| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
87. பாரிஸுத்³தி⁴தா³னகதா²
87. Pārisuddhidānakathā
164. யேன கேனசி அங்க³பச்சங்கே³ன விஞ்ஞாபேதீதி படிவசனங் நிச்சா²ரேதுமஸக்கொந்தோ யேன கேனசி அங்க³பச்சங்கே³ன விஞ்ஞாபேதி. உப⁴யதா²தி உப⁴யேஹி காயவாசாஸங்கா²தேஹி ஆகாரேஹி. காயவாசாஹி விஞ்ஞாபேதீதி ஸம்ப³ந்தோ⁴. ஸப்³பே³தி அகி²லா கி³லானா. ஹத்த²பாஸேதி ஸங்க⁴ஸ்ஸ ஹத்த²பாஸம்ஹி. ஸசே தூ³ரே ஹொந்தீதி ஸசே ப³ஹூ கி³லானா அஞ்ஞமஞ்ஞங் தூ³ரே ஹொந்தி. தங் தி³வஸந்தி தஸ்மிங் ஸங்க⁴அப்பஹோனகதி³வஸே.
164.Yena kenaci aṅgapaccaṅgena viññāpetīti paṭivacanaṃ nicchāretumasakkonto yena kenaci aṅgapaccaṅgena viññāpeti. Ubhayathāti ubhayehi kāyavācāsaṅkhātehi ākārehi. Kāyavācāhi viññāpetīti sambandho. Sabbeti akhilā gilānā. Hatthapāseti saṅghassa hatthapāsamhi. Sace dūre hontīti sace bahū gilānā aññamaññaṃ dūre honti. Taṃ divasanti tasmiṃ saṅghaappahonakadivase.
தத்தே²வ பக்கமதீதி எத்த² நிஸ்ஸக்கத்தே² த²பச்சயோதி ஆஹ ‘‘ததோவா’’தி, பாரிஸுத்³தி⁴ஹாரட்டா²னதோ ஏவாதி அத்தோ². ‘‘க³ச்ச²தீ’’தி இமினா கமுதா⁴துயா பத³விக்கே²பத்த²ங் த³ஸ்ஸேதி, ‘‘கத்த²சீ’’தி இமினா தஸ்ஸ கம்மங். ஸாமணேரோ படிஜானாதீதிஆதீ³ஸு படிஜானநாகாரத்த²ஸ்ஸ இதிஸத்³த³ஸ்ஸ லோபபா⁴வங் த³ஸ்ஸெந்தோ ஆஹ ‘‘ஸாமணேரோ அஹ’’ந்தி ஏவங் படிஜானாதீ’’திஆதி³. பூ⁴தங்யேவாதி விஜ்ஜமானங்யேவ. ஸப்³ப³த்தா²தி ஸப்³பே³ஸு ‘‘ஸிக்க²ங் பச்சக்கா²தகோ படிஜானாதீ’’திஆதீ³ஸு.
Tattheva pakkamatīti ettha nissakkatthe thapaccayoti āha ‘‘tatovā’’ti, pārisuddhihāraṭṭhānato evāti attho. ‘‘Gacchatī’’ti iminā kamudhātuyā padavikkhepatthaṃ dasseti, ‘‘katthacī’’ti iminā tassa kammaṃ. Sāmaṇero paṭijānātītiādīsu paṭijānanākāratthassa itisaddassa lopabhāvaṃ dassento āha ‘‘sāmaṇero aha’’nti evaṃ paṭijānātī’’tiādi. Bhūtaṃyevāti vijjamānaṃyeva. Sabbatthāti sabbesu ‘‘sikkhaṃ paccakkhātako paṭijānātī’’tiādīsu.
ஸப்³ப³ந்திமேன பரிச்சே²தே³ன சதுன்னங் பி⁴க்கூ²னந்தி ஸம்ப³ந்தோ⁴. ஸப்³ப³த்தா²தி ஸப்³பே³ஸு ‘‘ஸங்க⁴ப்பத்தோ விப்³ப⁴மதீ’’திஆதீ³ஸு. எத்தா²தி பாரிஸுத்³தி⁴ஹரணே. ப³ஹூனம்பீதி எத்த² பிஸத்³தே³ன ஏகேன ஏகஸ்ஸாபி, ப³ஹூஹி ஏகஸ்ஸாபி, ப³ஹூஹி ப³ஹூனம்பி ஆஹடா பாரிஸுத்³தி⁴ ஆஹடாவ ஹோதீதி த³ஸ்ஸேதி. ஸோதி பாரிஸுத்³தி⁴ஹாரகோ பி⁴க்கு². யேஸந்தி பி⁴க்கூ²னங். தஸ்ஸேவாதி பாரிஸுத்³தி⁴ஹாரகஸ்ஸேவ. இதரா பனாதி இதரேஸங் பாரிஸுத்³தி⁴ பன. பி³ளாலஸங்க²லிகாதி எத்த² பி³ளாலோதி ஆகு²பு⁴ஜோ. ஸோ ஹி பி³ளாஸயங் ஆகு²ங் க³ண்ஹிதுங் அலதி ஸமத்தே²தீதி பி³ளாலோதி வுச்சதி. ஸங்க²லிகாதி ஏதங் ஸத்தானங் ப³ந்த⁴னூபகரணவிஸேஸஸ்ஸ நாமங். பி³ளாலஸ்ஸ ஸங்க²லிகா தேன ஸம்ப³ந்த⁴ஸம்ப³ந்தி⁴பா⁴வேன ஸம்ப³ந்த⁴த்தாதி பி³ளாலஸங்க²லிகா. இத³ங் உபலக்க²ணமத்தங் யேஸங் கேஸஞ்சி ஸங்க²லிகாய க³ஹேதப்³ப³த்தா. தாய ஸதி³ஸா பி³ளாலஸங்க²லிகா பாரிஸுத்³தீ⁴தி அத்தோ². இத³ங் பனெத்த² ஓபம்மஸங்ஸந்த³னங் – யதா² ஸங்க²லிகாய பட²மங் வலயங் து³தியங்யேவ வலயங் பாபுணாதி, ந ததியங், ஏவமேவ பட²மங் தி³ன்னா பாரிஸுத்³தி⁴ து³தியமேவ பாபுணாதி, ந ததியந்தி.
Sabbantimena paricchedena catunnaṃ bhikkhūnanti sambandho. Sabbatthāti sabbesu ‘‘saṅghappatto vibbhamatī’’tiādīsu. Etthāti pārisuddhiharaṇe. Bahūnampīti ettha pisaddena ekena ekassāpi, bahūhi ekassāpi, bahūhi bahūnampi āhaṭā pārisuddhi āhaṭāva hotīti dasseti. Soti pārisuddhihārako bhikkhu. Yesanti bhikkhūnaṃ. Tassevāti pārisuddhihārakasseva. Itarā panāti itaresaṃ pārisuddhi pana. Biḷālasaṅkhalikāti ettha biḷāloti ākhubhujo. So hi biḷāsayaṃ ākhuṃ gaṇhituṃ alati samatthetīti biḷāloti vuccati. Saṅkhalikāti etaṃ sattānaṃ bandhanūpakaraṇavisesassa nāmaṃ. Biḷālassa saṅkhalikā tena sambandhasambandhibhāvena sambandhattāti biḷālasaṅkhalikā. Idaṃ upalakkhaṇamattaṃ yesaṃ kesañci saṅkhalikāya gahetabbattā. Tāya sadisā biḷālasaṅkhalikā pārisuddhīti attho. Idaṃ panettha opammasaṃsandanaṃ – yathā saṅkhalikāya paṭhamaṃ valayaṃ dutiyaṃyeva valayaṃ pāpuṇāti, na tatiyaṃ, evameva paṭhamaṃ dinnā pārisuddhi dutiyameva pāpuṇāti, na tatiyanti.
ஆக³ந்த்வாதி ஸங்க⁴ஸ்ஸ ஹத்த²பாஸங் ஆக³ந்த்வா. பாளியங் ஸுத்தோ ந ஆரோசேதீதிஆதீ³ஸு ஹெத்வத்தே² பச்சத்தவசனங். ஸுத்தேன நாரோசேதீதி ஹி அத்தோ². பாரிஸுத்³தி⁴ஹாரகஸ்ஸ அனாபத்தீதி எத்த² ஆபத்தீதி அன்வயத்த²ங் அத்தா²பத்திதோ த³ஸ்ஸெந்தோ ஆஹ ‘‘ஸசே…பே॰… ஆபஜ்ஜதீ’’தி. அஸ்ஸாதி பி⁴க்கு²ஸ்ஸ. உபி⁴ன்னம்பீதி பாரிஸுத்³தி⁴தா³யகஸ்ஸ, தங்ஹாரகஸ்ஸ சாதி உபி⁴ன்னம்பி.
Āgantvāti saṅghassa hatthapāsaṃ āgantvā. Pāḷiyaṃ sutto na ārocetītiādīsu hetvatthe paccattavacanaṃ. Suttena nārocetīti hi attho. Pārisuddhihārakassa anāpattīti ettha āpattīti anvayatthaṃ atthāpattito dassento āha ‘‘sace…pe… āpajjatī’’ti. Assāti bhikkhussa. Ubhinnampīti pārisuddhidāyakassa, taṃhārakassa cāti ubhinnampi.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 87. பாரிஸுத்³தி⁴தா³னகதா² • 87. Pārisuddhidānakathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / பாரிஸுத்³தி⁴தா³னகதா² • Pārisuddhidānakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பாரிஸுத்³தி⁴தா³னகதா²வண்ணனா • Pārisuddhidānakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பாரிஸுத்³தி⁴தா³னகதா²வண்ணனா • Pārisuddhidānakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பக்க²க³ணனாதி³உக்³க³ஹணானுஜானநகதா²தி³வண்ணனா • Pakkhagaṇanādiuggahaṇānujānanakathādivaṇṇanā
