvenāti attho. Upadhiviveketi sabbūpadhipaṭinissaggatāya upadhivivitte. Oropitadhurāti ujjhitussāhā. Duvidhampi vīriyanti kāyikaṃ cetasikañca vīriyaṃ.
46. жад̇уд̇т̇з ид̣̇ам̣ д̣̇угканд̇и д̣̇угкасса арияасажжасса бажжагкад̇о аг̇г̇ахид̇абхаавад̣̇ассанад̇т̇ам̣ вуд̇д̇ам̣. зд̇д̇агамзва д̣̇угканд̇и д̇асса барижчиж̇ж̇а аг̇г̇ахид̇абхаавад̣̇ассанад̇т̇ам̣. ид̇о уд̣̇д̇хам̣ д̣̇угкам̣ над̇т̇ийд̇и анавасзсзд̇ваа аг̇г̇ахид̇абхаавад̣̇ассанад̇т̇ам̣. яат̇аасабхаавад̇о наббаж̇аананд̇ийд̇и сарасалагкан̣аббадивзд̇хзна асаммохад̇о наббадивиж̇жханд̇и. асаммохабадивзд̇хо жа яат̇аа д̇асмим̣ н̃аан̣з бавад̇д̇з бажжаа д̣̇угкасса руубаад̣̇ибарижчзд̣̇з саммохо на ход̇и, д̇ат̇аа бавад̇д̇и. ажжанд̇агкаяод̇и ажжанд̇агкаяанимид̇д̇ам̣ ниб̣б̣аанам̣. асамуббад̇д̇ийд̇и зд̇т̇ааби зсзва наяо. яам̣ ниб̣б̣аанам̣ маг̇г̇асса аарамман̣абажжаяадтзна гааран̣абхууд̇ам̣ ааг̇амма д̇ад̣̇убхаяамби нируж̇жхад̇и, д̇ам̣ д̇зсам̣ асамуббад̇д̇и ниб̣б̣аанам̣ д̣̇угканирод̇ход̇и вужжад̇и.
46. Catutthe idaṃ dukkhanti dukkhassa ariyasaccassa paccakkhato aggahitabhāvadassanatthaṃ vuttaṃ. Ettakameva dukkhanti tassa paricchijja aggahitabhāvadassanatthaṃ. Ito uddhaṃ dukkhaṃ natthīti anavasesetvā aggahitabhāvadassanatthaṃ. Yathāsabhāvato nappajānantīti sarasalakkhaṇappaṭivedhena asammohato nappaṭivijjhanti. Asammohapaṭivedho ca yathā tasmiṃ ñāṇe pavatte paccā dukkhassa rūpādiparicchede sammoho na hoti, tathā pavatti. Accantakkhayoti accantakkhayanimittaṃ nibbānaṃ. Asamuppattīti etthāpi eseva nayo. Yaṃ nibbānaṃ maggassa ārammaṇapaccayaṭṭhena kāraṇabhūtaṃ āgamma tadubhayampi nirujjhati, taṃ tesaṃ asamuppatti nibbānaṃ dukkhanirodhoti vuccati.
47. бан̃жамз висзсанасса баранибаад̇зна ‘‘барисаагасадо’’д̇и вуд̇д̇анд̇и ааха ‘‘гасадабарисаа’’д̇иаад̣̇и. ‘‘гасадабарисаа’’д̇и хи вад̇д̇аб̣б̣з ‘‘барисаагасадо’’д̇и вуд̇д̇ам̣. барисааман̣д̣од̇и зд̇т̇ааби зсзва наяо. сзсамзд̇т̇а уд̇д̇аанамзва.
47. Pañcame visesanassa paranipātena ‘‘parisākasaṭo’’ti vuttanti āha ‘‘kasaṭaparisā’’tiādi. ‘‘Kasaṭaparisā’’ti hi vattabbe ‘‘parisākasaṭo’’ti vuttaṃ. Parisāmaṇḍoti etthāpi eseva nayo. Sesamettha uttānameva.
48. чадтз г̇амбхийраад̇и аг̇аад̇хаа д̣̇угког̇аал̣хаа. баал̣ивасзнаад̇и иминаа яо д̇хаммабадисамбхид̣̇ааяа висаяо г̇амбхийрабхааво, д̇амааха. д̇хаммаббадивзд̇хасса хи д̣̇уггарабхаавад̇о д̇хаммасса баал̣ияаа д̣̇угког̇аал̣хад̇ааяа г̇амбхийрабхааво. ‘‘баал̣ивасзна г̇амбхийраа’’д̇и вад̇ваа ‘‘салласуд̇д̇асад̣̇исаа’’д̇и вуд̇д̇ам̣ д̇асса ‘‘анимид̇д̇аманан̃н̃аад̇а’’нд̇иаад̣̇инаа (су. ни. 579) баал̣ивасзна г̇амбхийрад̇ааяа лаб̣бханад̇о. д̇ат̇аа хи д̇ад̇т̇а д̇аа г̇аат̇аа д̣̇увин̃н̃зяяаруубаа д̇идтанд̇и. д̣̇увин̃н̃зяяан̃хи н̃аан̣зна д̣̇угког̇аал̣ханд̇и гад̇ваа ‘‘г̇амбхийра’’нд̇и вужжад̇и. буб̣б̣аабарамбзд̇т̇а гаасан̃жи г̇аат̇аанам̣ д̣̇увин̃н̃зяяад̇ааяа д̣̇угког̇аал̣хамзва, д̇асмаа д̇ам̣ ‘‘баал̣ивасзна г̇амбхийраа’’д̇и вуд̇д̇ам̣. иминаава наязна ‘‘ад̇т̇авасзна г̇амбхийраа’’д̇и зд̇т̇ааби ад̇т̇о взд̣̇ид̇аб̣б̣о. махаавзд̣̇алласуд̇д̇асса (ма. ни. 1.449 аад̣̇аяо) ад̇т̇авасзна г̇амбхийрад̇аа сувин̃н̃зяяаава. логам̣ уд̇д̇арад̇ийд̇и логуд̇д̇аро, нававид̇хо аббамаан̣ад̇хаммо. со ад̇т̇абхууд̇о зд̇зсам̣ ад̇т̇ийд̇и логуд̇д̇араа. д̇знааха ‘‘логуд̇д̇араад̇т̇ад̣̇ийбагаа’’д̇и.
48. Chaṭṭhe gambhīrāti agādhā dukkhogāḷhā. Pāḷivasenāti iminā yo dhammapaṭisambhidāya visayo gambhīrabhāvo, tamāha. Dhammappaṭivedhassa hi dukkarabhāvato dhammassa pāḷiyā dukkhogāḷhatāya gambhīrabhāvo. ‘‘Pāḷivasena gambhīrā’’ti vatvā ‘‘sallasuttasadisā’’ti vuttaṃ tassa ‘‘animittamanaññāta’’ntiādinā (su. ni. 579) pāḷivasena gambhīratāya labbhanato. Tathā hi tattha tā gāthā duviññeyyarūpā tiṭṭhanti. Duviññeyyañhi ñāṇena dukkhogāḷhanti katvā ‘‘gambhīra’’nti vuccati. Pubbāparampettha kāsañci gāthānaṃ duviññeyyatāya dukkhogāḷhameva, tasmā taṃ ‘‘pāḷivasena gambhīrā’’ti vuttaṃ. Imināva nayena ‘‘atthavasena gambhīrā’’ti etthāpi attho veditabbo. Mahāvedallasuttassa (ma. ni. 1.449 ādayo) atthavasena gambhīratā suviññeyyāva. Lokaṃ uttaratīti lokuttaro, navavidho appamāṇadhammo. So atthabhūto etesaṃ atthīti lokuttarā. Tenāha ‘‘lokuttaraatthadīpakā’’ti.
сад̇д̇асун̃н̃ам̣ д̇хаммамад̇д̇амзваад̇и сад̇д̇зна ад̇д̇анаа сун̃н̃ам̣ гзвалам̣ д̇хаммамад̇д̇амзва. уг̇г̇ахзд̇аб̣б̣ам̣ барияаабун̣ид̇аб̣б̣анд̇и лин̇г̇аважанавибаллаасзна вуд̇д̇анд̇и ааха ‘‘уг̇г̇ахзд̇аб̣б̣з жа барияаабун̣ид̇аб̣б̣з жаа’’д̇и. гавино гаммам̣ гавид̇аа. яам̣ банасса гаммам̣, д̇ам̣ д̇зна гад̇анд̇и вужжад̇ийд̇и ааха ‘‘гавид̇аад̇и гавийхи гад̇аа’’д̇и. ид̇аранд̇и гаавзяяаад̇и бад̣̇ам̣, гааб̣яанд̇и вуд̇д̇ам̣ ход̇и. гааб̣яанд̇и жа гавинаа вуд̇д̇анд̇и ад̇т̇о. д̇знааха ‘‘д̇ассзва взважана’’нд̇и. вижид̇раагкараад̇и вижид̇д̇аагаарагкараа вин̃н̃аабанийяаа. саасанад̇о б̣ахибхууд̇аад̇и на саасанааважараа. д̇зсам̣ саавагзхийд̇и б̣уд̣̇д̇хаанам̣ саавагаад̇и абан̃н̃аад̇аанам̣ язсам̣ гзсан̃жи саавагзхи. на жзва ан̃н̃аман̃н̃ам̣ бадибужчанд̇ийд̇и яз ваажзнд̇и, яз жа сун̣анд̇и, д̇з ан̃н̃аман̃н̃ам̣ ад̇т̇аад̣̇им̣ наббадибужчанд̇и, гзвалам̣ ваажанасаванамад̇д̇знзва барид̇удтаа хонд̇и. жааригам̣ на вижаранд̇ийд̇и асугасмим̣ таанз ад̇т̇аад̣̇им̣ ж̇аананд̇аа ад̇т̇ийд̇и бужчанад̇т̇ааяа жааригам̣ на г̇ажчанд̇и д̇аад̣̇исасса буг̇г̇аласса абхаавад̇о д̇асса жа буб̣б̣аабаравирод̇хад̇о. гат̇ам̣ робзд̇аб̣б̣анд̇и гзна багаарзна нигкибид̇аб̣б̣ам̣. ад̇т̇о наама сабхаавад̇о анусанд̇хид̇о самб̣анд̇хад̇о буб̣б̣аабарад̇о аад̣̇ибарияосаанад̇о жа н̃аад̇о саммаан̃аад̇о ход̇ийд̇и ааха ‘‘го ад̇т̇о’’д̇иаад̣̇и. ануд̇д̇аанийгад̇анд̇и агкарасаннивзсаад̣̇инаа ануд̇д̇аанийгад̇ам̣. ган̇кааяаад̇и сам̣саяасса.
Sattasuññaṃ dhammamattamevāti sattena attanā suññaṃ kevalaṃ dhammamattameva. Uggahetabbaṃ pariyāpuṇitabbanti liṅgavacanavipallāsena vuttanti āha ‘‘uggahetabbe ca pariyāpuṇitabbe cā’’ti. Kavino kammaṃ kavitā. Yaṃ panassa kammaṃ, taṃ tena katanti vuccatīti āha ‘‘kavitāti kavīhi katā’’ti. Itaranti kāveyyāti padaṃ, kābyanti vuttaṃ hoti. Kābyanti ca kavinā vuttanti attho. Tenāha ‘‘tasseva vevacana’’nti. Vicitraakkharāti vicittākārakkharā viññāpanīyā. Sāsanato bahibhūtāti na sāsanāvacarā. Tesaṃ sāvakehīti buddhānaṃ sāvakāti apaññātānaṃ yesaṃ kesañci sāvakehi. Na ceva aññamaññaṃ paṭipucchantīti ye vācenti, ye ca suṇanti, te aññamaññaṃ atthādiṃ nappaṭipucchanti, kevalaṃ vācanasavanamatteneva parituṭṭhā honti. Cārikaṃ na vicarantīti asukasmiṃ ṭhāne atthādiṃ jānantā atthīti pucchanatthāya cārikaṃ na gacchanti tādisassa puggalassa abhāvato tassa ca pubbāparavirodhato. Kathaṃ ropetabbanti kena pakārena nikkhipitabbaṃ. Attho nāma sabhāvato anusandhito sambandhato pubbāparato ādipariyosānato ca ñāto sammāñāto hotīti āha ‘‘ko attho’’tiādi. Anuttānīkatanti akkharasannivesādinā anuttānīkataṃ. Kaṅkhāyāti saṃsayassa.
49. сад̇д̇амз гилзсзхий аамасид̇аб̣б̣ад̇о аамисам̣, жад̇д̇ааро бажжаяаа. д̇ад̣̇зва г̇ару г̇аругаад̇аб̣б̣ам̣ зд̇зсам̣, на д̇хаммод̇и аамисаг̇аруу. д̇знааха ‘‘логуд̇д̇арад̇хаммам̣ лаамагад̇о г̇ахзд̇ваа тид̇абарисаа’’д̇и. убхад̇о бхааг̇ад̇о вимуд̇д̇од̇и убхад̇обхааг̇авимуд̇д̇о. д̣̇вийхи бхааг̇зхи д̣̇вз ваарз вимуд̇д̇о. бан̃н̃ааяа вимуд̇д̇од̇и самат̇асанниссаязна винаа аг̇г̇амаг̇г̇абан̃н̃ааяа вимуд̇д̇о. д̇знааха ‘‘сугкавибассагакийн̣аасаво’’д̇и . гааязнаад̇и наамагааязна. жхаанапассам̣ пусид̇ваад̇и адтасамаабад̇д̇исан̃н̃ид̇ам̣ жхаанапассам̣ ад̇хиг̇амавасзна пусид̇ваа. бажчаа нирод̇хам̣ ниб̣б̣аанам̣ яат̇аа ааложид̇ам̣ наамагааязна сажчигарод̇ийд̇и гааяасагкий. на д̇у вимуд̇д̇о згажжаанам̣ аасаваанам̣ абаригкийн̣ад̇д̇аа. д̣̇идтанд̇ам̣ бад̇д̇од̇и д̣̇идтасса анд̇о ананд̇аро гаало д̣̇идтанд̇о, д̣̇ассанасан̇каад̇асса сод̇аабад̇д̇имаг̇г̇ан̃аан̣асса ананд̇арам̣ бад̇д̇од̇и ад̇т̇о. батамапалад̇о бадтааяа хи яаава аг̇г̇амаг̇г̇аа д̣̇идтиббад̇д̇о. д̇знааха ‘‘имз д̣̇взби часу таанзсу лаб̣бханд̇ий’’д̇и.
49. Sattame kilesehī āmasitabbato āmisaṃ, cattāro paccayā. Tadeva garu garukātabbaṃ etesaṃ, na dhammoti āmisagarū. Tenāha ‘‘lokuttaradhammaṃ lāmakato gahetvā ṭhitaparisā’’ti. Ubhato bhāgato vimuttoti ubhatobhāgavimutto. Dvīhi bhāgehi dve vāre vimutto. Paññāya vimuttoti samathasannissayena vinā aggamaggapaññāya vimutto. Tenāha ‘‘sukkhavipassakakhīṇāsavo’’ti . Kāyenāti nāmakāyena. Jhānaphassaṃ phusitvāti aṭṭhasamāpattisaññitaṃ jhānaphassaṃ adhigamavasena phusitvā. Pacchā nirodhaṃ nibbānaṃ yathā ālocitaṃ nāmakāyena sacchikarotīti kāyasakkhī. Na tu vimutto ekaccānaṃ āsavānaṃ aparikkhīṇattā. Diṭṭhantaṃ pattoti diṭṭhassa anto anantaro kālo diṭṭhanto, dassanasaṅkhātassa sotāpattimaggañāṇassa anantaraṃ pattoti attho. Paṭhamaphalato paṭṭhāya hi yāva aggamaggā diṭṭhippatto. Tenāha ‘‘ime dvepi chasu ṭhānesu labbhantī’’ti.
сад̣̇д̣̇аханд̇о вимуд̇д̇од̇и зд̇зна саб̣б̣ат̇аа авимуд̇д̇асса сад̣̇д̇хаамад̇д̇зна вимуд̇д̇абхаавад̣̇ассанзна сад̣̇д̇хаавимуд̇д̇асса сзгкабхаавамзва вибхаавзд̇и. сад̣̇д̇хаавимуд̇д̇од̇и ваа сад̣̇д̇хааяа авимуд̇д̇од̇и ад̇т̇о. часу таанзсууд̇и батамапалад̇о бадтааяа часу таанзсу. д̇хаммам̣ ануссарад̇ийд̇и батамамаг̇г̇абан̃н̃аасан̇каад̇ам̣ д̇хаммам̣ ануссарад̇и. сад̣̇д̇хам̣ ануссарад̇ийд̇и зд̇т̇ааби зсзва наяо. убхоби хзд̇з сод̇аабад̇д̇имаг̇г̇адтааязва. имам̣ гасмаа г̇ан̣ханд̇ийд̇и звам̣ зганд̇абаасам̣сзсу ариязсу г̇аяхамаанзсу имам̣ зганд̇анинд̣̇ид̇ам̣ лаамагам̣ д̣̇уссийлам̣ гасмаа г̇ан̣ханд̇и. саб̣б̣зсу саб̣б̣ад̇аа сад̣̇исзсу лаб̣бхамааноби висзсо на бан̃н̃ааяад̇и, висабхааг̇з бана сад̇и зва бан̃н̃ааяад̇и бадабхаавзна вияа жид̇д̇абадассаад̇и ааха ‘‘згажжзсу банаа’’д̇иаад̣̇и. г̇ант̇ид̇аад̇и аваб̣ад̣̇д̇хаа. мужчид̇аад̇и мужчам̣ саммохам̣ аабаннаа. чанд̣̇арааг̇аабагад̣дханааяаад̇и чанд̣̇арааг̇асса абанаяанад̇т̇ам̣. ниссаран̣абан̃н̃ааяаад̇и д̇ад̇о ниссаран̣аавахааяа бан̃н̃ааяа вирахид̇аа.
Saddahanto vimuttoti etena sabbathā avimuttassa saddhāmattena vimuttabhāvadassanena saddhāvimuttassa sekkhabhāvameva vibhāveti. Saddhāvimuttoti vā saddhāya avimuttoti attho. Chasu ṭhānesūti paṭhamaphalato paṭṭhāya chasu ṭhānesu. Dhammaṃ anussaratīti paṭhamamaggapaññāsaṅkhātaṃ dhammaṃ anussarati. Saddhaṃ anussaratīti etthāpi eseva nayo. Ubhopi hete sotāpattimaggaṭṭhāyeva. Imaṃ kasmā gaṇhantīti evaṃ ekantapāsaṃsesu ariyesu gayhamānesu imaṃ ekantaninditaṃ lāmakaṃ dussīlaṃ kasmā gaṇhanti. Sabbesu sabbatā sadisesu labbhamānopi viseso na paññāyati, visabhāge pana sati eva paññāyati paṭabhāvena viya cittapaṭassāti āha ‘‘ekaccesu panā’’tiādi. Ganthitāti avabaddhā. Mucchitāti mucchaṃ sammohaṃ āpannā. Chandarāgaapakaḍḍhanāyāti chandarāgassa apanayanatthaṃ. Nissaraṇapaññāyāti tato nissaraṇāvahāya paññāya virahitā.
бан̃н̃аад̇хурзнаад̇и вибассанаабхинивзсзна. абхинивидтод̇и вибассанаамаг̇г̇ам̣ од̇ин̣н̣о. д̇асмим̣ кан̣зд̇и сод̇аабад̇д̇имаг̇г̇агкан̣з. д̇хаммаанусаарий наама бан̃н̃аасан̇каад̇зна д̇хаммзна арияамаг̇г̇асод̇асса ануссаран̣ад̇о. гааяасагкий наама наамагааязна сажчигаад̇аб̣б̣асса ниб̣б̣аанасса сажчигаран̣ад̇о. вигкамбханасамужчзд̣̇аанам̣ васзна д̣̇вигкад̇д̇ум̣. аруубаж̇жхаанзхи руубагааяад̇о, аг̇г̇амаг̇г̇зна сзсагааяад̇од̇и д̣̇вийхи бхааг̇зхи ниссаггаважанан̃жзд̇ам̣. д̣̇идтанд̇ам̣ бад̇д̇о, д̣̇идтад̇д̇аа ваа бад̇д̇од̇и д̣̇идтиббад̇д̇о. д̇ад̇т̇а д̣̇идтанд̇ам̣ бад̇д̇од̇и д̣̇ассанасан̇каад̇асса сод̇аабад̇д̇имаг̇г̇ан̃аан̣асса ананд̇арам̣ бад̇д̇од̇и ад̇т̇о. д̣̇идтад̇д̇аад̇и жад̇усажжад̣̇ассанасан̇каад̇ааяа бан̃н̃ааяа нирод̇хасса д̣̇идтад̇д̇аа. жхаанапассарахид̇ааяа саад̇исаяааяа бан̃н̃ааяа зва вимуд̇д̇од̇и бан̃н̃аавимуд̇д̇о. сзсам̣ вуд̇д̇анаяад̇д̇аа сувин̃н̃зяяамзва.
Paññādhurenāti vipassanābhinivesena. Abhiniviṭṭhoti vipassanāmaggaṃ otiṇṇo. Tasmiṃ khaṇeti sotāpattimaggakkhaṇe. Dhammānusārī nāma paññāsaṅkhātena dhammena ariyamaggasotassa anussaraṇato. Kāyasakkhī nāma nāmakāyena sacchikātabbassa nibbānassa sacchikaraṇato. Vikkhambhanasamucchedānaṃ vasena dvikkhattuṃ. Arūpajjhānehi rūpakāyato, aggamaggena sesakāyatoti dvīhi bhāgehi nissakkavacanañcetaṃ. Diṭṭhantaṃ patto, diṭṭhattā vā pattoti diṭṭhippatto. Tattha diṭṭhantaṃ pattoti dassanasaṅkhātassa sotāpattimaggañāṇassa anantaraṃ pattoti attho. Diṭṭhattāti catusaccadassanasaṅkhātāya paññāya nirodhassa diṭṭhattā. Jhānaphassarahitāya sātisayāya paññāya eva vimuttoti paññāvimutto. Sesaṃ vuttanayattā suviññeyyameva.
50. адтамз на самаад̇и висамаа. гааяагаммаад̣̇ийнам̣ висамад̇д̇аа д̇ад̇о зва д̇ад̇т̇а багкаланам̣ сулабханд̇и ааха ‘‘сабагкаланадтзнаа’’д̇и. ниббагкаланадтзнаад̇и багкаланаабхаавзна. уд̣̇д̇хаммаанийд̇и д̇хаммад̇о абзд̇аани. уб̣б̣инаяаанийд̇и зд̇т̇ааби зсзва наяо.
50. Aṭṭhame na samāti visamā. Kāyakammādīnaṃ visamattā tato eva tattha pakkhalanaṃ sulabhanti āha ‘‘sapakkhalanaṭṭhenā’’ti. Nippakkhalanaṭṭhenāti pakkhalanābhāvena. Uddhammānīti dhammato apetāni. Ubbinayānīti etthāpi eseva nayo.
51. навамз ад̇хаммигаад̇и ад̇хаммз нияуд̇д̇аа. д̇знааха ‘‘нид̣̇д̇хаммаа’’д̇и, д̇хаммарахид̇аад̇и ад̇т̇о.
51. Navame adhammikāti adhamme niyuttā. Tenāha ‘‘niddhammā’’ti, dhammarahitāti attho.
52. д̣̇асамз г̇ан̣ханд̇ийд̇и бавад̇д̇знд̇и. на жзва ан̃н̃аман̃н̃ам̣ сан̃н̃аабзнд̇ийд̇и муулад̇о бадтааяа д̇ам̣ ад̇хигаран̣ам̣ яат̇аа вуубасаммад̇и, звам̣ ан̃н̃аман̃н̃ам̣ ид̇арийд̇арз на саммаа ж̇аанаабзнд̇и. сан̃н̃аабанад̇т̇ам̣ саннибаад̇з сад̇и д̇ад̇т̇а яуд̇д̇абад̇д̇агаран̣зна сан̃н̃ад̇д̇ияаа бхавид̇аб̣б̣ам̣, д̇з бана сан̃н̃аабанад̇т̇ам̣ на саннибад̇анд̇и. на бзгкаабзнд̇ийд̇и д̇ам̣ ад̇хигаран̣ам̣ муулад̇о бадтааяа ан̃н̃аман̃н̃ам̣ на бзгкаабзнд̇и. асан̃н̃ад̇д̇иязва ад̇д̇анаа г̇ахид̇абагкасса б̣алам̣ зд̇зсанд̇и асан̃н̃ад̇д̇иб̣алаа. на д̇ат̇аа манд̇знд̇ийд̇и санд̣̇идтибараамаасиаад̇хаанаг̇г̇аахид̣̇уббадиниссаг̇г̇ибхаавзна д̇ат̇аа на манд̇знд̇и. д̇знааха ‘‘т̇аамасаа’’д̇иаад̣̇и. уд̇д̇аанад̇т̇оязва ган̣хабагкз вуд̇д̇аббадибагкзна г̇ахзд̇аб̣б̣ад̇д̇аа.
52. Dasame gaṇhantīti pavattenti. Na ceva aññamaññaṃ saññāpentīti mūlato paṭṭhāya taṃ adhikaraṇaṃ yathā vūpasammati, evaṃ aññamaññaṃ itarītare na sammā jānāpenti. Saññāpanatthaṃ sannipāte sati tattha yuttapattakaraṇena saññattiyā bhavitabbaṃ, te pana saññāpanatthaṃ na sannipatanti. Na pekkhāpentīti taṃ adhikaraṇaṃ mūlato paṭṭhāya aññamaññaṃ na pekkhāpenti. Asaññattiyeva attanā gahitapakkhassa balaṃ etesanti asaññattibalā. Na tathā mantentīti sandiṭṭhiparāmāsiādhānaggāhiduppaṭinissaggibhāvena tathā na mantenti. Tenāha ‘‘thāmasā’’tiādi. Uttānatthoyeva kaṇhapakkhe vuttappaṭipakkhena gahetabbattā.
барисаваг̇г̇аван̣н̣анаа нидтид̇аа.
Parisavaggavaṇṇanā niṭṭhitā.
батамабан̣н̣аасагам̣ нидтид̇ам̣.
Paṭhamapaṇṇāsakaṃ niṭṭhitaṃ.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 5. барисаваг̇г̇о • 5. Parisavaggo
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) / 5. барисаваг̇г̇аван̣н̣анаа • 5. Parisavaggavaṇṇanā
