| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
238. පාරිවාසිකාදිකථා
238. Pārivāsikādikathā
393. පාරිවාසිකචතුත්‌ථො චෙ, භික්‌ඛවෙ, පරිවාසං දදෙය්‍ය, මූලාය පටිකස්‌සෙය්‍ය, මානත්‌තං දදෙය්‍ය, තංවීසො අබ්‌භෙය්‍ය – අකම්‌මං න ච කරණීයං. මූලාය පටිකස්‌සනාරහචතුත්‌ථො චෙ, භික්‌ඛවෙ, පරිවාසං දදෙය්‍ය, මූලාය පටිකස්‌සෙය්‍ය, මානත්‌තං දදෙය්‍ය, තංවීසො අබ්‌භෙය්‍ය – අකම්‌මං න ච කරණීයං. මානත්‌තාරහචතුත්‌ථො චෙ, භික්‌ඛවෙ, පරිවාසං දදෙය්‍ය, මූලාය පටිකස්‌සෙය්‍ය, මානත්‌තං දදෙය්‍ය, තංවීසො අබ්‌භෙය්‍ය – අකම්‌මං න ච කරණීයං. මානත්‌තචාරිකචතුත්‌ථො චෙ, භික්‌ඛවෙ, පරිවාසං දදෙය්‍ය, මූලාය පටිකස්‌සෙය්‍ය, මානත්‌තං දදෙය්‍ය, තංවීසො අබ්‌භෙය්‍ය – අකම්‌මං න ච කරණීයං. අබ්‌භානාරහචතුත්‌ථො චෙ, භික්‌ඛවෙ, පරිවාසං දදෙය්‍ය, මූලාය පටිකස්‌සෙය්‍ය, මානත්‌තං දදෙය්‍ය, තංවීසො අබ්‌භෙය්‍ය – අකම්‌මං න ච කරණීයං.
393. Pārivāsikacatuttho ce, bhikkhave, parivāsaṃ dadeyya, mūlāya paṭikasseyya, mānattaṃ dadeyya, taṃvīso abbheyya – akammaṃ na ca karaṇīyaṃ. Mūlāya paṭikassanārahacatuttho ce, bhikkhave, parivāsaṃ dadeyya, mūlāya paṭikasseyya, mānattaṃ dadeyya, taṃvīso abbheyya – akammaṃ na ca karaṇīyaṃ. Mānattārahacatuttho ce, bhikkhave, parivāsaṃ dadeyya, mūlāya paṭikasseyya, mānattaṃ dadeyya, taṃvīso abbheyya – akammaṃ na ca karaṇīyaṃ. Mānattacārikacatuttho ce, bhikkhave, parivāsaṃ dadeyya, mūlāya paṭikasseyya, mānattaṃ dadeyya, taṃvīso abbheyya – akammaṃ na ca karaṇīyaṃ. Abbhānārahacatuttho ce, bhikkhave, parivāsaṃ dadeyya, mūlāya paṭikasseyya, mānattaṃ dadeyya, taṃvīso abbheyya – akammaṃ na ca karaṇīyaṃ.
394. එකච්‌චස්‌ස, භික්‌ඛවෙ, සඞ්‌ඝමජ්‌ඣෙ පටික්‌කොසනා රුහති, එකච්‌චස්‌ස න රුහති. කස්‌ස ච, භික්‌ඛවෙ, සඞ්‌ඝමජ්‌ඣෙ පටික්‌කොසනා න රුහති? භික්‌ඛුනියා, භික්‌ඛවෙ, සඞ්‌ඝමජ්‌ඣෙ පටික්‌කොසනා න රුහති. සික්‌ඛමානාය, භික්‌ඛවෙ…පෙ.… සාමණෙරස්‌ස, භික්‌ඛවෙ… සාමණෙරියා, භික්‌ඛවෙ… සික්‌ඛාපච්‌චක්‌ඛාතකස්‌ස භික්‌ඛවෙ… අන්‌තිමවත්‌ථුං අජ්‌ඣාපන්‌නකස්‌ස, භික්‌ඛවෙ … උම්‌මත්‌තකස්‌ස, භික්‌ඛවෙ… ඛිත්‌තචිත්‌තස්‌ස, භික්‌ඛවෙ… වෙදනාට්‌ටස්‌ස, භික්‌ඛවෙ… ආපත්‌තියා අදස්‌සනෙ උක්‌ඛිත්‌තකස්‌ස, භික්‌ඛවෙ… ආපත්‌තියා අප්‌පටිකම්‌මෙ උක්‌ඛිත්‌තකස්‌ස, භික්‌ඛවෙ… පාපිකාය දිට්‌ඨියා අප්‌පටිනිස්‌සග්‌ගෙ උක්‌ඛිත්‌තකස්‌ස, භික්‌ඛවෙ… පණ්‌ඩකස්‌ස, භික්‌ඛවෙ… ථෙය්‍යසංවාසකස්‌ස, භික්‌ඛවෙ… තිත්‌ථියපක්‌කන්‌තකස්‌ස, භික්‌ඛවෙ … තිරච්‌ඡානගතස්‌ස භික්‌ඛවෙ… මාතුඝාතකස්‌ස, භික්‌ඛවෙ… පිතුඝාතකස්‌ස, භික්‌ඛවෙ… අරහන්‌තඝාතකස්‌ස, භික්‌ඛවෙ… භික්‌ඛුනිදූසකස්‌ස, භික්‌ඛවෙ… සඞ්‌ඝභෙදකස්‌ස, භික්‌ඛවෙ… ලොහිතුප්‌පාදකස්‌ස, භික්‌ඛවෙ… උභතොබ්‍යඤ්‌ජනකස්‌ස, භික්‌ඛවෙ… නානාසංවාසකස්‌ස, භික්‌ඛවෙ… නානාසීමාය ඨිතස්‌ස, භික්‌ඛවෙ… ඉද්‌ධියා වෙහාසෙ ඨිතස්‌ස, භික්‌ඛවෙ, යස්‌ස සඞ්‌ඝො කම්‌මං කරොති, තස්‌ස ච 1, භික්‌ඛවෙ, සඞ්‌ඝමජ්‌ඣෙ පටික්‌කොසනා න රුහති. ඉමෙසං ඛො, භික්‌ඛවෙ, සඞ්‌ඝමජ්‌ඣෙ පටික්‌කොසනා න රුහති.
394. Ekaccassa, bhikkhave, saṅghamajjhe paṭikkosanā ruhati, ekaccassa na ruhati. Kassa ca, bhikkhave, saṅghamajjhe paṭikkosanā na ruhati? Bhikkhuniyā, bhikkhave, saṅghamajjhe paṭikkosanā na ruhati. Sikkhamānāya, bhikkhave…pe… sāmaṇerassa, bhikkhave… sāmaṇeriyā, bhikkhave… sikkhāpaccakkhātakassa bhikkhave… antimavatthuṃ ajjhāpannakassa, bhikkhave … ummattakassa, bhikkhave… khittacittassa, bhikkhave… vedanāṭṭassa, bhikkhave… āpattiyā adassane ukkhittakassa, bhikkhave… āpattiyā appaṭikamme ukkhittakassa, bhikkhave… pāpikāya diṭṭhiyā appaṭinissagge ukkhittakassa, bhikkhave… paṇḍakassa, bhikkhave… theyyasaṃvāsakassa, bhikkhave… titthiyapakkantakassa, bhikkhave … tiracchānagatassa bhikkhave… mātughātakassa, bhikkhave… pitughātakassa, bhikkhave… arahantaghātakassa, bhikkhave… bhikkhunidūsakassa, bhikkhave… saṅghabhedakassa, bhikkhave… lohituppādakassa, bhikkhave… ubhatobyañjanakassa, bhikkhave… nānāsaṃvāsakassa, bhikkhave… nānāsīmāya ṭhitassa, bhikkhave… iddhiyā vehāse ṭhitassa, bhikkhave, yassa saṅgho kammaṃ karoti, tassa ca 2, bhikkhave, saṅghamajjhe paṭikkosanā na ruhati. Imesaṃ kho, bhikkhave, saṅghamajjhe paṭikkosanā na ruhati.
කස්‌ස ච, භික්‌ඛවෙ, සඞ්‌ඝමජ්‌ඣෙ පටික්‌කොසනා රුහති? භික්‌ඛුස්‌ස, භික්‌ඛවෙ, පකතත්‌තස්‌ස
Kassa ca, bhikkhave, saṅghamajjhe paṭikkosanā ruhati? Bhikkhussa, bhikkhave, pakatattassa
සමානසංවාසකස්‌ස සමානසීමාය ඨිතස්‌ස අන්‌තමසො ආනන්‌තරිකස්‌සාපි 3 භික්‌ඛුනො විඤ්‌ඤාපෙන්‌තස්‌ස සඞ්‌ඝමජ්‌ඣෙ පටික්‌කොසනා රුහති. ඉමස්‌ස ඛො, භික්‌ඛවෙ, සඞ්‌ඝමජ්‌ඣෙ පටික්‌කොසනා රුහති.
Samānasaṃvāsakassa samānasīmāya ṭhitassa antamaso ānantarikassāpi 4 bhikkhuno viññāpentassa saṅghamajjhe paṭikkosanā ruhati. Imassa kho, bhikkhave, saṅghamajjhe paṭikkosanā ruhati.
පාරිවාසිකාදිකථා නිට්‌ඨිතා.
Pārivāsikādikathā niṭṭhitā.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / චතුවග්‌ගකරණාදිකථා • Catuvaggakaraṇādikathā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 237. චතුවග්‌ගකරණාදිකථා • 237. Catuvaggakaraṇādikathā
