| Library / Tipiṭaka / д̇ибидага • Tipiṭaka / махааваг̇г̇а-адтагат̇аа • Mahāvagga-aṭṭhakathā |
баарисуд̣̇д̇хид̣̇аанагат̇аа
Pārisuddhidānakathā
164. гааязна вин̃н̃аабзд̇ийд̇и баарисуд̣̇д̇хид̣̇аанам̣ язна гзнажи ан̇г̇абажжан̇г̇зна вин̃н̃аабзд̇и ж̇аанаабзд̇и; ваажам̣ бана нижчаарзд̇ум̣ саггонд̇о ваажааяа вин̃н̃аабзд̇и; убхаяат̇аа саггонд̇о гааяаваажаахи. сан̇гхзна д̇ад̇т̇а г̇анд̇ваа убосат̇о гаад̇аб̣б̣од̇и сажз б̣ахуу д̇аад̣̇исаа г̇илаанаа хонд̇и, сан̇гхзна бадибаадияаа тад̇ваа саб̣б̣з хад̇т̇абаасз гаад̇аб̣б̣аа. сажз д̣̇уурз д̣̇уурз хонд̇и, сан̇гхо наббаход̇и, д̇ам̣ д̣̇ивасам̣ убосат̇о на гаад̇аб̣б̣о, над̇взва ваг̇г̇зна сан̇гхзна убосат̇о гаад̇аб̣б̣о.
164.Kāyena viññāpetīti pārisuddhidānaṃ yena kenaci aṅgapaccaṅgena viññāpeti jānāpeti; vācaṃ pana nicchāretuṃ sakkonto vācāya viññāpeti; ubhayathā sakkonto kāyavācāhi. Saṅghena tattha gantvā uposatho kātabboti sace bahū tādisā gilānā honti, saṅghena paṭipāṭiyā ṭhatvā sabbe hatthapāse kātabbā. Sace dūre dūre honti, saṅgho nappahoti, taṃ divasaṃ uposatho na kātabbo, natveva vaggena saṅghena uposatho kātabbo.
д̇ад̇т̇зва баггамад̇ийд̇и сан̇гхамаж̇жхам̣ анааг̇анд̇ваа д̇ад̇ова гад̇т̇ажи г̇ажчад̇и. сааман̣зро бадиж̇аанаад̇ийд̇и ‘‘сааман̣зро аха’’нд̇и звам̣ бадиж̇аанаад̇и; бхууд̇ам̣язва ваа сааман̣зрабхаавам̣ аарожзд̇и, бажчаа ваа сааман̣зрабхуумияам̣ д̇идтад̇ийд̇и ад̇т̇о. зса наяо саб̣б̣ад̇т̇а.
Tattheva pakkamatīti saṅghamajjhaṃ anāgantvā tatova katthaci gacchati. Sāmaṇero paṭijānātīti ‘‘sāmaṇero aha’’nti evaṃ paṭijānāti; bhūtaṃyeva vā sāmaṇerabhāvaṃ āroceti, pacchā vā sāmaṇerabhūmiyaṃ tiṭṭhatīti attho. Esa nayo sabbattha.
сан̇гхаббад̇д̇о баггамад̇ийд̇и саб̣б̣анд̇имзна барижчзд̣̇зна убосат̇ад̇т̇ааяа саннибад̇ид̇аанам̣ жад̇уннам̣ бхигкуунам̣ хад̇т̇абаасам̣ бад̇ваа баггамад̇и. зса наяо саб̣б̣ад̇т̇а. зд̇т̇а жа згзна б̣ахуунамби аахадаа баарисуд̣̇д̇хи аахадаава ход̇и. сажз бана со анд̇араамаг̇г̇з ан̃н̃ам̣ бхигкум̣ д̣̇исваа язсам̣ анзна баарисуд̣̇д̇хи г̇ахид̇аа, д̇зсан̃жа ад̇д̇ано жа баарисуд̣̇д̇хим̣ д̣̇зд̇и, д̇ассзва баарисуд̣̇д̇хи ааг̇ажчад̇и, ид̇араа бана б̣илаал̣асан̇калигабаарисуд̣̇д̇хи наама ход̇и. саа на ааг̇ажчад̇и.
Saṅghappatto pakkamatīti sabbantimena paricchedena uposathatthāya sannipatitānaṃ catunnaṃ bhikkhūnaṃ hatthapāsaṃ patvā pakkamati. Esa nayo sabbattha. Ettha ca ekena bahūnampi āhaṭā pārisuddhi āhaṭāva hoti. Sace pana so antarāmagge aññaṃ bhikkhuṃ disvā yesaṃ anena pārisuddhi gahitā, tesañca attano ca pārisuddhiṃ deti, tasseva pārisuddhi āgacchati, itarā pana bilāḷasaṅkhalikapārisuddhi nāma hoti. Sā na āgacchati.
суд̇д̇о на аарожзд̇ийд̇и ааг̇анд̇ваа субад̇и, ‘‘асугзна баарисуд̣̇д̇хи д̣̇иннаа’’д̇и на аарожзд̇и. баарисуд̣̇д̇хихаарагасса анаабад̇д̇ийд̇и зд̇т̇а сажз сан̃жижжа наарожзд̇и, д̣̇уггадам̣ аабаж̇ж̇ад̇и, баарисуд̣̇д̇хи бана аахадаава ход̇и. асан̃жижжа анаарожид̇ад̇д̇аа банасса анаабад̇д̇и, убхиннамби жа убосат̇о гад̇оязва ход̇и.
Sutto na ārocetīti āgantvā supati, ‘‘asukena pārisuddhi dinnā’’ti na āroceti. Pārisuddhihārakassa anāpattīti ettha sace sañcicca nāroceti, dukkaṭaṃ āpajjati, pārisuddhi pana āhaṭāva hoti. Asañcicca anārocitattā panassa anāpatti, ubhinnampi ca uposatho katoyeva hoti.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махааваг̇г̇абаал̣и • Mahāvaggapāḷi / 87. баарисуд̣̇д̇хид̣̇аанагат̇аа • 87. Pārisuddhidānakathā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / баарисуд̣̇д̇хид̣̇аанагат̇ааван̣н̣анаа • Pārisuddhidānakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / баарисуд̣̇д̇хид̣̇аанагат̇ааван̣н̣анаа • Pārisuddhidānakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / багкаг̇ан̣анаад̣̇иуг̇г̇ахан̣аануж̇аананагат̇аад̣̇иван̣н̣анаа • Pakkhagaṇanādiuggahaṇānujānanakathādivaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 87. баарисуд̣̇д̇хид̣̇аанагат̇аа • 87. Pārisuddhidānakathā
