| Library / Tipiṭaka / ತಿಪಿಟಕ • Tipiṭaka / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā |
ಪಾರಿಸುದ್ಧಿದಾನಕಥಾ
Pārisuddhidānakathā
೧೬೪. ಕಾಯೇನ ವಿಞ್ಞಾಪೇತೀತಿ ಪಾರಿಸುದ್ಧಿದಾನಂ ಯೇನ ಕೇನಚಿ ಅಙ್ಗಪಚ್ಚಙ್ಗೇನ ವಿಞ್ಞಾಪೇತಿ ಜಾನಾಪೇತಿ; ವಾಚಂ ಪನ ನಿಚ್ಛಾರೇತುಂ ಸಕ್ಕೋನ್ತೋ ವಾಚಾಯ ವಿಞ್ಞಾಪೇತಿ; ಉಭಯಥಾ ಸಕ್ಕೋನ್ತೋ ಕಾಯವಾಚಾಹಿ। ಸಙ್ಘೇನ ತತ್ಥ ಗನ್ತ್ವಾ ಉಪೋಸಥೋ ಕಾತಬ್ಬೋತಿ ಸಚೇ ಬಹೂ ತಾದಿಸಾ ಗಿಲಾನಾ ಹೋನ್ತಿ, ಸಙ್ಘೇನ ಪಟಿಪಾಟಿಯಾ ಠತ್ವಾ ಸಬ್ಬೇ ಹತ್ಥಪಾಸೇ ಕಾತಬ್ಬಾ। ಸಚೇ ದೂರೇ ದೂರೇ ಹೋನ್ತಿ, ಸಙ್ಘೋ ನಪ್ಪಹೋತಿ, ತಂ ದಿವಸಂ ಉಪೋಸಥೋ ನ ಕಾತಬ್ಬೋ, ನತ್ವೇವ ವಗ್ಗೇನ ಸಙ್ಘೇನ ಉಪೋಸಥೋ ಕಾತಬ್ಬೋ।
164.Kāyena viññāpetīti pārisuddhidānaṃ yena kenaci aṅgapaccaṅgena viññāpeti jānāpeti; vācaṃ pana nicchāretuṃ sakkonto vācāya viññāpeti; ubhayathā sakkonto kāyavācāhi. Saṅghena tattha gantvā uposatho kātabboti sace bahū tādisā gilānā honti, saṅghena paṭipāṭiyā ṭhatvā sabbe hatthapāse kātabbā. Sace dūre dūre honti, saṅgho nappahoti, taṃ divasaṃ uposatho na kātabbo, natveva vaggena saṅghena uposatho kātabbo.
ತತ್ಥೇವ ಪಕ್ಕಮತೀತಿ ಸಙ್ಘಮಜ್ಝಂ ಅನಾಗನ್ತ್ವಾ ತತೋವ ಕತ್ಥಚಿ ಗಚ್ಛತಿ। ಸಾಮಣೇರೋ ಪಟಿಜಾನಾತೀತಿ ‘‘ಸಾಮಣೇರೋ ಅಹ’’ನ್ತಿ ಏವಂ ಪಟಿಜಾನಾತಿ; ಭೂತಂಯೇವ ವಾ ಸಾಮಣೇರಭಾವಂ ಆರೋಚೇತಿ, ಪಚ್ಛಾ ವಾ ಸಾಮಣೇರಭೂಮಿಯಂ ತಿಟ್ಠತೀತಿ ಅತ್ಥೋ। ಏಸ ನಯೋ ಸಬ್ಬತ್ಥ।
Tattheva pakkamatīti saṅghamajjhaṃ anāgantvā tatova katthaci gacchati. Sāmaṇero paṭijānātīti ‘‘sāmaṇero aha’’nti evaṃ paṭijānāti; bhūtaṃyeva vā sāmaṇerabhāvaṃ āroceti, pacchā vā sāmaṇerabhūmiyaṃ tiṭṭhatīti attho. Esa nayo sabbattha.
ಸಙ್ಘಪ್ಪತ್ತೋ ಪಕ್ಕಮತೀತಿ ಸಬ್ಬನ್ತಿಮೇನ ಪರಿಚ್ಛೇದೇನ ಉಪೋಸಥತ್ಥಾಯ ಸನ್ನಿಪತಿತಾನಂ ಚತುನ್ನಂ ಭಿಕ್ಖೂನಂ ಹತ್ಥಪಾಸಂ ಪತ್ವಾ ಪಕ್ಕಮತಿ। ಏಸ ನಯೋ ಸಬ್ಬತ್ಥ। ಏತ್ಥ ಚ ಏಕೇನ ಬಹೂನಮ್ಪಿ ಆಹಟಾ ಪಾರಿಸುದ್ಧಿ ಆಹಟಾವ ಹೋತಿ। ಸಚೇ ಪನ ಸೋ ಅನ್ತರಾಮಗ್ಗೇ ಅಞ್ಞಂ ಭಿಕ್ಖುಂ ದಿಸ್ವಾ ಯೇಸಂ ಅನೇನ ಪಾರಿಸುದ್ಧಿ ಗಹಿತಾ, ತೇಸಞ್ಚ ಅತ್ತನೋ ಚ ಪಾರಿಸುದ್ಧಿಂ ದೇತಿ, ತಸ್ಸೇವ ಪಾರಿಸುದ್ಧಿ ಆಗಚ್ಛತಿ, ಇತರಾ ಪನ ಬಿಲಾಳಸಙ್ಖಲಿಕಪಾರಿಸುದ್ಧಿ ನಾಮ ಹೋತಿ। ಸಾ ನ ಆಗಚ್ಛತಿ।
Saṅghappatto pakkamatīti sabbantimena paricchedena uposathatthāya sannipatitānaṃ catunnaṃ bhikkhūnaṃ hatthapāsaṃ patvā pakkamati. Esa nayo sabbattha. Ettha ca ekena bahūnampi āhaṭā pārisuddhi āhaṭāva hoti. Sace pana so antarāmagge aññaṃ bhikkhuṃ disvā yesaṃ anena pārisuddhi gahitā, tesañca attano ca pārisuddhiṃ deti, tasseva pārisuddhi āgacchati, itarā pana bilāḷasaṅkhalikapārisuddhi nāma hoti. Sā na āgacchati.
ಸುತ್ತೋ ನ ಆರೋಚೇತೀತಿ ಆಗನ್ತ್ವಾ ಸುಪತಿ, ‘‘ಅಸುಕೇನ ಪಾರಿಸುದ್ಧಿ ದಿನ್ನಾ’’ತಿ ನ ಆರೋಚೇತಿ। ಪಾರಿಸುದ್ಧಿಹಾರಕಸ್ಸ ಅನಾಪತ್ತೀತಿ ಏತ್ಥ ಸಚೇ ಸಞ್ಚಿಚ್ಚ ನಾರೋಚೇತಿ, ದುಕ್ಕಟಂ ಆಪಜ್ಜತಿ, ಪಾರಿಸುದ್ಧಿ ಪನ ಆಹಟಾವ ಹೋತಿ। ಅಸಞ್ಚಿಚ್ಚ ಅನಾರೋಚಿತತ್ತಾ ಪನಸ್ಸ ಅನಾಪತ್ತಿ, ಉಭಿನ್ನಮ್ಪಿ ಚ ಉಪೋಸಥೋ ಕತೋಯೇವ ಹೋತಿ।
Sutto na ārocetīti āgantvā supati, ‘‘asukena pārisuddhi dinnā’’ti na āroceti. Pārisuddhihārakassa anāpattīti ettha sace sañcicca nāroceti, dukkaṭaṃ āpajjati, pārisuddhi pana āhaṭāva hoti. Asañcicca anārocitattā panassa anāpatti, ubhinnampi ca uposatho katoyeva hoti.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಗ್ಗಪಾಳಿ • Mahāvaggapāḷi / ೮೭. ಪಾರಿಸುದ್ಧಿದಾನಕಥಾ • 87. Pārisuddhidānakathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಪಾರಿಸುದ್ಧಿದಾನಕಥಾವಣ್ಣನಾ • Pārisuddhidānakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಪಾರಿಸುದ್ಧಿದಾನಕಥಾವಣ್ಣನಾ • Pārisuddhidānakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಪಕ್ಖಗಣನಾದಿಉಗ್ಗಹಣಾನುಜಾನನಕಥಾದಿವಣ್ಣನಾ • Pakkhagaṇanādiuggahaṇānujānanakathādivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೮೭. ಪಾರಿಸುದ್ಧಿದಾನಕಥಾ • 87. Pārisuddhidānakathā
