| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
পরিৰাসকথাৰণ্ণনা
Parivāsakathāvaṇṇanā
১০২. ‘‘সতিযেৰ অন্তরাযে অন্তরাযিকসঞ্ঞী ছাদেতি, অচ্ছন্না হোতি। অন্তরাযিকস্স পন অনন্তরাযিকসঞ্ঞায ছাদযতো অচ্ছন্নাৰা’’তিপি পাঠো। অৰেরীতি হিতকামো। উদ্ধস্তে অরুণেতি উট্ঠিতে অরুণে। সুদ্ধস্স সন্তিকেতি সভাগসঙ্ঘাদিসেসং অনাপন্নস্স সন্তিকে। ৰত্থুন্তি অসুচিমোচনাদিৰীতিক্কমং।
102. ‘‘Satiyeva antarāye antarāyikasaññī chādeti, acchannā hoti. Antarāyikassa pana anantarāyikasaññāya chādayato acchannāvā’’tipi pāṭho. Averīti hitakāmo. Uddhaste aruṇeti uṭṭhite aruṇe. Suddhassa santiketi sabhāgasaṅghādisesaṃ anāpannassa santike. Vatthunti asucimocanādivītikkamaṃ.
সুক্কৰিস্সট্ঠীতি ৰত্থু চেৰ গোত্তঞ্চাতি সুক্কৰিস্সট্ঠীতি ইদং অসুচিমোচনলক্খণস্স ৰীতিক্কমস্স পকাসনতো ৰত্থু চেৰ হোতি, সজাতিযসাধারণৰিজাতিযৰিনিৰত্তসভাৰায সুক্কৰিস্সট্ঠিযা এৰ পকাসনতো গোত্তঞ্চ হোতীতি অত্থো। গং তাযতীতি হি গোত্তং। সঙ্ঘাদিসেসোতি নামঞ্চেৰ আপত্তি চাতি সঙ্ঘাদিসেসোতি তেন তেন ৰীতিক্কমেন আপন্নস্স আপত্তিনিকাযস্স নামপ্পকাসনতো নামঞ্চেৰ হোতি আপত্তিসভাগত্তা আপত্তি চ।
Sukkavissaṭṭhītivatthu ceva gottañcāti sukkavissaṭṭhīti idaṃ asucimocanalakkhaṇassa vītikkamassa pakāsanato vatthu ceva hoti, sajātiyasādhāraṇavijātiyavinivattasabhāvāya sukkavissaṭṭhiyā eva pakāsanato gottañca hotīti attho. Gaṃ tāyatīti hi gottaṃ. Saṅghādisesotināmañceva āpatti cāti saṅghādisesoti tena tena vītikkamena āpannassa āpattinikāyassa nāmappakāsanato nāmañceva hoti āpattisabhāgattā āpatti ca.
তদনুরূপং কম্মৰাচং কত্ৰা মানত্তং দাতব্বন্তি –
Tadanurūpaṃ kammavācaṃ katvā mānattaṃ dātabbanti –
‘‘সুণাতু মে, ভন্তে, সঙ্ঘো, অযং ইত্থন্নামো ভিক্খু একং আপত্তিং আপজ্জি সঞ্চেতনিকং সুক্কৰিস্সট্ঠিং একাহপটিচ্ছন্নং, সো সঙ্ঘং একিস্সা আপত্তিযা সঞ্চেতনিকায সুক্কৰিস্সট্ঠিযা একাহপটিচ্ছন্নায একাহপরিৰাসং যাচি। সঙ্ঘো ইত্থন্নামস্স ভিক্খুনো একিস্সা আপত্তিযা সঞ্চেতনিকায সুক্কৰিস্সট্ঠিযা একাহপটিচ্ছন্নায একাহপরিৰাসং অদাসি। সো পরিৰুত্থপরিৰাসো। অযং ইত্থন্নামো ভিক্খু একং আপত্তিং আপজ্জি সঞ্চেতনিকং সুক্কৰিস্সট্ঠিং অপ্পটিচ্ছন্নং, সো সঙ্ঘং তাসং আপত্তীনং সঞ্চেতনিকানং সুক্কৰিস্সট্ঠীনং পটিচ্ছন্নায চ অপ্পটিচ্ছন্নায চ ছারত্তং মানত্তং যাচতি। যদি সঙ্ঘস্স পত্তকল্লং, সঙ্ঘো ইত্থন্নামস্স ভিক্খুনো দ্ৰিন্নং আপত্তীনং সঞ্চেতনিকানং সুক্কৰিস্সট্ঠীনং পটিচ্ছন্নায চ অপ্পটিচ্ছন্নায চ ছারত্তং মানত্তং দদেয্য, এসা ঞত্তি।
‘‘Suṇātu me, bhante, saṅgho, ayaṃ itthannāmo bhikkhu ekaṃ āpattiṃ āpajji sañcetanikaṃ sukkavissaṭṭhiṃ ekāhapaṭicchannaṃ, so saṅghaṃ ekissā āpattiyā sañcetanikāya sukkavissaṭṭhiyā ekāhapaṭicchannāya ekāhaparivāsaṃ yāci. Saṅgho itthannāmassa bhikkhuno ekissā āpattiyā sañcetanikāya sukkavissaṭṭhiyā ekāhapaṭicchannāya ekāhaparivāsaṃ adāsi. So parivutthaparivāso. Ayaṃ itthannāmo bhikkhu ekaṃ āpattiṃ āpajji sañcetanikaṃ sukkavissaṭṭhiṃ appaṭicchannaṃ, so saṅghaṃ tāsaṃ āpattīnaṃ sañcetanikānaṃ sukkavissaṭṭhīnaṃ paṭicchannāya ca appaṭicchannāya ca chārattaṃ mānattaṃ yācati. Yadi saṅghassa pattakallaṃ, saṅgho itthannāmassa bhikkhuno dvinnaṃ āpattīnaṃ sañcetanikānaṃ sukkavissaṭṭhīnaṃ paṭicchannāya ca appaṭicchannāya ca chārattaṃ mānattaṃ dadeyya, esā ñatti.
সুণাতু মে, ভন্তে…পে॰… সো পরিৰুত্থপরিৰাসো। অযং ইত্থন্নামো ভিক্খু একং আপত্তিং আপজ্জি সঞ্চেতনিকং সুক্কৰিস্সট্ঠিং অপ্পটিচ্ছন্নং, সো সঙ্ঘং তাসং…পে॰… যাচতি। সঙ্ঘো ইত্থন্নামস্স ভিক্খুনো দ্ৰিন্নং আপত্তীনং সঞ্চেতনিকানং সুক্কৰিস্সট্ঠীনং পটিচ্ছন্নায চ অপ্পটিচ্ছন্নায চ ছারত্তং মানত্তং দেতি। যস্সাযস্মতো খমতি ইত্থন্নামস্স ভিক্খুনো দ্ৰিন্নং আপত্তীনং সঞ্চেতনিকানং সুক্কৰিস্সট্ঠীনং পটিচ্ছন্নায চ অপ্পটিচ্ছন্নায চ ছারত্তং মানত্তস্স দানং, সো তুণ্হস্স। যস্স নক্খমতি, সো ভাসেয্য।
Suṇātu me, bhante…pe… so parivutthaparivāso. Ayaṃ itthannāmo bhikkhu ekaṃ āpattiṃ āpajji sañcetanikaṃ sukkavissaṭṭhiṃ appaṭicchannaṃ, so saṅghaṃ tāsaṃ…pe… yācati. Saṅgho itthannāmassa bhikkhuno dvinnaṃ āpattīnaṃ sañcetanikānaṃ sukkavissaṭṭhīnaṃ paṭicchannāya ca appaṭicchannāya ca chārattaṃ mānattaṃ deti. Yassāyasmato khamati itthannāmassa bhikkhuno dvinnaṃ āpattīnaṃ sañcetanikānaṃ sukkavissaṭṭhīnaṃ paṭicchannāya ca appaṭicchannāya ca chārattaṃ mānattassa dānaṃ, so tuṇhassa. Yassa nakkhamati, so bhāseyya.
দুতিযম্পি এতমত্থং ৰদামি…পে॰… ততিযম্পি এতমত্থং ৰদামি…পে॰…
Dutiyampi etamatthaṃ vadāmi…pe… tatiyampi etamatthaṃ vadāmi…pe…
দিন্নং সঙ্ঘেন ইত্থন্নামস্স ভিক্খুনো দ্ৰিন্নং আপত্তীনং সঞ্চেতনিকানং সুক্কৰিস্সট্ঠীনং পটিচ্ছন্নায চ অপ্পটিচ্ছন্নায চ ছারত্তং মানত্তং, খমতি সঙ্ঘস্স, তস্মা তুণ্হী। এৰমেতং ধারযামীতি –
Dinnaṃ saṅghena itthannāmassa bhikkhuno dvinnaṃ āpattīnaṃ sañcetanikānaṃ sukkavissaṭṭhīnaṃ paṭicchannāya ca appaṭicchannāya ca chārattaṃ mānattaṃ, khamati saṅghassa, tasmā tuṇhī. Evametaṃ dhārayāmīti –
এৰং কম্মৰাচং কত্ৰা মানত্তং দাতব্বং। চিণ্ণমানত্তস্স চ ইমিনাৰ নযেন কম্মৰাচং যোজেত্ৰা অব্ভানং কাতব্বং।
Evaṃ kammavācaṃ katvā mānattaṃ dātabbaṃ. Ciṇṇamānattassa ca imināva nayena kammavācaṃ yojetvā abbhānaṃ kātabbaṃ.
অঞ্ঞস্মিন্তি সুদ্ধন্তপরিৰাসৰসেন আপত্তিৰুট্ঠানতো অঞ্ঞস্মিং। দসসতং আপত্তিযো রত্তিসতং ছাদযিত্ৰাতি যোজেতব্বং।
Aññasminti suddhantaparivāsavasena āpattivuṭṭhānato aññasmiṃ. Dasasataṃ āpattiyo rattisataṃ chādayitvāti yojetabbaṃ.
পরিৰাসকথাৰণ্ণনা নিট্ঠিতা।
Parivāsakathāvaṇṇanā niṭṭhitā.
অত্তনো সীমং সোধেত্ৰা ৰিহারসীমাযাতি ৰিহারে বদ্ধসীমমেৰ সন্ধায ৰুত্তং। ৰিহারূপচারতোপি দ্ৰে লেড্ডুপাতা অতিক্কমিতব্বাতি ভিক্খুৰিহারং সন্ধায ৰদতি গামূপচারাতিক্কমেনেৰ ভিক্খুনীৰিহারূপচারাতিক্কমস্স সিদ্ধত্তা। ৰিহারস্স চাতি ভিক্খুৰিহারস্স। গামস্সাতি ন ৰুত্তন্তি গামস্স উপচারং মুঞ্চিতুং ৰট্টতীতি ন ৰুত্তং, তস্মা গামূপচারেপি ৰট্টতীতি অধিপ্পাযো।
Attano sīmaṃ sodhetvā vihārasīmāyāti vihāre baddhasīmameva sandhāya vuttaṃ. Vihārūpacāratopi dve leḍḍupātā atikkamitabbāti bhikkhuvihāraṃ sandhāya vadati gāmūpacārātikkameneva bhikkhunīvihārūpacārātikkamassa siddhattā. Vihārassa cāti bhikkhuvihārassa. Gāmassāti na vuttanti gāmassa upacāraṃ muñcituṃ vaṭṭatīti na vuttaṃ, tasmā gāmūpacārepi vaṭṭatīti adhippāyo.
তত্থেৰ ঠানং পচ্চাসীসন্তীতি ভিক্খূনং ঠানং পচ্চাসীসন্তি। পরিৰাসৰত্তাদীনন্তি পরিৰাসনিস্সযপটিপ্পস্সদ্ধিআদীনং। যুত্ততরং দিস্সতীতি ইমিনা অনিক্খিত্তৰত্তভিক্খুনা ৰিয ভিক্খুনিযাপি অন্তোউপচারসীমগতানংযেৰ আরোচেতব্বং, ন গামে ঠিতানম্পি গন্ত্ৰা আরোচেতব্বন্তি দীপেতি। তস্মিং গামেতি যস্মিং গামে ভিক্খুনুপস্সযো হোতি, তস্মিং গামে। বহি উপচারসীমায ঠত্ৰাতি উপচারসীমতো বহি ঠত্ৰা। সম্মন্নিত্ৰা দাতব্বাতি এত্থ সম্মন্নিত্ৰা দিন্নায সহৰাসেপি রত্তিচ্ছেদো ন হোতি।
Tattheva ṭhānaṃ paccāsīsantīti bhikkhūnaṃ ṭhānaṃ paccāsīsanti. Parivāsavattādīnanti parivāsanissayapaṭippassaddhiādīnaṃ. Yuttataraṃ dissatīti iminā anikkhittavattabhikkhunā viya bhikkhuniyāpi antoupacārasīmagatānaṃyeva ārocetabbaṃ, na gāme ṭhitānampi gantvā ārocetabbanti dīpeti. Tasmiṃ gāmeti yasmiṃ gāme bhikkhunupassayo hoti, tasmiṃ gāme. Bahi upacārasīmāya ṭhatvāti upacārasīmato bahi ṭhatvā. Sammannitvā dātabbāti ettha sammannitvā dinnāya sahavāsepi ratticchedo na hoti.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi / একাহপ্পটিচ্ছন্নপরিৰাসং • Ekāhappaṭicchannaparivāsaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / পটিচ্ছন্নপরিৰাসকথা • Paṭicchannaparivāsakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পরিৰাসকথাৰণ্ণনা • Parivāsakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পটিচ্ছন্নপরিৰাসকথাৰণ্ণনা • Paṭicchannaparivāsakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / পটিচ্ছন্নপরিৰাসকথা • Paṭicchannaparivāsakathā
