| Library / Tipiṭaka / ติปิฎก • Tipiṭaka / ปาจิตฺยาทิโยชนาปาฬิ • Pācityādiyojanāpāḷi |
๘๗. ปาริสุทฺธิทานกถา
87. Pārisuddhidānakathā
๑๖๔. เยน เกนจิ องฺคปจฺจเงฺคน วิญฺญาเปตีติ ปฎิวจนํ นิจฺฉาเรตุมสโกฺกโนฺต เยน เกนจิ องฺคปจฺจเงฺคน วิญฺญาเปติฯ อุภยถาติ อุภเยหิ กายวาจาสงฺขาเตหิ อากาเรหิฯ กายวาจาหิ วิญฺญาเปตีติ สมฺพโนฺธฯ สเพฺพติ อขิลา คิลานาฯ หตฺถปาเสติ สงฺฆสฺส หตฺถปาสมฺหิฯ สเจ ทูเร โหนฺตีติ สเจ พหู คิลานา อญฺญมญฺญํ ทูเร โหนฺติฯ ตํ ทิวสนฺติ ตสฺมิํ สงฺฆอปฺปโหนกทิวเสฯ
164.Yena kenaci aṅgapaccaṅgena viññāpetīti paṭivacanaṃ nicchāretumasakkonto yena kenaci aṅgapaccaṅgena viññāpeti. Ubhayathāti ubhayehi kāyavācāsaṅkhātehi ākārehi. Kāyavācāhi viññāpetīti sambandho. Sabbeti akhilā gilānā. Hatthapāseti saṅghassa hatthapāsamhi. Sace dūre hontīti sace bahū gilānā aññamaññaṃ dūre honti. Taṃ divasanti tasmiṃ saṅghaappahonakadivase.
ตเตฺถว ปกฺกมตีติ เอตฺถ นิสฺสกฺกเตฺถ ถปจฺจโยติ อาห ‘‘ตโตวา’’ติ, ปาริสุทฺธิหารฎฺฐานโต เอวาติ อโตฺถฯ ‘‘คจฺฉตี’’ติ อิมินา กมุธาตุยา ปทวิเกฺขปตฺถํ ทเสฺสติ, ‘‘กตฺถจี’’ติ อิมินา ตสฺส กมฺมํฯ สามเณโร ปฎิชานาตีติอาทีสุ ปฎิชานนาการตฺถสฺส อิติสทฺทสฺส โลปภาวํ ทเสฺสโนฺต อาห ‘‘สามเณโร อห’’นฺติ เอวํ ปฎิชานาตี’’ติอาทิฯ ภูตํเยวาติ วิชฺชมานํเยวฯ สพฺพตฺถาติ สเพฺพสุ ‘‘สิกฺขํ ปจฺจกฺขาตโก ปฎิชานาตี’’ติอาทีสุฯ
Tattheva pakkamatīti ettha nissakkatthe thapaccayoti āha ‘‘tatovā’’ti, pārisuddhihāraṭṭhānato evāti attho. ‘‘Gacchatī’’ti iminā kamudhātuyā padavikkhepatthaṃ dasseti, ‘‘katthacī’’ti iminā tassa kammaṃ. Sāmaṇero paṭijānātītiādīsu paṭijānanākāratthassa itisaddassa lopabhāvaṃ dassento āha ‘‘sāmaṇero aha’’nti evaṃ paṭijānātī’’tiādi. Bhūtaṃyevāti vijjamānaṃyeva. Sabbatthāti sabbesu ‘‘sikkhaṃ paccakkhātako paṭijānātī’’tiādīsu.
สพฺพนฺติเมน ปริเจฺฉเทน จตุนฺนํ ภิกฺขูนนฺติ สมฺพโนฺธฯ สพฺพตฺถาติ สเพฺพสุ ‘‘สงฺฆปฺปโตฺต วิพฺภมตี’’ติอาทีสุฯ เอตฺถาติ ปาริสุทฺธิหรเณฯ พหูนมฺปีติ เอตฺถ ปิสเทฺทน เอเกน เอกสฺสาปิ, พหูหิ เอกสฺสาปิ, พหูหิ พหูนมฺปิ อาหฎา ปาริสุทฺธิ อาหฎาว โหตีติ ทเสฺสติฯ โสติ ปาริสุทฺธิหารโก ภิกฺขุฯ เยสนฺติ ภิกฺขูนํฯ ตเสฺสวาติ ปาริสุทฺธิหารกเสฺสวฯ อิตรา ปนาติ อิตเรสํ ปาริสุทฺธิ ปนฯ พิฬาลสงฺขลิกาติ เอตฺถ พิฬาโลติ อาขุภุโชฯ โส หิ พิฬาสยํ อาขุํ คณฺหิตุํ อลติ สมเตฺถตีติ พิฬาโลติ วุจฺจติฯ สงฺขลิกาติ เอตํ สตฺตานํ พนฺธนูปกรณวิเสสสฺส นามํฯ พิฬาลสฺส สงฺขลิกา เตน สมฺพนฺธสมฺพนฺธิภาเวน สมฺพนฺธตฺตาติ พิฬาลสงฺขลิกาฯ อิทํ อุปลกฺขณมตฺตํ เยสํ เกสญฺจิ สงฺขลิกาย คเหตพฺพตฺตาฯ ตาย สทิสา พิฬาลสงฺขลิกา ปาริสุทฺธีติ อโตฺถฯ อิทํ ปเนตฺถ โอปมฺมสํสนฺทนํ – ยถา สงฺขลิกาย ปฐมํ วลยํ ทุติยํเยว วลยํ ปาปุณาติ, น ตติยํ, เอวเมว ปฐมํ ทินฺนา ปาริสุทฺธิ ทุติยเมว ปาปุณาติ, น ตติยนฺติฯ
Sabbantimena paricchedena catunnaṃ bhikkhūnanti sambandho. Sabbatthāti sabbesu ‘‘saṅghappatto vibbhamatī’’tiādīsu. Etthāti pārisuddhiharaṇe. Bahūnampīti ettha pisaddena ekena ekassāpi, bahūhi ekassāpi, bahūhi bahūnampi āhaṭā pārisuddhi āhaṭāva hotīti dasseti. Soti pārisuddhihārako bhikkhu. Yesanti bhikkhūnaṃ. Tassevāti pārisuddhihārakasseva. Itarā panāti itaresaṃ pārisuddhi pana. Biḷālasaṅkhalikāti ettha biḷāloti ākhubhujo. So hi biḷāsayaṃ ākhuṃ gaṇhituṃ alati samatthetīti biḷāloti vuccati. Saṅkhalikāti etaṃ sattānaṃ bandhanūpakaraṇavisesassa nāmaṃ. Biḷālassa saṅkhalikā tena sambandhasambandhibhāvena sambandhattāti biḷālasaṅkhalikā. Idaṃ upalakkhaṇamattaṃ yesaṃ kesañci saṅkhalikāya gahetabbattā. Tāya sadisā biḷālasaṅkhalikā pārisuddhīti attho. Idaṃ panettha opammasaṃsandanaṃ – yathā saṅkhalikāya paṭhamaṃ valayaṃ dutiyaṃyeva valayaṃ pāpuṇāti, na tatiyaṃ, evameva paṭhamaṃ dinnā pārisuddhi dutiyameva pāpuṇāti, na tatiyanti.
อาคนฺตฺวาติ สงฺฆสฺส หตฺถปาสํ อาคนฺตฺวาฯ ปาฬิยํ สุโตฺต น อาโรเจตีติอาทีสุ เหตฺวเตฺถ ปจฺจตฺตวจนํฯ สุเตฺตน นาโรเจตีติ หิ อโตฺถฯ ปาริสุทฺธิหารกสฺส อนาปตฺตีติ เอตฺถ อาปตฺตีติ อนฺวยตฺถํ อตฺถาปตฺติโต ทเสฺสโนฺต อาห ‘‘สเจ…เป.… อาปชฺชตี’’ติฯ อสฺสาติ ภิกฺขุสฺสฯ อุภินฺนมฺปีติ ปาริสุทฺธิทายกสฺส, ตํหารกสฺส จาติ อุภินฺนมฺปิฯ
Āgantvāti saṅghassa hatthapāsaṃ āgantvā. Pāḷiyaṃ sutto na ārocetītiādīsu hetvatthe paccattavacanaṃ. Suttena nārocetīti hi attho. Pārisuddhihārakassa anāpattīti ettha āpattīti anvayatthaṃ atthāpattito dassento āha ‘‘sace…pe… āpajjatī’’ti. Assāti bhikkhussa. Ubhinnampīti pārisuddhidāyakassa, taṃhārakassa cāti ubhinnampi.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / มหาวคฺคปาฬิ • Mahāvaggapāḷi / ๘๗. ปาริสุทฺธิทานกถา • 87. Pārisuddhidānakathā
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / มหาวคฺค-อฎฺฐกถา • Mahāvagga-aṭṭhakathā / ปาริสุทฺธิทานกถา • Pārisuddhidānakathā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / ปาริสุทฺธิทานกถาวณฺณนา • Pārisuddhidānakathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / ปาริสุทฺธิทานกถาวณฺณนา • Pārisuddhidānakathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / ปกฺขคณนาทิอุคฺคหณานุชานนกถาทิวณฺณนา • Pakkhagaṇanādiuggahaṇānujānanakathādivaṇṇanā
