| Library / Tipiṭaka / তিপিটক • Tipiṭaka / মহাৰগ্গ-অট্ঠকথা • Mahāvagga-aṭṭhakathā |
পারিসুদ্ধিদানকথা
Pārisuddhidānakathā
১৬৪. কাযেন ৰিঞ্ঞাপেতীতি পারিসুদ্ধিদানং যেন কেনচি অঙ্গপচ্চঙ্গেন ৰিঞ্ঞাপেতি জানাপেতি; ৰাচং পন নিচ্ছারেতুং সক্কোন্তো ৰাচায ৰিঞ্ঞাপেতি; উভযথা সক্কোন্তো কাযৰাচাহি। সঙ্ঘেন তত্থ গন্ত্ৰা উপোসথো কাতব্বোতি সচে বহূ তাদিসা গিলানা হোন্তি, সঙ্ঘেন পটিপাটিযা ঠত্ৰা সব্বে হত্থপাসে কাতব্বা। সচে দূরে দূরে হোন্তি, সঙ্ঘো নপ্পহোতি, তং দিৰসং উপোসথো ন কাতব্বো, নত্ৰেৰ ৰগ্গেন সঙ্ঘেন উপোসথো কাতব্বো।
164.Kāyena viññāpetīti pārisuddhidānaṃ yena kenaci aṅgapaccaṅgena viññāpeti jānāpeti; vācaṃ pana nicchāretuṃ sakkonto vācāya viññāpeti; ubhayathā sakkonto kāyavācāhi. Saṅghena tattha gantvā uposatho kātabboti sace bahū tādisā gilānā honti, saṅghena paṭipāṭiyā ṭhatvā sabbe hatthapāse kātabbā. Sace dūre dūre honti, saṅgho nappahoti, taṃ divasaṃ uposatho na kātabbo, natveva vaggena saṅghena uposatho kātabbo.
তত্থেৰ পক্কমতীতি সঙ্ঘমজ্ঝং অনাগন্ত্ৰা ততোৰ কত্থচি গচ্ছতি। সামণেরো পটিজানাতীতি ‘‘সামণেরো অহ’’ন্তি এৰং পটিজানাতি; ভূতংযেৰ ৰা সামণেরভাৰং আরোচেতি, পচ্ছা ৰা সামণেরভূমিযং তিট্ঠতীতি অত্থো। এস নযো সব্বত্থ।
Tattheva pakkamatīti saṅghamajjhaṃ anāgantvā tatova katthaci gacchati. Sāmaṇero paṭijānātīti ‘‘sāmaṇero aha’’nti evaṃ paṭijānāti; bhūtaṃyeva vā sāmaṇerabhāvaṃ āroceti, pacchā vā sāmaṇerabhūmiyaṃ tiṭṭhatīti attho. Esa nayo sabbattha.
সঙ্ঘপ্পত্তো পক্কমতীতি সব্বন্তিমেন পরিচ্ছেদেন উপোসথত্থায সন্নিপতিতানং চতুন্নং ভিক্খূনং হত্থপাসং পত্ৰা পক্কমতি। এস নযো সব্বত্থ। এত্থ চ একেন বহূনম্পি আহটা পারিসুদ্ধি আহটাৰ হোতি। সচে পন সো অন্তরামগ্গে অঞ্ঞং ভিক্খুং দিস্ৰা যেসং অনেন পারিসুদ্ধি গহিতা, তেসঞ্চ অত্তনো চ পারিসুদ্ধিং দেতি, তস্সেৰ পারিসুদ্ধি আগচ্ছতি, ইতরা পন বিলাল়সঙ্খলিকপারিসুদ্ধি নাম হোতি। সা ন আগচ্ছতি।
Saṅghappatto pakkamatīti sabbantimena paricchedena uposathatthāya sannipatitānaṃ catunnaṃ bhikkhūnaṃ hatthapāsaṃ patvā pakkamati. Esa nayo sabbattha. Ettha ca ekena bahūnampi āhaṭā pārisuddhi āhaṭāva hoti. Sace pana so antarāmagge aññaṃ bhikkhuṃ disvā yesaṃ anena pārisuddhi gahitā, tesañca attano ca pārisuddhiṃ deti, tasseva pārisuddhi āgacchati, itarā pana bilāḷasaṅkhalikapārisuddhi nāma hoti. Sā na āgacchati.
সুত্তো ন আরোচেতীতি আগন্ত্ৰা সুপতি, ‘‘অসুকেন পারিসুদ্ধি দিন্না’’তি ন আরোচেতি। পারিসুদ্ধিহারকস্স অনাপত্তীতি এত্থ সচে সঞ্চিচ্চ নারোচেতি, দুক্কটং আপজ্জতি, পারিসুদ্ধি পন আহটাৰ হোতি। অসঞ্চিচ্চ অনারোচিতত্তা পনস্স অনাপত্তি, উভিন্নম্পি চ উপোসথো কতোযেৰ হোতি।
Sutto na ārocetīti āgantvā supati, ‘‘asukena pārisuddhi dinnā’’ti na āroceti. Pārisuddhihārakassa anāpattīti ettha sace sañcicca nāroceti, dukkaṭaṃ āpajjati, pārisuddhi pana āhaṭāva hoti. Asañcicca anārocitattā panassa anāpatti, ubhinnampi ca uposatho katoyeva hoti.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ৮৭. পারিসুদ্ধিদানকথা • 87. Pārisuddhidānakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / পারিসুদ্ধিদানকথাৰণ্ণনা • Pārisuddhidānakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পারিসুদ্ধিদানকথাৰণ্ণনা • Pārisuddhidānakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পক্খগণনাদিউগ্গহণানুজাননকথাদিৰণ্ণনা • Pakkhagaṇanādiuggahaṇānujānanakathādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৮৭. পারিসুদ্ধিদানকথা • 87. Pārisuddhidānakathā
