| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
2. பரிவாஸகதா²
2. Parivāsakathā
102. தஸ்ஸாதி படிச்ச²ன்னமானத்தஸ்ஸ. ஸமோதா⁴னெத்வாதி இதே⁴வ பரிவாஸகதா²யங் ஸமோதா⁴னெத்வா. இதே⁴வ பரிவாஸகதா²யங் த³ஸ்ஸயிஸ்ஸாமாதி யோஜனா. இதே⁴வஸத்³தோ³ ஹி புப்³பா³பராபெக்கோ².
102.Tassāti paṭicchannamānattassa. Samodhānetvāti idheva parivāsakathāyaṃ samodhānetvā. Idheva parivāsakathāyaṃ dassayissāmāti yojanā. Idhevasaddo hi pubbāparāpekkho.
இத⁴ அதி⁴ப்பேதங் பரிவாஸங் வித்தா²ரெத்வா த³ஸ்ஸெந்தோ ஆஹ ‘‘அயங் ஹீ’’திஆதி³. இத⁴ அதி⁴ப்பேதோ பரிவாஸோ நாம திவிதோ⁴ ஹோதீதி யோஜனா. தத்தா²தி திவிதே⁴ஸு பரிவாஸேஸு. ‘‘யதா²படிச்ச²ன்னாய ஆபத்தியா’’தி வசனங் வித்தா²ரெந்தோ ஆஹ ‘‘கஸ்ஸசி ஹீ’’திஆதி³. யதா² உதா³யித்தே²ரஸ்ஸ ஏகாஹபடிச்ச²ன்னா அயங் ஆபத்தி ஹோதி, ததா² கஸ்ஸசி ஏகாஹபடிச்ச²ன்னா ஆபத்தி ஹோதீதி யோஜனா. யதா² ச பரதோ ஆக³தா உதா³யித்தே²ரஸ்ஸேவ ஆபத்தி ஹோதி, ததா² கஸ்ஸசி த்³விஹாதி³படிச்ச²ன்னா ஆபத்தி ஹோதீதி யோஜனா. இமினா வுத்தனயானுஸாரேன பரதோபி நயோ நேதப்³போ³. தஸ்மாதி யஸ்மா ஏகாஹாதி³படிச்ச²ன்னா ஏகாதி³ஆபத்தி ஹோதி, தஸ்மா ஜானிதப்³போ³தி யோஜனா.
Idha adhippetaṃ parivāsaṃ vitthāretvā dassento āha ‘‘ayaṃ hī’’tiādi. Idha adhippeto parivāso nāma tividho hotīti yojanā. Tatthāti tividhesu parivāsesu. ‘‘Yathāpaṭicchannāya āpattiyā’’ti vacanaṃ vitthārento āha ‘‘kassaci hī’’tiādi. Yathā udāyittherassa ekāhapaṭicchannā ayaṃ āpatti hoti, tathā kassaci ekāhapaṭicchannā āpatti hotīti yojanā. Yathā ca parato āgatā udāyittherasseva āpatti hoti, tathā kassaci dvihādipaṭicchannā āpatti hotīti yojanā. Iminā vuttanayānusārena paratopi nayo netabbo. Tasmāti yasmā ekāhādipaṭicchannā ekādiāpatti hoti, tasmā jānitabboti yojanā.
படிச்ச²ன்னபா⁴வங் வித்தா²ரெந்தோ ஆஹ ‘‘அயங் ஹீ’’திஆதி³. தத்தா²தி ‘‘த³ஸஹாகாரேஹீ’’தி பாடே². ஆபத்திஇதி ஸஞ்ஞா ஏதஸ்ஸாதி ஆபத்திஸஞ்ஞீ . பஹு சாதி ஸமத்தோ² ச. பபுப்³போ³ ஹூதா⁴து ஸமத்த²த்தே² ஹோதி.
Paṭicchannabhāvaṃ vitthārento āha ‘‘ayaṃ hī’’tiādi. Tatthāti ‘‘dasahākārehī’’ti pāṭhe. Āpattiiti saññā etassāti āpattisaññī. Pahu cāti samattho ca. Papubbo hūdhātu samatthatthe hoti.
தத்தா²தி தஸ்ஸங் மாதிகாயங். யந்தி ஆபத்திங். ஸோபி சாதி பி⁴க்கு²பி ச. தத்தா²தி தஸ்ஸங் ஆபத்தியங். அயந்தி பி⁴க்கு². தத்தா²தி ஆபத்தியங். அலஜ்ஜிபக்கே² திட்ட²தீதி ‘‘ஸஞ்சிச்ச ஆபத்திங் பரிகூ³ஹதீ’’தி (பரி॰ 359) வுத்தபக்கே² டி²தத்தா அலஜ்ஜிபக்கே² திட்ட²தி.
Tatthāti tassaṃ mātikāyaṃ. Yanti āpattiṃ. Sopi cāti bhikkhupi ca. Tatthāti tassaṃ āpattiyaṃ. Ayanti bhikkhu. Tatthāti āpattiyaṃ. Alajjipakkhe tiṭṭhatīti ‘‘sañcicca āpattiṃ parigūhatī’’ti (pari. 359) vuttapakkhe ṭhitattā alajjipakkhe tiṭṭhati.
பகதத்தோதி எத்த² ‘‘பாராஜிகங் அனஜ்ஜா²பன்னோ’’தி அத்த²ங் படிக்கி²பந்தோ ஆஹ ‘‘திவித⁴ங் உக்கே²பனீயகம்மங் அகதோ’’தி. ஏதந்தி அப்படிச்ச²ன்னபா⁴வங், ‘‘ஆபஜ்ஜதி…பே॰… குஸலேஹி சிந்திதா’’தி வசனங் வா.
Pakatattoti ettha ‘‘pārājikaṃ anajjhāpanno’’ti atthaṃ paṭikkhipanto āha ‘‘tividhaṃ ukkhepanīyakammaṃ akato’’ti. Etanti appaṭicchannabhāvaṃ, ‘‘āpajjati…pe… kusalehi cintitā’’ti vacanaṃ vā.
கா³தா²ய ‘‘ஸாவஸேஸ’’ந்தி இமினா பாராஜிகங் நிவத்தேதி. க³ருகந்தி எத்த² ஸங்கா⁴தி³ஸேஸமேவ அதி⁴ப்பேதந்தி த³ஸ்ஸேதி. அனாத³ரியந்தி ஸிக்கா²பதே³ அனாத³ரியங். வஜ்ஜந்தி து³க்கடங். உக்கி²த்தகேன கரணபூ⁴தேன.
Gāthāya ‘‘sāvasesa’’nti iminā pārājikaṃ nivatteti. Garukanti ettha saṅghādisesameva adhippetanti dasseti. Anādariyanti sikkhāpade anādariyaṃ. Vajjanti dukkaṭaṃ. Ukkhittakena karaṇabhūtena.
யஸ்ஸாதி பி⁴க்கு²ஸ்ஸ, நத்தீ²தி ஸம்ப³ந்தோ⁴. பீ⁴ருகஜாதிகதாயாதி பீ⁴ருகஸபா⁴வதாய. பப்³ப³தவிஹாரே வஸந்தஸ்ஸ யஸ்ஸ பி⁴க்கு²னோதி யோஜனா. பப்³ப³தவிஹாரேதி பப்³ப³தஸ்ஸ தலே, அந்தரே வா காரிதே விஹாரே. ஏதஸ்மிந்தி ஏதாதி³ஸே. அந்தராயே ஸதியேவாதி யோஜனா. தஸ்ஸ அச்ச²ன்னாவ ஹோதீதி யோஜனா. அனந்தராயிகஸஞ்ஞாய சா²த³யதோ அச்ச²ன்னாவாதி அனந்தராயிகஸஞ்ஞாய சா²தெ³ந்தஸ்ஸாபி ஏகந்தேன அந்தராயிகத்தா அச்ச²ன்னாவாதி அதி⁴ப்பாயோ.
Yassāti bhikkhussa, natthīti sambandho. Bhīrukajātikatāyāti bhīrukasabhāvatāya. Pabbatavihāre vasantassa yassa bhikkhunoti yojanā. Pabbatavihāreti pabbatassa tale, antare vā kārite vihāre. Etasminti etādise. Antarāye satiyevāti yojanā. Tassa acchannāva hotīti yojanā. Anantarāyikasaññāya chādayato acchannāvāti anantarāyikasaññāya chādentassāpi ekantena antarāyikattā acchannāvāti adhippāyo.
அஸ்ஸாதி பி⁴க்கு²ஸ்ஸ. ஹனுகவாதோதி ஹனுகஸ்ஸ கே³லஞ்ஞகரோ வாதோ. விஜ்ஜ²தீதி ஹனுகங் விஜ்ஜ²தி. இமினாதி பி⁴க்கு²னா. பஹுஸஞ்ஞினோ சா²தி³தாபி ஏகந்தேன அபஹுத்தா அச்சா²தி³தாவ ஹோதி.
Assāti bhikkhussa. Hanukavātoti hanukassa gelaññakaro vāto. Vijjhatīti hanukaṃ vijjhati. Imināti bhikkhunā. Pahusaññino chāditāpi ekantena apahuttā acchāditāva hoti.
சா²தே³துகாமோ சாதி எத்த² இத³ங் சதுக்கங் வேதி³தப்³ப³ங் சா²தே³துகாமோ சா²தே³தி, சா²தே³துகாமோ நச்சா²தே³தி, அச்சா²தே³துகாமோ சா²தே³தி, நச்சா²தே³துகாமோ நச்சா²தே³தீதி. தத்த² பட²மபத³ங் ஸந்தா⁴ய வுத்தங் ‘‘இத³ங் உத்தானத்த²மேவா’’தி. ஏவங் ஸேஸாஸுபி மாதிகாஸு சதுக்கங் வேதி³தப்³ப³ங் . சதூஸு சதுக்கேஸு பட²மபதே³ ஏவ ச²ன்னா ஹோதி, ந ஸேஸபதே³ஸு. அனுத்தானத்த²ங் த³ஸ்ஸெந்தோ ஆஹ ‘‘ஸசே பனா’’திஆதி³. புரேப⁴த்தே வாதி புரேப⁴த்தங் வா, ப⁴த்ததோ, ப⁴த்தஸ்ஸ வா புரேதி புரேப⁴த்தங். அப்³யயீபா⁴வஸமாஸே ஸத்தமீவிப⁴த்தியா அமிதிகாரியஸ்ஸ அனிச்சபா⁴வதோ வுத்தங் ‘‘புரேப⁴த்தே’’தி. ஏஸேவ நயோ ‘‘பச்சா²ப⁴த்தே’’தி எத்தா²பி. து³தியபத³ஸ்ஸ அத்த²ங் த³ஸ்ஸெத்வா ததியபத³ஸ்ஸ அத்த²ங் த³ஸ்ஸெந்தோ ஆஹ ‘‘யஸ்ஸ பனா’’திஆதி³. அபி⁴க்கு²கே டா²னே வஸந்தஸ்ஸ யஸ்ஸ பி⁴க்கு²ஸ்ஸாதி யோஜனா. ஆக³மெந்தஸ்ஸ க³ச்ச²ந்தஸ்ஸாதி அனாத³ரே சேதானி ஸாமிவசனானி.
Chādetukāmo cāti ettha idaṃ catukkaṃ veditabbaṃ chādetukāmo chādeti, chādetukāmo nacchādeti, acchādetukāmo chādeti, nacchādetukāmo nacchādetīti. Tattha paṭhamapadaṃ sandhāya vuttaṃ ‘‘idaṃ uttānatthamevā’’ti. Evaṃ sesāsupi mātikāsu catukkaṃ veditabbaṃ . Catūsu catukkesu paṭhamapade eva channā hoti, na sesapadesu. Anuttānatthaṃ dassento āha ‘‘sace panā’’tiādi. Purebhatte vāti purebhattaṃ vā, bhattato, bhattassa vā pureti purebhattaṃ. Abyayībhāvasamāse sattamīvibhattiyā amitikāriyassa aniccabhāvato vuttaṃ ‘‘purebhatte’’ti. Eseva nayo ‘‘pacchābhatte’’ti etthāpi. Dutiyapadassa atthaṃ dassetvā tatiyapadassa atthaṃ dassento āha ‘‘yassa panā’’tiādi. Abhikkhuke ṭhāne vasantassa yassa bhikkhussāti yojanā. Āgamentassa gacchantassāti anādare cetāni sāmivacanāni.
சதுத்த²பத³ஸ்ஸ அத்த²ங் த³ஸ்ஸெந்தோ ஆஹ ‘‘யோ பனா’’திஆதி³. தத்த² யோ பனாதி பி⁴க்கு² பன, ஆவி கரோதீதி ஸம்ப³ந்தோ⁴. ஸபா⁴க³ந்தி அவேரிங். அயந்தி பி⁴க்கு². உபஜ்ஜா²யோ இதி வா ஆசரியோ இதி வாதி யோஜனா. லஜ்ஜாயாதி லஜ்ஜனிமித்தங், லஜ்ஜகாரணா, லஜ்ஜஹேது வா. ஹீதி ஸச்சங், யஸ்மா வா, இதா⁴தி ஆபத்திஆரோசனட்டா²னே. அவேரிஸபா⁴க³ஸ்ஸாதி அவேரீ ஹுத்வா ஸபா⁴க³ஸ்ஸ.
Catutthapadassa atthaṃ dassento āha ‘‘yo panā’’tiādi. Tattha yo panāti bhikkhu pana, āvi karotīti sambandho. Sabhāganti averiṃ. Ayanti bhikkhu. Upajjhāyo iti vā ācariyo iti vāti yojanā. Lajjāyāti lajjanimittaṃ, lajjakāraṇā, lajjahetu vā. Hīti saccaṃ, yasmā vā, idhāti āpattiārocanaṭṭhāne. Averisabhāgassāti averī hutvā sabhāgassa.
பகாஸேதுகாமோதி அஞ்ஞேஸங் பகாஸேதுகாமோ. உபஜ்ஜா²யஸ்ஸாபீதி பிஸத்³தே³ன அஞ்ஞஸ்ஸ ஸந்திகே கா நாம கதா²தி த³ஸ்ஸேதி. தத்தா²தி ஆபத்திஆரோசனட்டா²னே. ஸபா⁴க³ஸங்கா⁴தி³ஸேஸந்தி வத்து²ஸபா⁴க³ஸங்கா⁴தி³ஸேஸங். ஸுத்³த⁴ஸ்ஸாதி வத்து²ஸபா⁴க³ஸங்கா⁴தி³ஸேஸதோ ஸுத்³த⁴ஸ்ஸ. ஆவிகரணாகாரங் த³ஸ்ஸெந்தோ ஆஹ ‘‘ஆவிகரொந்தோ சா’’திஆதி³. இதி இமானீதிஆதி³ நிக³மனங்.
Pakāsetukāmoti aññesaṃ pakāsetukāmo. Upajjhāyassāpīti pisaddena aññassa santike kā nāma kathāti dasseti. Tatthāti āpattiārocanaṭṭhāne. Sabhāgasaṅghādisesanti vatthusabhāgasaṅghādisesaṃ. Suddhassāti vatthusabhāgasaṅghādisesato suddhassa. Āvikaraṇākāraṃ dassento āha ‘‘āvikaronto cā’’tiādi. Iti imānītiādi nigamanaṃ.
ததோதி ஜானிதப்³ப³தோ, பரந்தி ஸம்ப³ந்தோ⁴. ஏகாஹபடிச்ச²ன்னாதி ஏகாஹேன படிச்ச²ன்னா. யாவ சுத்³த³ஸ தி³வஸானி, தாவ தி³வஸவஸேன யோஜனா காதப்³பா³தி யோஜனா. பக்க²படிச்ச²ன்னந்தி பக்கே²ன படிச்ச²ன்னங். அதிரேகபக்க²படிச்ச²ன்னந்தி பக்க²தோ அதிரேகேன படிச்ச²ன்னங்.
Tatoti jānitabbato, paranti sambandho. Ekāhapaṭicchannāti ekāhena paṭicchannā. Yāva cuddasa divasāni, tāva divasavasena yojanā kātabbāti yojanā. Pakkhapaṭicchannanti pakkhena paṭicchannaṃ. Atirekapakkhapaṭicchannanti pakkhato atirekena paṭicchannaṃ.
ஸங்வச்ச²ரபடிச்ச²ன்னந்தி ஸங்வச்ச²ரேன படிச்ச²ன்னங். ததோ வாதி அதிரேகஸட்டி²ஸங்வச்ச² ரதோ வா. பி⁴ய்யோபீதி அதிரேகம்பி.
Saṃvaccharapaṭicchannanti saṃvaccharena paṭicchannaṃ. Tato vāti atirekasaṭṭhisaṃvaccha rato vā. Bhiyyopīti atirekampi.
ததோதி தீஹி ஆபத்தீஹி. பரந்தி அதிரேகங். க³ணனவஸேனாதி ஆபத்திக³ணனவஸேன. வத்து²கித்தனவஸேன வாதி ஆபத்தீனங் வத்து²கித்தனவஸேன வா. நாமமத்தவஸேன வாதி ‘‘ஸங்கா⁴தி³ஸேஸாபத்தியோ’’தி ஏவங் நாமஸ்ஸேவ வஸேன வா. எத்த² ஹி மத்தஸத்³தோ³ அவதா⁴ரணத்தோ², தேன வத்து²ங் நிவத்தேதி.
Tatoti tīhi āpattīhi. Paranti atirekaṃ. Gaṇanavasenāti āpattigaṇanavasena. Vatthukittanavasena vāti āpattīnaṃ vatthukittanavasena vā. Nāmamattavasena vāti ‘‘saṅghādisesāpattiyo’’ti evaṃ nāmasseva vasena vā. Ettha hi mattasaddo avadhāraṇattho, tena vatthuṃ nivatteti.
தத்தா²தி ‘‘நாமமத்தவஸேனா’’தி பதே³. ஸஜாதிஸாதா⁴ரணந்தி ஸஸ்ஸ அத்தனோ ஜாதி ஸஜாதி, தாய ஸாதா⁴ரணங் ஸஜாதிஸாதா⁴ரணங். ஸப்³பே³ஸங், ஸப்³பே³ஹி வா ஆபத்தீஹி ஸாதா⁴ரணங் ஸப்³ப³ஸாதா⁴ரணங். தத்தா²தி து³விதே⁴ஸு நாமேஸு. ஸப்³ப³ஸாதா⁴ரணனாமவஸேனாபீதி எத்த² பிஸத்³தோ³ ‘‘அஹங் ப⁴ந்தே ஸம்ப³ஹுலா ஸங்கா⁴தி³ஸேஸா ஆபஜ்ஜிங் ஏகாஹபடிச்ச²ன்னாயோ’’தி ஏவங் ஸஜாதிஸாதா⁴ரணனாமவஸேனபி ‘‘அஹங் ப⁴ந்தே ஸம்ப³ஹுலா ஸங்கா⁴தி³ஸேஸா ஆபத்தியோ ஆபஜ்ஜிங் ஏகாஹபடிச்ச²ன்னாயோ’’தி ஏவங் உப⁴யஸாதா⁴ரணவஸேனபி வத்துங் வட்டதீதி த³ஸ்ஸேதி. ஹீதி ஸச்சங். ஸப்³ப³ம்பி பரிவாஸாதி³கங் இத³ங் வினயகம்மந்தி யோஜனா. வஸதி ஆபத்தி எத்த² ததா³யத்தவுத்திதாயாதி வத்து². கோ³ வுச்சதி வசனங் வா ஞாணங் வா, தங் தாயதீதி கொ³த்தங்.
Tatthāti ‘‘nāmamattavasenā’’ti pade. Sajātisādhāraṇanti sassa attano jāti sajāti, tāya sādhāraṇaṃ sajātisādhāraṇaṃ. Sabbesaṃ, sabbehi vā āpattīhi sādhāraṇaṃ sabbasādhāraṇaṃ. Tatthāti duvidhesu nāmesu. Sabbasādhāraṇanāmavasenāpīti ettha pisaddo ‘‘ahaṃ bhante sambahulā saṅghādisesā āpajjiṃ ekāhapaṭicchannāyo’’ti evaṃ sajātisādhāraṇanāmavasenapi ‘‘ahaṃ bhante sambahulā saṅghādisesā āpattiyo āpajjiṃ ekāhapaṭicchannāyo’’ti evaṃ ubhayasādhāraṇavasenapi vattuṃ vaṭṭatīti dasseti. Hīti saccaṃ. Sabbampi parivāsādikaṃ idaṃ vinayakammanti yojanā. Vasati āpatti ettha tadāyattavuttitāyāti vatthu. Go vuccati vacanaṃ vā ñāṇaṃ vā, taṃ tāyatīti gottaṃ.
தத்தா²தி வத்தா²தீ³ஸு சதுப்³பி³தே⁴ஸு. தத்தா²தி தேஸு வசனேஸு. ஸுக்கவிஸ்ஸட்டி²ங் காயஸங்ஸக்³க³ந்திஆதி³னா வசனேனாபீதி எத்த² ஆதி³ஸத்³தே³ன து³ட்டு²ல்லாதி³வசனானி ஸங்க³ண்ஹாதி. இத⁴ பனாதி இமஸ்மிங் பன டா²னே. யோ யோதி திஸ்ஸோ வா பு²ஸ்ஸோ வா ஆபன்னோ ஹோதி.
Tatthāti vatthādīsu catubbidhesu. Tatthāti tesu vacanesu. Sukkavissaṭṭhiṃ kāyasaṃsaggantiādinā vacanenāpīti ettha ādisaddena duṭṭhullādivacanāni saṅgaṇhāti. Idha panāti imasmiṃ pana ṭhāne. Yo yoti tisso vā phusso vā āpanno hoti.
ஏவங் ஆரோசேதப்³ப³ந்தி ஏவங் வக்க²மானநயேன ஆரோசேதப்³ப³ந்தி யோஜனா. கிங் ஆரோசேதப்³ப³ங்? ‘‘அஹங் ப⁴ந்தே…பே॰… ஸங்கோ⁴ தா⁴ரேது’’ இதி ஆரோசேதப்³ப³ந்தி யோஜனா.
Evaṃ ārocetabbanti evaṃ vakkhamānanayena ārocetabbanti yojanā. Kiṃ ārocetabbaṃ? ‘‘Ahaṃ bhante…pe… saṅgho dhāretu’’ iti ārocetabbanti yojanā.
வேத³யாமஹந்தி வேத³யாமி அஹங். மம பாரிவாஸிகபா⁴வங் ஸங்க⁴ங், ஸங்க⁴ஸ்ஸ வா ஜானாபேமீதி அத்தோ². வேத³யதீதி மந்தி வேத³யதி இதி மங். பாரிவாஸிகபா⁴வங் ஸங்க⁴ங், ஸங்க⁴ஸ்ஸ வா ஜானாபேதீதி மங் ஸங்கோ⁴ தா⁴ரேதூதி அத்தோ². எத்த² ப³ஹூஸு அட்ட²கதா²பொத்த²கேஸு ‘‘திண்ணங் வா அதிரேகானங் வா ஆரோசெந்தேன ஆயஸ்மந்தோ தா⁴ரெந்தூ’’தி பாடோ² அத்தி² . கேஸுசி அட்ட²கதா²பொத்த²கேஸு ‘‘திண்ணங் ஆரோசெந்தேன ஆயஸ்மந்தோ தா⁴ரெந்தூ’’தி எத்தகோயேவ பாடோ² அத்தி². ஹெட்டா² மானத்தகதா²யம்பி ஏவமேவ அத்தி². தத்த² ‘‘அதிரேகான’’ந்தி இமினா தீஹி அதிரேகானங் ஆரோசெந்தேன ஸங்க⁴ங் அபெக்கி²த்வா ஸசே ஏகவசனவஸேன வத்துகாமோ ஹோதி, ‘‘மங் ஸங்கோ⁴ தா⁴ரேதூ’’தி வத்தப்³ப³ங். அத² ஸம்ப³ஹுலே பி⁴க்கூ² அபெக்கி²த்வா ஸசே ப³ஹுவசனவஸேன வத்துகாமோ ஹோதி, யதா² திண்ணங், ஏவங் ‘‘மங் ஆயஸ்மந்தோ தா⁴ரெந்தூ’’தி வத்தப்³ப³ந்தி த³ஸ்ஸேதி. இத³ஞ்ச ஸத்³த³ஸத்த²வஸேனேவ வுத்தங், ந வினயகம்மவிபத்திவஸேனாதி த³ட்ட²ப்³ப³ங்.
Vedayāmahanti vedayāmi ahaṃ. Mama pārivāsikabhāvaṃ saṅghaṃ, saṅghassa vā jānāpemīti attho. Vedayatīti manti vedayati iti maṃ. Pārivāsikabhāvaṃ saṅghaṃ, saṅghassa vā jānāpetīti maṃ saṅgho dhāretūti attho. Ettha bahūsu aṭṭhakathāpotthakesu ‘‘tiṇṇaṃ vā atirekānaṃ vā ārocentena āyasmanto dhārentū’’ti pāṭho atthi . Kesuci aṭṭhakathāpotthakesu ‘‘tiṇṇaṃ ārocentena āyasmanto dhārentū’’ti ettakoyeva pāṭho atthi. Heṭṭhā mānattakathāyampi evameva atthi. Tattha ‘‘atirekāna’’nti iminā tīhi atirekānaṃ ārocentena saṅghaṃ apekkhitvā sace ekavacanavasena vattukāmo hoti, ‘‘maṃ saṅgho dhāretū’’ti vattabbaṃ. Atha sambahule bhikkhū apekkhitvā sace bahuvacanavasena vattukāmo hoti, yathā tiṇṇaṃ, evaṃ ‘‘maṃ āyasmanto dhārentū’’ti vattabbanti dasseti. Idañca saddasatthavaseneva vuttaṃ, na vinayakammavipattivasenāti daṭṭhabbaṃ.
‘‘விஹாரேயேவ ரத்திபரிக்³க³ஹோ’’தி இமினா அந்தோஉபசாரஸீமாயம்பி பரிவஸிதப்³ப³பா⁴வங் த³ஸ்ஸேதி. உபசாரஸீமந்தி பரிக்கி²த்தஸ்ஸ விஹாரஸ்ஸ பரிக்கே²பங், அபரிக்கி²த்தஸ்ஸ பரிக்கே²பாரஹட்டா²னங். ஏஸாதி பாரிவாஸிகோ பி⁴க்கு². அஸ்ஸாதி ஆக³தஸ்ஸ பி⁴க்கு²னோ.
‘‘Vihāreyeva rattipariggaho’’ti iminā antoupacārasīmāyampi parivasitabbabhāvaṃ dasseti. Upacārasīmanti parikkhittassa vihārassa parikkhepaṃ, aparikkhittassa parikkhepārahaṭṭhānaṃ. Esāti pārivāsiko bhikkhu. Assāti āgatassa bhikkhuno.
ததோதி ஆபத்திபடிச்ச²ன்னதி³வஸதோ. குக்குச்சவினோத³னத்தா²யாதி ஆபத்திபடிச்ச²ன்னதி³வஸேன ஸமங் பரிவஸிதப்³ப³ங் நுகோ², ந நுகோ²தி குக்குச்சஸ்ஸ வினோத³னத்தா²ய. பரிவுத்த²த்தாதி பரிவஸிதத்தா. ஸோதி பரிவுத்தோ² பி⁴க்கு². இத³ந்தி தா³தப்³ப³மானத்தங். தந்தி படிச்ச²ன்னமானத்தங். சா²ரத்தந்தி ச²ரத்தியோ ஸமாஹடாதி சா²ரத்தங், ஸமாஹாரே தி³கு³. ‘‘ச²ரத்த’’ந்தி வத்தப்³பே³ ஸுகு²ச்சாரணத்த²ங் ச²காரஸ்ஸ தீ³க⁴ங் கத்வா ஏவங் வுத்தங், அச்சந்தஸங்யோகே³ சேதங் உபயோக³வசனங்.
Tatoti āpattipaṭicchannadivasato. Kukkuccavinodanatthāyāti āpattipaṭicchannadivasena samaṃ parivasitabbaṃ nukho, na nukhoti kukkuccassa vinodanatthāya. Parivutthattāti parivasitattā. Soti parivuttho bhikkhu. Idanti dātabbamānattaṃ. Tanti paṭicchannamānattaṃ. Chārattanti charattiyo samāhaṭāti chārattaṃ, samāhāre digu. ‘‘Charatta’’nti vattabbe sukhuccāraṇatthaṃ chakārassa dīghaṃ katvā evaṃ vuttaṃ, accantasaṃyoge cetaṃ upayogavacanaṃ.
அப்படிச்ச²ன்னாபத்திங் தா³துங் வட்டதீதி ஸம்ப³ந்தோ⁴. இமினா ஹெட்டா² வுத்தங் படிச்ச²ன்னமானத்தங் இமஸ்மிங் படிச்ச²ன்னமானத்தே ஸமோதா⁴னெத்வாபி தா³துங் வட்டதீதி த³ஸ்ஸேதி. ஏவங் ஸந்தேபி மூலமானத்தங் படிச்ச படிச்ச²ன்னமானத்தந்தி வுச்சதி. கத²ங் தா³துங் வட்டதீதி யோஜனா.
Appaṭicchannāpattiṃ dātuṃ vaṭṭatīti sambandho. Iminā heṭṭhā vuttaṃ paṭicchannamānattaṃ imasmiṃ paṭicchannamānatte samodhānetvāpi dātuṃ vaṭṭatīti dasseti. Evaṃ santepi mūlamānattaṃ paṭicca paṭicchannamānattanti vuccati. Kathaṃ dātuṃ vaṭṭatīti yojanā.
அஸ்ஸாதி மானத்தங் யாசந்தஸ்ஸ. தத³னுரூபந்தி தஸ்ஸ யாசனஸ்ஸ அனுரூபங். ஸசே படிச்ச²ன்னா த்³வேதி எத்த² த்³வேதி நித³ஸ்ஸனமத்தங் ததோ அதிரேகம்பி க³ஹேதப்³ப³த்தா. ஸப்³ப³த்தா²தி ஸப்³பே³ஸு ஏகப³ஹூஸு. தத³னுரூபமே வாதி தஸ்ஸ மானத்ததா³னஸ்ஸ அனுரூபமேவ. இத⁴ பனாதி படிச்ச²ன்னமானத்தே பன. இதீதிஆதி³ நிக³மனங். யங் மானத்தங் தி³ய்யதீதி யோஜனா. எத்தா²தி படிச்ச²ன்னமானத்தே.
Assāti mānattaṃ yācantassa. Tadanurūpanti tassa yācanassa anurūpaṃ. Sace paṭicchannā dveti ettha dveti nidassanamattaṃ tato atirekampi gahetabbattā. Sabbatthāti sabbesu ekabahūsu. Tadanurūpame vāti tassa mānattadānassa anurūpameva. Idha panāti paṭicchannamānatte pana. Itītiādi nigamanaṃ. Yaṃ mānattaṃ diyyatīti yojanā. Etthāti paṭicchannamānatte.
அவஸேஸாதி அப்படிச்ச²ன்னபரிவாஸபடிச்ச²ன்னபரிவாஸேஹி அவஸேஸா. தத்தா²தி அவஸேஸேஸு த்³வீஸு பரிவாஸேஸு. அத⁴ம்மிகமானத்தசாராவஸானே அனுஞ்ஞாதபரிவாஸோதி ஸம்ப³ந்தோ⁴. கிஸ்மிங் வத்து²ஸ்மிங் அனுஞ்ஞாதோதி ஆஹ ‘‘இமஸ்மிங் வத்து²ஸ்மி’’ந்தி. ஏஸாதி ஸுத்³த⁴ந்தோ, தா³தப்³போ³தி ஸம்ப³ந்தோ⁴. ஏதந்தி ஜானநாஜானநங்.
Avasesāti appaṭicchannaparivāsapaṭicchannaparivāsehi avasesā. Tatthāti avasesesu dvīsu parivāsesu. Adhammikamānattacārāvasāne anuññātaparivāsoti sambandho. Kismiṃ vatthusmiṃ anuññātoti āha ‘‘imasmiṃ vatthusmi’’nti. Esāti suddhanto, dātabboti sambandho. Etanti jānanājānanaṃ.
தத்தா²தி த்³வீஸு ஸுத்³த⁴ந்தேஸு, சூளஸுத்³த⁴ந்தோதி வுச்சதீதி ஸம்ப³ந்தோ⁴. யோதி பி⁴க்கு², வத³தீதி ஸம்ப³ந்தோ⁴. ஆரோசிததி³வஸதோதி ஆபத்திஆரோசிததி³வஸதோ.
Tatthāti dvīsu suddhantesu, cūḷasuddhantoti vuccatīti sambandho. Yoti bhikkhu, vadatīti sambandho. Ārocitadivasatoti āpattiārocitadivasato.
தந்தி சூளஸுத்³த⁴ந்தங், பரிவஸந்தேன பரிவஸிதப்³ப³ந்தி ஸம்ப³ந்தோ⁴. அக்³க³ஹேஸீதி பரிவாஸங் அக்³க³ஹேஸி. அஞ்ஞந்தி க³ஹிதமாஸதோ அஞ்ஞங். ‘‘பரிவாஸதா³னகிச்சங் நத்தீ²’’தி இமினா பரிவாஸக³ஹணகிச்சம்பி நத்தீ²தி த³ஸ்ஸேதி க³ண்ஹந்தஸ்ஸேவ தா³தப்³ப³த்தா, தெ³ந்தஸ்ஸேவ க³ஹேதப்³ப³த்தா வா. உத்³த⁴ம்பி ஆரோஹதீதி பரிவாஸக³ஹணகாலதோ அஞ்ஞம்பி காலங் பரிவஸிதப்³ப³த்தா உத்³த⁴ம்பி ஆரோஹதி. ஹெட்டா²பி ஓரோஹதீதி பரிவாஸக³ஹணகாலதோ ஊனம்பி காலங் பரிவஸிதப்³ப³த்தா ஹெட்டா²பி ஓரோஹதி. இத³ந்தி ஆரோஹனோரோஹனங். தஸ்ஸாதி ஸுத்³த⁴ந்தபரிவாஸஸ்ஸ. ஏகமேவ படிச்ச த்³வே, திஸ்ஸோ, ஸம்ப³ஹுலா வா ப⁴வந்தீதி ஆஹ ‘‘ஏகங் வினா ஸம்ப³ஹுலானங் அபா⁴வதோ’’தி.
Tanti cūḷasuddhantaṃ, parivasantena parivasitabbanti sambandho. Aggahesīti parivāsaṃ aggahesi. Aññanti gahitamāsato aññaṃ. ‘‘Parivāsadānakiccaṃ natthī’’ti iminā parivāsagahaṇakiccampi natthīti dasseti gaṇhantasseva dātabbattā, dentasseva gahetabbattā vā. Uddhampi ārohatīti parivāsagahaṇakālato aññampi kālaṃ parivasitabbattā uddhampi ārohati. Heṭṭhāpi orohatīti parivāsagahaṇakālato ūnampi kālaṃ parivasitabbattā heṭṭhāpi orohati. Idanti ārohanorohanaṃ. Tassāti suddhantaparivāsassa. Ekameva paṭicca dve, tisso, sambahulā vā bhavantīti āha ‘‘ekaṃ vinā sambahulānaṃ abhāvato’’ti.
ஏவங் சூளஸுத்³த⁴ந்தங் த³ஸ்ஸெத்வா மஹாஸுத்³த⁴ந்தங் த³ஸ்ஸெந்தோ ஆஹ ‘‘யோ பனா’’திஆதி³. தந்தி மஹாஸுத்³த⁴ந்தங். யாவ யத்தகோ உபஸம்பத³தி³வஸோ ஹோதி, தாவ தத்தகங் காலந்தி யோஜனா. உத்³த⁴ங் நாரோஹதீதி உத்³த⁴ங் ஆரோஹனகாலஸ்ஸ அபா⁴வதோ உத்³த⁴ங் ந ஆரோஹதி. எத்தா²தி ஸுத்³த⁴ந்தபரிவாஸே. அயங் ஸுத்³த⁴ந்தபரிவாஸோ நாமாதி நிக³மனங்.
Evaṃ cūḷasuddhantaṃ dassetvā mahāsuddhantaṃ dassento āha ‘‘yo panā’’tiādi. Tanti mahāsuddhantaṃ. Yāva yattako upasampadadivaso hoti, tāva tattakaṃ kālanti yojanā. Uddhaṃ nārohatīti uddhaṃ ārohanakālassa abhāvato uddhaṃ na ārohati. Etthāti suddhantaparivāse. Ayaṃ suddhantaparivāso nāmāti nigamanaṃ.
தத்தா²தி திவிதே⁴ஸு ஸமோதா⁴னபரிவாஸேஸு. ‘‘ஓது⁴னித்வா ஸமோத³ஹித்வா தா³தப்³ப³பரிவாஸோ’’தி இமினா ஓது⁴னித்வா ஸமோதா⁴னெத்வா தா³தப்³போ³ பரிவாஸோ ஓதா⁴னஸமோதா⁴னோதி வசனத்த²ங் த³ஸ்ஸேதி, ‘‘பரிவாஸோ’’தி இமினா தத்³தி⁴தணபச்சயஸ்ஸ ஸரூபங் த³ஸ்ஸேதி. எத்த² ச அவது⁴னியதே, அவது⁴னிதப்³ப³ந்தி வா ஓதா⁴னங், ஸங் ஏகதோ ஓத³ஹீயதே ஸம்பிண்டீ³யதே, உத³ஹியதி ஸம்பிண்டி³யதீதி வா ஸமோதா⁴னந்தி அவயவவசனத்தோ² காதப்³போ³. ‘‘மக்கெ²த்வா’’தி இமினா து⁴தா⁴துயா பப்போடனத⁴ங்ஸனதோ⁴வனானி த³ஸ்ஸேதி. ஸோதி ஓதா⁴னஸமோதா⁴னோ, ஆக³தோதி ஸம்ப³ந்தோ⁴.
Tatthāti tividhesu samodhānaparivāsesu. ‘‘Odhunitvā samodahitvā dātabbaparivāso’’ti iminā odhunitvā samodhānetvā dātabbo parivāso odhānasamodhānoti vacanatthaṃ dasseti, ‘‘parivāso’’ti iminā taddhitaṇapaccayassa sarūpaṃ dasseti. Ettha ca avadhuniyate, avadhunitabbanti vā odhānaṃ, saṃ ekato odahīyate sampiṇḍīyate, udahiyati sampiṇḍiyatīti vā samodhānanti avayavavacanattho kātabbo. ‘‘Makkhetvā’’ti iminā dhudhātuyā pappoṭanadhaṃsanadhovanāni dasseti. Soti odhānasamodhāno, āgatoti sambandho.
எத்தா²தி ஓதா⁴னஸமோதா⁴னே. யோதி பி⁴க்கு², படிச்சா²தே³தீதி ஸம்ப³ந்தோ⁴. பரிவஸந்தோ வா மானத்தாரஹோ வா மானத்தங் சரந்தோ வா அப்³பா⁴னாரஹோ வா யோ பி⁴க்கூ²தி யோஜனா. ‘‘புரிமாய ஆபத்தியா’’தி பத³ங் ‘‘ஸமா வா’’தி பதே³ ஸஹாதி³யோகோ³. ‘‘ஊனதரா’’திபதே³ விப⁴த்திஅபாதா³னங், அனுமெய்யவிஸயஅபாதா³னங் வா. ‘‘அதி³வஸே கத்வா’’தி இமினா ஓது⁴னித்வாதி எத்த² து⁴தா⁴துயா யதா²வுத்தத்தே²யேவ த³ஸ்ஸேதி. ஊனகபக்க²படிச்ச²ன்னாதி பக்க²தோ ஊனகேன படிச்ச²ன்னா. ஏதேனுபாயேனாதி பக்கே² வுத்தேன ஏதேன உபாயேன.
Etthāti odhānasamodhāne. Yoti bhikkhu, paṭicchādetīti sambandho. Parivasanto vā mānattāraho vā mānattaṃ caranto vā abbhānāraho vā yo bhikkhūti yojanā. ‘‘Purimāya āpattiyā’’ti padaṃ ‘‘samā vā’’ti pade sahādiyogo. ‘‘Ūnatarā’’tipade vibhattiapādānaṃ, anumeyyavisayaapādānaṃ vā. ‘‘Adivase katvā’’ti iminā odhunitvāti ettha dhudhātuyā yathāvuttattheyeva dasseti. Ūnakapakkhapaṭicchannāti pakkhato ūnakena paṭicchannā. Etenupāyenāti pakkhe vuttena etena upāyena.
தத்தா²தி மூலாபத்திதோ அதிரேகபடிச்ச²ன்னே. ஆவி காராபெத்வாதி மூலாபத்திதோ அந்தராபத்தியா படிச்ச²ன்னபா⁴வங் ஆவி காராபெத்வா. எத்தா²தி ஆபத்திபடிச்ச²ன்னே. பமாணந்தி காரணங். யாதி ஆபத்தி. தத்தா²தி மூலபா⁴வேன கத்தப்³பா³யங் மூலிஆபத்தியங். இதரந்தி மூலிபா⁴வேன கத்தப்³ப³ங் மூலாபத்திங். ஸமோதா⁴யாதி ஸமோத³ஹித்வா. பக்கி²பித்வாதி அத்தோ².
Tatthāti mūlāpattito atirekapaṭicchanne. Āvi kārāpetvāti mūlāpattito antarāpattiyā paṭicchannabhāvaṃ āvi kārāpetvā. Etthāti āpattipaṭicchanne. Pamāṇanti kāraṇaṃ. Yāti āpatti. Tatthāti mūlabhāvena kattabbāyaṃ mūliāpattiyaṃ. Itaranti mūlibhāvena kattabbaṃ mūlāpattiṃ. Samodhāyāti samodahitvā. Pakkhipitvāti attho.
ஏகா வா யா ஆபத்தி ஸப்³ப³சிரபடிச்ச²ன்னா ஹோதீதி யோஜனா. ஸப்³ப³சிரபடிச்ச²ன்னாயோதி ஸப்³பா³ஸங் ஆபத்தீனங் சிரேன படிச்ச²ன்னாயோ. தாஸந்தி ஆபத்தீனங். அக்³கே⁴னாதி பரிச்சே²தே³ன. அக்³க⁴ஸத்³தோ³ ஹெத்த² பரிச்சே²த³த்த²வாசகோ. அபி⁴தா⁴னே (அபி⁴தா⁴னப்பதீ³பிகாயங் 1048 கா³தா²யங்) வுத்தங் ‘‘அக்³கோ⁴ முல்யே ச பூஜனே’’தி. எத்த² ‘‘முல்யே சா’’தி பத³ஸ்ஸ மூலபரிச்சே²தே³தி அத்தோ² த³ட்ட²ப்³போ³. தமேவத்த²ங் த³ஸ்ஸெந்தோ ஆஹ ‘‘தாஸங் ரத்திபரிச்சே²த³வஸேனா’’தி. இமேஹி பதே³ஹி அக்³கே⁴ன ரத்திபரிச்சே²தே³ன ஸமோதா⁴னெத்வா தா³தப்³போ³ பரிவாஸோ அக்³க⁴ஸமோதா⁴னோதி வசனத்த²ங் த³ஸ்ஸேதி. எத்த² ச ‘‘ஸப்³ப³சிரபடிச்ச²ன்னாயோ’’தி வுத்தத்தா கிஞ்சாபி கோடிஅத்த²வாசகோ ததியக்க²ரேன பாடோ² யுத்தோ விய தி³ஸ்ஸதி. ததா²பி ஸோ பாடோ² ந க³ஹேதப்³போ³. கஸ்மா? ப³ஹூஸு பாளிபொத்த²கேஸு, அட்ட²கதா²பொத்த²கேஸு ச அலிகி²தத்தா. ப³ஹூஸு ஹி போராணபொத்த²கேஸு சதுத்த²க்க²ரேன பாடோ²யேவ லிகி²தோ, தஸ்மா ஸோ பாடோ²யேவ க³ஹேதப்³போ³, ந அஞ்ஞோதி த³ட்ட²ப்³ப³ங். ஸோதி அக்³க⁴ஸமோதா⁴னோ. ஆக³தோயேவாதி ஸம்ப³ந்தோ⁴.
Ekā vā yā āpatti sabbacirapaṭicchannā hotīti yojanā. Sabbacirapaṭicchannāyoti sabbāsaṃ āpattīnaṃ cirena paṭicchannāyo. Tāsanti āpattīnaṃ. Agghenāti paricchedena. Agghasaddo hettha paricchedatthavācako. Abhidhāne (abhidhānappadīpikāyaṃ 1048 gāthāyaṃ) vuttaṃ ‘‘aggho mulye ca pūjane’’ti. Ettha ‘‘mulye cā’’ti padassa mūlaparicchedeti attho daṭṭhabbo. Tamevatthaṃ dassento āha ‘‘tāsaṃ rattiparicchedavasenā’’ti. Imehi padehi agghena rattiparicchedena samodhānetvā dātabbo parivāso agghasamodhānoti vacanatthaṃ dasseti. Ettha ca ‘‘sabbacirapaṭicchannāyo’’ti vuttattā kiñcāpi koṭiatthavācako tatiyakkharena pāṭho yutto viya dissati. Tathāpi so pāṭho na gahetabbo. Kasmā? Bahūsu pāḷipotthakesu, aṭṭhakathāpotthakesu ca alikhitattā. Bahūsu hi porāṇapotthakesu catutthakkharena pāṭhoyeva likhito, tasmā so pāṭhoyeva gahetabbo, na aññoti daṭṭhabbaṃ. Soti agghasamodhāno. Āgatoyevāti sambandho.
யஸ்ஸ பனாதி பி⁴க்கு²ஸ்ஸ, படிச்ச²ன்னாதி ஸம்ப³ந்தோ⁴. ஸப்³ப³ந்தி ஸகலங். ஆபத்திஸஹஸ்ஸகா³தா²ய –
Yassa panāti bhikkhussa, paṭicchannāti sambandho. Sabbanti sakalaṃ. Āpattisahassagāthāya –
த³ஸஸதங் ஆபத்தியோ ரத்திஸதங் சா²த³யித்வானாதி யோஜனா. இமினா நயேனபி அக்³க⁴ஸமோதா⁴னோதி எத்த² அக்³க⁴ஸத்³த³ஸ்ஸ சதுத்த²க்க²ரேன பாட²ஸ்ஸ யுத்தபா⁴வோ வேதி³தப்³போ³. அக்³கே⁴ன த³ஸரத்திபரிச்சே²தே³ன ஸமோதா⁴ய தா³தப்³போ³ அக்³க⁴ஸமோதா⁴னோ.
Dasasataṃ āpattiyo rattisataṃ chādayitvānāti yojanā. Iminā nayenapi agghasamodhānoti ettha agghasaddassa catutthakkharena pāṭhassa yuttabhāvo veditabbo. Agghena dasarattiparicchedena samodhāya dātabbo agghasamodhāno.
யோ பரிவாஸோ நானாவத்து²காயோ ஆபத்தியோ ஏகதோ கத்வா தி³ய்யதி, அயங் பரிவாஸோ மிஸ்ஸகஸமோதா⁴னோ நாமாதி யோஜனா. எத்த² வத்து²வஸேன மிஸ்ஸகா ஆபத்தியோ ஸமோதா⁴னெத்வா தா³தப்³போ³ பரிவாஸோ மிஸ்ஸகஸமோதா⁴னோதி வசனத்தோ² காதப்³போ³. தத்ராதி மிஸ்ஸகஸமோதா⁴னே. தத³னுரூபாயாதி தஸ்ஸ யாசனஸ்ஸ அனுரூபாய.
Yo parivāso nānāvatthukāyo āpattiyo ekato katvā diyyati, ayaṃ parivāso missakasamodhāno nāmāti yojanā. Ettha vatthuvasena missakā āpattiyo samodhānetvā dātabbo parivāso missakasamodhānoti vacanattho kātabbo. Tatrāti missakasamodhāne. Tadanurūpāyāti tassa yācanassa anurūpāya.
எத்த² சாதி மிஸ்ஸகஸமோதா⁴னே ச, காதுங் வட்டதீதி ஸம்ப³ந்தோ⁴.
Ettha cāti missakasamodhāne ca, kātuṃ vaṭṭatīti sambandho.
‘‘பக்க²மானத்தஞ்ச …பே॰… கத²யிஸ்ஸாமா’’தி யங் வசனங் வுத்தங், தஸ்ஸ வசனஸ்ஸ ஓகாஸோதி யோஜனா. தங் பனாதி பக்க²மானத்தங் பன. ‘‘அட்³ட⁴மாஸமேவ தா³தப்³ப³’’ந்தி இமினா பக்க²மேவ தா³தப்³ப³ங் மானத்தங் பக்க²மானத்தந்தி வசனத்த²ங் த³ஸ்ஸேதி. ஹீதி ஸச்சங். தங் பனாதி பக்க²மானத்தங் பன, தா³தப்³ப³ந்தி ஸம்ப³ந்தோ⁴. அத்தனோ ஸீமந்தி அத்தனோ விஹாரஸீமங், மஹாஸீமந்தி அத்தோ². ஸோதெ⁴த்வாதி ஸப்³பா³ஸங் ஹத்த²பாஸனயனவஸேன, ச²ந்தா³ரஹானங் ச²ந்த³னயனவஸேன, ஸீமதோ ப³ஹிகரணவஸேன ச ஸோதெ⁴த்வா. சதுவக்³க³க³ணந்தி சதுவக்³க³ஸங்க⁴ங். க³ணோதி செத்த² ஸங்கோ⁴யேவாதி⁴ப்பேதோ.
‘‘Pakkhamānattañca …pe… kathayissāmā’’ti yaṃ vacanaṃ vuttaṃ, tassa vacanassa okāsoti yojanā. Taṃ panāti pakkhamānattaṃ pana. ‘‘Aḍḍhamāsameva dātabba’’nti iminā pakkhameva dātabbaṃ mānattaṃ pakkhamānattanti vacanatthaṃ dasseti. Hīti saccaṃ. Taṃ panāti pakkhamānattaṃ pana, dātabbanti sambandho. Attano sīmanti attano vihārasīmaṃ, mahāsīmanti attho. Sodhetvāti sabbāsaṃ hatthapāsanayanavasena, chandārahānaṃ chandanayanavasena, sīmato bahikaraṇavasena ca sodhetvā. Catuvaggagaṇanti catuvaggasaṅghaṃ. Gaṇoti cettha saṅghoyevādhippeto.
தத்ராதி ‘‘யோஜனா காதப்³பா³’’தி வசனே. முக²மத்தத³ஸ்ஸனந்தி உபாயமத்தத³ஸ்ஸனங், ஆதி³மத்தத³ஸ்ஸனங் வா. ‘‘ஆபன்னாய பி⁴க்கு²னியா’’தி பத³ங் ‘‘ஏவமஸ்ஸ வசனீயோ’’தி பதே³ கத்தா, ‘‘யாசாபெத்வா’’தி பதே³ காரிதகம்மங். ‘‘ப்³யத்தாய பி⁴க்கு²னியா’’தி பத³ங் ‘‘ஞாபேதப்³போ³’’தி பதே³ காரிதகத்தா, ‘‘ஸங்கோ⁴’’தி பத³ங் தத்தே²வ காரிதகம்மங். ‘‘ஏதங் காரண’’ந்தி தா⁴துகம்மங் அஜ்ஜா²ஹரிதப்³ப³ங். தப்³ப³பச்சயேன காரிதகம்மமேவ வுத்தங். ஞாபேதப்³பா³காரங் த³ஸ்ஸெந்தோ ஆஹ ‘‘ஸுணாது மே’’திஆதி³.
Tatrāti ‘‘yojanā kātabbā’’ti vacane. Mukhamattadassananti upāyamattadassanaṃ, ādimattadassanaṃ vā. ‘‘Āpannāya bhikkhuniyā’’ti padaṃ ‘‘evamassa vacanīyo’’ti pade kattā, ‘‘yācāpetvā’’ti pade kāritakammaṃ. ‘‘Byattāya bhikkhuniyā’’ti padaṃ ‘‘ñāpetabbo’’ti pade kāritakattā, ‘‘saṅgho’’ti padaṃ tattheva kāritakammaṃ. ‘‘Etaṃ kāraṇa’’nti dhātukammaṃ ajjhāharitabbaṃ. Tabbapaccayena kāritakammameva vuttaṃ. Ñāpetabbākāraṃ dassento āha ‘‘suṇātu me’’tiādi.
நிக்கி²த்தவத்தந்தி கரணத்தே² சேதங் உபயோக³வசனங். நிக்கி²த்தவத்தேனாதி ஹி அத்தோ². தத்தே²வாதி மாளகஸீமாயமேவ. ஹீதி ஸச்சங், யஸ்மா வா. அஸ்ஸாதி மானத்தசாரிகாய பி⁴க்கு²னியா. தத்ராதி தஸ்மா கத்தப்³ப³வினயகம்மபா⁴வதோதி அத்தோ². நோதி அம்ஹாகங், ஸந்திகந்தி ஸம்ப³ந்தோ⁴. சதூஹி பகதத்தபி⁴க்கு²னீஹி நிஸீதி³தப்³ப³ந்தி ஸம்ப³ந்தோ⁴. கா³மூபசாரதோ த்³வே லெட்³டு³பாதே அதிக்கமித்வாதி இத³ங் பி⁴க்கு²னீவிஹாரூபசாராதிக்கமங் ஸந்தா⁴ய வுத்தங். விஹாரூபசாரதோபீதி பி⁴க்கு²விஹாரூபசாரதோபி. தத்தா²தி பி⁴க்கு²னீனங் நிஸின்னட்டா²னங். குருந்தி³மஹாபச்சரீஸு பன வுத்தந்தி ஸம்ப³ந்தோ⁴. விஹாரஸ்ஸ சாதி பி⁴க்கு²விஹாரஸ்ஸ ச. கா³மஸ்ஸ உபசாரங் முஞ்சிதுங் வட்டதீதி ந வுத்தந்தி யோஜனா. தஸ்மா கா³மூபசாரேபி நிஸீதி³துங் வட்டதீதி அதி⁴ப்பாயோ.
Nikkhittavattanti karaṇatthe cetaṃ upayogavacanaṃ. Nikkhittavattenāti hi attho. Tatthevāti māḷakasīmāyameva. Hīti saccaṃ, yasmā vā. Assāti mānattacārikāya bhikkhuniyā. Tatrāti tasmā kattabbavinayakammabhāvatoti attho. Noti amhākaṃ, santikanti sambandho. Catūhi pakatattabhikkhunīhi nisīditabbanti sambandho. Gāmūpacārato dve leḍḍupāte atikkamitvāti idaṃ bhikkhunīvihārūpacārātikkamaṃ sandhāya vuttaṃ. Vihārūpacāratopīti bhikkhuvihārūpacāratopi. Tatthāti bhikkhunīnaṃ nisinnaṭṭhānaṃ. Kurundimahāpaccarīsu pana vuttanti sambandho. Vihārassa cāti bhikkhuvihārassa ca. Gāmassa upacāraṃ muñcituṃ vaṭṭatīti na vuttanti yojanā. Tasmā gāmūpacārepi nisīdituṃ vaṭṭatīti adhippāyo.
தாய பி⁴க்கு²னியா ஆரோசேதப்³ப³ந்தி ஸம்ப³ந்தோ⁴.
Tāya bhikkhuniyā ārocetabbanti sambandho.
தத்தே²வாதி பி⁴க்கு²னீனங் நிஸீத³னட்டா²னேயேவ. டா²னந்தி பி⁴க்கூ²னங் டா²னங். ஏதீதி ஆக³ச்ச²தி. பகே³வாதி பாதோயேவ. தாயாதி மானத்தசாரினியா.
Tatthevāti bhikkhunīnaṃ nisīdanaṭṭhāneyeva. Ṭhānanti bhikkhūnaṃ ṭhānaṃ. Etīti āgacchati. Pagevāti pātoyeva. Tāyāti mānattacāriniyā.
அனிக்கி²த்தவத்தாய பன பி⁴க்கு²னியாதி ஸம்ப³ந்தோ⁴. அஜானநபச்சயாதி அஜானநகாரணா. தந்தி வசனங். பாரிவாஸிகவத்தாதீ³னந்தி ஆதி³ஸத்³தே³ன ஆக³ந்துகவத்தபூரணனிஸ்ஸயபடிப்பஸ்ஸத்³தா⁴த³யோ ஸங்க³ண்ஹாதி . யுத்ததரங் தி³ஸ்ஸதீதி யுத்ததரங் ஹுத்வா தி³ஸ்ஸதி. இமினா அனிக்கி²த்தவத்தபி⁴க்கு²னா விய பி⁴க்கு²னியாபி அந்தோஉபசாரஸீமக³தானங்யேவ ஆரோசேதப்³ப³ங், ந கா³மே டி²தானம்பி க³ந்த்வா ஆரோசேதப்³ப³ந்தி தீ³பேதி. உபோஸதே²தி உபோஸத²தி³வஸே. ஏஸேவ நயோ பவாரணாயபி. தே³வஸிகந்தி தி³வஸே தி³வஸே. தஸ்மிங் கா³மேதி பி⁴க்கு²னீனங் வஸனகா³மே. அஞ்ஞத்ராதி பி⁴க்கு²னீனங் வஸனகா³மதோ அஞ்ஞஸ்மிங் கா³மே. தத்ராதி பி⁴க்கு²னீனங் வஸனகா³மங். த³ஸ்ஸெத்வாதி பி⁴க்கு²னீனங் த³ஸ்ஸெத்வா. தாயாதி மானத்தசாரினியா. விஹாரந்தி பி⁴க்கூ²னங் விஹாரங். உபசாரஸீமாயாதி உபசாரஸீமதோ ப³ஹீதி ஸம்ப³ந்தோ⁴. அயந்தி மானத்தசாரினீ.
Anikkhittavattāya pana bhikkhuniyāti sambandho. Ajānanapaccayāti ajānanakāraṇā. Tanti vacanaṃ. Pārivāsikavattādīnanti ādisaddena āgantukavattapūraṇanissayapaṭippassaddhādayo saṅgaṇhāti . Yuttataraṃ dissatīti yuttataraṃ hutvā dissati. Iminā anikkhittavattabhikkhunā viya bhikkhuniyāpi antoupacārasīmagatānaṃyeva ārocetabbaṃ, na gāme ṭhitānampi gantvā ārocetabbanti dīpeti. Uposatheti uposathadivase. Eseva nayo pavāraṇāyapi. Devasikanti divase divase. Tasmiṃ gāmeti bhikkhunīnaṃ vasanagāme. Aññatrāti bhikkhunīnaṃ vasanagāmato aññasmiṃ gāme. Tatrāti bhikkhunīnaṃ vasanagāmaṃ. Dassetvāti bhikkhunīnaṃ dassetvā. Tāyāti mānattacāriniyā. Vihāranti bhikkhūnaṃ vihāraṃ. Upacārasīmāyāti upacārasīmato bahīti sambandho. Ayanti mānattacārinī.
வீஸதி க³ணோ இமஸ்ஸாதி வீஸதிக³ணோ, ஸங்கோ⁴, தஸ்மிங். மானத்தங் சரமானா பி⁴க்கு²னீதி யோஜனா. இத³ங் பக்க²மானத்தங் நாமாதி இத³ங் புப்³ப³வசனஸ்ஸ நிக³மவஸேன பரவசனஸ்ஸ கத²னத்தா²ய வுத்தந்தி த³ட்ட²ப்³ப³ங்.
Vīsati gaṇo imassāti vīsatigaṇo, saṅgho, tasmiṃ. Mānattaṃ caramānā bhikkhunīti yojanā. Idaṃ pakkhamānattaṃ nāmāti idaṃ pubbavacanassa nigamavasena paravacanassa kathanatthāya vuttanti daṭṭhabbaṃ.
தத்தா²தி திவிதே⁴ஸு மானத்தேஸு. யதே³தங் மானத்தங் அனுஞ்ஞாதந்தி ஸம்ப³ந்தோ⁴. பரதோதி பரஸ்மிங். பரிவாஸங் பரிவஸந்தஸ்ஸ மூலாயபடிகஸ்ஸிதஸ்ஸ உதா³யித்தே²ரஸ்ஸ அனுஞ்ஞாதந்தி ஸம்ப³ந்தோ⁴. ஆபஜ்ஜித்வாதி ஆபஜ்ஜனதோ. இத³ந்தி மானத்தங் வுச்சதீதி ஸம்ப³ந்தோ⁴. ஹீதி ஸச்சங், யஸ்மா வா. ஓதா⁴னஸமோதா⁴னந்தி எத்த² வசனத்தோ² ஹெட்டா² வுத்தோயேவ. தம்பீதி குருந்தி³யங் வுத்தவசனம்பி.
Tatthāti tividhesu mānattesu. Yadetaṃ mānattaṃ anuññātanti sambandho. Paratoti parasmiṃ. Parivāsaṃ parivasantassa mūlāyapaṭikassitassa udāyittherassa anuññātanti sambandho. Āpajjitvāti āpajjanato. Idanti mānattaṃ vuccatīti sambandho. Hīti saccaṃ, yasmā vā. Odhānasamodhānanti ettha vacanattho heṭṭhā vuttoyeva. Tampīti kurundiyaṃ vuttavacanampi.
தந்தி அக்³க⁴ஸமோதா⁴னமிஸ்ஸகஸமோதா⁴னங், தா³தப்³ப³ந்தி ஸம்ப³ந்தோ⁴. எத்தாவதாதி ஏதபரிமாணேன வசனக்கமேன, ‘‘அயஞ்ஹி இத⁴ அதி⁴ப்பேதோ பரிவாஸோ நாமா’’தி (சூளவ॰ அட்ட²॰ 102) வசனதோ பட்டா²ய யாவ ‘‘யோஜெத்வா தா³தப்³ப³’’ந்தி வசனங், தாவ வசனக்கமேனாதி அத்தோ². ‘‘தேன ஹி பி⁴க்க²வே…பே॰… த³ஸ்ஸெஸ்ஸாமா’’தி யங் வசனங் வுத்தந்தி யோஜனா. ‘‘அத்த²தோ’’தி இமினா ஸத்³தோ³பி க³ஹேதப்³போ³ அவினாபா⁴வதோ.
Tanti agghasamodhānamissakasamodhānaṃ, dātabbanti sambandho. Ettāvatāti etaparimāṇena vacanakkamena, ‘‘ayañhi idha adhippeto parivāso nāmā’’ti (cūḷava. aṭṭha. 102) vacanato paṭṭhāya yāva ‘‘yojetvā dātabba’’nti vacanaṃ, tāva vacanakkamenāti attho. ‘‘Tena hi bhikkhave…pe… dassessāmā’’ti yaṃ vacanaṃ vuttanti yojanā. ‘‘Atthato’’ti iminā saddopi gahetabbo avinābhāvato.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi / ஏகாஹப்படிச்ச²ன்னபரிவாஸங் • Ekāhappaṭicchannaparivāsaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / படிச்ச²ன்னபரிவாஸகதா² • Paṭicchannaparivāsakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பரிவாஸகதா²வண்ணனா • Parivāsakathāvaṇṇanā
