| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
பாரிஸுத்³தி⁴தா³னகதா²
Pārisuddhidānakathā
164. காயேன விஞ்ஞாபேதீதி பாரிஸுத்³தி⁴தா³னங் யேன கேனசி அங்க³பச்சங்கே³ன விஞ்ஞாபேதி ஜானாபேதி; வாசங் பன நிச்சா²ரேதுங் ஸக்கொந்தோ வாசாய விஞ்ஞாபேதி; உப⁴யதா² ஸக்கொந்தோ காயவாசாஹி. ஸங்கே⁴ன தத்த² க³ந்த்வா உபோஸதோ² காதப்³போ³தி ஸசே ப³ஹூ தாதி³ஸா கி³லானா ஹொந்தி, ஸங்கே⁴ன படிபாடியா ட²த்வா ஸப்³பே³ ஹத்த²பாஸே காதப்³பா³. ஸசே தூ³ரே தூ³ரே ஹொந்தி, ஸங்கோ⁴ நப்பஹோதி, தங் தி³வஸங் உபோஸதோ² ந காதப்³போ³, நத்வேவ வக்³கே³ன ஸங்கே⁴ன உபோஸதோ² காதப்³போ³.
164.Kāyena viññāpetīti pārisuddhidānaṃ yena kenaci aṅgapaccaṅgena viññāpeti jānāpeti; vācaṃ pana nicchāretuṃ sakkonto vācāya viññāpeti; ubhayathā sakkonto kāyavācāhi. Saṅghena tattha gantvā uposatho kātabboti sace bahū tādisā gilānā honti, saṅghena paṭipāṭiyā ṭhatvā sabbe hatthapāse kātabbā. Sace dūre dūre honti, saṅgho nappahoti, taṃ divasaṃ uposatho na kātabbo, natveva vaggena saṅghena uposatho kātabbo.
தத்தே²வ பக்கமதீதி ஸங்க⁴மஜ்ஜ²ங் அனாக³ந்த்வா ததோவ கத்த²சி க³ச்ச²தி. ஸாமணேரோ படிஜானாதீதி ‘‘ஸாமணேரோ அஹ’’ந்தி ஏவங் படிஜானாதி; பூ⁴தங்யேவ வா ஸாமணேரபா⁴வங் ஆரோசேதி, பச்சா² வா ஸாமணேரபூ⁴மியங் திட்ட²தீதி அத்தோ². ஏஸ நயோ ஸப்³ப³த்த².
Tattheva pakkamatīti saṅghamajjhaṃ anāgantvā tatova katthaci gacchati. Sāmaṇero paṭijānātīti ‘‘sāmaṇero aha’’nti evaṃ paṭijānāti; bhūtaṃyeva vā sāmaṇerabhāvaṃ āroceti, pacchā vā sāmaṇerabhūmiyaṃ tiṭṭhatīti attho. Esa nayo sabbattha.
ஸங்க⁴ப்பத்தோ பக்கமதீதி ஸப்³ப³ந்திமேன பரிச்சே²தே³ன உபோஸத²த்தா²ய ஸன்னிபதிதானங் சதுன்னங் பி⁴க்கூ²னங் ஹத்த²பாஸங் பத்வா பக்கமதி. ஏஸ நயோ ஸப்³ப³த்த². எத்த² ச ஏகேன ப³ஹூனம்பி ஆஹடா பாரிஸுத்³தி⁴ ஆஹடாவ ஹோதி. ஸசே பன ஸோ அந்தராமக்³கே³ அஞ்ஞங் பி⁴க்கு²ங் தி³ஸ்வா யேஸங் அனேன பாரிஸுத்³தி⁴ க³ஹிதா, தேஸஞ்ச அத்தனோ ச பாரிஸுத்³தி⁴ங் தே³தி, தஸ்ஸேவ பாரிஸுத்³தி⁴ ஆக³ச்ச²தி, இதரா பன பி³லாளஸங்க²லிகபாரிஸுத்³தி⁴ நாம ஹோதி. ஸா ந ஆக³ச்ச²தி.
Saṅghappatto pakkamatīti sabbantimena paricchedena uposathatthāya sannipatitānaṃ catunnaṃ bhikkhūnaṃ hatthapāsaṃ patvā pakkamati. Esa nayo sabbattha. Ettha ca ekena bahūnampi āhaṭā pārisuddhi āhaṭāva hoti. Sace pana so antarāmagge aññaṃ bhikkhuṃ disvā yesaṃ anena pārisuddhi gahitā, tesañca attano ca pārisuddhiṃ deti, tasseva pārisuddhi āgacchati, itarā pana bilāḷasaṅkhalikapārisuddhi nāma hoti. Sā na āgacchati.
ஸுத்தோ ந ஆரோசேதீதி ஆக³ந்த்வா ஸுபதி, ‘‘அஸுகேன பாரிஸுத்³தி⁴ தி³ன்னா’’தி ந ஆரோசேதி. பாரிஸுத்³தி⁴ஹாரகஸ்ஸ அனாபத்தீதி எத்த² ஸசே ஸஞ்சிச்ச நாரோசேதி, து³க்கடங் ஆபஜ்ஜதி, பாரிஸுத்³தி⁴ பன ஆஹடாவ ஹோதி. அஸஞ்சிச்ச அனாரோசிதத்தா பனஸ்ஸ அனாபத்தி, உபி⁴ன்னம்பி ச உபோஸதோ² கதோயேவ ஹோதி.
Sutto na ārocetīti āgantvā supati, ‘‘asukena pārisuddhi dinnā’’ti na āroceti. Pārisuddhihārakassa anāpattīti ettha sace sañcicca nāroceti, dukkaṭaṃ āpajjati, pārisuddhi pana āhaṭāva hoti. Asañcicca anārocitattā panassa anāpatti, ubhinnampi ca uposatho katoyeva hoti.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 87. பாரிஸுத்³தி⁴தா³னகதா² • 87. Pārisuddhidānakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பாரிஸுத்³தி⁴தா³னகதா²வண்ணனா • Pārisuddhidānakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பாரிஸுத்³தி⁴தா³னகதா²வண்ணனா • Pārisuddhidānakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பக்க²க³ணனாதி³உக்³க³ஹணானுஜானநகதா²தி³வண்ணனா • Pakkhagaṇanādiuggahaṇānujānanakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 87. பாரிஸுத்³தி⁴தா³னகதா² • 87. Pārisuddhidānakathā
