| Library / Tipiṭaka / ತಿಪಿಟಕ • Tipiṭaka / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi |
೮೭. ಪಾರಿಸುದ್ಧಿದಾನಕಥಾ
87. Pārisuddhidānakathā
೧೬೪. ಯೇನ ಕೇನಚಿ ಅಙ್ಗಪಚ್ಚಙ್ಗೇನ ವಿಞ್ಞಾಪೇತೀತಿ ಪಟಿವಚನಂ ನಿಚ್ಛಾರೇತುಮಸಕ್ಕೋನ್ತೋ ಯೇನ ಕೇನಚಿ ಅಙ್ಗಪಚ್ಚಙ್ಗೇನ ವಿಞ್ಞಾಪೇತಿ। ಉಭಯಥಾತಿ ಉಭಯೇಹಿ ಕಾಯವಾಚಾಸಙ್ಖಾತೇಹಿ ಆಕಾರೇಹಿ। ಕಾಯವಾಚಾಹಿ ವಿಞ್ಞಾಪೇತೀತಿ ಸಮ್ಬನ್ಧೋ। ಸಬ್ಬೇತಿ ಅಖಿಲಾ ಗಿಲಾನಾ। ಹತ್ಥಪಾಸೇತಿ ಸಙ್ಘಸ್ಸ ಹತ್ಥಪಾಸಮ್ಹಿ। ಸಚೇ ದೂರೇ ಹೋನ್ತೀತಿ ಸಚೇ ಬಹೂ ಗಿಲಾನಾ ಅಞ್ಞಮಞ್ಞಂ ದೂರೇ ಹೋನ್ತಿ। ತಂ ದಿವಸನ್ತಿ ತಸ್ಮಿಂ ಸಙ್ಘಅಪ್ಪಹೋನಕದಿವಸೇ।
164.Yena kenaci aṅgapaccaṅgena viññāpetīti paṭivacanaṃ nicchāretumasakkonto yena kenaci aṅgapaccaṅgena viññāpeti. Ubhayathāti ubhayehi kāyavācāsaṅkhātehi ākārehi. Kāyavācāhi viññāpetīti sambandho. Sabbeti akhilā gilānā. Hatthapāseti saṅghassa hatthapāsamhi. Sace dūre hontīti sace bahū gilānā aññamaññaṃ dūre honti. Taṃ divasanti tasmiṃ saṅghaappahonakadivase.
ತತ್ಥೇವ ಪಕ್ಕಮತೀತಿ ಏತ್ಥ ನಿಸ್ಸಕ್ಕತ್ಥೇ ಥಪಚ್ಚಯೋತಿ ಆಹ ‘‘ತತೋವಾ’’ತಿ, ಪಾರಿಸುದ್ಧಿಹಾರಟ್ಠಾನತೋ ಏವಾತಿ ಅತ್ಥೋ। ‘‘ಗಚ್ಛತೀ’’ತಿ ಇಮಿನಾ ಕಮುಧಾತುಯಾ ಪದವಿಕ್ಖೇಪತ್ಥಂ ದಸ್ಸೇತಿ, ‘‘ಕತ್ಥಚೀ’’ತಿ ಇಮಿನಾ ತಸ್ಸ ಕಮ್ಮಂ। ಸಾಮಣೇರೋ ಪಟಿಜಾನಾತೀತಿಆದೀಸು ಪಟಿಜಾನನಾಕಾರತ್ಥಸ್ಸ ಇತಿಸದ್ದಸ್ಸ ಲೋಪಭಾವಂ ದಸ್ಸೇನ್ತೋ ಆಹ ‘‘ಸಾಮಣೇರೋ ಅಹ’’ನ್ತಿ ಏವಂ ಪಟಿಜಾನಾತೀ’’ತಿಆದಿ। ಭೂತಂಯೇವಾತಿ ವಿಜ್ಜಮಾನಂಯೇವ। ಸಬ್ಬತ್ಥಾತಿ ಸಬ್ಬೇಸು ‘‘ಸಿಕ್ಖಂ ಪಚ್ಚಕ್ಖಾತಕೋ ಪಟಿಜಾನಾತೀ’’ತಿಆದೀಸು।
Tattheva pakkamatīti ettha nissakkatthe thapaccayoti āha ‘‘tatovā’’ti, pārisuddhihāraṭṭhānato evāti attho. ‘‘Gacchatī’’ti iminā kamudhātuyā padavikkhepatthaṃ dasseti, ‘‘katthacī’’ti iminā tassa kammaṃ. Sāmaṇero paṭijānātītiādīsu paṭijānanākāratthassa itisaddassa lopabhāvaṃ dassento āha ‘‘sāmaṇero aha’’nti evaṃ paṭijānātī’’tiādi. Bhūtaṃyevāti vijjamānaṃyeva. Sabbatthāti sabbesu ‘‘sikkhaṃ paccakkhātako paṭijānātī’’tiādīsu.
ಸಬ್ಬನ್ತಿಮೇನ ಪರಿಚ್ಛೇದೇನ ಚತುನ್ನಂ ಭಿಕ್ಖೂನನ್ತಿ ಸಮ್ಬನ್ಧೋ। ಸಬ್ಬತ್ಥಾತಿ ಸಬ್ಬೇಸು ‘‘ಸಙ್ಘಪ್ಪತ್ತೋ ವಿಬ್ಭಮತೀ’’ತಿಆದೀಸು। ಏತ್ಥಾತಿ ಪಾರಿಸುದ್ಧಿಹರಣೇ। ಬಹೂನಮ್ಪೀತಿ ಏತ್ಥ ಪಿಸದ್ದೇನ ಏಕೇನ ಏಕಸ್ಸಾಪಿ, ಬಹೂಹಿ ಏಕಸ್ಸಾಪಿ, ಬಹೂಹಿ ಬಹೂನಮ್ಪಿ ಆಹಟಾ ಪಾರಿಸುದ್ಧಿ ಆಹಟಾವ ಹೋತೀತಿ ದಸ್ಸೇತಿ। ಸೋತಿ ಪಾರಿಸುದ್ಧಿಹಾರಕೋ ಭಿಕ್ಖು। ಯೇಸನ್ತಿ ಭಿಕ್ಖೂನಂ। ತಸ್ಸೇವಾತಿ ಪಾರಿಸುದ್ಧಿಹಾರಕಸ್ಸೇವ। ಇತರಾ ಪನಾತಿ ಇತರೇಸಂ ಪಾರಿಸುದ್ಧಿ ಪನ। ಬಿಳಾಲಸಙ್ಖಲಿಕಾತಿ ಏತ್ಥ ಬಿಳಾಲೋತಿ ಆಖುಭುಜೋ। ಸೋ ಹಿ ಬಿಳಾಸಯಂ ಆಖುಂ ಗಣ್ಹಿತುಂ ಅಲತಿ ಸಮತ್ಥೇತೀತಿ ಬಿಳಾಲೋತಿ ವುಚ್ಚತಿ। ಸಙ್ಖಲಿಕಾತಿ ಏತಂ ಸತ್ತಾನಂ ಬನ್ಧನೂಪಕರಣವಿಸೇಸಸ್ಸ ನಾಮಂ। ಬಿಳಾಲಸ್ಸ ಸಙ್ಖಲಿಕಾ ತೇನ ಸಮ್ಬನ್ಧಸಮ್ಬನ್ಧಿಭಾವೇನ ಸಮ್ಬನ್ಧತ್ತಾತಿ ಬಿಳಾಲಸಙ್ಖಲಿಕಾ। ಇದಂ ಉಪಲಕ್ಖಣಮತ್ತಂ ಯೇಸಂ ಕೇಸಞ್ಚಿ ಸಙ್ಖಲಿಕಾಯ ಗಹೇತಬ್ಬತ್ತಾ। ತಾಯ ಸದಿಸಾ ಬಿಳಾಲಸಙ್ಖಲಿಕಾ ಪಾರಿಸುದ್ಧೀತಿ ಅತ್ಥೋ। ಇದಂ ಪನೇತ್ಥ ಓಪಮ್ಮಸಂಸನ್ದನಂ – ಯಥಾ ಸಙ್ಖಲಿಕಾಯ ಪಠಮಂ ವಲಯಂ ದುತಿಯಂಯೇವ ವಲಯಂ ಪಾಪುಣಾತಿ, ನ ತತಿಯಂ, ಏವಮೇವ ಪಠಮಂ ದಿನ್ನಾ ಪಾರಿಸುದ್ಧಿ ದುತಿಯಮೇವ ಪಾಪುಣಾತಿ, ನ ತತಿಯನ್ತಿ।
Sabbantimena paricchedena catunnaṃ bhikkhūnanti sambandho. Sabbatthāti sabbesu ‘‘saṅghappatto vibbhamatī’’tiādīsu. Etthāti pārisuddhiharaṇe. Bahūnampīti ettha pisaddena ekena ekassāpi, bahūhi ekassāpi, bahūhi bahūnampi āhaṭā pārisuddhi āhaṭāva hotīti dasseti. Soti pārisuddhihārako bhikkhu. Yesanti bhikkhūnaṃ. Tassevāti pārisuddhihārakasseva. Itarā panāti itaresaṃ pārisuddhi pana. Biḷālasaṅkhalikāti ettha biḷāloti ākhubhujo. So hi biḷāsayaṃ ākhuṃ gaṇhituṃ alati samatthetīti biḷāloti vuccati. Saṅkhalikāti etaṃ sattānaṃ bandhanūpakaraṇavisesassa nāmaṃ. Biḷālassa saṅkhalikā tena sambandhasambandhibhāvena sambandhattāti biḷālasaṅkhalikā. Idaṃ upalakkhaṇamattaṃ yesaṃ kesañci saṅkhalikāya gahetabbattā. Tāya sadisā biḷālasaṅkhalikā pārisuddhīti attho. Idaṃ panettha opammasaṃsandanaṃ – yathā saṅkhalikāya paṭhamaṃ valayaṃ dutiyaṃyeva valayaṃ pāpuṇāti, na tatiyaṃ, evameva paṭhamaṃ dinnā pārisuddhi dutiyameva pāpuṇāti, na tatiyanti.
ಆಗನ್ತ್ವಾತಿ ಸಙ್ಘಸ್ಸ ಹತ್ಥಪಾಸಂ ಆಗನ್ತ್ವಾ। ಪಾಳಿಯಂ ಸುತ್ತೋ ನ ಆರೋಚೇತೀತಿಆದೀಸು ಹೇತ್ವತ್ಥೇ ಪಚ್ಚತ್ತವಚನಂ। ಸುತ್ತೇನ ನಾರೋಚೇತೀತಿ ಹಿ ಅತ್ಥೋ। ಪಾರಿಸುದ್ಧಿಹಾರಕಸ್ಸ ಅನಾಪತ್ತೀತಿ ಏತ್ಥ ಆಪತ್ತೀತಿ ಅನ್ವಯತ್ಥಂ ಅತ್ಥಾಪತ್ತಿತೋ ದಸ್ಸೇನ್ತೋ ಆಹ ‘‘ಸಚೇ…ಪೇ॰… ಆಪಜ್ಜತೀ’’ತಿ। ಅಸ್ಸಾತಿ ಭಿಕ್ಖುಸ್ಸ। ಉಭಿನ್ನಮ್ಪೀತಿ ಪಾರಿಸುದ್ಧಿದಾಯಕಸ್ಸ, ತಂಹಾರಕಸ್ಸ ಚಾತಿ ಉಭಿನ್ನಮ್ಪಿ।
Āgantvāti saṅghassa hatthapāsaṃ āgantvā. Pāḷiyaṃ sutto na ārocetītiādīsu hetvatthe paccattavacanaṃ. Suttena nārocetīti hi attho. Pārisuddhihārakassa anāpattīti ettha āpattīti anvayatthaṃ atthāpattito dassento āha ‘‘sace…pe… āpajjatī’’ti. Assāti bhikkhussa. Ubhinnampīti pārisuddhidāyakassa, taṃhārakassa cāti ubhinnampi.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಗ್ಗಪಾಳಿ • Mahāvaggapāḷi / ೮೭. ಪಾರಿಸುದ್ಧಿದಾನಕಥಾ • 87. Pārisuddhidānakathā
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā / ಪಾರಿಸುದ್ಧಿದಾನಕಥಾ • Pārisuddhidānakathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಪಾರಿಸುದ್ಧಿದಾನಕಥಾವಣ್ಣನಾ • Pārisuddhidānakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಪಾರಿಸುದ್ಧಿದಾನಕಥಾವಣ್ಣನಾ • Pārisuddhidānakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಪಕ್ಖಗಣನಾದಿಉಗ್ಗಹಣಾನುಜಾನನಕಥಾದಿವಣ್ಣನಾ • Pakkhagaṇanādiuggahaṇānujānanakathādivaṇṇanā
