| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၂၃၈. ပာရိဝာသိကာဒိကထာ
238. Pārivāsikādikathā
၃၉၃. ပာရိဝာသိကစတုတ္ထော စေ, ဘိက္ခဝေ, ပရိဝာသံ ဒဒေယ္ယ, မူလာယ ပဋိကသ္သေယ္ယ, မာနတ္တံ ဒဒေယ္ယ, တံဝီသော အဗ္ဘေယ္ယ – အကမ္မံ န စ ကရဏီယံ။ မူလာယ ပဋိကသ္သနာရဟစတုတ္ထော စေ, ဘိက္ခဝေ, ပရိဝာသံ ဒဒေယ္ယ, မူလာယ ပဋိကသ္သေယ္ယ, မာနတ္တံ ဒဒေယ္ယ, တံဝီသော အဗ္ဘေယ္ယ – အကမ္မံ န စ ကရဏီယံ။ မာနတ္တာရဟစတုတ္ထော စေ, ဘိက္ခဝေ, ပရိဝာသံ ဒဒေယ္ယ, မူလာယ ပဋိကသ္သေယ္ယ, မာနတ္တံ ဒဒေယ္ယ, တံဝီသော အဗ္ဘေယ္ယ – အကမ္မံ န စ ကရဏီယံ။ မာနတ္တစာရိကစတုတ္ထော စေ, ဘိက္ခဝေ, ပရိဝာသံ ဒဒေယ္ယ, မူလာယ ပဋိကသ္သေယ္ယ, မာနတ္တံ ဒဒေယ္ယ, တံဝီသော အဗ္ဘေယ္ယ – အကမ္မံ န စ ကရဏီယံ။ အဗ္ဘာနာရဟစတုတ္ထော စေ, ဘိက္ခဝေ, ပရိဝာသံ ဒဒေယ္ယ, မူလာယ ပဋိကသ္သေယ္ယ, မာနတ္တံ ဒဒေယ္ယ, တံဝီသော အဗ္ဘေယ္ယ – အကမ္မံ န စ ကရဏီယံ။
393. Pārivāsikacatuttho ce, bhikkhave, parivāsaṃ dadeyya, mūlāya paṭikasseyya, mānattaṃ dadeyya, taṃvīso abbheyya – akammaṃ na ca karaṇīyaṃ. Mūlāya paṭikassanārahacatuttho ce, bhikkhave, parivāsaṃ dadeyya, mūlāya paṭikasseyya, mānattaṃ dadeyya, taṃvīso abbheyya – akammaṃ na ca karaṇīyaṃ. Mānattārahacatuttho ce, bhikkhave, parivāsaṃ dadeyya, mūlāya paṭikasseyya, mānattaṃ dadeyya, taṃvīso abbheyya – akammaṃ na ca karaṇīyaṃ. Mānattacārikacatuttho ce, bhikkhave, parivāsaṃ dadeyya, mūlāya paṭikasseyya, mānattaṃ dadeyya, taṃvīso abbheyya – akammaṃ na ca karaṇīyaṃ. Abbhānārahacatuttho ce, bhikkhave, parivāsaṃ dadeyya, mūlāya paṭikasseyya, mānattaṃ dadeyya, taṃvīso abbheyya – akammaṃ na ca karaṇīyaṃ.
၃၉၄. ဧကစ္စသ္သ, ဘိက္ခဝေ, သင္ဃမဇ္ဈေ ပဋိက္ကောသနာ ရုဟတိ, ဧကစ္စသ္သ န ရုဟတိ။ ကသ္သ စ, ဘိက္ခဝေ, သင္ဃမဇ္ဈေ ပဋိက္ကောသနာ န ရုဟတိ? ဘိက္ခုနိယာ, ဘိက္ခဝေ, သင္ဃမဇ္ဈေ ပဋိက္ကောသနာ န ရုဟတိ။ သိက္ခမာနာယ, ဘိက္ခဝေ။ပေ.။ သာမဏေရသ္သ, ဘိက္ခဝေ။ သာမဏေရိယာ, ဘိက္ခဝေ။ သိက္ခာပစ္စက္ခာတကသ္သ ဘိက္ခဝေ။ အန္တိမဝတ္ထုံ အဇ္ဈာပန္နကသ္သ, ဘိက္ခဝေ ။ ဥမ္မတ္တကသ္သ, ဘိက္ခဝေ။ ခိတ္တစိတ္တသ္သ, ဘိက္ခဝေ။ ဝေဒနာဋ္ဋသ္သ, ဘိက္ခဝေ။ အာပတ္တိယာ အဒသ္သနေ ဥက္ခိတ္တကသ္သ, ဘိက္ခဝေ။ အာပတ္တိယာ အပ္ပဋိကမ္မေ ဥက္ခိတ္တကသ္သ, ဘိက္ခဝေ။ ပာပိကာယ ဒိဋ္ဌိယာ အပ္ပဋိနိသ္သဂ္ဂေ ဥက္ခိတ္တကသ္သ, ဘိက္ခဝေ။ ပဏ္ဍကသ္သ, ဘိက္ခဝေ။ ထေယ္ယသံဝာသကသ္သ, ဘိက္ခဝေ။ တိတ္ထိယပက္ကန္တကသ္သ, ဘိက္ခဝေ ။ တိရစ္ဆာနဂတသ္သ ဘိက္ခဝေ။ မာတုဃာတကသ္သ, ဘိက္ခဝေ။ ပိတုဃာတကသ္သ, ဘိက္ခဝေ။ အရဟန္တဃာတကသ္သ, ဘိက္ခဝေ။ ဘိက္ခုနိဒူသကသ္သ, ဘိက္ခဝေ။ သင္ဃဘေဒကသ္သ, ဘိက္ခဝေ။ လောဟိတုပ္ပာဒကသ္သ, ဘိက္ခဝေ။ ဥဘတောဗ္ယဉ္ဇနကသ္သ, ဘိက္ခဝေ။ နာနာသံဝာသကသ္သ, ဘိက္ခဝေ။ နာနာသီမာယ ဌိတသ္သ, ဘိက္ခဝေ။ ဣဒ္ဓိယာ ဝေဟာသေ ဌိတသ္သ, ဘိက္ခဝေ, ယသ္သ သင္ဃော ကမ္မံ ကရောတိ, တသ္သ စ 1, ဘိက္ခဝေ, သင္ဃမဇ္ဈေ ပဋိက္ကောသနာ န ရုဟတိ။ ဣမေသံ ခော, ဘိက္ခဝေ, သင္ဃမဇ္ဈေ ပဋိက္ကောသနာ န ရုဟတိ။
394. Ekaccassa, bhikkhave, saṅghamajjhe paṭikkosanā ruhati, ekaccassa na ruhati. Kassa ca, bhikkhave, saṅghamajjhe paṭikkosanā na ruhati? Bhikkhuniyā, bhikkhave, saṅghamajjhe paṭikkosanā na ruhati. Sikkhamānāya, bhikkhave…pe… sāmaṇerassa, bhikkhave… sāmaṇeriyā, bhikkhave… sikkhāpaccakkhātakassa bhikkhave… antimavatthuṃ ajjhāpannakassa, bhikkhave … ummattakassa, bhikkhave… khittacittassa, bhikkhave… vedanāṭṭassa, bhikkhave… āpattiyā adassane ukkhittakassa, bhikkhave… āpattiyā appaṭikamme ukkhittakassa, bhikkhave… pāpikāya diṭṭhiyā appaṭinissagge ukkhittakassa, bhikkhave… paṇḍakassa, bhikkhave… theyyasaṃvāsakassa, bhikkhave… titthiyapakkantakassa, bhikkhave … tiracchānagatassa bhikkhave… mātughātakassa, bhikkhave… pitughātakassa, bhikkhave… arahantaghātakassa, bhikkhave… bhikkhunidūsakassa, bhikkhave… saṅghabhedakassa, bhikkhave… lohituppādakassa, bhikkhave… ubhatobyañjanakassa, bhikkhave… nānāsaṃvāsakassa, bhikkhave… nānāsīmāya ṭhitassa, bhikkhave… iddhiyā vehāse ṭhitassa, bhikkhave, yassa saṅgho kammaṃ karoti, tassa ca 2, bhikkhave, saṅghamajjhe paṭikkosanā na ruhati. Imesaṃ kho, bhikkhave, saṅghamajjhe paṭikkosanā na ruhati.
ကသ္သ စ, ဘိက္ခဝေ, သင္ဃမဇ္ဈေ ပဋိက္ကောသနာ ရုဟတိ? ဘိက္ခုသ္သ, ဘိက္ခဝေ, ပကတတ္တသ္သ
Kassa ca, bhikkhave, saṅghamajjhe paṭikkosanā ruhati? Bhikkhussa, bhikkhave, pakatattassa
သမာနသံဝာသကသ္သ သမာနသီမာယ ဌိတသ္သ အန္တမသော အာနန္တရိကသ္သာပိ 3 ဘိက္ခုနော ဝိညာပေန္တသ္သ သင္ဃမဇ္ဈေ ပဋိက္ကောသနာ ရုဟတိ။ ဣမသ္သ ခော, ဘိက္ခဝေ, သင္ဃမဇ္ဈေ ပဋိက္ကောသနာ ရုဟတိ။
Samānasaṃvāsakassa samānasīmāya ṭhitassa antamaso ānantarikassāpi 4 bhikkhuno viññāpentassa saṅghamajjhe paṭikkosanā ruhati. Imassa kho, bhikkhave, saṅghamajjhe paṭikkosanā ruhati.
ပာရိဝာသိကာဒိကထာ နိဋ္ဌိတာ။
Pārivāsikādikathā niṭṭhitā.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / စတုဝဂ္ဂကရဏာဒိကထာ • Catuvaggakaraṇādikathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၂၃၇. စတုဝဂ္ဂကရဏာဒိကထာ • 237. Catuvaggakaraṇādikathā
