| Library / Tipiṭaka / д̇ибидага • Tipiṭaka / жуул̣аваг̇г̇а-адтагат̇аа • Cūḷavagga-aṭṭhakathā |
2. баариваасигагканд̇хагам̣
2. Pārivāsikakkhandhakaṃ
баариваасигавад̇д̇агат̇аа
Pārivāsikavattakathā
75. баариваасигагканд̇хагз – баариваасигаад̇и бариваасам̣ баривасанд̇аа. д̇ад̇т̇а жад̇уб̣б̣ид̇хо бариваасо – аббадижчаннабариваасо, бадижчаннабариваасо, суд̣̇д̇ханд̇абариваасо, самод̇хаанабариваасод̇и. д̇зсу ‘‘яо, бхигкавз, ан̃н̃оби ан̃н̃ад̇ид̇т̇ияабуб̣б̣о имасмим̣ д̇хаммавинаяз ааган̇кад̇и баб̣б̣аж̇ж̇ам̣, ааган̇кад̇и убасамбад̣̇ам̣, д̇асса жад̇д̇ааро маасз бариваасо д̣̇аад̇аб̣б̣о’’д̇и (махаава. 86) звам̣ махааканд̇хагз вуд̇д̇о д̇ид̇т̇ияабариваасо аббадижчаннабариваасо наама. д̇ад̇т̇а яам̣ вад̇д̇аб̣б̣ам̣ д̇ам̣ вуд̇д̇амзва. аяам̣ бана ид̇ха анад̇хиббзд̇о. сзсаа д̇аяо язна сан̇гхаад̣̇исзсаабад̇д̇и аабаннаа жзва ход̇и бадижчаад̣̇ид̇аа жа, д̇асса д̣̇аад̇аб̣б̣аа. д̇зсу яам̣ вад̇д̇аб̣б̣ам̣ д̇ам̣ самужжаяагканд̇хагз вагкаама. зд̇з бана ид̇ха ад̇хиббзд̇аа. д̇асмаа зд̇зсу яам̣гин̃жи бариваасам̣ баривасанд̇аа ‘‘баариваасигаа’’д̇и взд̣̇ид̇аб̣б̣аа.
75. Pārivāsikakkhandhake – pārivāsikāti parivāsaṃ parivasantā. Tattha catubbidho parivāso – appaṭicchannaparivāso, paṭicchannaparivāso, suddhantaparivāso, samodhānaparivāsoti. Tesu ‘‘yo, bhikkhave, aññopi aññatitthiyapubbo imasmiṃ dhammavinaye ākaṅkhati pabbajjaṃ, ākaṅkhati upasampadaṃ, tassa cattāro māse parivāso dātabbo’’ti (mahāva. 86) evaṃ mahākhandhake vutto titthiyaparivāso appaṭicchannaparivāso nāma. Tattha yaṃ vattabbaṃ taṃ vuttameva. Ayaṃ pana idha anadhippeto. Sesā tayo yena saṅghādisesāpatti āpannā ceva hoti paṭicchāditā ca, tassa dātabbā. Tesu yaṃ vattabbaṃ taṃ samuccayakkhandhake vakkhāma. Ete pana idha adhippetā. Tasmā etesu yaṃkiñci parivāsaṃ parivasantā ‘‘pārivāsikā’’ti veditabbā.
багад̇ад̇д̇аанам̣ бхигкуунанд̇и табзд̇ваа навагад̇арам̣ баариваасигам̣ авасзсаанам̣ анд̇амасо муулааяабадигассанаарахаад̣̇ийнамби. абхиваад̣̇анабажжудтаананд̇и яам̣ д̇з абхиваад̣̇анаад̣̇им̣ гаронд̇и, д̇ам̣ саад̣̇ияанд̇и, самбадижчанд̇и; на бадигкибанд̇ийд̇и ад̇т̇о. д̇ад̇т̇а саамийжигамманд̇и табзд̇ваа абхиваад̣̇анаад̣̇ийни ан̃н̃асса анужчавигасса б̣ийж̇анаваад̇ад̣̇аанаад̣̇ино аабхисамаажааригассзд̇ам̣ ад̇хиважанам̣. аасанаабхихааранд̇и аасанасса абхихаран̣ам̣, аасанам̣ г̇ахзд̇ваа абхиг̇аманам̣ бан̃н̃аабанамзва ваа. сзяяаабхихаарзби зсзва наяо. баад̣̇од̣̇аганд̇и баад̣̇ад̇хованауд̣̇агам̣. баад̣̇абийтанд̇и д̇ход̇абаад̣̇адтабанагам̣. баад̣̇агат̇алиганд̇и ад̇ход̇абаад̣̇адтабанагам̣ баад̣̇агхам̣санам̣ ваа. аабад̇д̇и д̣̇уггадассаад̇и сад̣̇д̇хивихааригаанамби саад̣̇ияанд̇асса д̣̇уггадамзва, д̇асмаа д̇з вад̇д̇аб̣б̣аа – ‘‘ахам̣ винаяагаммам̣ гароми, маяхам̣ вад̇д̇ам̣ маа гарот̇а, маа мам̣ г̇аамаббавзсанам̣ аабужчат̇аа’’д̇и. сажз сад̣̇д̇хаабаб̣б̣аж̇ид̇аа гулабуд̇д̇аа ‘‘д̇умхз, бханд̇з, д̇умхаагам̣ винаяагаммам̣ гарот̇аа’’д̇и вад̇ваа вад̇д̇ам̣ гаронд̇и, г̇аамаббавзсанамби аабужчанд̇иязва, ваарид̇агаалад̇о бадтааяа анаабад̇д̇и. мит̇у яат̇аавуд̣дханд̇и баариваасигабхигкуунам̣ ан̃н̃аман̃н̃ам̣ яо яо вуд̣дхо д̇зна д̇зна навагад̇арасса саад̣̇ид̇ум̣.
Pakatattānaṃ bhikkhūnanti ṭhapetvā navakataraṃ pārivāsikaṃ avasesānaṃ antamaso mūlāyapaṭikassanārahādīnampi. Abhivādanapaccuṭṭhānanti yaṃ te abhivādanādiṃ karonti, taṃ sādiyanti, sampaṭicchanti; na paṭikkhipantīti attho. Tattha sāmīcikammanti ṭhapetvā abhivādanādīni aññassa anucchavikassa bījanavātadānādino ābhisamācārikassetaṃ adhivacanaṃ. Āsanābhihāranti āsanassa abhiharaṇaṃ, āsanaṃ gahetvā abhigamanaṃ paññāpanameva vā. Seyyābhihārepi eseva nayo. Pādodakanti pādadhovanaudakaṃ. Pādapīṭhanti dhotapādaṭṭhapanakaṃ. Pādakathalikanti adhotapādaṭṭhapanakaṃ pādaghaṃsanaṃ vā. Āpatti dukkaṭassāti saddhivihārikānampi sādiyantassa dukkaṭameva, tasmā te vattabbā – ‘‘ahaṃ vinayakammaṃ karomi, mayhaṃ vattaṃ mā karotha, mā maṃ gāmappavesanaṃ āpucchathā’’ti. Sace saddhāpabbajitā kulaputtā ‘‘tumhe, bhante, tumhākaṃ vinayakammaṃ karothā’’ti vatvā vattaṃ karonti, gāmappavesanampi āpucchantiyeva, vāritakālato paṭṭhāya anāpatti. Mithu yathāvuḍḍhanti pārivāsikabhikkhūnaṃ aññamaññaṃ yo yo vuḍḍho tena tena navakatarassa sādituṃ.
бан̃жа яат̇аавуд̣дханд̇и багад̇ад̇д̇зхиби сад̣̇д̇хим̣ вуд̣дхабадибаадияаа зва. д̇асмаа баад̇имогкз уд̣̇д̣̇иссамаанз хад̇т̇абаасз нисийд̣̇ид̇ум̣ ваддад̇и. махаабажжарияам̣ бана ‘‘баал̣ияаа анисийд̣̇ид̇ваа баал̣им̣ вихааяа хад̇т̇абаасам̣ амун̃жанд̇зна нисийд̣̇ид̇аб̣б̣а’’нд̇и вуд̇д̇ам̣. баарисуд̣̇д̇хиубосат̇з гарийяамаанз сан̇гханавагадтаанз нисийд̣̇ид̇ваа д̇ад̇т̇зва нисиннзна ад̇д̇ано баал̣ияаа баарисуд̣̇д̇хиубосат̇о гаад̇аб̣б̣о. бавааран̣ааяаби сан̇гханавагадтаанз нисийд̣̇ид̇ваа д̇ад̇т̇зва нисиннзна ад̇д̇ано баал̣ияаа баваарзд̇аб̣б̣ам̣. сан̇гхзна гхан̣дим̣ бахарид̇ваа бхааж̇ийяамаанам̣ вассигасаадигамби ад̇д̇ано бад̇д̇адтаанз г̇ахзд̇ум̣ ваддад̇и.
Pañcayathāvuḍḍhanti pakatattehipi saddhiṃ vuḍḍhapaṭipāṭiyā eva. Tasmā pātimokkhe uddissamāne hatthapāse nisīdituṃ vaṭṭati. Mahāpaccariyaṃ pana ‘‘pāḷiyā anisīditvā pāḷiṃ vihāya hatthapāsaṃ amuñcantena nisīditabba’’nti vuttaṃ. Pārisuddhiuposathe karīyamāne saṅghanavakaṭṭhāne nisīditvā tattheva nisinnena attano pāḷiyā pārisuddhiuposatho kātabbo. Pavāraṇāyapi saṅghanavakaṭṭhāne nisīditvā tattheva nisinnena attano pāḷiyā pavāretabbaṃ. Saṅghena ghaṇṭiṃ paharitvā bhājīyamānaṃ vassikasāṭikampi attano pattaṭṭhāne gahetuṃ vaṭṭati.
он̣ож̇ананд̇и виссаж̇ж̇анам̣ вужжад̇и. сажз хи баариваасигасса д̣̇вз д̇ийн̣и уд̣̇д̣̇зсабхад̇д̇аад̣̇ийни баабун̣анд̇и, ан̃н̃аа жасса буг̇г̇алигабхад̇д̇абажжаасаа ход̇и, д̇аани бадибаадияаа г̇ахзд̇ваа ‘‘бханд̇з, хздтаа г̇аахзт̇а, аж̇ж̇а маяхам̣ бхад̇д̇абажжаасаа ад̇т̇и, свз г̇ан̣хиссаамий’’д̇и вад̇ваа виссаж̇ж̇зд̇аб̣б̣аани. звам̣ д̇аани бунад̣̇ивасзсу г̇ан̣хид̇ум̣ лабхад̇и. бунад̣̇ивасз саб̣б̣абатамам̣ зд̇асса д̣̇аад̇аб̣б̣анд̇и гурунд̣̇ияам̣ вуд̇д̇ам̣. яад̣̇и бана на г̇ан̣хаад̇и на виссаж̇ж̇зд̇и, бунад̣̇ивасз на лабхад̇и, ид̣̇ам̣ он̣ож̇анам̣ наама баариваасигассзва од̣̇исса анун̃н̃аад̇ам̣. гасмаа? д̇асса хи сан̇гханавагадтаанз нисиннасса бхад̇д̇аг̇г̇з яааг̇укаж̇ж̇агаад̣̇ийни баабун̣анд̇и ваа на ваа, д̇асмаа со ‘‘бхигкаахаарзна маа гиламид̇т̇аа’’д̇и ид̣̇амасса сан̇г̇ахагаран̣ад̇т̇ааяа од̣̇исса анун̃н̃аад̇ам̣.
Oṇojananti vissajjanaṃ vuccati. Sace hi pārivāsikassa dve tīṇi uddesabhattādīni pāpuṇanti, aññā cassa puggalikabhattapaccāsā hoti, tāni paṭipāṭiyā gahetvā ‘‘bhante, heṭṭhā gāhetha, ajja mayhaṃ bhattapaccāsā atthi, sve gaṇhissāmī’’ti vatvā vissajjetabbāni. Evaṃ tāni punadivasesu gaṇhituṃ labhati. Punadivase sabbapaṭhamaṃ etassa dātabbanti kurundiyaṃ vuttaṃ. Yadi pana na gaṇhāti na vissajjeti, punadivase na labhati, idaṃ oṇojanaṃ nāma pārivāsikasseva odissa anuññātaṃ. Kasmā? Tassa hi saṅghanavakaṭṭhāne nisinnassa bhattagge yāgukhajjakādīni pāpuṇanti vā na vā, tasmā so ‘‘bhikkhāhārena mā kilamitthā’’ti idamassa saṅgahakaraṇatthāya odissa anuññātaṃ.
бхад̇д̇анд̇и ааг̇ад̇ааг̇ад̇зхи вуд̣дхабадибаадияаа г̇ахзд̇ваа г̇анд̇аб̣б̣ам̣ вихаарз сан̇гхасса жад̇уссаалабхад̇д̇ам̣, зд̇ам̣ яат̇аавуд̣дхам̣ лабхад̇и. баал̣ияаа бана г̇анд̇ум̣ ваа таад̇ум̣ ваа на лабхад̇и, д̇асмаа баал̣ид̇о осаггид̇ваа хад̇т̇абаасз тид̇зна хад̇т̇ам̣ басаарзд̇ваа яат̇аа сзно нибад̇ид̇ваа г̇ан̣хаад̇и, звам̣ г̇ан̣хид̇аб̣б̣ам̣. аараамигасаман̣уд̣̇д̣̇зсзхи аахараабзд̇ум̣ на лабхад̇и. сажз саяамзва аахаранд̇и, ваддад̇и. ран̃н̃о махаабзл̣абхад̇д̇зби зсзва наяо. жад̇уссаалабхад̇д̇з бана сажз он̣ож̇анам̣ гад̇д̇угаамо ход̇и, ад̇д̇ано ад̇т̇ааяа угкид̇д̇з бин̣д̣з ‘‘аж̇ж̇а мз бхад̇д̇ам̣ ад̇т̇и, свз г̇ан̣хиссаамий’’д̇и вад̇д̇аб̣б̣ам̣. бунад̣̇ивасз д̣̇вз бин̣д̣з лабхад̇ийд̇и махаабажжарияам̣ вуд̇д̇ам̣. уд̣̇д̣̇зсабхад̇д̇аад̣̇ийниби баал̣ид̇о осаггид̇ваава г̇ахзд̇аб̣б̣аани. яад̇т̇а бана нисийд̣̇аабзд̇ваа баривисанд̇и, д̇ад̇т̇а сааман̣зраанам̣ ж̇здтагзна бхигкуунам̣ сан̇гханавагзна худ̇ваа нисийд̣̇ид̇аб̣б̣ам̣.
Bhattanti āgatāgatehi vuḍḍhapaṭipāṭiyā gahetvā gantabbaṃ vihāre saṅghassa catussālabhattaṃ, etaṃ yathāvuḍḍhaṃ labhati. Pāḷiyā pana gantuṃ vā ṭhātuṃ vā na labhati, tasmā pāḷito osakkitvā hatthapāse ṭhitena hatthaṃ pasāretvā yathā seno nipatitvā gaṇhāti, evaṃ gaṇhitabbaṃ. Ārāmikasamaṇuddesehi āharāpetuṃ na labhati. Sace sayameva āharanti, vaṭṭati. Rañño mahāpeḷabhattepi eseva nayo. Catussālabhatte pana sace oṇojanaṃ kattukāmo hoti, attano atthāya ukkhitte piṇḍe ‘‘ajja me bhattaṃ atthi, sve gaṇhissāmī’’ti vattabbaṃ. Punadivase dve piṇḍe labhatīti mahāpaccariyaṃ vuttaṃ. Uddesabhattādīnipi pāḷito osakkitvāva gahetabbāni. Yattha pana nisīdāpetvā parivisanti, tattha sāmaṇerānaṃ jeṭṭhakena bhikkhūnaṃ saṅghanavakena hutvā nisīditabbaṃ.
76. ид̣̇аани яаа аяам̣ саммаавад̇д̇анаа вуд̇д̇аа, д̇ад̇т̇а на убасамбаад̣̇зд̇аб̣б̣анд̇и убаж̇жхааязна худ̇ваа на убасамбаад̣̇зд̇аб̣б̣ам̣; вад̇д̇ам̣ нигкибид̇ваа бана убасамбаад̣̇зд̇ум̣ ваддад̇и. аажариязна худ̇вааби гаммаваажаа на саавзд̇аб̣б̣аа, ан̃н̃асмим̣ асад̇и вад̇д̇ам̣ нигкибид̇ваа саавзд̇ум̣ ваддад̇и. на ниссаяод̇и ааг̇анд̇угаанам̣ ниссаяо на д̣̇аад̇аб̣б̣о. язхиби багад̇ияаава ниссаяо г̇ахид̇о, д̇з вад̇д̇аб̣б̣аа – ‘‘ахам̣ винаяагаммам̣ гароми, асугад̇т̇зрасса наама санд̇игз ниссаяам̣ г̇ан̣хат̇а, маяхам̣ вад̇д̇ам̣ маа гарот̇а, маа мам̣ г̇аамаббавзсанам̣ аабужчат̇аа’’д̇и. сажз звам̣ вуд̇д̇зби гаронд̇иязва, ваарид̇агаалад̇о бадтааяа гаронд̇зсуби анаабад̇д̇и.
76. Idāni yā ayaṃ sammāvattanā vuttā, tattha na upasampādetabbanti upajjhāyena hutvā na upasampādetabbaṃ; vattaṃ nikkhipitvā pana upasampādetuṃ vaṭṭati. Ācariyena hutvāpi kammavācā na sāvetabbā, aññasmiṃ asati vattaṃ nikkhipitvā sāvetuṃ vaṭṭati. Na nissayoti āgantukānaṃ nissayo na dātabbo. Yehipi pakatiyāva nissayo gahito, te vattabbā – ‘‘ahaṃ vinayakammaṃ karomi, asukattherassa nāma santike nissayaṃ gaṇhatha, mayhaṃ vattaṃ mā karotha, mā maṃ gāmappavesanaṃ āpucchathā’’ti. Sace evaṃ vuttepi karontiyeva, vāritakālato paṭṭhāya karontesupi anāpatti.
на сааман̣зрод̇и ан̃н̃о сааман̣зро на г̇ахзд̇аб̣б̣о. убаж̇жхам̣ д̣̇ад̇ваа г̇ахид̇асааман̣зрааби вад̇д̇аб̣б̣аа – ‘‘ахам̣ винаяагаммам̣ гароми, маяхам̣ вад̇д̇ам̣ маа гарот̇а, маа мам̣ г̇аамаббавзсанам̣ аабужчат̇аа’’д̇и. сажз звам̣ вуд̇д̇зби гаронд̇иязва, ваарид̇агаалад̇о бадтааяа гаронд̇зсуби анаабад̇д̇и. бхигкуноваад̣̇агасаммуд̇и наама аад̇хибажжадтаанабхууд̇аад̇и бадигкид̇д̇аа, д̇асмаа бхигкусан̇гхасса вад̇д̇аб̣б̣ам̣ – ‘‘бханд̇з, ахам̣ винаяагаммам̣ гароми, бхигкуноваад̣̇агам̣ ж̇аанаат̇аа’’д̇и, бадиб̣аласса ваа бхигкусса бхааро гаад̇аб̣б̣о. ааг̇ад̇аа бхигкунияо ‘‘сан̇гхасанд̇игам̣ г̇ажчат̇а, сан̇гхо во оваад̣̇ад̣̇ааяагам̣ ж̇ааниссад̇ий’’д̇и ваа ‘‘ахам̣ винаяагаммам̣ гароми, асугабхигкусса наама санд̇игам̣ г̇ажчат̇а, со во оваад̣̇ам̣ д̣̇ассад̇ий’’д̇и ваа вад̇д̇аб̣б̣аа.
Na sāmaṇeroti añño sāmaṇero na gahetabbo. Upajjhaṃ datvā gahitasāmaṇerāpi vattabbā – ‘‘ahaṃ vinayakammaṃ karomi, mayhaṃ vattaṃ mā karotha, mā maṃ gāmappavesanaṃ āpucchathā’’ti. Sace evaṃ vuttepi karontiyeva, vāritakālato paṭṭhāya karontesupi anāpatti. Bhikkhunovādakasammuti nāma ādhipaccaṭṭhānabhūtāti paṭikkhittā, tasmā bhikkhusaṅghassa vattabbaṃ – ‘‘bhante, ahaṃ vinayakammaṃ karomi, bhikkhunovādakaṃ jānāthā’’ti, paṭibalassa vā bhikkhussa bhāro kātabbo. Āgatā bhikkhuniyo ‘‘saṅghasantikaṃ gacchatha, saṅgho vo ovādadāyakaṃ jānissatī’’ti vā ‘‘ahaṃ vinayakammaṃ karomi, asukabhikkhussa nāma santikaṃ gacchatha, so vo ovādaṃ dassatī’’ti vā vattabbā.
саа аабад̇д̇ийд̇и суггависсадтияаа бариваасз д̣̇иннз суггависсадти наабаж̇ж̇ид̇аб̣б̣аа. ан̃н̃аа ваа д̇аад̣̇исигаад̇и гааяасам̣саг̇г̇аад̣̇иг̇аругаабад̇д̇и. д̇ад̇о ваа баабидтад̇араад̇и баарааж̇игаабад̇д̇и; сад̇д̇асу хи аабад̇д̇ийсу д̣̇уб̣бхаасид̇аабад̇д̇и баабидтаа; д̣̇уггадаабад̇д̇и баабидтад̇араа; д̣̇уггадаабад̇д̇и баабидтаа, баадид̣̇зсанийяаабад̇д̇и баабидтад̇араад̇и звам̣ баажид̇д̇ияат̇уллажжаяасан̇гхаад̣̇исзсабаарааж̇игаабад̇д̇ийсу наяо нзд̇аб̣б̣о. д̇аасам̣ вад̇т̇уусуби д̣̇уб̣бхаасид̇авад̇т̇у баабидтам̣, д̣̇уггадавад̇т̇у баабидтад̇аранд̇и буриманаязнзва бхзд̣̇о взд̣̇ид̇аб̣б̣о. бан̣н̣ад̇д̇иваж̇ж̇асигкаабад̣̇з бана вад̇т̇уби аабад̇д̇иби баабидтаа. логаваж̇ж̇з убхаяамби баабидтад̇арам̣.
Sā āpattīti sukkavissaṭṭhiyā parivāse dinne sukkavissaṭṭhi nāpajjitabbā. Aññā vā tādisikāti kāyasaṃsaggādigarukāpatti. Tato vā pāpiṭṭhatarāti pārājikāpatti; sattasu hi āpattīsu dubbhāsitāpatti pāpiṭṭhā; dukkaṭāpatti pāpiṭṭhatarā; dukkaṭāpatti pāpiṭṭhā, pāṭidesanīyāpatti pāpiṭṭhatarāti evaṃ pācittiyathullaccayasaṅghādisesapārājikāpattīsu nayo netabbo. Tāsaṃ vatthūsupi dubbhāsitavatthu pāpiṭṭhaṃ, dukkaṭavatthu pāpiṭṭhataranti purimanayeneva bhedo veditabbo. Paṇṇattivajjasikkhāpade pana vatthupi āpattipi pāpiṭṭhā. Lokavajje ubhayampi pāpiṭṭhataraṃ.
гамманд̇и бариваасагаммаваажаа вужжад̇и. д̇ам̣ гаммам̣ ‘‘агад̇ам̣ д̣̇уггада’’нд̇иаад̣̇ийхи ваа ‘‘гим̣ ид̣̇ам̣ гаммам̣ наама гасигаммам̣ г̇орагкагамма’’нд̇иаад̣̇ийхи ваа важанзхи на г̇арахид̇аб̣б̣ам̣. гаммигаад̇и язхи бхигкуухи гаммам̣ гад̇ам̣, д̇з вужжанд̇и, д̇з ‘‘б̣аалаа аб̣яад̇д̇аа’’д̇иаад̣̇ийхи важанзхи на г̇арахид̇аб̣б̣аа. на саважанийяам̣ гаад̇аб̣б̣анд̇и балиб̣од̇хад̇т̇ааяа ваа баггосанад̇т̇ааяа ваа саважанийяам̣ на гаад̇аб̣б̣ам̣, балиб̣од̇хад̇т̇ааяа хи гаронд̇о ‘‘ахам̣ ааяасманд̇ам̣ имасмим̣ вад̇т̇усмим̣ саважанийяам̣ гароми, имамхаа ааваасаа згабад̣̇амби маа баггаами, яаава на д̇ам̣ ад̇хигаран̣ам̣ вуубасанд̇ам̣ ход̇ий’’д̇и звам̣ гарод̇и. баггосанад̇т̇ааяа гаронд̇о ‘‘ахам̣ д̇з саважанийяам̣ гароми, зхи маяаа сад̣̇д̇хим̣ винаяад̇хараанам̣ саммукийбхаавам̣ г̇ажчаамаа’’д̇и звам̣ гарод̇и; д̇ад̣̇убхаяамби на гаад̇аб̣б̣ам̣.
Kammanti parivāsakammavācā vuccati. Taṃ kammaṃ ‘‘akataṃ dukkaṭa’’ntiādīhi vā ‘‘kiṃ idaṃ kammaṃ nāma kasikammaṃ gorakkhakamma’’ntiādīhi vā vacanehi na garahitabbaṃ. Kammikāti yehi bhikkhūhi kammaṃ kataṃ, te vuccanti, te ‘‘bālā abyattā’’tiādīhi vacanehi na garahitabbā. Nasavacanīyaṃ kātabbanti palibodhatthāya vā pakkosanatthāya vā savacanīyaṃ na kātabbaṃ, palibodhatthāya hi karonto ‘‘ahaṃ āyasmantaṃ imasmiṃ vatthusmiṃ savacanīyaṃ karomi, imamhā āvāsā ekapadampi mā pakkāmi, yāva na taṃ adhikaraṇaṃ vūpasantaṃ hotī’’ti evaṃ karoti. Pakkosanatthāya karonto ‘‘ahaṃ te savacanīyaṃ karomi, ehi mayā saddhiṃ vinayadharānaṃ sammukhībhāvaṃ gacchāmā’’ti evaṃ karoti; tadubhayampi na kātabbaṃ.
на ануваад̣̇од̇и вихаарз ж̇здтагадтаанам̣ на гаад̇аб̣б̣ам̣. баад̇имогкуд̣̇д̣̇зсагзна ваа д̇хаммаж̇жхзсагзна ваа на бхавид̇аб̣б̣ам̣. нааби д̇зрасасу саммуд̇ийсу згасаммуд̇ивасзнааби иссарияагаммам̣ гаад̇аб̣б̣ам̣. на огаасод̇и ‘‘гарод̇у мз ааяасмаа огаасам̣, ахам̣ д̇ам̣ вад̇д̇угаамо’’д̇и звам̣ багад̇ад̇д̇асса огаасо на гаарзд̇аб̣б̣о, вад̇т̇унаа ваа аабад̇д̇ияаа ваа на жод̣̇зд̇аб̣б̣о, ‘‘аяам̣ буб̣б̣з д̇з д̣̇осо’’д̇и на саарзд̇аб̣б̣о. на бхигкуухи самбаяож̇зд̇аб̣б̣анд̇и ан̃н̃аман̃н̃ам̣ яож̇зд̇ваа галахо на гаарзд̇аб̣б̣о.
Na anuvādoti vihāre jeṭṭhakaṭṭhānaṃ na kātabbaṃ. Pātimokkhuddesakena vā dhammajjhesakena vā na bhavitabbaṃ. Nāpi terasasu sammutīsu ekasammutivasenāpi issariyakammaṃ kātabbaṃ. Na okāsoti ‘‘karotu me āyasmā okāsaṃ, ahaṃ taṃ vattukāmo’’ti evaṃ pakatattassa okāso na kāretabbo, vatthunā vā āpattiyā vā na codetabbo, ‘‘ayaṃ pubbe te doso’’ti na sāretabbo. Na bhikkhūhi sampayojetabbanti aññamaññaṃ yojetvā kalaho na kāretabbo.
бурад̇од̇и сан̇гхад̇т̇зрзна худ̇ваа бурад̇о на г̇анд̇аб̣б̣ам̣, д̣̇ваад̣̇асахад̇т̇ам̣ убажаарам̣ мун̃жид̇ваа згагзна г̇анд̇аб̣б̣ам̣. нисийд̣̇анзби зсзва наяо. аасанабарияанд̇од̇и бхад̇д̇аг̇г̇аад̣̇ийсу сан̇гханавагаасанам̣ вужжад̇и; сваасса д̣̇аад̇аб̣б̣о, д̇ад̇т̇а нисийд̣̇ид̇аб̣б̣ам̣. сзяяаабарияанд̇од̇и сзяяаанам̣ барияанд̇о, саб̣б̣алаамагам̣ ман̃жабийтам̣. аяан̃хи вассаг̇г̇зна ад̇д̇ано бад̇д̇адтаанз сзяяам̣ г̇ахзд̇ум̣ на лабхад̇и. саб̣б̣абхигкуухи вижинид̇ваа г̇ахид̇аавасзсаа ман̇гулаг̇уут̇абхарид̇аа взд̇д̇алад̇аад̣̇ивинад̣̇д̇хаа лаамагасзяяаа асса д̣̇аад̇аб̣б̣аа. вихаарабарияанд̇од̇и яат̇аа жа сзяяаа, звам̣ васанаааваасоби вассаг̇г̇зна ад̇д̇ано бад̇д̇адтаанз д̇асса на ваддад̇и. саб̣б̣абхигкуухи вижинид̇ваа г̇ахид̇аавасзсаа бана раж̇охад̇абхууми ж̇ад̇угамуусигабхарид̇аа бан̣н̣асаалаа асса д̣̇аад̇аб̣б̣аа. сажз багад̇ад̇д̇аа саб̣б̣з ругкамуулигаа аб̣бхогаасигаа жа хонд̇и, чаннам̣ на убзнд̇и, саб̣б̣зби зд̇зхи виссадтааваасаа наама хонд̇и. д̇зсу яам̣ ижчад̇и, д̇ам̣ лабхад̇и. вассуубанааяигад̣̇ивасз бажжаяам̣ згабассз тад̇ваа вассаг̇г̇зна г̇ан̣хид̇ум̣ лабхад̇и. сзнаасанам̣ на лабхад̇и, ниб̣ад̣̇д̇хавассааваасигам̣ сзнаасанам̣ г̇ан̣хид̇угаамзна вад̇д̇ам̣ нигкибид̇ваа г̇ахзд̇аб̣б̣ам̣.
Puratoti saṅghattherena hutvā purato na gantabbaṃ, dvādasahatthaṃ upacāraṃ muñcitvā ekakena gantabbaṃ. Nisīdanepi eseva nayo. Āsanapariyantoti bhattaggādīsu saṅghanavakāsanaṃ vuccati; svāssa dātabbo, tattha nisīditabbaṃ. Seyyāpariyantoti seyyānaṃ pariyanto, sabbalāmakaṃ mañcapīṭhaṃ. Ayañhi vassaggena attano pattaṭṭhāne seyyaṃ gahetuṃ na labhati. Sabbabhikkhūhi vicinitvā gahitāvasesā maṅkulagūthabharitā vettalatādivinaddhā lāmakaseyyā assa dātabbā. Vihārapariyantoti yathā ca seyyā, evaṃ vasanaāvāsopi vassaggena attano pattaṭṭhāne tassa na vaṭṭati. Sabbabhikkhūhi vicinitvā gahitāvasesā pana rajohatabhūmi jatukamūsikabharitā paṇṇasālā assa dātabbā. Sace pakatattā sabbe rukkhamūlikā abbhokāsikā ca honti, channaṃ na upenti, sabbepi etehi vissaṭṭhāvāsā nāma honti. Tesu yaṃ icchati, taṃ labhati. Vassūpanāyikadivase paccayaṃ ekapasse ṭhatvā vassaggena gaṇhituṃ labhati. Senāsanaṃ na labhati, nibaddhavassāvāsikaṃ senāsanaṃ gaṇhitukāmena vattaṃ nikkhipitvā gahetabbaṃ.
д̇зна жа со саад̣̇ид̇аб̣б̣од̇и яам̣ асса аасанаад̣̇ибарияанд̇ам̣ бхигкуу д̣̇знд̇и, со зва саад̣̇ид̇аб̣б̣о. бурзсаман̣зна ваа бажчаасаман̣зна ваад̇и н̃аад̇ибаваарид̇адтаанз ‘‘зд̇д̇агз бхигкуу г̇ахзд̇ваа ааг̇ажчат̇аа’’д̇и ниманд̇ид̇зна ‘‘бханд̇з, асугам̣ наама гулам̣ бхигкуу ниманд̇зси, зт̇а д̇ад̇т̇а г̇ажчаамаа’’д̇и звам̣ сам̣вид̇хааяа бхигкуу бурзсаман̣з ваа бажчаасаман̣з ваа гад̇ваа на г̇анд̇аб̣б̣ам̣. ‘‘бханд̇з, асугасмим̣ наама г̇аамз мануссаа бхигкуунам̣ ааг̇аманам̣ ижчанд̇и, саад̇ху вад̇асса сажз д̇зсам̣ сан̇г̇ахам̣ гарзяяаат̇аа’’д̇и звам̣ бана барияааязна гат̇зд̇ум̣ ваддад̇и.
Tenaca so sāditabboti yaṃ assa āsanādipariyantaṃ bhikkhū denti, so eva sāditabbo. Puresamaṇena vā pacchāsamaṇena vāti ñātipavāritaṭṭhāne ‘‘ettake bhikkhū gahetvā āgacchathā’’ti nimantitena ‘‘bhante, asukaṃ nāma kulaṃ bhikkhū nimantesi, etha tattha gacchāmā’’ti evaṃ saṃvidhāya bhikkhū puresamaṇe vā pacchāsamaṇe vā katvā na gantabbaṃ. ‘‘Bhante, asukasmiṃ nāma gāme manussā bhikkhūnaṃ āgamanaṃ icchanti, sādhu vatassa sace tesaṃ saṅgahaṃ kareyyāthā’’ti evaṃ pana pariyāyena kathetuṃ vaṭṭati.
на ааран̃н̃иган̇г̇анд̇и ааг̇ад̇ааг̇ад̇аанам̣ аарожзд̇ум̣ харааяамаанзна ааран̃н̃игад̇худ̇ан̇г̇ам̣ на самаад̣̇аад̇аб̣б̣ам̣. язнааби багад̇ияаа самаад̣̇иннам̣, д̇зна д̣̇уд̇ияам̣ бхигкум̣ г̇ахзд̇ваа аран̃н̃з арун̣ам̣ удтаабзд̇аб̣б̣ам̣, на жа згагзна вад̇т̇аб̣б̣ам̣. д̇ат̇аа бхад̇д̇аг̇г̇аад̣̇ийсу аасанабарияанд̇з нисаж̇ж̇ааяа харааяамаанзна бин̣д̣абаад̇игад̇худ̇ан̇г̇амби на самаад̣̇аад̇аб̣б̣ам̣. яо бана багад̇ияаава бин̣д̣абаад̇иго д̇асса бадисзд̇хо над̇т̇и.
Na āraññikaṅganti āgatāgatānaṃ ārocetuṃ harāyamānena āraññikadhutaṅgaṃ na samādātabbaṃ. Yenāpi pakatiyā samādinnaṃ, tena dutiyaṃ bhikkhuṃ gahetvā araññe aruṇaṃ uṭṭhāpetabbaṃ, na ca ekakena vatthabbaṃ. Tathā bhattaggādīsu āsanapariyante nisajjāya harāyamānena piṇḍapātikadhutaṅgampi na samādātabbaṃ. Yo pana pakatiyāva piṇḍapātiko tassa paṭisedho natthi.
на жа д̇аббажжаяаад̇и ‘‘нийхадабхад̇д̇о худ̇ваа вихаарзязва нисийд̣̇ид̇ваа бхун̃ж̇анд̇о рад̇д̇ияо г̇ан̣аяиссаами, г̇ажчад̇о мз бхигкум̣ д̣̇исваа анаарожзнд̇асса рад̇д̇ижчзд̣̇о сияаа’’д̇и иминаа гааран̣зна бин̣д̣абаад̇о на нийхараабзд̇аб̣б̣о. маа мам̣ ж̇ааним̣сууд̇и ‘‘маа мам̣ згабхигкуби ж̇аанаад̇уу’’д̇и жа иминаа аж̇жхаасаязна вихаарз сааман̣зрзхи бажаабзд̇ваа бхун̃ж̇ид̇умби на лабхад̇и. г̇аамам̣ бин̣д̣ааяа бависид̇аб̣б̣амзва. г̇илаанасса бана навагаммааажарияубаж̇жхааяагижжаад̣̇ибасуд̇асса ваа вихаарзязва ажчид̇ум̣ ваддад̇и. сажзби г̇аамз анзгасад̇аа бхигкуу вижаранд̇и, на саггаа ход̇и аарожзд̇ум̣, г̇аамагааваасам̣ г̇анд̇ваа сабхааг̇адтаанз васид̇ум̣ ваддад̇и.
Na ca tappaccayāti ‘‘nīhaṭabhatto hutvā vihāreyeva nisīditvā bhuñjanto rattiyo gaṇayissāmi, gacchato me bhikkhuṃ disvā anārocentassa ratticchedo siyā’’ti iminā kāraṇena piṇḍapāto na nīharāpetabbo. Mā maṃ jāniṃsūti ‘‘mā maṃ ekabhikkhupi jānātū’’ti ca iminā ajjhāsayena vihāre sāmaṇerehi pacāpetvā bhuñjitumpi na labhati. Gāmaṃ piṇḍāya pavisitabbameva. Gilānassa pana navakammaācariyupajjhāyakiccādipasutassa vā vihāreyeva acchituṃ vaṭṭati. Sacepi gāme anekasatā bhikkhū vicaranti, na sakkā hoti ārocetuṃ, gāmakāvāsaṃ gantvā sabhāgaṭṭhāne vasituṃ vaṭṭati.
ааг̇анд̇угзнаад̇и ган̃жи вихаарам̣ г̇ад̇зна д̇ад̇т̇а бхигкуунам̣ аарожзд̇аб̣б̣ам̣. сажз саб̣б̣з згадтаанз тид̇з бассад̇и, згадтаанз тид̇знзва аарожзд̇аб̣б̣ам̣. ат̇а ругкамуулаад̣̇ийсу висум̣ висум̣ тид̇аа хонд̇и, д̇ад̇т̇а д̇ад̇т̇а г̇анд̇ваа аарожзд̇аб̣б̣ам̣. сан̃жижжа анаарожзнд̇асса рад̇д̇ижчзд̣̇о жа ход̇и, вад̇д̇абхзд̣̇з жа д̣̇уггадам̣. ат̇а вижинанд̇о згажжз на бассад̇и, рад̇д̇ижчзд̣̇ова ход̇и, на вад̇д̇абхзд̣̇ад̣̇уггадам̣.
Āgantukenāti kañci vihāraṃ gatena tattha bhikkhūnaṃ ārocetabbaṃ. Sace sabbe ekaṭṭhāne ṭhite passati, ekaṭṭhāne ṭhiteneva ārocetabbaṃ. Atha rukkhamūlādīsu visuṃ visuṃ ṭhitā honti, tattha tattha gantvā ārocetabbaṃ. Sañcicca anārocentassa ratticchedo ca hoti, vattabhede ca dukkaṭaṃ. Atha vicinanto ekacce na passati, ratticchedova hoti, na vattabhedadukkaṭaṃ.
ааг̇анд̇угассаад̇и ад̇д̇ано васанавихаарам̣ ааг̇ад̇ассааби згасса ваа б̣ахуунам̣ ваа вуд̇д̇анаязнзва аарожзд̇аб̣б̣ам̣ . рад̇д̇ижчзд̣̇авад̇д̇абхзд̣̇ааби жзд̇т̇а вуд̇д̇анаязнзва взд̣̇ид̇аб̣б̣аа. сажз ааг̇анд̇угаа мухуд̇д̇ам̣ виссамид̇ваа ваа ависсамид̇ваа зва ваа вихаарамаж̇жхзна г̇ажчанд̇и, д̇зсамби аарожзд̇аб̣б̣ам̣. сажз д̇асса аж̇аананд̇ассзва г̇ажчанд̇и, аяан̃жа бана г̇ад̇агаалз ж̇аанаад̇и, г̇анд̇ваа аарожзд̇аб̣б̣ам̣. самбаабун̣ид̇ум̣ асаггонд̇асса рад̇д̇ижчзд̣̇ова ход̇и, на вад̇д̇абхзд̣̇ад̣̇уггадам̣. язби анд̇овихаарам̣ аббависид̇ваа убажаарасиймам̣ оггамид̇ваа г̇ажчанд̇и, аяан̃жа нзсам̣ чад̇д̇асад̣̇д̣̇ам̣ ваа уггаасид̇асад̣̇д̣̇ам̣ ваа кибид̇асад̣̇д̣̇ам̣ ваа суд̇ваава ааг̇анд̇угабхаавам̣ ж̇аанаад̇и, г̇анд̇ваа аарожзд̇аб̣б̣ам̣ . г̇ад̇агаалз ж̇аананд̇знаби ануб̣анд̇хид̇ваа аарожзд̇аб̣б̣амзва. самбаабун̣ид̇ум̣ асаггонд̇асса рад̇д̇ижчзд̣̇ова ход̇и, на вад̇д̇абхзд̣̇ад̣̇уггадам̣. яоби рад̇д̇им̣язва ааг̇анд̇ваа рад̇д̇им̣язва г̇ажчад̇и, собисса рад̇д̇ижчзд̣̇ам̣ гарод̇и, ан̃н̃аад̇ад̇д̇аа бана вад̇д̇абхзд̣̇ад̣̇уггадам̣ над̇т̇и. сажз аж̇аанид̇ваава аб̣бхаанам̣ гарод̇и, агад̇амзва ход̇ийд̇и гурунд̣̇ияам̣ вуд̇д̇ам̣. д̇асмаа ад̇хигаа рад̇д̇ияо г̇ахзд̇ваа гаад̇аб̣б̣ам̣, аяам̣ абан̣н̣агабадибад̣̇аа.
Āgantukassāti attano vasanavihāraṃ āgatassāpi ekassa vā bahūnaṃ vā vuttanayeneva ārocetabbaṃ . Ratticchedavattabhedāpi cettha vuttanayeneva veditabbā. Sace āgantukā muhuttaṃ vissamitvā vā avissamitvā eva vā vihāramajjhena gacchanti, tesampi ārocetabbaṃ. Sace tassa ajānantasseva gacchanti, ayañca pana gatakāle jānāti, gantvā ārocetabbaṃ. Sampāpuṇituṃ asakkontassa ratticchedova hoti, na vattabhedadukkaṭaṃ. Yepi antovihāraṃ appavisitvā upacārasīmaṃ okkamitvā gacchanti, ayañca nesaṃ chattasaddaṃ vā ukkāsitasaddaṃ vā khipitasaddaṃ vā sutvāva āgantukabhāvaṃ jānāti, gantvā ārocetabbaṃ . Gatakāle jānantenapi anubandhitvā ārocetabbameva. Sampāpuṇituṃ asakkontassa ratticchedova hoti, na vattabhedadukkaṭaṃ. Yopi rattiṃyeva āgantvā rattiṃyeva gacchati, sopissa ratticchedaṃ karoti, aññātattā pana vattabhedadukkaṭaṃ natthi. Sace ajānitvāva abbhānaṃ karoti, akatameva hotīti kurundiyaṃ vuttaṃ. Tasmā adhikā rattiyo gahetvā kātabbaṃ, ayaṃ apaṇṇakapaṭipadā.
над̣̇ийаад̣̇ийсу наавааяа г̇ажчанд̇амби барад̇ийрз тид̇амби аагаасзна г̇ажчанд̇амби баб̣б̣ад̇ад̇алааран̃н̃аад̣̇ийсу д̣̇уурз тид̇амби бхигкум̣ д̣̇исваа сажз ‘‘бхигкуу’’д̇и вавад̇т̇аанам̣ ад̇т̇и, нааваад̣̇ийхи ваа г̇анд̇ваа махаасад̣̇д̣̇ам̣ гад̇ваа ваа взг̇зна ануб̣анд̇хид̇ваа ваа аарожзд̇аб̣б̣ам̣, анаарожзнд̇асса рад̇д̇ижчзд̣̇о жзва вад̇д̇абхзд̣̇ад̣̇уггадан̃жа. сажз вааяаманд̇оби самбаабун̣ид̇ум̣ ваа саавзд̇ум̣ ваа на саггод̇и, рад̇д̇ижчзд̣̇ова ход̇и, на вад̇д̇абхзд̣̇ад̣̇уггадам̣. сан̇гхасзнаабхаяад̇т̇зро бана висаяаависаязна гат̇зд̇и – ‘‘висаяз гира анаарожзнд̇асса рад̇д̇ижчзд̣̇о жзва вад̇д̇абхзд̣̇ад̣̇уггадан̃жа ход̇и, ависаяз бана убхаяамби над̇т̇ий’’д̇и. гаравийгад̇иссад̇т̇зро ‘‘саман̣о аяанд̇и вавад̇т̇аанамзва бамаан̣ам̣, сажзби ависаяо ход̇и, вад̇д̇абхзд̣̇ад̣̇уггадамзва над̇т̇и, рад̇д̇ижчзд̣̇о бана ход̇иязваа’’д̇и ааха.
Nadīādīsu nāvāya gacchantampi paratīre ṭhitampi ākāsena gacchantampi pabbatatalaaraññādīsu dūre ṭhitampi bhikkhuṃ disvā sace ‘‘bhikkhū’’ti vavatthānaṃ atthi, nāvādīhi vā gantvā mahāsaddaṃ katvā vā vegena anubandhitvā vā ārocetabbaṃ, anārocentassa ratticchedo ceva vattabhedadukkaṭañca. Sace vāyamantopi sampāpuṇituṃ vā sāvetuṃ vā na sakkoti, ratticchedova hoti, na vattabhedadukkaṭaṃ. Saṅghasenābhayatthero pana visayāvisayena katheti – ‘‘visaye kira anārocentassa ratticchedo ceva vattabhedadukkaṭañca hoti, avisaye pana ubhayampi natthī’’ti. Karavīkatissatthero ‘‘samaṇo ayanti vavatthānameva pamāṇaṃ, sacepi avisayo hoti, vattabhedadukkaṭameva natthi, ratticchedo pana hotiyevā’’ti āha.
убосат̇зд̇и ‘‘убосат̇ам̣ самбаабун̣иссаамаа’’д̇и ааг̇анд̇угаа бхигкуу ааг̇ажчанд̇и, ид̣̇д̇хияаа г̇ажчанд̇ааби убосат̇абхаавам̣ н̃ад̇ваа од̇арид̇ваа убосат̇ам̣ гаронд̇и, д̇асмаа ааг̇анд̇угасод̇ханад̇т̇ам̣ убосат̇ад̣̇ивасз аарожзд̇аб̣б̣ам̣. бавааран̣ааяаби зсзва наяо. г̇илаанод̇и г̇анд̇ум̣ асамад̇т̇о. д̣̇ууд̇знаад̇и зд̇т̇а анубасамбаннам̣ бзсзд̇ум̣ на ваддад̇и, бхигкум̣ бзсзд̇ваа аарожаабзд̇аб̣б̣ам̣.
Uposatheti ‘‘uposathaṃ sampāpuṇissāmā’’ti āgantukā bhikkhū āgacchanti, iddhiyā gacchantāpi uposathabhāvaṃ ñatvā otaritvā uposathaṃ karonti, tasmā āgantukasodhanatthaṃ uposathadivase ārocetabbaṃ. Pavāraṇāyapi eseva nayo. Gilānoti gantuṃ asamattho. Dūtenāti ettha anupasampannaṃ pesetuṃ na vaṭṭati, bhikkhuṃ pesetvā ārocāpetabbaṃ.
абхигкуго ааваасод̇и сун̃н̃авихааро; яад̇т̇а згоби бхигку над̇т̇и, д̇ад̇т̇а ваасад̇т̇ааяа на г̇анд̇аб̣б̣ам̣. на хи д̇ад̇т̇а вуд̇т̇арад̇д̇ияо г̇ан̣ануубигаа хонд̇и, багад̇ад̇д̇зна бана сад̣̇д̇хим̣ ваддад̇и. д̣̇асавид̇ханд̇арааяз бана сажзби рад̇д̇ияо г̇ан̣ануубигаа на хонд̇и, анд̇арааяад̇о баримужжанад̇т̇ааяа г̇анд̇аб̣б̣амзва. д̇зна вуд̇д̇ам̣ – ‘‘ан̃н̃ад̇ра анд̇арааяаа’’д̇и. наанаасам̣ваасагзхи сад̣̇д̇хим̣ винаяагаммам̣ гаад̇ум̣ на ваддад̇и. д̇зсам̣ анаарожанзби рад̇д̇ижчзд̣̇о над̇т̇и, абхигкугааваасасад̣̇исамзва ход̇и. д̇зна вуд̇д̇ам̣ – ‘‘яад̇т̇ассу бхигкуу наанаасам̣ваасагаа’’д̇и. сзсам̣ убосат̇агканд̇хагз вуд̇д̇анаяамзва.
Abhikkhukoāvāsoti suññavihāro; yattha ekopi bhikkhu natthi, tattha vāsatthāya na gantabbaṃ. Na hi tattha vuttharattiyo gaṇanūpikā honti, pakatattena pana saddhiṃ vaṭṭati. Dasavidhantarāye pana sacepi rattiyo gaṇanūpikā na honti, antarāyato parimuccanatthāya gantabbameva. Tena vuttaṃ – ‘‘aññatra antarāyā’’ti. Nānāsaṃvāsakehi saddhiṃ vinayakammaṃ kātuṃ na vaṭṭati. Tesaṃ anārocanepi ratticchedo natthi, abhikkhukāvāsasadisameva hoti. Tena vuttaṃ – ‘‘yatthassu bhikkhū nānāsaṃvāsakā’’ti. Sesaṃ uposathakkhandhake vuttanayameva.
81. згажчаннз ааваасзд̇иаад̣̇ийсу ааваасо наама васанад̇т̇ааяа гад̇асзнаасанам̣. анааваасо наама жзд̇ияагхарам̣ б̣од̇хигхарам̣ саммун̃ж̇аниаддаго д̣̇ааруаддаго баанийяамаал̣о важжагуди д̣̇ваарагодтагод̇и звамаад̣̇и. д̇ад̇ияабад̣̇зна д̇ад̣̇убхаяамби г̇ахид̇ам̣. зд̇зсу яад̇т̇а гад̇т̇ажи згажчаннз чад̣̇анад̇о уд̣̇агабад̇анадтаанабарижчиннз огаасз угкид̇д̇аго васид̇ум̣ на лабхад̇и. ‘‘баариваасиго бана анд̇оааваасзязва на лабхад̇ий’’д̇и махаабажжарияам̣ вуд̇д̇ам̣. махааадтагат̇ааяам̣ бана ‘‘ависзсзна уд̣̇агабаад̇зна ваарид̇а’’нд̇и вуд̇д̇ам̣. гурунд̣̇ияам̣ ‘‘зд̇зсу зд̇д̇агзсу бан̃жаван̣н̣ажчад̣̇анаб̣ад̣̇д̇хадтаанзсу баариваасигасса жа угкид̇д̇агасса жа багад̇ад̇д̇зна сад̣̇д̇хим̣ уд̣̇агабаад̇зна ваарид̇а’’нд̇и вуд̇д̇ам̣. д̇асмаа наануубажаарзби згажчаннз на ваддад̇и. сажз банзд̇т̇а д̇ад̣̇ахубасамбаннзби багад̇ад̇д̇з батамам̣ бависид̇ваа нибаннз садтивассоби баариваасиго бажчаа бависид̇ваа ж̇аананд̇о нибаж̇ж̇ад̇и, рад̇д̇ижчзд̣̇о жзва вад̇д̇абхзд̣̇ад̣̇уггадан̃жа. аж̇аананд̇асса рад̇д̇ижчзд̣̇ова на вад̇д̇абхзд̣̇ад̣̇уггадам̣. сажз бана д̇асмим̣ батамам̣ нибаннз бажчаа багад̇ад̇д̇о бависид̇ваа нибаж̇ж̇ад̇и, баариваасиго жа ж̇аанаад̇и, рад̇д̇ижчзд̣̇о жзва вад̇д̇абхзд̣̇ад̣̇уггадан̃жа. но жз ж̇аанаад̇и, рад̇д̇ижчзд̣̇ова на вад̇д̇абхзд̣̇ад̣̇уггадам̣.
81.Ekacchanne āvāsetiādīsu āvāso nāma vasanatthāya katasenāsanaṃ. Anāvāso nāma cetiyagharaṃ bodhigharaṃ sammuñjaniaṭṭako dāruaṭṭako pānīyamāḷo vaccakuṭi dvārakoṭṭhakoti evamādi. Tatiyapadena tadubhayampi gahitaṃ. Etesu yattha katthaci ekacchanne chadanato udakapatanaṭṭhānaparicchinne okāse ukkhittako vasituṃ na labhati. ‘‘Pārivāsiko pana antoāvāseyeva na labhatī’’ti mahāpaccariyaṃ vuttaṃ. Mahāaṭṭhakathāyaṃ pana ‘‘avisesena udakapātena vārita’’nti vuttaṃ. Kurundiyaṃ ‘‘etesu ettakesu pañcavaṇṇacchadanabaddhaṭṭhānesu pārivāsikassa ca ukkhittakassa ca pakatattena saddhiṃ udakapātena vārita’’nti vuttaṃ. Tasmā nānūpacārepi ekacchanne na vaṭṭati. Sace panettha tadahupasampannepi pakatatte paṭhamaṃ pavisitvā nipanne saṭṭhivassopi pārivāsiko pacchā pavisitvā jānanto nipajjati, ratticchedo ceva vattabhedadukkaṭañca. Ajānantassa ratticchedova na vattabhedadukkaṭaṃ. Sace pana tasmiṃ paṭhamaṃ nipanne pacchā pakatatto pavisitvā nipajjati, pārivāsiko ca jānāti, ratticchedo ceva vattabhedadukkaṭañca. No ce jānāti, ratticchedova na vattabhedadukkaṭaṃ.
вудтаад̇аб̣б̣ам̣ ниманд̇зд̇аб̣б̣од̇и д̇ад̣̇ахубасамбаннамби д̣̇исваа вудтаад̇аб̣б̣амзва; вудтааяа жа ‘‘ахам̣ иминаа суканисинно вудтаабид̇о’’д̇и бараммукзна на г̇анд̇аб̣б̣ам̣, ‘‘ид̣̇ам̣ аажарияа-аасанам̣, зд̇т̇а нисийд̣̇ат̇аа’’д̇и звам̣ ниманд̇зд̇аб̣б̣оязва. навагзна бана ‘‘махаат̇зрам̣ об̣ад̣̇д̇хам̣ гаромий’’д̇и баариваасигад̇т̇зрасса санд̇игам̣ на г̇анд̇аб̣б̣ам̣. згаасанзд̇и самаанавассигаасанз ман̃жз ваа бийтз ваа . на чамааяам̣ нисиннзд̇и багад̇ад̇д̇з бхуумияам̣ нисиннз ид̇арзна анд̇амасо д̇ин̣асант̇аарзби ужжад̇арз ваалигаад̇алзби ваа на нисийд̣̇ид̇аб̣б̣ам̣, д̣̇ваад̣̇асахад̇т̇ам̣ бана убажаарам̣ мун̃жид̇ваа нисийд̣̇ид̇ум̣ ваддад̇и. згажан̇гамзд̇и сахааязна вияа сад̣̇д̇хим̣ жан̇гаманд̇о згасмим̣ жан̇гамз.
Vuṭṭhātabbaṃ nimantetabboti tadahupasampannampi disvā vuṭṭhātabbameva; vuṭṭhāya ca ‘‘ahaṃ iminā sukhanisinno vuṭṭhāpito’’ti parammukhena na gantabbaṃ, ‘‘idaṃ ācariya-āsanaṃ, ettha nisīdathā’’ti evaṃ nimantetabboyeva. Navakena pana ‘‘mahātheraṃ obaddhaṃ karomī’’ti pārivāsikattherassa santikaṃ na gantabbaṃ. Ekāsaneti samānavassikāsane mañce vā pīṭhe vā . Na chamāyaṃ nisinneti pakatatte bhūmiyaṃ nisinne itarena antamaso tiṇasanthārepi uccatare vālikātalepi vā na nisīditabbaṃ, dvādasahatthaṃ pana upacāraṃ muñcitvā nisīdituṃ vaṭṭati. Ekacaṅkameti sahāyena viya saddhiṃ caṅkamanto ekasmiṃ caṅkame.
чамааяам̣ жан̇гаманд̇анд̇и чамааяам̣ жан̇гаманд̇з, аяамзва ваа баато. аяам̣ банзд̇т̇а ад̇т̇о – агад̇абарижчзд̣̇ааяа бхуумияаа жан̇гаманд̇з барижчзд̣̇ам̣ гад̇ваа ваалигам̣ аагирид̇ваа ааламб̣анам̣ яож̇зд̇ваа гад̇ажан̇гамз нийжзби на жан̇гамид̇аб̣б̣ам̣, го бана ваад̣̇о идтагаажаяасамбаннз взд̣̇игаабаригкид̇д̇зд̇и! сажз бана баагаарабаригкид̇д̇о ход̇и д̣̇ваарагодтагаяуд̇д̇о баб̣б̣ад̇анд̇аравананд̇араг̇умб̣анд̇арзсу ваа суббадижчанно, д̇аад̣̇исз жан̇гамз жан̇гамид̇ум̣ ваддад̇и. аббадижчаннзби убажаарам̣ мун̃жид̇ваа ваддад̇и.
Chamāyaṃ caṅkamantanti chamāyaṃ caṅkamante, ayameva vā pāṭho. Ayaṃ panettha attho – akataparicchedāya bhūmiyā caṅkamante paricchedaṃ katvā vālikaṃ ākiritvā ālambanaṃ yojetvā katacaṅkame nīcepi na caṅkamitabbaṃ, ko pana vādo iṭṭhakācayasampanne vedikāparikkhitteti! Sace pana pākāraparikkhitto hoti dvārakoṭṭhakayutto pabbatantaravanantaragumbantaresu vā suppaṭicchanno, tādise caṅkame caṅkamituṃ vaṭṭati. Appaṭicchannepi upacāraṃ muñcitvā vaṭṭati.
вуд̣дхад̇арзнаад̇и зд̇т̇а сажз вуд̣дхад̇арз баариваасигз батамам̣ нибаннз ид̇аро ж̇аананд̇о бажчаа нибаж̇ж̇ад̇и, рад̇д̇ижчзд̣̇о жасса ход̇и вад̇д̇абхзд̣̇з жа д̣̇уггадам̣. вуд̣дхад̇арасса бана рад̇д̇ижчзд̣̇ова на вад̇д̇абхзд̣̇ад̣̇уггадам̣. аж̇аанид̇ваа нибаж̇ж̇ад̇и, д̣̇виннамби вад̇д̇абхзд̣̇о над̇т̇и, рад̇д̇ижчзд̣̇о бана ход̇и. ат̇а навагабаариваасигз батамам̣ нибаннз вуд̣дхад̇аро бажчаа нибаж̇ж̇ад̇и, наваго жа ж̇аанаад̇и, рад̇д̇и жасса чиж̇ж̇ад̇и, вад̇д̇абхзд̣̇з жа д̣̇уггадам̣ ход̇и. вуд̣дхад̇арасса рад̇д̇ижчзд̣̇ова на вад̇д̇абхзд̣̇о. но жз ж̇аанаад̇и, д̣̇виннамби вад̇д̇абхзд̣̇о над̇т̇и, рад̇д̇ижчзд̣̇о бана ход̇и. сажз д̣̇взби абажчаабуримам̣ нибаж̇ж̇анд̇и, вуд̣дхад̇арасса рад̇д̇ижчзд̣̇ова ид̇арасса вад̇д̇абхзд̣̇обийд̇и гурунд̣̇ияам̣ вуд̇д̇ам̣. д̣̇вз баариваасигаа самавассаа, зго батамам̣ нибанно, зго ж̇аананд̇ова бажчаа нибаж̇ж̇ад̇и, рад̇д̇и жа чиж̇ж̇ад̇и, вад̇д̇абхзд̣̇з жа д̣̇уггадам̣. батамам̣ нибаннасса рад̇д̇ижчзд̣̇ова на вад̇д̇абхзд̣̇о. сажз бажчаа нибаж̇ж̇анд̇оби на ж̇аанаад̇и, д̣̇виннамби вад̇д̇абхзд̣̇о над̇т̇и, рад̇д̇ижчзд̣̇о бана ход̇и. сажз д̣̇взби абажчаабуримам̣ нибаж̇ж̇анд̇и, д̣̇виннамби рад̇д̇ижчзд̣̇оязва, на вад̇д̇абхзд̣̇о. сажз хи д̣̇вз баариваасигаа згад̇о васзяяум̣, д̇з ан̃н̃аман̃н̃асса аж̇жхаажаарам̣ н̃ад̇ваа аг̇аараваа ваа виббадисаарино ваа худ̇ваа баабидтад̇арам̣ ваа аабад̇д̇им̣ аабаж̇ж̇зяяум̣ виб̣бхамзяяум̣ ваа, д̇асмаа нзсам̣ сахасзяяаа саб̣б̣аббагаарзна бадигкид̇д̇аа. сзсам̣ вуд̇д̇анаязнзва взд̣̇ид̇аб̣б̣ам̣. муулааяабадигассанаарахаад̣̇аяо жзд̇т̇а баариваасигаанам̣ багад̇ад̇д̇адтаанз тид̇аад̇и взд̣̇ид̇аб̣б̣аа.
Vuḍḍhatarenāti ettha sace vuḍḍhatare pārivāsike paṭhamaṃ nipanne itaro jānanto pacchā nipajjati, ratticchedo cassa hoti vattabhede ca dukkaṭaṃ. Vuḍḍhatarassa pana ratticchedova na vattabhedadukkaṭaṃ. Ajānitvā nipajjati, dvinnampi vattabhedo natthi, ratticchedo pana hoti. Atha navakapārivāsike paṭhamaṃ nipanne vuḍḍhataro pacchā nipajjati, navako ca jānāti, ratti cassa chijjati, vattabhede ca dukkaṭaṃ hoti. Vuḍḍhatarassa ratticchedova na vattabhedo. No ce jānāti, dvinnampi vattabhedo natthi, ratticchedo pana hoti. Sace dvepi apacchāpurimaṃ nipajjanti, vuḍḍhatarassa ratticchedova itarassa vattabhedopīti kurundiyaṃ vuttaṃ. Dve pārivāsikā samavassā, eko paṭhamaṃ nipanno, eko jānantova pacchā nipajjati, ratti ca chijjati, vattabhede ca dukkaṭaṃ. Paṭhamaṃ nipannassa ratticchedova na vattabhedo. Sace pacchā nipajjantopi na jānāti, dvinnampi vattabhedo natthi, ratticchedo pana hoti. Sace dvepi apacchāpurimaṃ nipajjanti, dvinnampi ratticchedoyeva, na vattabhedo. Sace hi dve pārivāsikā ekato vaseyyuṃ, te aññamaññassa ajjhācāraṃ ñatvā agāravā vā vippaṭisārino vā hutvā pāpiṭṭhataraṃ vā āpattiṃ āpajjeyyuṃ vibbhameyyuṃ vā, tasmā nesaṃ sahaseyyā sabbappakārena paṭikkhittā. Sesaṃ vuttanayeneva veditabbaṃ. Mūlāyapaṭikassanārahādayo cettha pārivāsikānaṃ pakatattaṭṭhāne ṭhitāti veditabbā.
баариваасигажад̇уд̇т̇о жз, бхигкавз, бариваасанд̇и зд̇т̇а баариваасигам̣ жад̇уд̇т̇ам̣ гад̇ваа ан̃н̃асса бариваасад̣̇аанаад̣̇ийни гаад̇ум̣ на ваддад̇и. зд̇зсвзвааяам̣ г̇ан̣абуураго на ход̇и, сзсасан̇гхагаммзсу ход̇и. г̇ан̣з бана аббахонд̇з вад̇д̇ам̣ нигкибаабзд̇ваа г̇ан̣абуураго гаад̇аб̣б̣од̇и.
Pārivāsikacatuttho ce, bhikkhave, parivāsanti ettha pārivāsikaṃ catutthaṃ katvā aññassa parivāsadānādīni kātuṃ na vaṭṭati. Etesvevāyaṃ gaṇapūrako na hoti, sesasaṅghakammesu hoti. Gaṇe pana appahonte vattaṃ nikkhipāpetvā gaṇapūrako kātabboti.
83. имам̣ бана вад̇д̇агат̇ам̣ суд̇ваа винаяад̇хараубаалид̇т̇зрасса рахог̇ад̇асса звам̣ баривид̇агго уд̣̇абаад̣̇и – ‘‘бхаг̇авад̇аа б̣аху баариваасигавад̇д̇ам̣ бан̃н̃ад̇д̇ам̣, гад̇ихи ну ко зд̇т̇а гааран̣зхи рад̇д̇ижчзд̣̇о ход̇ий’’д̇и! со бхаг̇аванд̇ам̣ убасан̇гамид̇ваа д̇амад̇т̇ам̣ бужчи. бхаг̇аваа жасса б̣яаагааси. д̇зна вуд̇д̇ам̣ – ‘‘ат̇а ко ааяасмаа убаали…бз… рад̇д̇ижчзд̣̇аа’’д̇и. д̇ад̇т̇а сахаваасод̇и явааяам̣ багад̇ад̇д̇зна бхигкунаа сад̣̇д̇хим̣ згажчаннзд̇иаад̣̇инаа наязна вуд̇д̇о згад̇о ваасо. виббаваасод̇и згагассзва ваасо. анаарожанаад̇и ааг̇анд̇угаад̣̇ийнам̣ анаарожанаа. зд̇зсу д̇ийсу згзгзна гааран̣зна рад̇д̇ижчзд̣̇о ход̇и.
83. Imaṃ pana vattakathaṃ sutvā vinayadharaupālittherassa rahogatassa evaṃ parivitakko udapādi – ‘‘bhagavatā bahu pārivāsikavattaṃ paññattaṃ, katihi nu kho ettha kāraṇehi ratticchedo hotī’’ti! So bhagavantaṃ upasaṅkamitvā tamatthaṃ pucchi. Bhagavā cassa byākāsi. Tena vuttaṃ – ‘‘atha kho āyasmā upāli…pe… ratticchedā’’ti. Tattha sahavāsoti yvāyaṃ pakatattena bhikkhunā saddhiṃ ekacchannetiādinā nayena vutto ekato vāso. Vippavāsoti ekakasseva vāso. Anārocanāti āgantukādīnaṃ anārocanā. Etesu tīsu ekekena kāraṇena ratticchedo hoti.
84. на саггонд̇ийд̇и сан̇гхасса маханд̇ад̇ааяа д̇ад̇т̇а д̇ад̇т̇а г̇анд̇ваа саб̣б̣зсам̣ аарожзд̇ум̣ асаггонд̇аа сод̇хзд̇ум̣ на саггонд̇и. бариваасам̣ нигкибаами, вад̇д̇ам̣ нигкибаамийд̇и имзсу д̣̇вийсу бад̣̇зсу згзнааби нигкид̇д̇ова ход̇и бариваасо; д̣̇вийхи сунигкид̇д̇оязва. самаад̣̇аанзби зсзва наяо. звам̣ вад̇д̇ам̣ самаад̣̇ияид̇ваа баривуд̇т̇абариваасасса маанад̇д̇ам̣ г̇ан̣хад̇о буна вад̇д̇асамаад̣̇аанагижжам̣ над̇т̇и, самаад̣̇иннавад̇д̇оязва хзса д̇асмаасса чаарад̇д̇ам̣ маанад̇д̇ам̣ д̣̇аад̇аб̣б̣ам̣, жин̣н̣амаанад̇д̇о аб̣бхзд̇аб̣б̣о. звам̣ анаабад̇д̇иго худ̇ваа суд̣̇д̇ханд̇з бад̇идтид̇о д̇иссо сигкаа буурзд̇ваа д̣̇угкассанд̇ам̣ гариссад̇ийд̇и.
84.Na sakkontīti saṅghassa mahantatāya tattha tattha gantvā sabbesaṃ ārocetuṃ asakkontā sodhetuṃ na sakkonti. Parivāsaṃ nikkhipāmi, vattaṃ nikkhipāmīti imesu dvīsu padesu ekenāpi nikkhittova hoti parivāso; dvīhi sunikkhittoyeva. Samādānepi eseva nayo. Evaṃ vattaṃ samādiyitvā parivutthaparivāsassa mānattaṃ gaṇhato puna vattasamādānakiccaṃ natthi, samādinnavattoyeva hesa tasmāssa chārattaṃ mānattaṃ dātabbaṃ, ciṇṇamānatto abbhetabbo. Evaṃ anāpattiko hutvā suddhante patiṭṭhito tisso sikkhā pūretvā dukkhassantaṃ karissatīti.
баариваасигавад̇д̇агат̇аа нидтид̇аа.
Pārivāsikavattakathā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / жуул̣аваг̇г̇абаал̣и • Cūḷavaggapāḷi / 1. баариваасигавад̇д̇ам̣ • 1. Pārivāsikavattaṃ
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / баариваасигавад̇д̇агат̇ааван̣н̣анаа • Pārivāsikavattakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / баариваасигавад̇д̇агат̇ааван̣н̣анаа • Pārivāsikavattakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / баариваасигавад̇д̇агат̇ааван̣н̣анаа • Pārivāsikavattakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 1. баариваасигавад̇д̇агат̇аа • 1. Pārivāsikavattakathā
