| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༥. པརིསཝགྒོ
5. Parisavaggo
༤༣. ‘‘དྭེམཱ , བྷིཀྑཝེ, པརིསཱ། ཀཏམཱ དྭེ? ཨུཏྟཱནཱ ཙ པརིསཱ གམྦྷཱིརཱ ཙ པརིསཱ། ཀཏམཱ ཙ, བྷིཀྑཝེ, ཨུཏྟཱནཱ པརིསཱ? ཨིདྷ, བྷིཀྑཝེ, ཡསྶཾ པརིསཱཡཾ བྷིཀྑཱུ ཨུདྡྷཏཱ ཧོནྟི ཨུནྣལཱ༹ ཙཔལཱ མུཁརཱ ཝིཀིཎྞཝཱཙཱ མུཊྛསྶཏཱི ཨསམྤཛཱནཱ ཨསམཱཧིཏཱ ཝིབྦྷནྟཙིཏྟཱ པཱཀཏིནྡྲིཡཱ། ཨཡཾ ཝུཙྩཏི, བྷིཀྑཝེ, ཨུཏྟཱནཱ པརིསཱ།
43. ‘‘Dvemā , bhikkhave, parisā. Katamā dve? Uttānā ca parisā gambhīrā ca parisā. Katamā ca, bhikkhave, uttānā parisā? Idha, bhikkhave, yassaṃ parisāyaṃ bhikkhū uddhatā honti unnaḷā capalā mukharā vikiṇṇavācā muṭṭhassatī asampajānā asamāhitā vibbhantacittā pākatindriyā. Ayaṃ vuccati, bhikkhave, uttānā parisā.
‘‘ཀཏམཱ ཙ, བྷིཀྑཝེ, གམྦྷཱིརཱ པརིསཱ? ཨིདྷ, བྷིཀྑཝེ, ཡསྶཾ པརིསཱཡཾ བྷིཀྑཱུ ཨནུདྡྷཏཱ ཧོནྟི ཨནུནྣལཱ༹ ཨཙཔལཱ ཨམུཁརཱ ཨཝིཀིཎྞཝཱཙཱ ཨུཔཊྛིཏསྶཏཱི སམྤཛཱནཱ སམཱཧིཏཱ ཨེཀགྒཙིཏྟཱ སཾཝུཏིནྡྲིཡཱ། ཨཡཾ ཝུཙྩཏི , བྷིཀྑཝེ, གམྦྷཱིརཱ པརིསཱ། ཨིམཱ ཁོ, བྷིཀྑཝེ, དྭེ པརིསཱ། ཨེཏདགྒཾ, བྷིཀྑཝེ, ཨིམཱསཾ དྭིནྣཾ པརིསཱནཾ ཡདིདཾ གམྦྷཱིརཱ པརིསཱ’’ཏི།
‘‘Katamā ca, bhikkhave, gambhīrā parisā? Idha, bhikkhave, yassaṃ parisāyaṃ bhikkhū anuddhatā honti anunnaḷā acapalā amukharā avikiṇṇavācā upaṭṭhitassatī sampajānā samāhitā ekaggacittā saṃvutindriyā. Ayaṃ vuccati , bhikkhave, gambhīrā parisā. Imā kho, bhikkhave, dve parisā. Etadaggaṃ, bhikkhave, imāsaṃ dvinnaṃ parisānaṃ yadidaṃ gambhīrā parisā’’ti.
༤༤. ‘‘དྭེམཱ, བྷིཀྑཝེ, པརིསཱ། ཀཏམཱ དྭེ? ཝགྒཱ ཙ པརིསཱ སམགྒཱ ཙ པརིསཱ། ཀཏམཱ ཙ, བྷིཀྑཝེ, ཝགྒཱ པརིསཱ? ཨིདྷ, བྷིཀྑཝེ, ཡསྶཾ པརིསཱཡཾ བྷིཀྑཱུ བྷཎྜནཛཱཏཱ ཀལཧཛཱཏཱ ཝིཝཱདཱཔནྣཱ ཨཉྙམཉྙཾ མུཁསཏྟཱིཧི ཝིཏུདནྟཱ ཝིཧརནྟི། ཨཡཾ ཝུཙྩཏི, བྷིཀྑཝེ, ཝགྒཱ པརིསཱ།
44. ‘‘Dvemā, bhikkhave, parisā. Katamā dve? Vaggā ca parisā samaggā ca parisā. Katamā ca, bhikkhave, vaggā parisā? Idha, bhikkhave, yassaṃ parisāyaṃ bhikkhū bhaṇḍanajātā kalahajātā vivādāpannā aññamaññaṃ mukhasattīhi vitudantā viharanti. Ayaṃ vuccati, bhikkhave, vaggā parisā.
‘‘ཀཏམཱ ཙ, བྷིཀྑཝེ, སམགྒཱ པརིསཱ? ཨིདྷ, བྷིཀྑཝེ, ཡསྶཾ པརིསཱཡཾ བྷིཀྑཱུ སམགྒཱ སམྨོདམཱནཱ ཨཝིཝདམཱནཱ ཁཱིརོདཀཱིབྷཱུཏཱ ཨཉྙམཉྙཾ པིཡཙཀྑཱུཧི སམྤསྶནྟཱ ཝིཧརནྟི། ཨཡཾ ཝུཙྩཏི, བྷིཀྑཝེ, སམགྒཱ པརིསཱ། ཨིམཱ ཁོ, བྷིཀྑཝེ, དྭེ པརིསཱ། ཨེཏདགྒཾ, བྷིཀྑཝེ, ཨིམཱསཾ དྭིནྣཾ པརིསཱནཾ ཡདིདཾ སམགྒཱ པརིསཱ’’ཏི།
‘‘Katamā ca, bhikkhave, samaggā parisā? Idha, bhikkhave, yassaṃ parisāyaṃ bhikkhū samaggā sammodamānā avivadamānā khīrodakībhūtā aññamaññaṃ piyacakkhūhi sampassantā viharanti. Ayaṃ vuccati, bhikkhave, samaggā parisā. Imā kho, bhikkhave, dve parisā. Etadaggaṃ, bhikkhave, imāsaṃ dvinnaṃ parisānaṃ yadidaṃ samaggā parisā’’ti.
༤༥. ‘‘དྭེམཱ, བྷིཀྑཝེ, པརིསཱ། ཀཏམཱ དྭེ? ཨནགྒཝཏཱི ཙ པརིསཱ ཨགྒཝཏཱི ཙ པརིསཱ། ཀཏམཱ ཙ, བྷིཀྑཝེ, ཨནགྒཝཏཱི པརིསཱ? ཨིདྷ , བྷིཀྑཝེ, ཡསྶཾ པརིསཱཡཾ ཐེརཱ བྷིཀྑཱུ བཱཧུལིཀཱ 1 ཧོནྟི སཱཐལིཀཱ, ཨོཀྐམནེ པུབྦངྒམཱ, པཝིཝེཀེ ནིཀྑིཏྟདྷུརཱ, ན ཝཱིརིཡཾ ཨཱརབྷནྟི ཨཔྤཏྟསྶ པཏྟིཡཱ ཨནདྷིགཏསྶ ཨདྷིགམཱཡ ཨསཙྪིཀཏསྶ སཙྪིཀིརིཡཱཡ། ཏེསཾ པཙྪིམཱ ཛནཏཱ དིཊྛཱནུགཏིཾ ཨཱཔཛྫཏི། སཱཔི ཧོཏི བཱཧུལིཀཱ སཱཐལིཀཱ, ཨོཀྐམནེ པུབྦངྒམཱ, པཝིཝེཀེ ནིཀྑིཏྟདྷུརཱ, ན ཝཱིརིཡཾ ཨཱརབྷཏི ཨཔྤཏྟསྶ པཏྟིཡཱ ཨནདྷིགཏསྶ ཨདྷིགམཱཡ ཨསཙྪིཀཏསྶ སཙྪིཀིརིཡཱཡ། ཨཡཾ ཝུཙྩཏི, བྷིཀྑཝེ, ཨནགྒཝཏཱི པརིསཱ།
45. ‘‘Dvemā, bhikkhave, parisā. Katamā dve? Anaggavatī ca parisā aggavatī ca parisā. Katamā ca, bhikkhave, anaggavatī parisā? Idha , bhikkhave, yassaṃ parisāyaṃ therā bhikkhū bāhulikā 2 honti sāthalikā, okkamane pubbaṅgamā, paviveke nikkhittadhurā, na vīriyaṃ ārabhanti appattassa pattiyā anadhigatassa adhigamāya asacchikatassa sacchikiriyāya. Tesaṃ pacchimā janatā diṭṭhānugatiṃ āpajjati. Sāpi hoti bāhulikā sāthalikā, okkamane pubbaṅgamā, paviveke nikkhittadhurā, na vīriyaṃ ārabhati appattassa pattiyā anadhigatassa adhigamāya asacchikatassa sacchikiriyāya. Ayaṃ vuccati, bhikkhave, anaggavatī parisā.
‘‘ཀཏམཱ ཙ, བྷིཀྑཝེ, ཨགྒཝཏཱི པརིསཱ? ཨིདྷ, བྷིཀྑཝེ, ཡསྶཾ པརིསཱཡཾ ཐེརཱ བྷིཀྑཱུ ན བཱཧུལིཀཱ ཧོནྟི ན སཱཐལིཀཱ, ཨོཀྐམནེ ནིཀྑིཏྟདྷུརཱ, པཝིཝེཀེ པུབྦངྒམཱ, ཝཱིརིཡཾ ཨཱརབྷནྟི ཨཔྤཏྟསྶ པཏྟིཡཱ ཨནདྷིགཏསྶ ཨདྷིགམཱཡ ཨསཙྪིཀཏསྶ སཙྪིཀིརིཡཱཡ། ཏེསཾ པཙྪིམཱ ཛནཏཱ དིཊྛཱནུགཏིཾ ཨཱཔཛྫཏི། སཱཔི ཧོཏི ན བཱཧུལིཀཱ ན སཱཐལིཀཱ, ཨོཀྐམནེ ནིཀྑིཏྟདྷུརཱ, པཝིཝེཀེ པུབྦངྒམཱ, ཝཱིརིཡཾ ཨཱརབྷཏི ཨཔྤཏྟསྶ པཏྟིཡཱ ཨནདྷིགཏསྶ ཨདྷིགམཱཡ ཨསཙྪིཀཏསྶ སཙྪིཀིརིཡཱཡ། ཨཡཾ ཝུཙྩཏི, བྷིཀྑཝེ, ཨགྒཝཏཱི པརིསཱ། ཨིམཱ ཁོ, བྷིཀྑཝེ, དྭེ པརིསཱ། ཨེཏདགྒཾ, བྷིཀྑཝེ, ཨིམཱསཾ དྭིནྣཾ པརིསཱནཾ ཡདིདཾ ཨགྒཝཏཱི པརིསཱ’’ཏི།
‘‘Katamā ca, bhikkhave, aggavatī parisā? Idha, bhikkhave, yassaṃ parisāyaṃ therā bhikkhū na bāhulikā honti na sāthalikā, okkamane nikkhittadhurā, paviveke pubbaṅgamā, vīriyaṃ ārabhanti appattassa pattiyā anadhigatassa adhigamāya asacchikatassa sacchikiriyāya. Tesaṃ pacchimā janatā diṭṭhānugatiṃ āpajjati. Sāpi hoti na bāhulikā na sāthalikā, okkamane nikkhittadhurā, paviveke pubbaṅgamā, vīriyaṃ ārabhati appattassa pattiyā anadhigatassa adhigamāya asacchikatassa sacchikiriyāya. Ayaṃ vuccati, bhikkhave, aggavatī parisā. Imā kho, bhikkhave, dve parisā. Etadaggaṃ, bhikkhave, imāsaṃ dvinnaṃ parisānaṃ yadidaṃ aggavatī parisā’’ti.
༤༦. ‘‘དྭེམཱ, བྷིཀྑཝེ, པརིསཱ། ཀཏམཱ དྭེ? ཨནརིཡཱ ཙ པརིསཱ ཨརིཡཱ ཙ པརིསཱ། ཀཏམཱ ཙ, བྷིཀྑཝེ, ཨནརིཡཱ པརིསཱ? ཨིདྷ, བྷིཀྑཝེ, ཡསྶཾ པརིསཱཡཾ བྷིཀྑཱུ ‘ཨིདཾ དུཀྑ’ནྟི ཡཐཱབྷཱུཏཾ ནཔྤཛཱནནྟི, ‘ཨཡཾ དུཀྑསམུདཡོ’ཏི ཡཐཱབྷཱུཏཾ ནཔྤཛཱནནྟི, ‘ཨཡཾ དུཀྑནིརོདྷོ’ཏི ཡཐཱབྷཱུཏཾ ནཔྤཛཱནནྟི , ‘ཨཡཾ དུཀྑནིརོདྷགཱམིནཱི པཊིཔདཱ’ཏི ཡཐཱབྷཱུཏཾ ནཔྤཛཱནནྟི། ཨཡཾ ཝུཙྩཏི, བྷིཀྑཝེ, ཨནརིཡཱ པརིསཱ།
46. ‘‘Dvemā, bhikkhave, parisā. Katamā dve? Anariyā ca parisā ariyā ca parisā. Katamā ca, bhikkhave, anariyā parisā? Idha, bhikkhave, yassaṃ parisāyaṃ bhikkhū ‘idaṃ dukkha’nti yathābhūtaṃ nappajānanti, ‘ayaṃ dukkhasamudayo’ti yathābhūtaṃ nappajānanti, ‘ayaṃ dukkhanirodho’ti yathābhūtaṃ nappajānanti , ‘ayaṃ dukkhanirodhagāminī paṭipadā’ti yathābhūtaṃ nappajānanti. Ayaṃ vuccati, bhikkhave, anariyā parisā.
‘‘ཀཏམཱ ཙ, བྷིཀྑཝེ, ཨརིཡཱ པརིསཱ? ཨིདྷ, བྷིཀྑཝེ, ཡསྶཾ པརིསཱཡཾ བྷིཀྑཱུ ‘ཨིདཾ དུཀྑ’ནྟི ཡཐཱབྷཱུཏཾ པཛཱནནྟི, ‘ཨཡཾ དུཀྑསམུདཡོ’ཏི ཡཐཱབྷཱུཏཾ པཛཱནནྟི, ‘ཨཡཾ དུཀྑནིརོདྷོ’ཏི ཡཐཱབྷཱུཏཾ པཛཱནནྟྣྟྟི , ‘ཨཡཾ དུཀྑནིརོདྷགཱམིནཱི པཊིཔདཱ’ཏི ཡཐཱབྷཱུཏཾ པཛཱནནྟི། ཨཡཾ ཝུཙྩཏི, བྷིཀྑཝེ, ཨརིཡཱ པརིསཱ། ཨིམཱ ཁོ, བྷིཀྑཝེ, དྭེ པརིསཱ། ཨེཏདགྒཾ, བྷིཀྑཝེ, ཨིམཱསཾ དྭིནྣཾ པརིསཱནཾ ཡདིདཾ ཨརིཡཱ པརིསཱ’’ཏི།
‘‘Katamā ca, bhikkhave, ariyā parisā? Idha, bhikkhave, yassaṃ parisāyaṃ bhikkhū ‘idaṃ dukkha’nti yathābhūtaṃ pajānanti, ‘ayaṃ dukkhasamudayo’ti yathābhūtaṃ pajānanti, ‘ayaṃ dukkhanirodho’ti yathābhūtaṃ pajānantntti , ‘ayaṃ dukkhanirodhagāminī paṭipadā’ti yathābhūtaṃ pajānanti. Ayaṃ vuccati, bhikkhave, ariyā parisā. Imā kho, bhikkhave, dve parisā. Etadaggaṃ, bhikkhave, imāsaṃ dvinnaṃ parisānaṃ yadidaṃ ariyā parisā’’ti.
༤༧. ‘‘དྭེམཱ, བྷིཀྑཝེ, པརིསཱ། ཀཏམཱ དྭེ? པརིསཱཀསཊོ ཙ པརིསཱམཎྜོ ཙ། ཀཏམོ ཙ, བྷིཀྑཝེ, པརིསཱཀསཊོ? ཨིདྷ, བྷིཀྑཝེ, ཡསྶཾ པརིསཱཡཾ བྷིཀྑཱུ ཚནྡཱགཏིཾ གཙྪནྟི, དོསཱགཏིཾ གཙྪནྟི, མོཧཱགཏིཾ གཙྪནྟི, བྷཡཱགཏིཾ གཙྪནྟི། ཨཡཾ ཝུཙྩཏི, བྷིཀྑཝེ, པརིསཱཀསཊོ།
47. ‘‘Dvemā, bhikkhave, parisā. Katamā dve? Parisākasaṭo ca parisāmaṇḍo ca. Katamo ca, bhikkhave, parisākasaṭo? Idha, bhikkhave, yassaṃ parisāyaṃ bhikkhū chandāgatiṃ gacchanti, dosāgatiṃ gacchanti, mohāgatiṃ gacchanti, bhayāgatiṃ gacchanti. Ayaṃ vuccati, bhikkhave, parisākasaṭo.
‘‘ཀཏམོ ཙ, བྷིཀྑཝེ, པརིསཱམཎྜོ? ཨིདྷ, བྷིཀྑཝེ, ཡསྶཾ པརིསཱཡཾ བྷིཀྑཱུ ན ཚནྡཱགཏིཾ གཙྪནྟི, ན དོསཱགཏིཾ གཙྪནྟི, ན མོཧཱགཏིཾ གཙྪནྟི, ན བྷཡཱགཏིཾ གཙྪནྟི། ཨཡཾ ཝུཙྩཏི, བྷིཀྑཝེ, པརིསཱམཎྜོ། ཨིམཱ ཁོ, བྷིཀྑཝེ, དྭེ པརིསཱ། ཨེཏདགྒཾ, བྷིཀྑཝེ, ཨིམཱསཾ དྭིནྣཾ པརིསཱནཾ ཡདིདཾ པརིསཱམཎྜོ’’ཏི།
‘‘Katamo ca, bhikkhave, parisāmaṇḍo? Idha, bhikkhave, yassaṃ parisāyaṃ bhikkhū na chandāgatiṃ gacchanti, na dosāgatiṃ gacchanti, na mohāgatiṃ gacchanti, na bhayāgatiṃ gacchanti. Ayaṃ vuccati, bhikkhave, parisāmaṇḍo. Imā kho, bhikkhave, dve parisā. Etadaggaṃ, bhikkhave, imāsaṃ dvinnaṃ parisānaṃ yadidaṃ parisāmaṇḍo’’ti.
༤༨. ‘‘དྭེམཱ, བྷིཀྑཝེ, པརིསཱ། ཀཏམཱ དྭེ? ཨོཀྐཱཙིཏཝིནཱིཏཱ པརིསཱ ནོཔཊིཔུཙྪཱཝིནཱིཏཱ, པཊིཔུཙྪཱཝིནཱིཏཱ པརིསཱ ནོཨོཀྐཱཙིཏཝིནཱིཏཱ། ཀཏམཱ ཙ, བྷིཀྑཝེ, ཨོཀྐཱཙིཏཝིནཱིཏཱ པརིསཱ ནོཔཊིཔུཙྪཱཝིནཱིཏཱ? ཨིདྷ, བྷིཀྑཝེ, ཡསྶཾ པརིསཱཡཾ བྷིཀྑཱུ ཡེ ཏེ སུཏྟནྟཱ ཏཐཱགཏབྷཱསིཏཱ གམྦྷཱིརཱ གམྦྷཱིརཏྠཱ ལོཀུཏྟརཱ སུཉྙཏཱཔཊིསཾཡུཏྟཱ ཏེསུ བྷཉྙམཱནེསུ ན སུསྶཱུསནྟི ན སོཏཾ ཨོདཧནྟི ན ཨཉྙཱ ཙིཏྟཾ ཨུཔཊྛཔེནྟི ན ཙ ཏེ དྷམྨེ ཨུགྒཧེཏབྦཾ པརིཡཱཔུཎིཏབྦཾ མཉྙནྟི། ཡེ པན ཏེ སུཏྟནྟཱ ཀཝིཏཱ 3 ཀཱཝེཡྻཱ ཙིཏྟཀྑརཱ ཙིཏྟབྱཉྫནཱ བཱཧིརཀཱ སཱཝཀབྷཱསིཏཱ ཏེསུ བྷཉྙམཱནེསུ སུསྶཱུསནྟི སོཏཾ ཨོདཧནྟི ཨཉྙཱ ཙིཏྟཾ ཨུཔཊྛཔེནྟི, ཏེ དྷམྨེ ཨུགྒཧེཏབྦཾ པརིཡཱཔུཎིཏབྦཾ མཉྙནྟི, ཏེ ཙ ཏཾ དྷམྨཾ པརིཡཱཔུཎིཏྭཱ ན ཙེཝ ཨཉྙམཉྙཾ པཊིཔུཙྪནྟི ན ཙ པཊིཝིཙརནྟི – ‘ཨིདཾ ཀཐཾ, ཨིམསྶ ཀོ ཨཏྠོ’ཏི? ཏེ ཨཝིཝཊཉྩེཝ ན ཝིཝརནྟི, ཨནུཏྟཱནཱིཀཏཉྩ ན ཨུཏྟཱནཱིཀརོནྟི, ཨནེཀཝིཧིཏེསུ ཙ ཀངྑཱཋཱནིཡེསུ དྷམྨེསུ ཀངྑཾ ན པཊིཝིནོདེནྟི། ཨཡཾ ཝུཙྩཏི, བྷིཀྑཝེ, ཨོཀྐཱཙིཏཝིནཱིཏཱ པརིསཱ ནོ པཊིཔུཙྪཱཝིནཱིཏཱ།
48. ‘‘Dvemā, bhikkhave, parisā. Katamā dve? Okkācitavinītā parisā nopaṭipucchāvinītā, paṭipucchāvinītā parisā nookkācitavinītā. Katamā ca, bhikkhave, okkācitavinītā parisā nopaṭipucchāvinītā? Idha, bhikkhave, yassaṃ parisāyaṃ bhikkhū ye te suttantā tathāgatabhāsitā gambhīrā gambhīratthā lokuttarā suññatāpaṭisaṃyuttā tesu bhaññamānesu na sussūsanti na sotaṃ odahanti na aññā cittaṃ upaṭṭhapenti na ca te dhamme uggahetabbaṃ pariyāpuṇitabbaṃ maññanti. Ye pana te suttantā kavitā 4 kāveyyā cittakkharā cittabyañjanā bāhirakā sāvakabhāsitā tesu bhaññamānesu sussūsanti sotaṃ odahanti aññā cittaṃ upaṭṭhapenti, te dhamme uggahetabbaṃ pariyāpuṇitabbaṃ maññanti, te ca taṃ dhammaṃ pariyāpuṇitvā na ceva aññamaññaṃ paṭipucchanti na ca paṭivicaranti – ‘idaṃ kathaṃ, imassa ko attho’ti? Te avivaṭañceva na vivaranti, anuttānīkatañca na uttānīkaronti, anekavihitesu ca kaṅkhāṭhāniyesu dhammesu kaṅkhaṃ na paṭivinodenti. Ayaṃ vuccati, bhikkhave, okkācitavinītā parisā no paṭipucchāvinītā.
‘‘ཀཏམཱ ཙ, བྷིཀྑཝེ, པཊིཔུཙྪཱཝིནཱིཏཱ པརིསཱ ནོཨོཀྐཱཙིཏཝིནཱིཏཱ? ཨིདྷ, བྷིཀྑཝེ, ཡསྶཾ པརིསཱཡཾ བྷིཀྑཱུ ཡེ ཏེ སུཏྟནྟཱ ཀཝིཏཱ ཀཱཝེཡྻཱ ཙིཏྟཀྑརཱ ཙིཏྟབྱཉྫནཱ བཱཧིརཀཱ སཱཝཀབྷཱསིཏཱ ཏེསུ བྷཉྙམཱནེསུ ན སུསྶཱུསནྟི ན སོཏཾ ཨོདཧནྟི ན ཨཉྙཱ ཙིཏྟཾ ཨུཔཊྛཔེནྟི, ན ཙ ཏེ དྷམྨེ ཨུགྒཧེཏབྦཾ པརིཡཱཔུཎིཏབྦཾ མཉྙནྟི། ཡེ པན ཏེ སུཏྟནྟཱ ཏཐཱགཏབྷཱསིཏཱ གམྦྷཱིརཱ གམྦྷཱིརཏྠཱ ལོཀུཏྟརཱ སུཉྙཏཱཔཊིསཾཡུཏྟཱ ཏེསུ བྷཉྙམཱནེསུ སུསྶཱུསནྟི སོཏཾ ཨོདཧནྟི ཨཉྙཱ ཙིཏྟཾ ཨུཔཊྛཔེནྟི, ཏེ ཙ དྷམྨེ ཨུགྒཧེཏབྦཾ པརིཡཱཔུཎིཏབྦཾ མཉྙནྟི། ཏེ ཏཾ དྷམྨཾ པརིཡཱཔུཎིཏྭཱ ཨཉྙམཉྙཾ པཊིཔུཙྪནྟི པཊིཝིཙརནྟི – ‘ཨིདཾ ཀཐཾ, ཨིམསྶ ཀོ ཨཏྠོ’ཏི? ཏེ ཨཝིཝཊཉྩེཝ ཝིཝརནྟི, ཨནུཏྟཱནཱིཀཏཉྩ ཨུཏྟཱནཱིཀརོནྟི, ཨནེཀཝིཧིཏེསུ ཙ ཀངྑཱཋཱནིཡེསུ དྷམྨེསུ ཀངྑཾ པཊིཝིནོདེནྟི། ཨཡཾ ཝུཙྩཏི, བྷིཀྑཝེ, པཊིཔུཙྪཱཝིནཱིཏཱ པརིསཱ ནོཨོཀྐཱཙིཏཝིནཱིཏཱ། ཨིམཱ ཁོ, བྷིཀྑཝེ, དྭེ པརིསཱ། ཨེཏདགྒཾ, བྷིཀྑཝེ, ཨིམཱསཾ དྭིནྣཾ པརིསཱནཾ ཡདིདཾ པཊིཔུཙྪཱཝིནཱིཏཱ པརིསཱ ནོཨོཀྐཱཙིཏཝིནཱིཏཱ’’ཏི།
‘‘Katamā ca, bhikkhave, paṭipucchāvinītā parisā nookkācitavinītā? Idha, bhikkhave, yassaṃ parisāyaṃ bhikkhū ye te suttantā kavitā kāveyyā cittakkharā cittabyañjanā bāhirakā sāvakabhāsitā tesu bhaññamānesu na sussūsanti na sotaṃ odahanti na aññā cittaṃ upaṭṭhapenti, na ca te dhamme uggahetabbaṃ pariyāpuṇitabbaṃ maññanti. Ye pana te suttantā tathāgatabhāsitā gambhīrā gambhīratthā lokuttarā suññatāpaṭisaṃyuttā tesu bhaññamānesu sussūsanti sotaṃ odahanti aññā cittaṃ upaṭṭhapenti, te ca dhamme uggahetabbaṃ pariyāpuṇitabbaṃ maññanti. Te taṃ dhammaṃ pariyāpuṇitvā aññamaññaṃ paṭipucchanti paṭivicaranti – ‘idaṃ kathaṃ, imassa ko attho’ti? Te avivaṭañceva vivaranti, anuttānīkatañca uttānīkaronti, anekavihitesu ca kaṅkhāṭhāniyesu dhammesu kaṅkhaṃ paṭivinodenti. Ayaṃ vuccati, bhikkhave, paṭipucchāvinītā parisā nookkācitavinītā. Imā kho, bhikkhave, dve parisā. Etadaggaṃ, bhikkhave, imāsaṃ dvinnaṃ parisānaṃ yadidaṃ paṭipucchāvinītā parisā nookkācitavinītā’’ti.
༤༩. ‘‘དྭེམཱ, བྷིཀྑཝེ, པརིསཱ། ཀཏམཱ དྭེ? ཨཱམིསགརུ པརིསཱ ནོ སདྡྷམྨགརུ, སདྡྷམྨགརུ པརིསཱ ནོ ཨཱམིསགརུ། ཀཏམཱ ཙ, བྷིཀྑཝེ, ཨཱམིསགརུ པརིསཱ ནོ སདྡྷམྨགརུ? ཨིདྷ, བྷིཀྑཝེ, ཡསྶཾ པརིསཱཡཾ བྷིཀྑཱུ གིཧཱིནཾ ཨོདཱཏཝསནཱནཾ སམྨུཁཱ ཨཉྙམཉྙསྶ ཝཎྞཾ བྷཱསནྟི – ‘ཨསུཀོ བྷིཀྑུ ཨུབྷཏོབྷཱགཝིམུཏྟོ, ཨསུཀོ པཉྙཱཝིམུཏྟོ , ཨསུཀོ ཀཱཡསཀྑཱི , ཨསུཀོ དིཊྛིཔྤཏྟོ, ཨསུཀོ སདྡྷཱཝིམུཏྟོ, ཨསུཀོ དྷམྨཱནུསཱརཱི, ཨསུཀོ སདྡྷཱནུསཱརཱི, ཨསུཀོ སཱིལཝཱ ཀལྱཱཎདྷམྨོ, ཨསུཀོ དུསྶཱིལོ པཱཔདྷམྨོ’ཏི། ཏེ ཏེན ལཱབྷཾ ལབྷནྟི། ཏེ ཏཾ ལཱབྷཾ ལབྷིཏྭཱ གཐིཏཱ 5 མུཙྪིཏཱ ཨཛ྄ཛྷོཔནྣཱ 6 ཨནཱདཱིནཝདསྶཱཝིནོ ཨནིསྶརཎཔཉྙཱ པརིབྷུཉྫནྟི། ཨཡཾ ཝུཙྩཏི, བྷིཀྑཝེ, ཨཱམིསགརུ པརིསཱ ནོ སདྡྷམྨགརུ།
49. ‘‘Dvemā, bhikkhave, parisā. Katamā dve? Āmisagaru parisā no saddhammagaru, saddhammagaru parisā no āmisagaru. Katamā ca, bhikkhave, āmisagaru parisā no saddhammagaru? Idha, bhikkhave, yassaṃ parisāyaṃ bhikkhū gihīnaṃ odātavasanānaṃ sammukhā aññamaññassa vaṇṇaṃ bhāsanti – ‘asuko bhikkhu ubhatobhāgavimutto, asuko paññāvimutto , asuko kāyasakkhī , asuko diṭṭhippatto, asuko saddhāvimutto, asuko dhammānusārī, asuko saddhānusārī, asuko sīlavā kalyāṇadhammo, asuko dussīlo pāpadhammo’ti. Te tena lābhaṃ labhanti. Te taṃ lābhaṃ labhitvā gathitā 7 mucchitā ajjhopannā 8 anādīnavadassāvino anissaraṇapaññā paribhuñjanti. Ayaṃ vuccati, bhikkhave, āmisagaru parisā no saddhammagaru.
‘‘ཀཏམཱ ཙ, བྷིཀྑཝེ, སདྡྷམྨགརུ པརིསཱ ནོཨཱམིསགརུ? ཨིདྷ, བྷིཀྑཝེ, ཡསྶཾ པརིསཱཡཾ བྷིཀྑཱུ གིཧཱིནཾ ཨོདཱཏཝསནཱནཾ སམྨུཁཱ ཨཉྙམཉྙསྶ ཝཎྞཾ ན བྷཱསནྟི – ‘ཨསུཀོ བྷིཀྑུ ཨུབྷཏོབྷཱགཝིམུཏྟོ, ཨསུཀོ པཉྙཱཝིམུཏྟོ, ཨསུཀོ ཀཱཡསཀྑཱི, ཨསུཀོ དིཊྛིཔྤཏྟོ, ཨསུཀོ སདྡྷཱཝིམུཏྟོ, ཨསུཀོ དྷམྨཱནུསྶཱརཱི, ཨསུཀོ སདྡྷཱནུསཱརཱི, ཨསུཀོ སཱིལཝཱ ཀལྱཱཎདྷམྨོ, ཨསུཀོ དུསྶཱིལོ པཱཔདྷམྨོ’ཏི། ཏེ ཏེན ལཱབྷཾ ལབྷནྟི། ཏེ ཏཾ ལཱབྷཾ ལབྷིཏྭཱ ཨགཐིཏཱ ཨམུཙྪིཏཱ ཨནཛ྄ཛྷོསནྣཱ ཨཱདཱིནཝདསྶཱཝིནོ ནིསྶརཎཔཉྙཱ པརིབྷུཉྫནྟི། ཨཡཾ ཝུཙྩཏི, བྷིཀྑཝེ, སདྡྷམྨགརུ པརིསཱ ནོཨཱམིསགརུ། ཨིམཱ ཁོ, བྷིཀྑཝེ, དྭེ པརིསཱ། ཨེཏདགྒཾ, བྷིཀྑཝེ, ཨིམཱསཾ དྭིནྣཾ པརིསཱནཾ ཡདིདཾ སདྡྷམྨགརུ པརིསཱ ནོཨཱམིསགརཱུ’’ཏི།
‘‘Katamā ca, bhikkhave, saddhammagaru parisā noāmisagaru? Idha, bhikkhave, yassaṃ parisāyaṃ bhikkhū gihīnaṃ odātavasanānaṃ sammukhā aññamaññassa vaṇṇaṃ na bhāsanti – ‘asuko bhikkhu ubhatobhāgavimutto, asuko paññāvimutto, asuko kāyasakkhī, asuko diṭṭhippatto, asuko saddhāvimutto, asuko dhammānussārī, asuko saddhānusārī, asuko sīlavā kalyāṇadhammo, asuko dussīlo pāpadhammo’ti. Te tena lābhaṃ labhanti. Te taṃ lābhaṃ labhitvā agathitā amucchitā anajjhosannā ādīnavadassāvino nissaraṇapaññā paribhuñjanti. Ayaṃ vuccati, bhikkhave, saddhammagaru parisā noāmisagaru. Imā kho, bhikkhave, dve parisā. Etadaggaṃ, bhikkhave, imāsaṃ dvinnaṃ parisānaṃ yadidaṃ saddhammagaru parisā noāmisagarū’’ti.
༥༠. ‘‘དྭེམཱ, བྷིཀྑཝེ, པརིསཱ། ཀཏམཱ དྭེ? ཝིསམཱ ཙ པརིསཱ སམཱ ཙ པརིསཱ། ཀཏམཱ ཙ, བྷིཀྑཝེ, ཝིསམཱ པརིསཱ? ཨིདྷ, བྷིཀྑཝེ, ཡསྶཾ པརིསཱཡཾ ཨདྷམྨཀམྨཱནི པཝཏྟནྟི དྷམྨཀམྨཱནི ནཔྤཝཏྟནྟི , ཨཝིནཡཀམྨཱནི པཝཏྟནྟི ཝིནཡཀམྨཱནི ནཔྤཝཏྟནྟི, ཨདྷམྨཀམྨཱནི དིཔྤནྟི དྷམྨཀམྨཱནི ན དིཔྤནྟི, ཨཝིནཡཀམྨཱནི དིཔྤནྟི ཝིནཡཀམྨཱནི ན དིཔྤནྟི། ཨཡཾ ཝུཙྩཏི, བྷིཀྑཝེ, ཝིསམཱ པརིསཱ། ( ) 9
50. ‘‘Dvemā, bhikkhave, parisā. Katamā dve? Visamā ca parisā samā ca parisā. Katamā ca, bhikkhave, visamā parisā? Idha, bhikkhave, yassaṃ parisāyaṃ adhammakammāni pavattanti dhammakammāni nappavattanti , avinayakammāni pavattanti vinayakammāni nappavattanti, adhammakammāni dippanti dhammakammāni na dippanti, avinayakammāni dippanti vinayakammāni na dippanti. Ayaṃ vuccati, bhikkhave, visamā parisā. ( ) 10
‘‘ཀཏམཱ ཙ, བྷིཀྑཝེ, སམཱ པརིསཱ? ཨིདྷ, བྷིཀྑཝེ, ཡསྶཾ པརིསཱཡཾ དྷམྨཀམྨཱནི པཝཏྟནྟི ཨདྷམྨཀམྨཱནི ནཔྤཝཏྟནྟི, ཝིནཡཀམྨཱནི པཝཏྟནྟི ཨཝིནཡཀམྨཱནི ནཔྤཝཏྟནྟི, དྷམྨཀམྨཱནི དིཔྤནྟི ཨདྷམྨཀམྨཱནི ན དིཔྤནྟི, ཝིནཡཀམྨཱནི དིཔྤནྟི ཨཝིནཡཀམྨཱནི ན དིཔྤནྟི། ཨཡཾ ཝུཙྩཏི, བྷིཀྑཝེ, སམཱ པརིསཱ། ( ) 11 ཨིམཱ ཁོ, བྷིཀྑཝེ, དྭེ པརིསཱ། ཨེཏདགྒཾ, བྷིཀྑཝེ, ཨིམཱསཾ དྭིནྣཾ པརིསཱནཾ ཡདིདཾ སམཱ པརིསཱ’’ཏི།
‘‘Katamā ca, bhikkhave, samā parisā? Idha, bhikkhave, yassaṃ parisāyaṃ dhammakammāni pavattanti adhammakammāni nappavattanti, vinayakammāni pavattanti avinayakammāni nappavattanti, dhammakammāni dippanti adhammakammāni na dippanti, vinayakammāni dippanti avinayakammāni na dippanti. Ayaṃ vuccati, bhikkhave, samā parisā. ( ) 12 Imā kho, bhikkhave, dve parisā. Etadaggaṃ, bhikkhave, imāsaṃ dvinnaṃ parisānaṃ yadidaṃ samā parisā’’ti.
༥༡. ‘‘དྭེམཱ, བྷིཀྑཝེ, པརིསཱ། ཀཏམཱ དྭེ? ཨདྷམྨིཀཱ ཙ པརིསཱ དྷམྨིཀཱ ཙ པརིསཱ…པེ॰… ཨིམཱ ཁོ, བྷིཀྑཝེ, དྭེ པརིསཱ། ཨེཏདགྒཾ, བྷིཀྑཝེ, ཨིམཱསཾ དྭིནྣཾ པརིསཱནཾ ཡདིདཾ དྷམྨིཀཱ པརིསཱ’’ཏི།
51. ‘‘Dvemā, bhikkhave, parisā. Katamā dve? Adhammikā ca parisā dhammikā ca parisā…pe… imā kho, bhikkhave, dve parisā. Etadaggaṃ, bhikkhave, imāsaṃ dvinnaṃ parisānaṃ yadidaṃ dhammikā parisā’’ti.
༥༢. ‘‘དྭེམཱ, བྷིཀྑཝེ, པརིསཱ། ཀཏམཱ དྭེ? ཨདྷམྨཝཱདིནཱི ཙ པརིསཱ དྷམྨཝཱདིནཱི ཙ པརིསཱ། ཀཏམཱ ཙ, བྷིཀྑཝེ, ཨདྷམྨཝཱདིནཱི པརིསཱ? ཨིདྷ, བྷིཀྑཝེ, ཡསྶཾ པརིསཱཡཾ བྷིཀྑཱུ ཨདྷིཀརཎཾ ཨཱདིཡནྟི དྷམྨིཀཾ ཝཱ ཨདྷམྨིཀཾ ཝཱ། ཏེ ཏཾ ཨདྷིཀརཎཾ ཨཱདིཡིཏྭཱ ན ཙེཝ ཨཉྙམཉྙཾ སཉྙཱཔེནྟི ན ཙ སཉྙཏྟིཾ ཨུཔགཙྪནྟི, ན ཙ ནིཛ྄ཛྷཱཔེནྟི ན ཙ ནིཛ྄ཛྷཏྟིཾ ཨུཔགཙྪནྟི། ཏེ ཨསཉྙཏྟིབལཱ ཨནིཛ྄ཛྷཏྟིབལཱ ཨཔྤཊིནིསྶགྒམནྟིནོ ཏམེཝ ཨདྷིཀརཎཾ ཐཱམསཱ པརཱམཱསཱ 13 ཨབྷིནིཝིསྶ ཝོཧརནྟི – ‘ཨིདམེཝ སཙྩཾ མོགྷམཉྙ’ནྟི། ཨཡཾ ཝུཙྩཏི, བྷིཀྑཝེ, ཨདྷམྨཝཱདིནཱི པརིསཱ།
52. ‘‘Dvemā, bhikkhave, parisā. Katamā dve? Adhammavādinī ca parisā dhammavādinī ca parisā. Katamā ca, bhikkhave, adhammavādinī parisā? Idha, bhikkhave, yassaṃ parisāyaṃ bhikkhū adhikaraṇaṃ ādiyanti dhammikaṃ vā adhammikaṃ vā. Te taṃ adhikaraṇaṃ ādiyitvā na ceva aññamaññaṃ saññāpenti na ca saññattiṃ upagacchanti, na ca nijjhāpenti na ca nijjhattiṃ upagacchanti. Te asaññattibalā anijjhattibalā appaṭinissaggamantino tameva adhikaraṇaṃ thāmasā parāmāsā 14 abhinivissa voharanti – ‘idameva saccaṃ moghamañña’nti. Ayaṃ vuccati, bhikkhave, adhammavādinī parisā.
‘‘ཀཏམཱ ཙ, བྷིཀྑཝེ, དྷམྨཝཱདིནཱི པརིསཱ? ཨིདྷ, བྷིཀྑཝེ, ཡསྶཾ པརིསཱཡཾ བྷིཀྑཱུ ཨདྷིཀརཎཾ ཨཱདིཡནྟི དྷམྨིཀཾ ཝཱ ཨདྷམྨིཀཾ ཝཱ། ཏེ ཏཾ ཨདྷིཀརཎཾ ཨཱདིཡིཏྭཱ ཨཉྙམཉྙཾ སཉྙཱཔེནྟི ཙེཝ སཉྙཏྟིཉྩ ཨུཔགཙྪནྟི, ནིཛ྄ཛྷཱཔེནྟི ཙེཝ ནིཛ྄ཛྷཏྟིཉྩ ཨུཔགཙྪནྟི། ཏེ སཉྙཏྟིབལཱ ནིཛ྄ཛྷཏྟིབལཱ པཊིནིསྶགྒམནྟིནོ, ན ཏམེཝ ཨདྷིཀརཎཾ ཐཱམསཱ པརཱམཱསཱ ཨབྷིནིཝིསྶ ཝོཧརནྟི – ‘ཨིདམེཝ སཙྩཾ མོགྷམཉྙ’ནྟི། ཨཡཾ ཝུཙྩཏི, བྷིཀྑཝེ, དྷམྨཝཱདིནཱི པརིསཱ། ཨིམཱ ཁོ, བྷིཀྑཝེ, དྭེ པརིསཱ། ཨེཏདགྒཾ, བྷིཀྑཝེ, ཨིམཱསཾ དྭིནྣཾ པརིསཱནཾ ཡདིདཾ དྷམྨཝཱདིནཱི པརིསཱ’’ཏི།
‘‘Katamā ca, bhikkhave, dhammavādinī parisā? Idha, bhikkhave, yassaṃ parisāyaṃ bhikkhū adhikaraṇaṃ ādiyanti dhammikaṃ vā adhammikaṃ vā. Te taṃ adhikaraṇaṃ ādiyitvā aññamaññaṃ saññāpenti ceva saññattiñca upagacchanti, nijjhāpenti ceva nijjhattiñca upagacchanti. Te saññattibalā nijjhattibalā paṭinissaggamantino, na tameva adhikaraṇaṃ thāmasā parāmāsā abhinivissa voharanti – ‘idameva saccaṃ moghamañña’nti. Ayaṃ vuccati, bhikkhave, dhammavādinī parisā. Imā kho, bhikkhave, dve parisā. Etadaggaṃ, bhikkhave, imāsaṃ dvinnaṃ parisānaṃ yadidaṃ dhammavādinī parisā’’ti.
པརིསཝགྒོ པཉྩམོ།
Parisavaggo pañcamo.
ཏསྶུདྡཱནཾ –
Tassuddānaṃ –
ཨུཏྟཱནཱ ཝགྒཱ ཨགྒཝཏཱི, ཨརིཡཱ ཀསཊོ ཙ པཉྩམོ།
Uttānā vaggā aggavatī, ariyā kasaṭo ca pañcamo;
ཨོཀྐཱཙིཏཨཱམིསཉྩེཝ, ཝིསམཱ ཨདྷམྨཱདྷམྨིཡེན ཙཱཏི༎
Okkācitaāmisañceva, visamā adhammādhammiyena cāti.
པཋམོ པཎྞཱསཀོ སམཏྟོ།
Paṭhamo paṇṇāsako samatto.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༥. པརིསཝགྒཝཎྞནཱ • 5. Parisavaggavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༥. པརིསཝགྒཝཎྞནཱ • 5. Parisavaggavaṇṇanā
