| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
২. পরিৰাসকথা
2. Parivāsakathā
১০২. তস্সাতি পটিচ্ছন্নমানত্তস্স। সমোধানেত্ৰাতি ইধেৰ পরিৰাসকথাযং সমোধানেত্ৰা। ইধেৰ পরিৰাসকথাযং দস্সযিস্সামাতি যোজনা। ইধেৰসদ্দো হি পুব্বাপরাপেক্খো।
102.Tassāti paṭicchannamānattassa. Samodhānetvāti idheva parivāsakathāyaṃ samodhānetvā. Idheva parivāsakathāyaṃ dassayissāmāti yojanā. Idhevasaddo hi pubbāparāpekkho.
ইধ অধিপ্পেতং পরিৰাসং ৰিত্থারেত্ৰা দস্সেন্তো আহ ‘‘অযং হী’’তিআদি। ইধ অধিপ্পেতো পরিৰাসো নাম তিৰিধো হোতীতি যোজনা। তত্থাতি তিৰিধেসু পরিৰাসেসু। ‘‘যথাপটিচ্ছন্নায আপত্তিযা’’তি ৰচনং ৰিত্থারেন্তো আহ ‘‘কস্সচি হী’’তিআদি। যথা উদাযিত্থেরস্স একাহপটিচ্ছন্না অযং আপত্তি হোতি, তথা কস্সচি একাহপটিচ্ছন্না আপত্তি হোতীতি যোজনা। যথা চ পরতো আগতা উদাযিত্থেরস্সেৰ আপত্তি হোতি, তথা কস্সচি দ্ৰিহাদিপটিচ্ছন্না আপত্তি হোতীতি যোজনা। ইমিনা ৰুত্তনযানুসারেন পরতোপি নযো নেতব্বো। তস্মাতি যস্মা একাহাদিপটিচ্ছন্না একাদিআপত্তি হোতি, তস্মা জানিতব্বোতি যোজনা।
Idha adhippetaṃ parivāsaṃ vitthāretvā dassento āha ‘‘ayaṃ hī’’tiādi. Idha adhippeto parivāso nāma tividho hotīti yojanā. Tatthāti tividhesu parivāsesu. ‘‘Yathāpaṭicchannāya āpattiyā’’ti vacanaṃ vitthārento āha ‘‘kassaci hī’’tiādi. Yathā udāyittherassa ekāhapaṭicchannā ayaṃ āpatti hoti, tathā kassaci ekāhapaṭicchannā āpatti hotīti yojanā. Yathā ca parato āgatā udāyittherasseva āpatti hoti, tathā kassaci dvihādipaṭicchannā āpatti hotīti yojanā. Iminā vuttanayānusārena paratopi nayo netabbo. Tasmāti yasmā ekāhādipaṭicchannā ekādiāpatti hoti, tasmā jānitabboti yojanā.
পটিচ্ছন্নভাৰং ৰিত্থারেন্তো আহ ‘‘অযং হী’’তিআদি। তত্থাতি ‘‘দসহাকারেহী’’তি পাঠে। আপত্তিইতি সঞ্ঞা এতস্সাতি আপত্তিসঞ্ঞী । পহু চাতি সমত্থো চ। পপুব্বো হূধাতু সমত্থত্থে হোতি।
Paṭicchannabhāvaṃ vitthārento āha ‘‘ayaṃ hī’’tiādi. Tatthāti ‘‘dasahākārehī’’ti pāṭhe. Āpattiiti saññā etassāti āpattisaññī. Pahu cāti samattho ca. Papubbo hūdhātu samatthatthe hoti.
তত্থাতি তস্সং মাতিকাযং। যন্তি আপত্তিং। সোপি চাতি ভিক্খুপি চ। তত্থাতি তস্সং আপত্তিযং। অযন্তি ভিক্খু। তত্থাতি আপত্তিযং। অলজ্জিপক্খে তিট্ঠতীতি ‘‘সঞ্চিচ্চ আপত্তিং পরিগূহতী’’তি (পরি॰ ৩৫৯) ৰুত্তপক্খে ঠিতত্তা অলজ্জিপক্খে তিট্ঠতি।
Tatthāti tassaṃ mātikāyaṃ. Yanti āpattiṃ. Sopi cāti bhikkhupi ca. Tatthāti tassaṃ āpattiyaṃ. Ayanti bhikkhu. Tatthāti āpattiyaṃ. Alajjipakkhe tiṭṭhatīti ‘‘sañcicca āpattiṃ parigūhatī’’ti (pari. 359) vuttapakkhe ṭhitattā alajjipakkhe tiṭṭhati.
পকতত্তোতি এত্থ ‘‘পারাজিকং অনজ্ঝাপন্নো’’তি অত্থং পটিক্খিপন্তো আহ ‘‘তিৰিধং উক্খেপনীযকম্মং অকতো’’তি। এতন্তি অপ্পটিচ্ছন্নভাৰং, ‘‘আপজ্জতি…পে॰… কুসলেহি চিন্তিতা’’তি ৰচনং ৰা।
Pakatattoti ettha ‘‘pārājikaṃ anajjhāpanno’’ti atthaṃ paṭikkhipanto āha ‘‘tividhaṃ ukkhepanīyakammaṃ akato’’ti. Etanti appaṭicchannabhāvaṃ, ‘‘āpajjati…pe… kusalehi cintitā’’ti vacanaṃ vā.
গাথায ‘‘সাৰসেস’’ন্তি ইমিনা পারাজিকং নিৰত্তেতি। গরুকন্তি এত্থ সঙ্ঘাদিসেসমেৰ অধিপ্পেতন্তি দস্সেতি। অনাদরিযন্তি সিক্খাপদে অনাদরিযং। ৰজ্জন্তি দুক্কটং। উক্খিত্তকেন করণভূতেন।
Gāthāya ‘‘sāvasesa’’nti iminā pārājikaṃ nivatteti. Garukanti ettha saṅghādisesameva adhippetanti dasseti. Anādariyanti sikkhāpade anādariyaṃ. Vajjanti dukkaṭaṃ. Ukkhittakena karaṇabhūtena.
যস্সাতি ভিক্খুস্স, নত্থীতি সম্বন্ধো। ভীরুকজাতিকতাযাতি ভীরুকসভাৰতায। পব্বতৰিহারে ৰসন্তস্স যস্স ভিক্খুনোতি যোজনা। পব্বতৰিহারেতি পব্বতস্স তলে, অন্তরে ৰা কারিতে ৰিহারে। এতস্মিন্তি এতাদিসে। অন্তরাযে সতিযেৰাতি যোজনা। তস্স অচ্ছন্নাৰ হোতীতি যোজনা। অনন্তরাযিকসঞ্ঞায ছাদযতো অচ্ছন্নাৰাতি অনন্তরাযিকসঞ্ঞায ছাদেন্তস্সাপি একন্তেন অন্তরাযিকত্তা অচ্ছন্নাৰাতি অধিপ্পাযো।
Yassāti bhikkhussa, natthīti sambandho. Bhīrukajātikatāyāti bhīrukasabhāvatāya. Pabbatavihāre vasantassa yassa bhikkhunoti yojanā. Pabbatavihāreti pabbatassa tale, antare vā kārite vihāre. Etasminti etādise. Antarāye satiyevāti yojanā. Tassa acchannāva hotīti yojanā. Anantarāyikasaññāya chādayato acchannāvāti anantarāyikasaññāya chādentassāpi ekantena antarāyikattā acchannāvāti adhippāyo.
অস্সাতি ভিক্খুস্স। হনুকৰাতোতি হনুকস্স গেলঞ্ঞকরো ৰাতো। ৰিজ্ঝতীতি হনুকং ৰিজ্ঝতি। ইমিনাতি ভিক্খুনা। পহুসঞ্ঞিনো ছাদিতাপি একন্তেন অপহুত্তা অচ্ছাদিতাৰ হোতি।
Assāti bhikkhussa. Hanukavātoti hanukassa gelaññakaro vāto. Vijjhatīti hanukaṃ vijjhati. Imināti bhikkhunā. Pahusaññino chāditāpi ekantena apahuttā acchāditāva hoti.
ছাদেতুকামো চাতি এত্থ ইদং চতুক্কং ৰেদিতব্বং ছাদেতুকামো ছাদেতি, ছাদেতুকামো নচ্ছাদেতি, অচ্ছাদেতুকামো ছাদেতি, নচ্ছাদেতুকামো নচ্ছাদেতীতি। তত্থ পঠমপদং সন্ধায ৰুত্তং ‘‘ইদং উত্তানত্থমেৰা’’তি। এৰং সেসাসুপি মাতিকাসু চতুক্কং ৰেদিতব্বং । চতূসু চতুক্কেসু পঠমপদে এৰ ছন্না হোতি, ন সেসপদেসু। অনুত্তানত্থং দস্সেন্তো আহ ‘‘সচে পনা’’তিআদি। পুরেভত্তে ৰাতি পুরেভত্তং ৰা, ভত্ততো, ভত্তস্স ৰা পুরেতি পুরেভত্তং। অব্যযীভাৰসমাসে সত্তমীৰিভত্তিযা অমিতিকারিযস্স অনিচ্চভাৰতো ৰুত্তং ‘‘পুরেভত্তে’’তি। এসেৰ নযো ‘‘পচ্ছাভত্তে’’তি এত্থাপি। দুতিযপদস্স অত্থং দস্সেত্ৰা ততিযপদস্স অত্থং দস্সেন্তো আহ ‘‘যস্স পনা’’তিআদি। অভিক্খুকে ঠানে ৰসন্তস্স যস্স ভিক্খুস্সাতি যোজনা। আগমেন্তস্স গচ্ছন্তস্সাতি অনাদরে চেতানি সামিৰচনানি।
Chādetukāmo cāti ettha idaṃ catukkaṃ veditabbaṃ chādetukāmo chādeti, chādetukāmo nacchādeti, acchādetukāmo chādeti, nacchādetukāmo nacchādetīti. Tattha paṭhamapadaṃ sandhāya vuttaṃ ‘‘idaṃ uttānatthamevā’’ti. Evaṃ sesāsupi mātikāsu catukkaṃ veditabbaṃ . Catūsu catukkesu paṭhamapade eva channā hoti, na sesapadesu. Anuttānatthaṃ dassento āha ‘‘sace panā’’tiādi. Purebhatte vāti purebhattaṃ vā, bhattato, bhattassa vā pureti purebhattaṃ. Abyayībhāvasamāse sattamīvibhattiyā amitikāriyassa aniccabhāvato vuttaṃ ‘‘purebhatte’’ti. Eseva nayo ‘‘pacchābhatte’’ti etthāpi. Dutiyapadassa atthaṃ dassetvā tatiyapadassa atthaṃ dassento āha ‘‘yassa panā’’tiādi. Abhikkhuke ṭhāne vasantassa yassa bhikkhussāti yojanā. Āgamentassa gacchantassāti anādare cetāni sāmivacanāni.
চতুত্থপদস্স অত্থং দস্সেন্তো আহ ‘‘যো পনা’’তিআদি। তত্থ যো পনাতি ভিক্খু পন, আৰি করোতীতি সম্বন্ধো। সভাগন্তি অৰেরিং। অযন্তি ভিক্খু। উপজ্ঝাযো ইতি ৰা আচরিযো ইতি ৰাতি যোজনা। লজ্জাযাতি লজ্জনিমিত্তং, লজ্জকারণা, লজ্জহেতু ৰা। হীতি সচ্চং, যস্মা ৰা, ইধাতি আপত্তিআরোচনট্ঠানে। অৰেরিসভাগস্সাতি অৰেরী হুত্ৰা সভাগস্স।
Catutthapadassa atthaṃ dassento āha ‘‘yo panā’’tiādi. Tattha yo panāti bhikkhu pana, āvi karotīti sambandho. Sabhāganti averiṃ. Ayanti bhikkhu. Upajjhāyo iti vā ācariyo iti vāti yojanā. Lajjāyāti lajjanimittaṃ, lajjakāraṇā, lajjahetu vā. Hīti saccaṃ, yasmā vā, idhāti āpattiārocanaṭṭhāne. Averisabhāgassāti averī hutvā sabhāgassa.
পকাসেতুকামোতি অঞ্ঞেসং পকাসেতুকামো। উপজ্ঝাযস্সাপীতি পিসদ্দেন অঞ্ঞস্স সন্তিকে কা নাম কথাতি দস্সেতি। তত্থাতি আপত্তিআরোচনট্ঠানে। সভাগসঙ্ঘাদিসেসন্তি ৰত্থুসভাগসঙ্ঘাদিসেসং। সুদ্ধস্সাতি ৰত্থুসভাগসঙ্ঘাদিসেসতো সুদ্ধস্স। আৰিকরণাকারং দস্সেন্তো আহ ‘‘আৰিকরোন্তো চা’’তিআদি। ইতি ইমানীতিআদি নিগমনং।
Pakāsetukāmoti aññesaṃ pakāsetukāmo. Upajjhāyassāpīti pisaddena aññassa santike kā nāma kathāti dasseti. Tatthāti āpattiārocanaṭṭhāne. Sabhāgasaṅghādisesanti vatthusabhāgasaṅghādisesaṃ. Suddhassāti vatthusabhāgasaṅghādisesato suddhassa. Āvikaraṇākāraṃ dassento āha ‘‘āvikaronto cā’’tiādi. Iti imānītiādi nigamanaṃ.
ততোতি জানিতব্বতো, পরন্তি সম্বন্ধো। একাহপটিচ্ছন্নাতি একাহেন পটিচ্ছন্না। যাৰ চুদ্দস দিৰসানি, তাৰ দিৰসৰসেন যোজনা কাতব্বাতি যোজনা। পক্খপটিচ্ছন্নন্তি পক্খেন পটিচ্ছন্নং। অতিরেকপক্খপটিচ্ছন্নন্তি পক্খতো অতিরেকেন পটিচ্ছন্নং।
Tatoti jānitabbato, paranti sambandho. Ekāhapaṭicchannāti ekāhena paṭicchannā. Yāva cuddasa divasāni, tāva divasavasena yojanā kātabbāti yojanā. Pakkhapaṭicchannanti pakkhena paṭicchannaṃ. Atirekapakkhapaṭicchannanti pakkhato atirekena paṭicchannaṃ.
সংৰচ্ছরপটিচ্ছন্নন্তি সংৰচ্ছরেন পটিচ্ছন্নং। ততো ৰাতি অতিরেকসট্ঠিসংৰচ্ছ রতো ৰা। ভিয্যোপীতি অতিরেকম্পি।
Saṃvaccharapaṭicchannanti saṃvaccharena paṭicchannaṃ. Tato vāti atirekasaṭṭhisaṃvaccha rato vā. Bhiyyopīti atirekampi.
ততোতি তীহি আপত্তীহি। পরন্তি অতিরেকং। গণনৰসেনাতি আপত্তিগণনৰসেন। ৰত্থুকিত্তনৰসেন ৰাতি আপত্তীনং ৰত্থুকিত্তনৰসেন ৰা। নামমত্তৰসেন ৰাতি ‘‘সঙ্ঘাদিসেসাপত্তিযো’’তি এৰং নামস্সেৰ ৰসেন ৰা। এত্থ হি মত্তসদ্দো অৰধারণত্থো, তেন ৰত্থুং নিৰত্তেতি।
Tatoti tīhi āpattīhi. Paranti atirekaṃ. Gaṇanavasenāti āpattigaṇanavasena. Vatthukittanavasena vāti āpattīnaṃ vatthukittanavasena vā. Nāmamattavasena vāti ‘‘saṅghādisesāpattiyo’’ti evaṃ nāmasseva vasena vā. Ettha hi mattasaddo avadhāraṇattho, tena vatthuṃ nivatteti.
তত্থাতি ‘‘নামমত্তৰসেনা’’তি পদে। সজাতিসাধারণন্তি সস্স অত্তনো জাতি সজাতি, তায সাধারণং সজাতিসাধারণং। সব্বেসং, সব্বেহি ৰা আপত্তীহি সাধারণং সব্বসাধারণং। তত্থাতি দুৰিধেসু নামেসু। সব্বসাধারণনামৰসেনাপীতি এত্থ পিসদ্দো ‘‘অহং ভন্তে সম্বহুলা সঙ্ঘাদিসেসা আপজ্জিং একাহপটিচ্ছন্নাযো’’তি এৰং সজাতিসাধারণনামৰসেনপি ‘‘অহং ভন্তে সম্বহুলা সঙ্ঘাদিসেসা আপত্তিযো আপজ্জিং একাহপটিচ্ছন্নাযো’’তি এৰং উভযসাধারণৰসেনপি ৰত্তুং ৰট্টতীতি দস্সেতি। হীতি সচ্চং। সব্বম্পি পরিৰাসাদিকং ইদং ৰিনযকম্মন্তি যোজনা। ৰসতি আপত্তি এত্থ তদাযত্তৰুত্তিতাযাতি ৰত্থু। গো ৰুচ্চতি ৰচনং ৰা ঞাণং ৰা, তং তাযতীতি গোত্তং।
Tatthāti ‘‘nāmamattavasenā’’ti pade. Sajātisādhāraṇanti sassa attano jāti sajāti, tāya sādhāraṇaṃ sajātisādhāraṇaṃ. Sabbesaṃ, sabbehi vā āpattīhi sādhāraṇaṃ sabbasādhāraṇaṃ. Tatthāti duvidhesu nāmesu. Sabbasādhāraṇanāmavasenāpīti ettha pisaddo ‘‘ahaṃ bhante sambahulā saṅghādisesā āpajjiṃ ekāhapaṭicchannāyo’’ti evaṃ sajātisādhāraṇanāmavasenapi ‘‘ahaṃ bhante sambahulā saṅghādisesā āpattiyo āpajjiṃ ekāhapaṭicchannāyo’’ti evaṃ ubhayasādhāraṇavasenapi vattuṃ vaṭṭatīti dasseti. Hīti saccaṃ. Sabbampi parivāsādikaṃ idaṃ vinayakammanti yojanā. Vasati āpatti ettha tadāyattavuttitāyāti vatthu. Go vuccati vacanaṃ vā ñāṇaṃ vā, taṃ tāyatīti gottaṃ.
তত্থাতি ৰত্থাদীসু চতুব্বিধেসু। তত্থাতি তেসু ৰচনেসু। সুক্কৰিস্সট্ঠিং কাযসংসগ্গন্তিআদিনা ৰচনেনাপীতি এত্থ আদিসদ্দেন দুট্ঠুল্লাদিৰচনানি সঙ্গণ্হাতি। ইধ পনাতি ইমস্মিং পন ঠানে। যো যোতি তিস্সো ৰা ফুস্সো ৰা আপন্নো হোতি।
Tatthāti vatthādīsu catubbidhesu. Tatthāti tesu vacanesu. Sukkavissaṭṭhiṃ kāyasaṃsaggantiādinā vacanenāpīti ettha ādisaddena duṭṭhullādivacanāni saṅgaṇhāti. Idha panāti imasmiṃ pana ṭhāne. Yo yoti tisso vā phusso vā āpanno hoti.
এৰং আরোচেতব্বন্তি এৰং ৰক্খমাননযেন আরোচেতব্বন্তি যোজনা। কিং আরোচেতব্বং? ‘‘অহং ভন্তে…পে॰… সঙ্ঘো ধারেতু’’ ইতি আরোচেতব্বন্তি যোজনা।
Evaṃ ārocetabbanti evaṃ vakkhamānanayena ārocetabbanti yojanā. Kiṃ ārocetabbaṃ? ‘‘Ahaṃ bhante…pe… saṅgho dhāretu’’ iti ārocetabbanti yojanā.
ৰেদযামহন্তি ৰেদযামি অহং। মম পারিৰাসিকভাৰং সঙ্ঘং, সঙ্ঘস্স ৰা জানাপেমীতি অত্থো। ৰেদযতীতি মন্তি ৰেদযতি ইতি মং। পারিৰাসিকভাৰং সঙ্ঘং, সঙ্ঘস্স ৰা জানাপেতীতি মং সঙ্ঘো ধারেতূতি অত্থো। এত্থ বহূসু অট্ঠকথাপোত্থকেসু ‘‘তিণ্ণং ৰা অতিরেকানং ৰা আরোচেন্তেন আযস্মন্তো ধারেন্তূ’’তি পাঠো অত্থি । কেসুচি অট্ঠকথাপোত্থকেসু ‘‘তিণ্ণং আরোচেন্তেন আযস্মন্তো ধারেন্তূ’’তি এত্তকোযেৰ পাঠো অত্থি। হেট্ঠা মানত্তকথাযম্পি এৰমেৰ অত্থি। তত্থ ‘‘অতিরেকান’’ন্তি ইমিনা তীহি অতিরেকানং আরোচেন্তেন সঙ্ঘং অপেক্খিত্ৰা সচে একৰচনৰসেন ৰত্তুকামো হোতি, ‘‘মং সঙ্ঘো ধারেতূ’’তি ৰত্তব্বং। অথ সম্বহুলে ভিক্খূ অপেক্খিত্ৰা সচে বহুৰচনৰসেন ৰত্তুকামো হোতি, যথা তিণ্ণং, এৰং ‘‘মং আযস্মন্তো ধারেন্তূ’’তি ৰত্তব্বন্তি দস্সেতি। ইদঞ্চ সদ্দসত্থৰসেনেৰ ৰুত্তং, ন ৰিনযকম্মৰিপত্তিৰসেনাতি দট্ঠব্বং।
Vedayāmahanti vedayāmi ahaṃ. Mama pārivāsikabhāvaṃ saṅghaṃ, saṅghassa vā jānāpemīti attho. Vedayatīti manti vedayati iti maṃ. Pārivāsikabhāvaṃ saṅghaṃ, saṅghassa vā jānāpetīti maṃ saṅgho dhāretūti attho. Ettha bahūsu aṭṭhakathāpotthakesu ‘‘tiṇṇaṃ vā atirekānaṃ vā ārocentena āyasmanto dhārentū’’ti pāṭho atthi . Kesuci aṭṭhakathāpotthakesu ‘‘tiṇṇaṃ ārocentena āyasmanto dhārentū’’ti ettakoyeva pāṭho atthi. Heṭṭhā mānattakathāyampi evameva atthi. Tattha ‘‘atirekāna’’nti iminā tīhi atirekānaṃ ārocentena saṅghaṃ apekkhitvā sace ekavacanavasena vattukāmo hoti, ‘‘maṃ saṅgho dhāretū’’ti vattabbaṃ. Atha sambahule bhikkhū apekkhitvā sace bahuvacanavasena vattukāmo hoti, yathā tiṇṇaṃ, evaṃ ‘‘maṃ āyasmanto dhārentū’’ti vattabbanti dasseti. Idañca saddasatthavaseneva vuttaṃ, na vinayakammavipattivasenāti daṭṭhabbaṃ.
‘‘ৰিহারেযেৰ রত্তিপরিগ্গহো’’তি ইমিনা অন্তোউপচারসীমাযম্পি পরিৰসিতব্বভাৰং দস্সেতি। উপচারসীমন্তি পরিক্খিত্তস্স ৰিহারস্স পরিক্খেপং, অপরিক্খিত্তস্স পরিক্খেপারহট্ঠানং। এসাতি পারিৰাসিকো ভিক্খু। অস্সাতি আগতস্স ভিক্খুনো।
‘‘Vihāreyeva rattipariggaho’’ti iminā antoupacārasīmāyampi parivasitabbabhāvaṃ dasseti. Upacārasīmanti parikkhittassa vihārassa parikkhepaṃ, aparikkhittassa parikkhepārahaṭṭhānaṃ. Esāti pārivāsiko bhikkhu. Assāti āgatassa bhikkhuno.
ততোতি আপত্তিপটিচ্ছন্নদিৰসতো। কুক্কুচ্চৰিনোদনত্থাযাতি আপত্তিপটিচ্ছন্নদিৰসেন সমং পরিৰসিতব্বং নুখো, ন নুখোতি কুক্কুচ্চস্স ৰিনোদনত্থায। পরিৰুত্থত্তাতি পরিৰসিতত্তা। সোতি পরিৰুত্থো ভিক্খু। ইদন্তি দাতব্বমানত্তং। তন্তি পটিচ্ছন্নমানত্তং। ছারত্তন্তি ছরত্তিযো সমাহটাতি ছারত্তং, সমাহারে দিগু। ‘‘ছরত্ত’’ন্তি ৰত্তব্বে সুখুচ্চারণত্থং ছকারস্স দীঘং কত্ৰা এৰং ৰুত্তং, অচ্চন্তসংযোগে চেতং উপযোগৰচনং।
Tatoti āpattipaṭicchannadivasato. Kukkuccavinodanatthāyāti āpattipaṭicchannadivasena samaṃ parivasitabbaṃ nukho, na nukhoti kukkuccassa vinodanatthāya. Parivutthattāti parivasitattā. Soti parivuttho bhikkhu. Idanti dātabbamānattaṃ. Tanti paṭicchannamānattaṃ. Chārattanti charattiyo samāhaṭāti chārattaṃ, samāhāre digu. ‘‘Charatta’’nti vattabbe sukhuccāraṇatthaṃ chakārassa dīghaṃ katvā evaṃ vuttaṃ, accantasaṃyoge cetaṃ upayogavacanaṃ.
অপ্পটিচ্ছন্নাপত্তিং দাতুং ৰট্টতীতি সম্বন্ধো। ইমিনা হেট্ঠা ৰুত্তং পটিচ্ছন্নমানত্তং ইমস্মিং পটিচ্ছন্নমানত্তে সমোধানেত্ৰাপি দাতুং ৰট্টতীতি দস্সেতি। এৰং সন্তেপি মূলমানত্তং পটিচ্চ পটিচ্ছন্নমানত্তন্তি ৰুচ্চতি। কথং দাতুং ৰট্টতীতি যোজনা।
Appaṭicchannāpattiṃ dātuṃ vaṭṭatīti sambandho. Iminā heṭṭhā vuttaṃ paṭicchannamānattaṃ imasmiṃ paṭicchannamānatte samodhānetvāpi dātuṃ vaṭṭatīti dasseti. Evaṃ santepi mūlamānattaṃ paṭicca paṭicchannamānattanti vuccati. Kathaṃ dātuṃ vaṭṭatīti yojanā.
অস্সাতি মানত্তং যাচন্তস্স। তদনুরূপন্তি তস্স যাচনস্স অনুরূপং। সচে পটিচ্ছন্না দ্ৰেতি এত্থ দ্ৰেতি নিদস্সনমত্তং ততো অতিরেকম্পি গহেতব্বত্তা। সব্বত্থাতি সব্বেসু একবহূসু। তদনুরূপমে ৰাতি তস্স মানত্তদানস্স অনুরূপমেৰ। ইধ পনাতি পটিচ্ছন্নমানত্তে পন। ইতীতিআদি নিগমনং। যং মানত্তং দিয্যতীতি যোজনা। এত্থাতি পটিচ্ছন্নমানত্তে।
Assāti mānattaṃ yācantassa. Tadanurūpanti tassa yācanassa anurūpaṃ. Sace paṭicchannā dveti ettha dveti nidassanamattaṃ tato atirekampi gahetabbattā. Sabbatthāti sabbesu ekabahūsu. Tadanurūpame vāti tassa mānattadānassa anurūpameva. Idha panāti paṭicchannamānatte pana. Itītiādi nigamanaṃ. Yaṃ mānattaṃ diyyatīti yojanā. Etthāti paṭicchannamānatte.
অৰসেসাতি অপ্পটিচ্ছন্নপরিৰাসপটিচ্ছন্নপরিৰাসেহি অৰসেসা। তত্থাতি অৰসেসেসু দ্ৰীসু পরিৰাসেসু। অধম্মিকমানত্তচারাৰসানে অনুঞ্ঞাতপরিৰাসোতি সম্বন্ধো। কিস্মিং ৰত্থুস্মিং অনুঞ্ঞাতোতি আহ ‘‘ইমস্মিং ৰত্থুস্মি’’ন্তি। এসাতি সুদ্ধন্তো, দাতব্বোতি সম্বন্ধো। এতন্তি জাননাজাননং।
Avasesāti appaṭicchannaparivāsapaṭicchannaparivāsehi avasesā. Tatthāti avasesesu dvīsu parivāsesu. Adhammikamānattacārāvasāne anuññātaparivāsoti sambandho. Kismiṃ vatthusmiṃ anuññātoti āha ‘‘imasmiṃ vatthusmi’’nti. Esāti suddhanto, dātabboti sambandho. Etanti jānanājānanaṃ.
তত্থাতি দ্ৰীসু সুদ্ধন্তেসু, চূল়সুদ্ধন্তোতি ৰুচ্চতীতি সম্বন্ধো। যোতি ভিক্খু, ৰদতীতি সম্বন্ধো। আরোচিতদিৰসতোতি আপত্তিআরোচিতদিৰসতো।
Tatthāti dvīsu suddhantesu, cūḷasuddhantoti vuccatīti sambandho. Yoti bhikkhu, vadatīti sambandho. Ārocitadivasatoti āpattiārocitadivasato.
তন্তি চূল়সুদ্ধন্তং, পরিৰসন্তেন পরিৰসিতব্বন্তি সম্বন্ধো। অগ্গহেসীতি পরিৰাসং অগ্গহেসি। অঞ্ঞন্তি গহিতমাসতো অঞ্ঞং। ‘‘পরিৰাসদানকিচ্চং নত্থী’’তি ইমিনা পরিৰাসগহণকিচ্চম্পি নত্থীতি দস্সেতি গণ্হন্তস্সেৰ দাতব্বত্তা, দেন্তস্সেৰ গহেতব্বত্তা ৰা। উদ্ধম্পি আরোহতীতি পরিৰাসগহণকালতো অঞ্ঞম্পি কালং পরিৰসিতব্বত্তা উদ্ধম্পি আরোহতি। হেট্ঠাপি ওরোহতীতি পরিৰাসগহণকালতো ঊনম্পি কালং পরিৰসিতব্বত্তা হেট্ঠাপি ওরোহতি। ইদন্তি আরোহনোরোহনং। তস্সাতি সুদ্ধন্তপরিৰাসস্স। একমেৰ পটিচ্চ দ্ৰে, তিস্সো, সম্বহুলা ৰা ভৰন্তীতি আহ ‘‘একং ৰিনা সম্বহুলানং অভাৰতো’’তি।
Tanti cūḷasuddhantaṃ, parivasantena parivasitabbanti sambandho. Aggahesīti parivāsaṃ aggahesi. Aññanti gahitamāsato aññaṃ. ‘‘Parivāsadānakiccaṃ natthī’’ti iminā parivāsagahaṇakiccampi natthīti dasseti gaṇhantasseva dātabbattā, dentasseva gahetabbattā vā. Uddhampi ārohatīti parivāsagahaṇakālato aññampi kālaṃ parivasitabbattā uddhampi ārohati. Heṭṭhāpi orohatīti parivāsagahaṇakālato ūnampi kālaṃ parivasitabbattā heṭṭhāpi orohati. Idanti ārohanorohanaṃ. Tassāti suddhantaparivāsassa. Ekameva paṭicca dve, tisso, sambahulā vā bhavantīti āha ‘‘ekaṃ vinā sambahulānaṃ abhāvato’’ti.
এৰং চূল়সুদ্ধন্তং দস্সেত্ৰা মহাসুদ্ধন্তং দস্সেন্তো আহ ‘‘যো পনা’’তিআদি। তন্তি মহাসুদ্ধন্তং। যাৰ যত্তকো উপসম্পদদিৰসো হোতি, তাৰ তত্তকং কালন্তি যোজনা। উদ্ধং নারোহতীতি উদ্ধং আরোহনকালস্স অভাৰতো উদ্ধং ন আরোহতি। এত্থাতি সুদ্ধন্তপরিৰাসে। অযং সুদ্ধন্তপরিৰাসো নামাতি নিগমনং।
Evaṃ cūḷasuddhantaṃ dassetvā mahāsuddhantaṃ dassento āha ‘‘yo panā’’tiādi. Tanti mahāsuddhantaṃ. Yāva yattako upasampadadivaso hoti, tāva tattakaṃ kālanti yojanā. Uddhaṃ nārohatīti uddhaṃ ārohanakālassa abhāvato uddhaṃ na ārohati. Etthāti suddhantaparivāse. Ayaṃ suddhantaparivāso nāmāti nigamanaṃ.
তত্থাতি তিৰিধেসু সমোধানপরিৰাসেসু। ‘‘ওধুনিত্ৰা সমোদহিত্ৰা দাতব্বপরিৰাসো’’তি ইমিনা ওধুনিত্ৰা সমোধানেত্ৰা দাতব্বো পরিৰাসো ওধানসমোধানোতি ৰচনত্থং দস্সেতি, ‘‘পরিৰাসো’’তি ইমিনা তদ্ধিতণপচ্চযস্স সরূপং দস্সেতি। এত্থ চ অৰধুনিযতে, অৰধুনিতব্বন্তি ৰা ওধানং, সং একতো ওদহীযতে সম্পিণ্ডীযতে, উদহিযতি সম্পিণ্ডিযতীতি ৰা সমোধানন্তি অৰযৰৰচনত্থো কাতব্বো। ‘‘মক্খেত্ৰা’’তি ইমিনা ধুধাতুযা পপ্পোটনধংসনধোৰনানি দস্সেতি। সোতি ওধানসমোধানো, আগতোতি সম্বন্ধো।
Tatthāti tividhesu samodhānaparivāsesu. ‘‘Odhunitvā samodahitvā dātabbaparivāso’’ti iminā odhunitvā samodhānetvā dātabbo parivāso odhānasamodhānoti vacanatthaṃ dasseti, ‘‘parivāso’’ti iminā taddhitaṇapaccayassa sarūpaṃ dasseti. Ettha ca avadhuniyate, avadhunitabbanti vā odhānaṃ, saṃ ekato odahīyate sampiṇḍīyate, udahiyati sampiṇḍiyatīti vā samodhānanti avayavavacanattho kātabbo. ‘‘Makkhetvā’’ti iminā dhudhātuyā pappoṭanadhaṃsanadhovanāni dasseti. Soti odhānasamodhāno, āgatoti sambandho.
এত্থাতি ওধানসমোধানে। যোতি ভিক্খু, পটিচ্ছাদেতীতি সম্বন্ধো। পরিৰসন্তো ৰা মানত্তারহো ৰা মানত্তং চরন্তো ৰা অব্ভানারহো ৰা যো ভিক্খূতি যোজনা। ‘‘পুরিমায আপত্তিযা’’তি পদং ‘‘সমা ৰা’’তি পদে সহাদিযোগো। ‘‘ঊনতরা’’তিপদে ৰিভত্তিঅপাদানং, অনুমেয্যৰিসযঅপাদানং ৰা। ‘‘অদিৰসে কত্ৰা’’তি ইমিনা ওধুনিত্ৰাতি এত্থ ধুধাতুযা যথাৰুত্তত্থেযেৰ দস্সেতি। ঊনকপক্খপটিচ্ছন্নাতি পক্খতো ঊনকেন পটিচ্ছন্না। এতেনুপাযেনাতি পক্খে ৰুত্তেন এতেন উপাযেন।
Etthāti odhānasamodhāne. Yoti bhikkhu, paṭicchādetīti sambandho. Parivasanto vā mānattāraho vā mānattaṃ caranto vā abbhānāraho vā yo bhikkhūti yojanā. ‘‘Purimāya āpattiyā’’ti padaṃ ‘‘samā vā’’ti pade sahādiyogo. ‘‘Ūnatarā’’tipade vibhattiapādānaṃ, anumeyyavisayaapādānaṃ vā. ‘‘Adivase katvā’’ti iminā odhunitvāti ettha dhudhātuyā yathāvuttattheyeva dasseti. Ūnakapakkhapaṭicchannāti pakkhato ūnakena paṭicchannā. Etenupāyenāti pakkhe vuttena etena upāyena.
তত্থাতি মূলাপত্তিতো অতিরেকপটিচ্ছন্নে। আৰি কারাপেত্ৰাতি মূলাপত্তিতো অন্তরাপত্তিযা পটিচ্ছন্নভাৰং আৰি কারাপেত্ৰা। এত্থাতি আপত্তিপটিচ্ছন্নে। পমাণন্তি কারণং। যাতি আপত্তি। তত্থাতি মূলভাৰেন কত্তব্বাযং মূলিআপত্তিযং। ইতরন্তি মূলিভাৰেন কত্তব্বং মূলাপত্তিং। সমোধাযাতি সমোদহিত্ৰা। পক্খিপিত্ৰাতি অত্থো।
Tatthāti mūlāpattito atirekapaṭicchanne. Āvi kārāpetvāti mūlāpattito antarāpattiyā paṭicchannabhāvaṃ āvi kārāpetvā. Etthāti āpattipaṭicchanne. Pamāṇanti kāraṇaṃ. Yāti āpatti. Tatthāti mūlabhāvena kattabbāyaṃ mūliāpattiyaṃ. Itaranti mūlibhāvena kattabbaṃ mūlāpattiṃ. Samodhāyāti samodahitvā. Pakkhipitvāti attho.
একা ৰা যা আপত্তি সব্বচিরপটিচ্ছন্না হোতীতি যোজনা। সব্বচিরপটিচ্ছন্নাযোতি সব্বাসং আপত্তীনং চিরেন পটিচ্ছন্নাযো। তাসন্তি আপত্তীনং। অগ্ঘেনাতি পরিচ্ছেদেন। অগ্ঘসদ্দো হেত্থ পরিচ্ছেদত্থৰাচকো। অভিধানে (অভিধানপ্পদীপিকাযং ১০৪৮ গাথাযং) ৰুত্তং ‘‘অগ্ঘো মুল্যে চ পূজনে’’তি। এত্থ ‘‘মুল্যে চা’’তি পদস্স মূলপরিচ্ছেদেতি অত্থো দট্ঠব্বো। তমেৰত্থং দস্সেন্তো আহ ‘‘তাসং রত্তিপরিচ্ছেদৰসেনা’’তি। ইমেহি পদেহি অগ্ঘেন রত্তিপরিচ্ছেদেন সমোধানেত্ৰা দাতব্বো পরিৰাসো অগ্ঘসমোধানোতি ৰচনত্থং দস্সেতি। এত্থ চ ‘‘সব্বচিরপটিচ্ছন্নাযো’’তি ৰুত্তত্তা কিঞ্চাপি কোটিঅত্থৰাচকো ততিযক্খরেন পাঠো যুত্তো ৰিয দিস্সতি। তথাপি সো পাঠো ন গহেতব্বো। কস্মা? বহূসু পাল়িপোত্থকেসু, অট্ঠকথাপোত্থকেসু চ অলিখিতত্তা। বহূসু হি পোরাণপোত্থকেসু চতুত্থক্খরেন পাঠোযেৰ লিখিতো, তস্মা সো পাঠোযেৰ গহেতব্বো, ন অঞ্ঞোতি দট্ঠব্বং। সোতি অগ্ঘসমোধানো। আগতোযেৰাতি সম্বন্ধো।
Ekā vā yā āpatti sabbacirapaṭicchannā hotīti yojanā. Sabbacirapaṭicchannāyoti sabbāsaṃ āpattīnaṃ cirena paṭicchannāyo. Tāsanti āpattīnaṃ. Agghenāti paricchedena. Agghasaddo hettha paricchedatthavācako. Abhidhāne (abhidhānappadīpikāyaṃ 1048 gāthāyaṃ) vuttaṃ ‘‘aggho mulye ca pūjane’’ti. Ettha ‘‘mulye cā’’ti padassa mūlaparicchedeti attho daṭṭhabbo. Tamevatthaṃ dassento āha ‘‘tāsaṃ rattiparicchedavasenā’’ti. Imehi padehi agghena rattiparicchedena samodhānetvā dātabbo parivāso agghasamodhānoti vacanatthaṃ dasseti. Ettha ca ‘‘sabbacirapaṭicchannāyo’’ti vuttattā kiñcāpi koṭiatthavācako tatiyakkharena pāṭho yutto viya dissati. Tathāpi so pāṭho na gahetabbo. Kasmā? Bahūsu pāḷipotthakesu, aṭṭhakathāpotthakesu ca alikhitattā. Bahūsu hi porāṇapotthakesu catutthakkharena pāṭhoyeva likhito, tasmā so pāṭhoyeva gahetabbo, na aññoti daṭṭhabbaṃ. Soti agghasamodhāno. Āgatoyevāti sambandho.
যস্স পনাতি ভিক্খুস্স, পটিচ্ছন্নাতি সম্বন্ধো। সব্বন্তি সকলং। আপত্তিসহস্সগাথায –
Yassa panāti bhikkhussa, paṭicchannāti sambandho. Sabbanti sakalaṃ. Āpattisahassagāthāya –
দসসতং আপত্তিযো রত্তিসতং ছাদযিত্ৰানাতি যোজনা। ইমিনা নযেনপি অগ্ঘসমোধানোতি এত্থ অগ্ঘসদ্দস্স চতুত্থক্খরেন পাঠস্স যুত্তভাৰো ৰেদিতব্বো। অগ্ঘেন দসরত্তিপরিচ্ছেদেন সমোধায দাতব্বো অগ্ঘসমোধানো।
Dasasataṃ āpattiyo rattisataṃ chādayitvānāti yojanā. Iminā nayenapi agghasamodhānoti ettha agghasaddassa catutthakkharena pāṭhassa yuttabhāvo veditabbo. Agghena dasarattiparicchedena samodhāya dātabbo agghasamodhāno.
যো পরিৰাসো নানাৰত্থুকাযো আপত্তিযো একতো কত্ৰা দিয্যতি, অযং পরিৰাসো মিস্সকসমোধানো নামাতি যোজনা। এত্থ ৰত্থুৰসেন মিস্সকা আপত্তিযো সমোধানেত্ৰা দাতব্বো পরিৰাসো মিস্সকসমোধানোতি ৰচনত্থো কাতব্বো। তত্রাতি মিস্সকসমোধানে। তদনুরূপাযাতি তস্স যাচনস্স অনুরূপায।
Yo parivāso nānāvatthukāyo āpattiyo ekato katvā diyyati, ayaṃ parivāso missakasamodhāno nāmāti yojanā. Ettha vatthuvasena missakā āpattiyo samodhānetvā dātabbo parivāso missakasamodhānoti vacanattho kātabbo. Tatrāti missakasamodhāne. Tadanurūpāyāti tassa yācanassa anurūpāya.
এত্থ চাতি মিস্সকসমোধানে চ, কাতুং ৰট্টতীতি সম্বন্ধো।
Ettha cāti missakasamodhāne ca, kātuṃ vaṭṭatīti sambandho.
‘‘পক্খমানত্তঞ্চ …পে॰… কথযিস্সামা’’তি যং ৰচনং ৰুত্তং, তস্স ৰচনস্স ওকাসোতি যোজনা। তং পনাতি পক্খমানত্তং পন। ‘‘অড্ঢমাসমেৰ দাতব্ব’’ন্তি ইমিনা পক্খমেৰ দাতব্বং মানত্তং পক্খমানত্তন্তি ৰচনত্থং দস্সেতি। হীতি সচ্চং। তং পনাতি পক্খমানত্তং পন, দাতব্বন্তি সম্বন্ধো। অত্তনো সীমন্তি অত্তনো ৰিহারসীমং, মহাসীমন্তি অত্থো। সোধেত্ৰাতি সব্বাসং হত্থপাসনযনৰসেন, ছন্দারহানং ছন্দনযনৰসেন, সীমতো বহিকরণৰসেন চ সোধেত্ৰা। চতুৰগ্গগণন্তি চতুৰগ্গসঙ্ঘং। গণোতি চেত্থ সঙ্ঘোযেৰাধিপ্পেতো।
‘‘Pakkhamānattañca …pe… kathayissāmā’’ti yaṃ vacanaṃ vuttaṃ, tassa vacanassa okāsoti yojanā. Taṃ panāti pakkhamānattaṃ pana. ‘‘Aḍḍhamāsameva dātabba’’nti iminā pakkhameva dātabbaṃ mānattaṃ pakkhamānattanti vacanatthaṃ dasseti. Hīti saccaṃ. Taṃ panāti pakkhamānattaṃ pana, dātabbanti sambandho. Attano sīmanti attano vihārasīmaṃ, mahāsīmanti attho. Sodhetvāti sabbāsaṃ hatthapāsanayanavasena, chandārahānaṃ chandanayanavasena, sīmato bahikaraṇavasena ca sodhetvā. Catuvaggagaṇanti catuvaggasaṅghaṃ. Gaṇoti cettha saṅghoyevādhippeto.
তত্রাতি ‘‘যোজনা কাতব্বা’’তি ৰচনে। মুখমত্তদস্সনন্তি উপাযমত্তদস্সনং, আদিমত্তদস্সনং ৰা। ‘‘আপন্নায ভিক্খুনিযা’’তি পদং ‘‘এৰমস্স ৰচনীযো’’তি পদে কত্তা, ‘‘যাচাপেত্ৰা’’তি পদে কারিতকম্মং। ‘‘ব্যত্তায ভিক্খুনিযা’’তি পদং ‘‘ঞাপেতব্বো’’তি পদে কারিতকত্তা, ‘‘সঙ্ঘো’’তি পদং তত্থেৰ কারিতকম্মং। ‘‘এতং কারণ’’ন্তি ধাতুকম্মং অজ্ঝাহরিতব্বং। তব্বপচ্চযেন কারিতকম্মমেৰ ৰুত্তং। ঞাপেতব্বাকারং দস্সেন্তো আহ ‘‘সুণাতু মে’’তিআদি।
Tatrāti ‘‘yojanā kātabbā’’ti vacane. Mukhamattadassananti upāyamattadassanaṃ, ādimattadassanaṃ vā. ‘‘Āpannāya bhikkhuniyā’’ti padaṃ ‘‘evamassa vacanīyo’’ti pade kattā, ‘‘yācāpetvā’’ti pade kāritakammaṃ. ‘‘Byattāya bhikkhuniyā’’ti padaṃ ‘‘ñāpetabbo’’ti pade kāritakattā, ‘‘saṅgho’’ti padaṃ tattheva kāritakammaṃ. ‘‘Etaṃ kāraṇa’’nti dhātukammaṃ ajjhāharitabbaṃ. Tabbapaccayena kāritakammameva vuttaṃ. Ñāpetabbākāraṃ dassento āha ‘‘suṇātu me’’tiādi.
নিক্খিত্তৰত্তন্তি করণত্থে চেতং উপযোগৰচনং। নিক্খিত্তৰত্তেনাতি হি অত্থো। তত্থেৰাতি মাল়কসীমাযমেৰ। হীতি সচ্চং, যস্মা ৰা। অস্সাতি মানত্তচারিকায ভিক্খুনিযা। তত্রাতি তস্মা কত্তব্বৰিনযকম্মভাৰতোতি অত্থো। নোতি অম্হাকং, সন্তিকন্তি সম্বন্ধো। চতূহি পকতত্তভিক্খুনীহি নিসীদিতব্বন্তি সম্বন্ধো। গামূপচারতো দ্ৰে লেড্ডুপাতে অতিক্কমিত্ৰাতি ইদং ভিক্খুনীৰিহারূপচারাতিক্কমং সন্ধায ৰুত্তং। ৰিহারূপচারতোপীতি ভিক্খুৰিহারূপচারতোপি। তত্থাতি ভিক্খুনীনং নিসিন্নট্ঠানং। কুরুন্দিমহাপচ্চরীসু পন ৰুত্তন্তি সম্বন্ধো। ৰিহারস্স চাতি ভিক্খুৰিহারস্স চ। গামস্স উপচারং মুঞ্চিতুং ৰট্টতীতি ন ৰুত্তন্তি যোজনা। তস্মা গামূপচারেপি নিসীদিতুং ৰট্টতীতি অধিপ্পাযো।
Nikkhittavattanti karaṇatthe cetaṃ upayogavacanaṃ. Nikkhittavattenāti hi attho. Tatthevāti māḷakasīmāyameva. Hīti saccaṃ, yasmā vā. Assāti mānattacārikāya bhikkhuniyā. Tatrāti tasmā kattabbavinayakammabhāvatoti attho. Noti amhākaṃ, santikanti sambandho. Catūhi pakatattabhikkhunīhi nisīditabbanti sambandho. Gāmūpacārato dve leḍḍupāte atikkamitvāti idaṃ bhikkhunīvihārūpacārātikkamaṃ sandhāya vuttaṃ. Vihārūpacāratopīti bhikkhuvihārūpacāratopi. Tatthāti bhikkhunīnaṃ nisinnaṭṭhānaṃ. Kurundimahāpaccarīsu pana vuttanti sambandho. Vihārassa cāti bhikkhuvihārassa ca. Gāmassa upacāraṃ muñcituṃ vaṭṭatīti na vuttanti yojanā. Tasmā gāmūpacārepi nisīdituṃ vaṭṭatīti adhippāyo.
তায ভিক্খুনিযা আরোচেতব্বন্তি সম্বন্ধো।
Tāya bhikkhuniyā ārocetabbanti sambandho.
তত্থেৰাতি ভিক্খুনীনং নিসীদনট্ঠানেযেৰ। ঠানন্তি ভিক্খূনং ঠানং। এতীতি আগচ্ছতি। পগেৰাতি পাতোযেৰ। তাযাতি মানত্তচারিনিযা।
Tatthevāti bhikkhunīnaṃ nisīdanaṭṭhāneyeva. Ṭhānanti bhikkhūnaṃ ṭhānaṃ. Etīti āgacchati. Pagevāti pātoyeva. Tāyāti mānattacāriniyā.
অনিক্খিত্তৰত্তায পন ভিক্খুনিযাতি সম্বন্ধো। অজাননপচ্চযাতি অজাননকারণা। তন্তি ৰচনং। পারিৰাসিকৰত্তাদীনন্তি আদিসদ্দেন আগন্তুকৰত্তপূরণনিস্সযপটিপ্পস্সদ্ধাদযো সঙ্গণ্হাতি । যুত্ততরং দিস্সতীতি যুত্ততরং হুত্ৰা দিস্সতি। ইমিনা অনিক্খিত্তৰত্তভিক্খুনা ৰিয ভিক্খুনিযাপি অন্তোউপচারসীমগতানংযেৰ আরোচেতব্বং, ন গামে ঠিতানম্পি গন্ত্ৰা আরোচেতব্বন্তি দীপেতি। উপোসথেতি উপোসথদিৰসে। এসেৰ নযো পৰারণাযপি। দেৰসিকন্তি দিৰসে দিৰসে। তস্মিং গামেতি ভিক্খুনীনং ৰসনগামে। অঞ্ঞত্রাতি ভিক্খুনীনং ৰসনগামতো অঞ্ঞস্মিং গামে। তত্রাতি ভিক্খুনীনং ৰসনগামং। দস্সেত্ৰাতি ভিক্খুনীনং দস্সেত্ৰা। তাযাতি মানত্তচারিনিযা। ৰিহারন্তি ভিক্খূনং ৰিহারং। উপচারসীমাযাতি উপচারসীমতো বহীতি সম্বন্ধো। অযন্তি মানত্তচারিনী।
Anikkhittavattāya pana bhikkhuniyāti sambandho. Ajānanapaccayāti ajānanakāraṇā. Tanti vacanaṃ. Pārivāsikavattādīnanti ādisaddena āgantukavattapūraṇanissayapaṭippassaddhādayo saṅgaṇhāti . Yuttataraṃ dissatīti yuttataraṃ hutvā dissati. Iminā anikkhittavattabhikkhunā viya bhikkhuniyāpi antoupacārasīmagatānaṃyeva ārocetabbaṃ, na gāme ṭhitānampi gantvā ārocetabbanti dīpeti. Uposatheti uposathadivase. Eseva nayo pavāraṇāyapi. Devasikanti divase divase. Tasmiṃ gāmeti bhikkhunīnaṃ vasanagāme. Aññatrāti bhikkhunīnaṃ vasanagāmato aññasmiṃ gāme. Tatrāti bhikkhunīnaṃ vasanagāmaṃ. Dassetvāti bhikkhunīnaṃ dassetvā. Tāyāti mānattacāriniyā. Vihāranti bhikkhūnaṃ vihāraṃ. Upacārasīmāyāti upacārasīmato bahīti sambandho. Ayanti mānattacārinī.
ৰীসতি গণো ইমস্সাতি ৰীসতিগণো, সঙ্ঘো, তস্মিং। মানত্তং চরমানা ভিক্খুনীতি যোজনা। ইদং পক্খমানত্তং নামাতি ইদং পুব্বৰচনস্স নিগমৰসেন পরৰচনস্স কথনত্থায ৰুত্তন্তি দট্ঠব্বং।
Vīsati gaṇo imassāti vīsatigaṇo, saṅgho, tasmiṃ. Mānattaṃ caramānā bhikkhunīti yojanā. Idaṃ pakkhamānattaṃ nāmāti idaṃ pubbavacanassa nigamavasena paravacanassa kathanatthāya vuttanti daṭṭhabbaṃ.
তত্থাতি তিৰিধেসু মানত্তেসু। যদেতং মানত্তং অনুঞ্ঞাতন্তি সম্বন্ধো। পরতোতি পরস্মিং। পরিৰাসং পরিৰসন্তস্স মূলাযপটিকস্সিতস্স উদাযিত্থেরস্স অনুঞ্ঞাতন্তি সম্বন্ধো। আপজ্জিত্ৰাতি আপজ্জনতো। ইদন্তি মানত্তং ৰুচ্চতীতি সম্বন্ধো। হীতি সচ্চং, যস্মা ৰা। ওধানসমোধানন্তি এত্থ ৰচনত্থো হেট্ঠা ৰুত্তোযেৰ। তম্পীতি কুরুন্দিযং ৰুত্তৰচনম্পি।
Tatthāti tividhesu mānattesu. Yadetaṃ mānattaṃ anuññātanti sambandho. Paratoti parasmiṃ. Parivāsaṃ parivasantassa mūlāyapaṭikassitassa udāyittherassa anuññātanti sambandho. Āpajjitvāti āpajjanato. Idanti mānattaṃ vuccatīti sambandho. Hīti saccaṃ, yasmā vā. Odhānasamodhānanti ettha vacanattho heṭṭhā vuttoyeva. Tampīti kurundiyaṃ vuttavacanampi.
তন্তি অগ্ঘসমোধানমিস্সকসমোধানং, দাতব্বন্তি সম্বন্ধো। এত্তাৰতাতি এতপরিমাণেন ৰচনক্কমেন, ‘‘অযঞ্হি ইধ অধিপ্পেতো পরিৰাসো নামা’’তি (চূল়ৰ॰ অট্ঠ॰ ১০২) ৰচনতো পট্ঠায যাৰ ‘‘যোজেত্ৰা দাতব্ব’’ন্তি ৰচনং, তাৰ ৰচনক্কমেনাতি অত্থো। ‘‘তেন হি ভিক্খৰে…পে॰… দস্সেস্সামা’’তি যং ৰচনং ৰুত্তন্তি যোজনা। ‘‘অত্থতো’’তি ইমিনা সদ্দোপি গহেতব্বো অৰিনাভাৰতো।
Tanti agghasamodhānamissakasamodhānaṃ, dātabbanti sambandho. Ettāvatāti etaparimāṇena vacanakkamena, ‘‘ayañhi idha adhippeto parivāso nāmā’’ti (cūḷava. aṭṭha. 102) vacanato paṭṭhāya yāva ‘‘yojetvā dātabba’’nti vacanaṃ, tāva vacanakkamenāti attho. ‘‘Tena hi bhikkhave…pe… dassessāmā’’ti yaṃ vacanaṃ vuttanti yojanā. ‘‘Atthato’’ti iminā saddopi gahetabbo avinābhāvato.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi / একাহপ্পটিচ্ছন্নপরিৰাসং • Ekāhappaṭicchannaparivāsaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / পটিচ্ছন্নপরিৰাসকথা • Paṭicchannaparivāsakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / পরিৰাসকথাৰণ্ণনা • Parivāsakathāvaṇṇanā
