| Library / Tipiṭaka / д̇ибидага • Tipiṭaka / саарад̇т̇ад̣̇ийбаний-дийгаа • Sāratthadīpanī-ṭīkā |
баарисуд̣̇д̇хид̣̇аанагат̇ааван̣н̣анаа
Pārisuddhidānakathāvaṇṇanā
164. язна гзнажи ан̇г̇абажжан̇г̇зна вин̃н̃аабзд̇ийд̇и манасаа жинд̇зд̇ваа хад̇т̇аббаяог̇аад̣̇инаа язна гзнажи вин̃н̃аабзд̇и. сан̇гхо наббаход̇ийд̇и д̣̇виннам̣ д̣̇виннам̣ анд̇араа хад̇т̇абаасам̣ авиж̇ахид̇ваа бадибаадияаа таад̇ум̣ наббаход̇и. ид̇араа бана б̣ил̣ааласан̇калигабаарисуд̣̇д̇хи наамаад̇и зд̇т̇а гзжи вад̣̇анд̇и ‘‘б̣ил̣ааласан̇калигаа б̣ад̣̇д̇хаава ход̇и анд̇ог̇зхз зва самбаяож̇анад̇д̇аа, яат̇аа саа на гад̇т̇ажи г̇ажчад̇и, д̇ат̇аа сааби на г̇ажчад̇ийд̇и ад̇хиббааяо. ид̇арат̇аа висзсанам̣ нирад̇т̇агам̣ ход̇ий’’д̇и. абарз бана ‘‘яат̇аа б̣ахуухи мануссзхи згасса б̣ил̣ааласса ад̇д̇ано ад̇д̇ано сан̇калигаа г̇ийвааяа ааб̣ад̣̇д̇хаа б̣ил̣аалз г̇ажчанд̇з г̇ажчанд̇и ааб̣ад̣̇д̇хад̇д̇аа, на ан̃н̃асмим̣ б̣ил̣аалз г̇ажчанд̇з г̇ажчанд̇и анааб̣ад̣̇д̇хад̇д̇аа, звамзвасса бхигкусса б̣ахуухи сан̇калигасад̣̇исаа чанд̣̇абаарисуд̣̇д̇хи д̣̇иннаа, саа д̇асмим̣ бхигкусмим̣ г̇ажчанд̇з г̇ажчад̇и д̇асмим̣ сан̇калигаа вияа ааб̣ад̣̇д̇хад̇д̇аа, на ан̃н̃асмим̣ анааб̣ад̣̇д̇хад̇д̇аа’’д̇и вад̣̇анд̇и. саб̣б̣амбзд̇ам̣ на саарад̇о бажжзд̇аб̣б̣ам̣. аяам̣ банзд̇т̇а сааро – яат̇аа сан̇калигааяа батамавалаяам̣ д̣̇уд̇ияам̣язва валаяам̣ баабун̣аад̇и, на д̇ад̇ияам̣, звамаяамби баарисуд̣̇д̇хид̣̇ааяагзна яасса д̣̇иннаа, д̇ад̇о ан̃н̃ад̇т̇а на г̇ажчад̇ийд̇и сан̇калигасад̣̇исад̇д̇аа ‘‘б̣ил̣ааласан̇калигаа’’д̇и вуд̇д̇аа. б̣ил̣ааласан̇калигаг̇ахан̣ан̃жзд̇т̇а яаасам̣ гаасан̃жи сан̇калигаанам̣ убалагкан̣амад̇д̇анд̇и д̣̇адтаб̣б̣ам̣.
164.Yena kenaci aṅgapaccaṅgena viññāpetīti manasā cintetvā hatthappayogādinā yena kenaci viññāpeti. Saṅgho nappahotīti dvinnaṃ dvinnaṃ antarā hatthapāsaṃ avijahitvā paṭipāṭiyā ṭhātuṃ nappahoti. Itarā pana biḷālasaṅkhalikapārisuddhi nāmāti ettha keci vadanti ‘‘biḷālasaṅkhalikā baddhāva hoti antogehe eva sampayojanattā, yathā sā na katthaci gacchati, tathā sāpi na gacchatīti adhippāyo. Itarathā visesanaṃ niratthakaṃ hotī’’ti. Apare pana ‘‘yathā bahūhi manussehi ekassa biḷālassa attano attano saṅkhalikā gīvāya ābaddhā biḷāle gacchante gacchanti ābaddhattā, na aññasmiṃ biḷāle gacchante gacchanti anābaddhattā, evamevassa bhikkhussa bahūhi saṅkhalikasadisā chandapārisuddhi dinnā, sā tasmiṃ bhikkhusmiṃ gacchante gacchati tasmiṃ saṅkhalikā viya ābaddhattā, na aññasmiṃ anābaddhattā’’ti vadanti. Sabbampetaṃ na sārato paccetabbaṃ. Ayaṃ panettha sāro – yathā saṅkhalikāya paṭhamavalayaṃ dutiyaṃyeva valayaṃ pāpuṇāti, na tatiyaṃ, evamayampi pārisuddhidāyakena yassa dinnā, tato aññattha na gacchatīti saṅkhalikasadisattā ‘‘biḷālasaṅkhalikā’’ti vuttā. Biḷālasaṅkhalikagahaṇañcettha yāsaṃ kāsañci saṅkhalikānaṃ upalakkhaṇamattanti daṭṭhabbaṃ.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махааваг̇г̇абаал̣и • Mahāvaggapāḷi / 87. баарисуд̣̇д̇хид̣̇аанагат̇аа • 87. Pārisuddhidānakathā
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махааваг̇г̇а-адтагат̇аа • Mahāvagga-aṭṭhakathā / баарисуд̣̇д̇хид̣̇аанагат̇аа • Pārisuddhidānakathā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / баарисуд̣̇д̇хид̣̇аанагат̇ааван̣н̣анаа • Pārisuddhidānakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / багкаг̇ан̣анаад̣̇иуг̇г̇ахан̣аануж̇аананагат̇аад̣̇иван̣н̣анаа • Pakkhagaṇanādiuggahaṇānujānanakathādivaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 87. баарисуд̣̇д̇хид̣̇аанагат̇аа • 87. Pārisuddhidānakathā
