| Library / Tipiṭaka / तिपिटक • Tipiṭaka / महावग्गपाळि • Mahāvaggapāḷi |
२३८. पारिवासिकादिकथा
238. Pārivāsikādikathā
३९३. पारिवासिकचतुत्थो चे, भिक्खवे, परिवासं ददेय्य, मूलाय पटिकस्सेय्य, मानत्तं ददेय्य, तंवीसो अब्भेय्य – अकम्मं न च करणीयं। मूलाय पटिकस्सनारहचतुत्थो चे, भिक्खवे, परिवासं ददेय्य, मूलाय पटिकस्सेय्य, मानत्तं ददेय्य, तंवीसो अब्भेय्य – अकम्मं न च करणीयं। मानत्तारहचतुत्थो चे, भिक्खवे, परिवासं ददेय्य, मूलाय पटिकस्सेय्य, मानत्तं ददेय्य, तंवीसो अब्भेय्य – अकम्मं न च करणीयं। मानत्तचारिकचतुत्थो चे, भिक्खवे, परिवासं ददेय्य, मूलाय पटिकस्सेय्य, मानत्तं ददेय्य, तंवीसो अब्भेय्य – अकम्मं न च करणीयं। अब्भानारहचतुत्थो चे, भिक्खवे, परिवासं ददेय्य, मूलाय पटिकस्सेय्य, मानत्तं ददेय्य, तंवीसो अब्भेय्य – अकम्मं न च करणीयं।
393. Pārivāsikacatuttho ce, bhikkhave, parivāsaṃ dadeyya, mūlāya paṭikasseyya, mānattaṃ dadeyya, taṃvīso abbheyya – akammaṃ na ca karaṇīyaṃ. Mūlāya paṭikassanārahacatuttho ce, bhikkhave, parivāsaṃ dadeyya, mūlāya paṭikasseyya, mānattaṃ dadeyya, taṃvīso abbheyya – akammaṃ na ca karaṇīyaṃ. Mānattārahacatuttho ce, bhikkhave, parivāsaṃ dadeyya, mūlāya paṭikasseyya, mānattaṃ dadeyya, taṃvīso abbheyya – akammaṃ na ca karaṇīyaṃ. Mānattacārikacatuttho ce, bhikkhave, parivāsaṃ dadeyya, mūlāya paṭikasseyya, mānattaṃ dadeyya, taṃvīso abbheyya – akammaṃ na ca karaṇīyaṃ. Abbhānārahacatuttho ce, bhikkhave, parivāsaṃ dadeyya, mūlāya paṭikasseyya, mānattaṃ dadeyya, taṃvīso abbheyya – akammaṃ na ca karaṇīyaṃ.
३९४. एकच्चस्स, भिक्खवे, सङ्घमज्झे पटिक्कोसना रुहति, एकच्चस्स न रुहति। कस्स च, भिक्खवे, सङ्घमज्झे पटिक्कोसना न रुहति? भिक्खुनिया, भिक्खवे, सङ्घमज्झे पटिक्कोसना न रुहति। सिक्खमानाय, भिक्खवे…पे॰… सामणेरस्स, भिक्खवे… सामणेरिया, भिक्खवे… सिक्खापच्चक्खातकस्स भिक्खवे… अन्तिमवत्थुं अज्झापन्नकस्स, भिक्खवे … उम्मत्तकस्स, भिक्खवे… खित्तचित्तस्स, भिक्खवे… वेदनाट्टस्स, भिक्खवे… आपत्तिया अदस्सने उक्खित्तकस्स, भिक्खवे… आपत्तिया अप्पटिकम्मे उक्खित्तकस्स, भिक्खवे… पापिकाय दिट्ठिया अप्पटिनिस्सग्गे उक्खित्तकस्स, भिक्खवे… पण्डकस्स, भिक्खवे… थेय्यसंवासकस्स, भिक्खवे… तित्थियपक्कन्तकस्स, भिक्खवे … तिरच्छानगतस्स भिक्खवे… मातुघातकस्स, भिक्खवे… पितुघातकस्स, भिक्खवे… अरहन्तघातकस्स, भिक्खवे… भिक्खुनिदूसकस्स, भिक्खवे… सङ्घभेदकस्स, भिक्खवे… लोहितुप्पादकस्स, भिक्खवे… उभतोब्यञ्जनकस्स, भिक्खवे… नानासंवासकस्स, भिक्खवे… नानासीमाय ठितस्स, भिक्खवे… इद्धिया वेहासे ठितस्स, भिक्खवे, यस्स सङ्घो कम्मं करोति, तस्स च 1, भिक्खवे, सङ्घमज्झे पटिक्कोसना न रुहति। इमेसं खो, भिक्खवे, सङ्घमज्झे पटिक्कोसना न रुहति।
394. Ekaccassa, bhikkhave, saṅghamajjhe paṭikkosanā ruhati, ekaccassa na ruhati. Kassa ca, bhikkhave, saṅghamajjhe paṭikkosanā na ruhati? Bhikkhuniyā, bhikkhave, saṅghamajjhe paṭikkosanā na ruhati. Sikkhamānāya, bhikkhave…pe… sāmaṇerassa, bhikkhave… sāmaṇeriyā, bhikkhave… sikkhāpaccakkhātakassa bhikkhave… antimavatthuṃ ajjhāpannakassa, bhikkhave … ummattakassa, bhikkhave… khittacittassa, bhikkhave… vedanāṭṭassa, bhikkhave… āpattiyā adassane ukkhittakassa, bhikkhave… āpattiyā appaṭikamme ukkhittakassa, bhikkhave… pāpikāya diṭṭhiyā appaṭinissagge ukkhittakassa, bhikkhave… paṇḍakassa, bhikkhave… theyyasaṃvāsakassa, bhikkhave… titthiyapakkantakassa, bhikkhave … tiracchānagatassa bhikkhave… mātughātakassa, bhikkhave… pitughātakassa, bhikkhave… arahantaghātakassa, bhikkhave… bhikkhunidūsakassa, bhikkhave… saṅghabhedakassa, bhikkhave… lohituppādakassa, bhikkhave… ubhatobyañjanakassa, bhikkhave… nānāsaṃvāsakassa, bhikkhave… nānāsīmāya ṭhitassa, bhikkhave… iddhiyā vehāse ṭhitassa, bhikkhave, yassa saṅgho kammaṃ karoti, tassa ca 2, bhikkhave, saṅghamajjhe paṭikkosanā na ruhati. Imesaṃ kho, bhikkhave, saṅghamajjhe paṭikkosanā na ruhati.
कस्स च, भिक्खवे, सङ्घमज्झे पटिक्कोसना रुहति? भिक्खुस्स, भिक्खवे, पकतत्तस्स
Kassa ca, bhikkhave, saṅghamajjhe paṭikkosanā ruhati? Bhikkhussa, bhikkhave, pakatattassa
समानसंवासकस्स समानसीमाय ठितस्स अन्तमसो आनन्तरिकस्सापि 3 भिक्खुनो विञ्ञापेन्तस्स सङ्घमज्झे पटिक्कोसना रुहति। इमस्स खो, भिक्खवे, सङ्घमज्झे पटिक्कोसना रुहति।
Samānasaṃvāsakassa samānasīmāya ṭhitassa antamaso ānantarikassāpi 4 bhikkhuno viññāpentassa saṅghamajjhe paṭikkosanā ruhati. Imassa kho, bhikkhave, saṅghamajjhe paṭikkosanā ruhati.
पारिवासिकादिकथा निट्ठिता।
Pārivāsikādikathā niṭṭhitā.
Footnotes:
Related texts:
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / महावग्ग-अट्ठकथा • Mahāvagga-aṭṭhakathā / चतुवग्गकरणादिकथा • Catuvaggakaraṇādikathā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi / २३७. चतुवग्गकरणादिकथा • 237. Catuvaggakaraṇādikathā
