| Library / Tipiṭaka / तिपिटक • Tipiṭaka / महावग्ग-अट्ठकथा • Mahāvagga-aṭṭhakathā |
पारिसुद्धिदानकथा
Pārisuddhidānakathā
१६४. कायेन विञ्ञापेतीति पारिसुद्धिदानं येन केनचि अङ्गपच्चङ्गेन विञ्ञापेति जानापेति; वाचं पन निच्छारेतुं सक्कोन्तो वाचाय विञ्ञापेति; उभयथा सक्कोन्तो कायवाचाहि। सङ्घेन तत्थ गन्त्वा उपोसथो कातब्बोति सचे बहू तादिसा गिलाना होन्ति, सङ्घेन पटिपाटिया ठत्वा सब्बे हत्थपासे कातब्बा। सचे दूरे दूरे होन्ति, सङ्घो नप्पहोति, तं दिवसं उपोसथो न कातब्बो, नत्वेव वग्गेन सङ्घेन उपोसथो कातब्बो।
164.Kāyena viññāpetīti pārisuddhidānaṃ yena kenaci aṅgapaccaṅgena viññāpeti jānāpeti; vācaṃ pana nicchāretuṃ sakkonto vācāya viññāpeti; ubhayathā sakkonto kāyavācāhi. Saṅghena tattha gantvā uposatho kātabboti sace bahū tādisā gilānā honti, saṅghena paṭipāṭiyā ṭhatvā sabbe hatthapāse kātabbā. Sace dūre dūre honti, saṅgho nappahoti, taṃ divasaṃ uposatho na kātabbo, natveva vaggena saṅghena uposatho kātabbo.
तत्थेव पक्कमतीति सङ्घमज्झं अनागन्त्वा ततोव कत्थचि गच्छति। सामणेरो पटिजानातीति ‘‘सामणेरो अह’’न्ति एवं पटिजानाति; भूतंयेव वा सामणेरभावं आरोचेति, पच्छा वा सामणेरभूमियं तिट्ठतीति अत्थो। एस नयो सब्बत्थ।
Tattheva pakkamatīti saṅghamajjhaṃ anāgantvā tatova katthaci gacchati. Sāmaṇero paṭijānātīti ‘‘sāmaṇero aha’’nti evaṃ paṭijānāti; bhūtaṃyeva vā sāmaṇerabhāvaṃ āroceti, pacchā vā sāmaṇerabhūmiyaṃ tiṭṭhatīti attho. Esa nayo sabbattha.
सङ्घप्पत्तो पक्कमतीति सब्बन्तिमेन परिच्छेदेन उपोसथत्थाय सन्निपतितानं चतुन्नं भिक्खूनं हत्थपासं पत्वा पक्कमति। एस नयो सब्बत्थ। एत्थ च एकेन बहूनम्पि आहटा पारिसुद्धि आहटाव होति। सचे पन सो अन्तरामग्गे अञ्ञं भिक्खुं दिस्वा येसं अनेन पारिसुद्धि गहिता, तेसञ्च अत्तनो च पारिसुद्धिं देति, तस्सेव पारिसुद्धि आगच्छति, इतरा पन बिलाळसङ्खलिकपारिसुद्धि नाम होति। सा न आगच्छति।
Saṅghappatto pakkamatīti sabbantimena paricchedena uposathatthāya sannipatitānaṃ catunnaṃ bhikkhūnaṃ hatthapāsaṃ patvā pakkamati. Esa nayo sabbattha. Ettha ca ekena bahūnampi āhaṭā pārisuddhi āhaṭāva hoti. Sace pana so antarāmagge aññaṃ bhikkhuṃ disvā yesaṃ anena pārisuddhi gahitā, tesañca attano ca pārisuddhiṃ deti, tasseva pārisuddhi āgacchati, itarā pana bilāḷasaṅkhalikapārisuddhi nāma hoti. Sā na āgacchati.
सुत्तो न आरोचेतीति आगन्त्वा सुपति, ‘‘असुकेन पारिसुद्धि दिन्ना’’ति न आरोचेति। पारिसुद्धिहारकस्स अनापत्तीति एत्थ सचे सञ्चिच्च नारोचेति, दुक्कटं आपज्जति, पारिसुद्धि पन आहटाव होति। असञ्चिच्च अनारोचितत्ता पनस्स अनापत्ति, उभिन्नम्पि च उपोसथो कतोयेव होति।
Sutto na ārocetīti āgantvā supati, ‘‘asukena pārisuddhi dinnā’’ti na āroceti. Pārisuddhihārakassa anāpattīti ettha sace sañcicca nāroceti, dukkaṭaṃ āpajjati, pārisuddhi pana āhaṭāva hoti. Asañcicca anārocitattā panassa anāpatti, ubhinnampi ca uposatho katoyeva hoti.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / महावग्गपाळि • Mahāvaggapāḷi / ८७. पारिसुद्धिदानकथा • 87. Pārisuddhidānakathā
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / पारिसुद्धिदानकथावण्णना • Pārisuddhidānakathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / पारिसुद्धिदानकथावण्णना • Pārisuddhidānakathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / पक्खगणनादिउग्गहणानुजाननकथादिवण्णना • Pakkhagaṇanādiuggahaṇānujānanakathādivaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / ८७. पारिसुद्धिदानकथा • 87. Pārisuddhidānakathā
