| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
பரிவாஸகதா²வண்ணனா
Parivāsakathāvaṇṇanā
102. ‘‘ஸதியேவ அந்தராயே அந்தராயிகஸஞ்ஞீ சா²தே³தி, அச்ச²ன்னா ஹோதி. அந்தராயிகஸ்ஸ பன அனந்தராயிகஸஞ்ஞாய சா²த³யதோ அச்ச²ன்னாவா’’திபி பாடோ². அவேரீதி ஹிதகாமோ. உத்³த⁴ஸ்தே அருணேதி உட்டி²தே அருணே. ஸுத்³த⁴ஸ்ஸ ஸந்திகேதி ஸபா⁴க³ஸங்கா⁴தி³ஸேஸங் அனாபன்னஸ்ஸ ஸந்திகே. வத்து²ந்தி அஸுசிமோசனாதி³வீதிக்கமங்.
102. ‘‘Satiyeva antarāye antarāyikasaññī chādeti, acchannā hoti. Antarāyikassa pana anantarāyikasaññāya chādayato acchannāvā’’tipi pāṭho. Averīti hitakāmo. Uddhaste aruṇeti uṭṭhite aruṇe. Suddhassa santiketi sabhāgasaṅghādisesaṃ anāpannassa santike. Vatthunti asucimocanādivītikkamaṃ.
ஸுக்கவிஸ்ஸட்டீ²தி வத்து² சேவ கொ³த்தஞ்சாதி ஸுக்கவிஸ்ஸட்டீ²தி இத³ங் அஸுசிமோசனலக்க²ணஸ்ஸ வீதிக்கமஸ்ஸ பகாஸனதோ வத்து² சேவ ஹோதி, ஸஜாதியஸாதா⁴ரணவிஜாதியவினிவத்தஸபா⁴வாய ஸுக்கவிஸ்ஸட்டி²யா ஏவ பகாஸனதோ கொ³த்தஞ்ச ஹோதீதி அத்தோ². க³ங் தாயதீதி ஹி கொ³த்தங். ஸங்கா⁴தி³ஸேஸோதி நாமஞ்சேவ ஆபத்தி சாதி ஸங்கா⁴தி³ஸேஸோதி தேன தேன வீதிக்கமேன ஆபன்னஸ்ஸ ஆபத்தினிகாயஸ்ஸ நாமப்பகாஸனதோ நாமஞ்சேவ ஹோதி ஆபத்திஸபா⁴க³த்தா ஆபத்தி ச.
Sukkavissaṭṭhītivatthu ceva gottañcāti sukkavissaṭṭhīti idaṃ asucimocanalakkhaṇassa vītikkamassa pakāsanato vatthu ceva hoti, sajātiyasādhāraṇavijātiyavinivattasabhāvāya sukkavissaṭṭhiyā eva pakāsanato gottañca hotīti attho. Gaṃ tāyatīti hi gottaṃ. Saṅghādisesotināmañceva āpatti cāti saṅghādisesoti tena tena vītikkamena āpannassa āpattinikāyassa nāmappakāsanato nāmañceva hoti āpattisabhāgattā āpatti ca.
தத³னுரூபங் கம்மவாசங் கத்வா மானத்தங் தா³தப்³ப³ந்தி –
Tadanurūpaṃ kammavācaṃ katvā mānattaṃ dātabbanti –
‘‘ஸுணாது மே, ப⁴ந்தே, ஸங்கோ⁴, அயங் இத்த²ன்னாமோ பி⁴க்கு² ஏகங் ஆபத்திங் ஆபஜ்ஜி ஸஞ்சேதனிகங் ஸுக்கவிஸ்ஸட்டி²ங் ஏகாஹபடிச்ச²ன்னங், ஸோ ஸங்க⁴ங் ஏகிஸ்ஸா ஆபத்தியா ஸஞ்சேதனிகாய ஸுக்கவிஸ்ஸட்டி²யா ஏகாஹபடிச்ச²ன்னாய ஏகாஹபரிவாஸங் யாசி. ஸங்கோ⁴ இத்த²ன்னாமஸ்ஸ பி⁴க்கு²னோ ஏகிஸ்ஸா ஆபத்தியா ஸஞ்சேதனிகாய ஸுக்கவிஸ்ஸட்டி²யா ஏகாஹபடிச்ச²ன்னாய ஏகாஹபரிவாஸங் அதா³ஸி. ஸோ பரிவுத்த²பரிவாஸோ. அயங் இத்த²ன்னாமோ பி⁴க்கு² ஏகங் ஆபத்திங் ஆபஜ்ஜி ஸஞ்சேதனிகங் ஸுக்கவிஸ்ஸட்டி²ங் அப்படிச்ச²ன்னங், ஸோ ஸங்க⁴ங் தாஸங் ஆபத்தீனங் ஸஞ்சேதனிகானங் ஸுக்கவிஸ்ஸட்டீ²னங் படிச்ச²ன்னாய ச அப்படிச்ச²ன்னாய ச சா²ரத்தங் மானத்தங் யாசதி. யதி³ ஸங்க⁴ஸ்ஸ பத்தகல்லங், ஸங்கோ⁴ இத்த²ன்னாமஸ்ஸ பி⁴க்கு²னோ த்³வின்னங் ஆபத்தீனங் ஸஞ்சேதனிகானங் ஸுக்கவிஸ்ஸட்டீ²னங் படிச்ச²ன்னாய ச அப்படிச்ச²ன்னாய ச சா²ரத்தங் மானத்தங் த³தெ³ய்ய, ஏஸா ஞத்தி.
‘‘Suṇātu me, bhante, saṅgho, ayaṃ itthannāmo bhikkhu ekaṃ āpattiṃ āpajji sañcetanikaṃ sukkavissaṭṭhiṃ ekāhapaṭicchannaṃ, so saṅghaṃ ekissā āpattiyā sañcetanikāya sukkavissaṭṭhiyā ekāhapaṭicchannāya ekāhaparivāsaṃ yāci. Saṅgho itthannāmassa bhikkhuno ekissā āpattiyā sañcetanikāya sukkavissaṭṭhiyā ekāhapaṭicchannāya ekāhaparivāsaṃ adāsi. So parivutthaparivāso. Ayaṃ itthannāmo bhikkhu ekaṃ āpattiṃ āpajji sañcetanikaṃ sukkavissaṭṭhiṃ appaṭicchannaṃ, so saṅghaṃ tāsaṃ āpattīnaṃ sañcetanikānaṃ sukkavissaṭṭhīnaṃ paṭicchannāya ca appaṭicchannāya ca chārattaṃ mānattaṃ yācati. Yadi saṅghassa pattakallaṃ, saṅgho itthannāmassa bhikkhuno dvinnaṃ āpattīnaṃ sañcetanikānaṃ sukkavissaṭṭhīnaṃ paṭicchannāya ca appaṭicchannāya ca chārattaṃ mānattaṃ dadeyya, esā ñatti.
ஸுணாது மே, ப⁴ந்தே…பே॰… ஸோ பரிவுத்த²பரிவாஸோ. அயங் இத்த²ன்னாமோ பி⁴க்கு² ஏகங் ஆபத்திங் ஆபஜ்ஜி ஸஞ்சேதனிகங் ஸுக்கவிஸ்ஸட்டி²ங் அப்படிச்ச²ன்னங், ஸோ ஸங்க⁴ங் தாஸங்…பே॰… யாசதி. ஸங்கோ⁴ இத்த²ன்னாமஸ்ஸ பி⁴க்கு²னோ த்³வின்னங் ஆபத்தீனங் ஸஞ்சேதனிகானங் ஸுக்கவிஸ்ஸட்டீ²னங் படிச்ச²ன்னாய ச அப்படிச்ச²ன்னாய ச சா²ரத்தங் மானத்தங் தே³தி. யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ த்³வின்னங் ஆபத்தீனங் ஸஞ்சேதனிகானங் ஸுக்கவிஸ்ஸட்டீ²னங் படிச்ச²ன்னாய ச அப்படிச்ச²ன்னாய ச சா²ரத்தங் மானத்தஸ்ஸ தா³னங், ஸோ துண்ஹஸ்ஸ. யஸ்ஸ நக்க²மதி, ஸோ பா⁴ஸெய்ய.
Suṇātu me, bhante…pe… so parivutthaparivāso. Ayaṃ itthannāmo bhikkhu ekaṃ āpattiṃ āpajji sañcetanikaṃ sukkavissaṭṭhiṃ appaṭicchannaṃ, so saṅghaṃ tāsaṃ…pe… yācati. Saṅgho itthannāmassa bhikkhuno dvinnaṃ āpattīnaṃ sañcetanikānaṃ sukkavissaṭṭhīnaṃ paṭicchannāya ca appaṭicchannāya ca chārattaṃ mānattaṃ deti. Yassāyasmato khamati itthannāmassa bhikkhuno dvinnaṃ āpattīnaṃ sañcetanikānaṃ sukkavissaṭṭhīnaṃ paṭicchannāya ca appaṭicchannāya ca chārattaṃ mānattassa dānaṃ, so tuṇhassa. Yassa nakkhamati, so bhāseyya.
து³தியம்பி ஏதமத்த²ங் வதா³மி…பே॰… ததியம்பி ஏதமத்த²ங் வதா³மி…பே॰…
Dutiyampi etamatthaṃ vadāmi…pe… tatiyampi etamatthaṃ vadāmi…pe…
தி³ன்னங் ஸங்கே⁴ன இத்த²ன்னாமஸ்ஸ பி⁴க்கு²னோ த்³வின்னங் ஆபத்தீனங் ஸஞ்சேதனிகானங் ஸுக்கவிஸ்ஸட்டீ²னங் படிச்ச²ன்னாய ச அப்படிச்ச²ன்னாய ச சா²ரத்தங் மானத்தங், க²மதி ஸங்க⁴ஸ்ஸ, தஸ்மா துண்ஹீ. ஏவமேதங் தா⁴ரயாமீதி –
Dinnaṃ saṅghena itthannāmassa bhikkhuno dvinnaṃ āpattīnaṃ sañcetanikānaṃ sukkavissaṭṭhīnaṃ paṭicchannāya ca appaṭicchannāya ca chārattaṃ mānattaṃ, khamati saṅghassa, tasmā tuṇhī. Evametaṃ dhārayāmīti –
ஏவங் கம்மவாசங் கத்வா மானத்தங் தா³தப்³ப³ங். சிண்ணமானத்தஸ்ஸ ச இமினாவ நயேன கம்மவாசங் யோஜெத்வா அப்³பா⁴னங் காதப்³ப³ங்.
Evaṃ kammavācaṃ katvā mānattaṃ dātabbaṃ. Ciṇṇamānattassa ca imināva nayena kammavācaṃ yojetvā abbhānaṃ kātabbaṃ.
அஞ்ஞஸ்மிந்தி ஸுத்³த⁴ந்தபரிவாஸவஸேன ஆபத்திவுட்டா²னதோ அஞ்ஞஸ்மிங். த³ஸஸதங் ஆபத்தியோ ரத்திஸதங் சா²த³யித்வாதி யோஜேதப்³ப³ங்.
Aññasminti suddhantaparivāsavasena āpattivuṭṭhānato aññasmiṃ. Dasasataṃ āpattiyo rattisataṃ chādayitvāti yojetabbaṃ.
பரிவாஸகதா²வண்ணனா நிட்டி²தா.
Parivāsakathāvaṇṇanā niṭṭhitā.
அத்தனோ ஸீமங் ஸோதெ⁴த்வா விஹாரஸீமாயாதி விஹாரே ப³த்³த⁴ஸீமமேவ ஸந்தா⁴ய வுத்தங். விஹாரூபசாரதோபி த்³வே லெட்³டு³பாதா அதிக்கமிதப்³பா³தி பி⁴க்கு²விஹாரங் ஸந்தா⁴ய வத³தி கா³மூபசாராதிக்கமேனேவ பி⁴க்கு²னீவிஹாரூபசாராதிக்கமஸ்ஸ ஸித்³த⁴த்தா. விஹாரஸ்ஸ சாதி பி⁴க்கு²விஹாரஸ்ஸ. கா³மஸ்ஸாதி ந வுத்தந்தி கா³மஸ்ஸ உபசாரங் முஞ்சிதுங் வட்டதீதி ந வுத்தங், தஸ்மா கா³மூபசாரேபி வட்டதீதி அதி⁴ப்பாயோ.
Attano sīmaṃ sodhetvā vihārasīmāyāti vihāre baddhasīmameva sandhāya vuttaṃ. Vihārūpacāratopi dve leḍḍupātā atikkamitabbāti bhikkhuvihāraṃ sandhāya vadati gāmūpacārātikkameneva bhikkhunīvihārūpacārātikkamassa siddhattā. Vihārassa cāti bhikkhuvihārassa. Gāmassāti na vuttanti gāmassa upacāraṃ muñcituṃ vaṭṭatīti na vuttaṃ, tasmā gāmūpacārepi vaṭṭatīti adhippāyo.
தத்தே²வ டா²னங் பச்சாஸீஸந்தீதி பி⁴க்கூ²னங் டா²னங் பச்சாஸீஸந்தி. பரிவாஸவத்தாதீ³னந்தி பரிவாஸனிஸ்ஸயபடிப்பஸ்ஸத்³தி⁴ஆதீ³னங். யுத்ததரங் தி³ஸ்ஸதீதி இமினா அனிக்கி²த்தவத்தபி⁴க்கு²னா விய பி⁴க்கு²னியாபி அந்தோஉபசாரஸீமக³தானங்யேவ ஆரோசேதப்³ப³ங், ந கா³மே டி²தானம்பி க³ந்த்வா ஆரோசேதப்³ப³ந்தி தீ³பேதி. தஸ்மிங் கா³மேதி யஸ்மிங் கா³மே பி⁴க்கு²னுபஸ்ஸயோ ஹோதி, தஸ்மிங் கா³மே. ப³ஹி உபசாரஸீமாய ட²த்வாதி உபசாரஸீமதோ ப³ஹி ட²த்வா. ஸம்மன்னித்வா தா³தப்³பா³தி எத்த² ஸம்மன்னித்வா தி³ன்னாய ஸஹவாஸேபி ரத்திச்சே²தோ³ ந ஹோதி.
Tattheva ṭhānaṃ paccāsīsantīti bhikkhūnaṃ ṭhānaṃ paccāsīsanti. Parivāsavattādīnanti parivāsanissayapaṭippassaddhiādīnaṃ. Yuttataraṃ dissatīti iminā anikkhittavattabhikkhunā viya bhikkhuniyāpi antoupacārasīmagatānaṃyeva ārocetabbaṃ, na gāme ṭhitānampi gantvā ārocetabbanti dīpeti. Tasmiṃ gāmeti yasmiṃ gāme bhikkhunupassayo hoti, tasmiṃ gāme. Bahi upacārasīmāya ṭhatvāti upacārasīmato bahi ṭhatvā. Sammannitvā dātabbāti ettha sammannitvā dinnāya sahavāsepi ratticchedo na hoti.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi / ஏகாஹப்படிச்ச²ன்னபரிவாஸங் • Ekāhappaṭicchannaparivāsaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / படிச்ச²ன்னபரிவாஸகதா² • Paṭicchannaparivāsakathā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பரிவாஸகதா²வண்ணனா • Parivāsakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / படிச்ச²ன்னபரிவாஸகதா²வண்ணனா • Paṭicchannaparivāsakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / படிச்ச²ன்னபரிவாஸகதா² • Paṭicchannaparivāsakathā
