| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
2. பாரிவாஸிகக்க²ந்த⁴கங்
2. Pārivāsikakkhandhakaṃ
பாரிவாஸிகவத்தகதா²வண்ணனா
Pārivāsikavattakathāvaṇṇanā
75. பாரிவாஸிகக்க²ந்த⁴கே நவகதரங் பாரிவாஸிகந்தி அத்தனோ நவகதரங் பாரிவாஸிகங். பாரிவாஸிகஸ்ஸ ஹி அத்தனோ நவகதரங் பாரிவாஸிகங் ட²பெத்வா அஞ்ஞே மூலாயபடிகஸ்ஸனாரஹமானத்தாரஹமானத்தசாரிகஅப்³பா⁴னாரஹாபி பகதத்தட்டா²னேயேவ திட்ட²ந்தி. தேனாஹ ‘‘அந்தமஸோ மூலாயபஅகஸ்ஸனாரஹாதீ³னம்பீ’’தி. பாதே³ க⁴ங்ஸெந்தி ஏதேனாதி பாத³க⁴ங்ஸனங், ஸக்க²ரகத²லாதி³. ‘‘அனுஜானாமி, பி⁴க்க²வே, திஸ்ஸோ பாத³க⁴ங்ஸனியோ ஸக்க²ரங் கத²லங் ஸமுத்³த³பே²ணக’’ந்தி (சூளவ॰ 269) ஹி வுத்தங். ஸத்³தி⁴விஹாரிகாதீ³னம்பி ஸாதி³யந்தஸ்ஸாதி ஸத்³தி⁴விஹாரிகானம்பி அபி⁴வாத³னாதி³ங் ஸாதி³யந்தஸ்ஸ. ‘‘மா மங் கா³மப்பவேஸனங் ஆபுச்ச²தா²’’தி வுத்தே அனாபுச்சா²பி கா³மங் பவிஸிதுங் வட்டதி. யோ யோ வுட்³டோ⁴தி பாரிவாஸிகேஸு பி⁴க்கூ²ஸு யோ யோ வுட்³டோ⁴. நவகதரஸ்ஸ ஸாதி³துந்தி பாரிவாஸிகனவகதரஸ்ஸ அபி⁴வாத³னாதி³ங் ஸாதி³துங்.
75. Pārivāsikakkhandhake navakataraṃ pārivāsikanti attano navakataraṃ pārivāsikaṃ. Pārivāsikassa hi attano navakataraṃ pārivāsikaṃ ṭhapetvā aññe mūlāyapaṭikassanārahamānattārahamānattacārikaabbhānārahāpi pakatattaṭṭhāneyeva tiṭṭhanti. Tenāha ‘‘antamaso mūlāyapaakassanārahādīnampī’’ti. Pāde ghaṃsenti etenāti pādaghaṃsanaṃ, sakkharakathalādi. ‘‘Anujānāmi, bhikkhave, tisso pādaghaṃsaniyo sakkharaṃ kathalaṃ samuddapheṇaka’’nti (cūḷava. 269) hi vuttaṃ. Saddhivihārikādīnampi sādiyantassāti saddhivihārikānampi abhivādanādiṃ sādiyantassa. ‘‘Mā maṃ gāmappavesanaṃ āpucchathā’’ti vutte anāpucchāpi gāmaṃ pavisituṃ vaṭṭati. Yo yo vuḍḍhoti pārivāsikesu bhikkhūsu yo yo vuḍḍho. Navakatarassa sāditunti pārivāsikanavakatarassa abhivādanādiṃ sādituṃ.
தத்தே²வாதி ஸங்க⁴னவகட்டா²னேயேவ. அத்தனோ பாளியா பவாரேதப்³ப³ந்தி அத்தனோ வஸ்ஸக்³கே³ன பத்தபாளியா பவாரேதப்³ப³ங், ந பன ஸப்³பே³ஸு பவாரிதேஸூதி அத்தோ². யதி³ பன ந க³ண்ஹாதி ந விஸ்ஸஜ்ஜேதீதி யதி³ புரிமதி³வஸே அத்தனோ ந க³ண்ஹாதி க³ஹெத்வா ச ந விஸ்ஸஜ்ஜேதி. சதுஸ்ஸாலப⁴த்தந்தி போ⁴ஜனஸாலாயங் படிபாடியா தி³ய்யமானப⁴த்தங். ஹத்த²பாஸே டி²தேனாதி தா³யகஸ்ஸ ஹத்த²பாஸே டி²தேன.
Tatthevāti saṅghanavakaṭṭhāneyeva. Attano pāḷiyā pavāretabbanti attano vassaggena pattapāḷiyā pavāretabbaṃ, na pana sabbesu pavāritesūti attho. Yadi pana na gaṇhāti na vissajjetīti yadi purimadivase attano na gaṇhāti gahetvā ca na vissajjeti. Catussālabhattanti bhojanasālāyaṃ paṭipāṭiyā diyyamānabhattaṃ. Hatthapāse ṭhitenāti dāyakassa hatthapāse ṭhitena.
76. அஞ்ஞோ ஸாமணேரோ ந க³ஹேதப்³போ³தி உபஜ்ஜா²யேன ஹுத்வா அஞ்ஞோ ஸாமணேரோ ந க³ஹேதப்³போ³. உபஜ்ஜ²ங் த³த்வா க³ஹிதஸாமணேராபீதி பகதத்தகாலே உபஜ்ஜ²ங் த³த்வா க³ஹிதஸாமணேராபி. லத்³த⁴ஸம்முதிகேன ஆணத்தோபி க³ருத⁴ம்மேஹி அஞ்ஞேஹி வா ஓவதி³துங் லப⁴தீதி ஆஹ ‘‘படிப³லஸ்ஸ வா பி⁴க்கு²ஸ்ஸ பா⁴ரோ காதப்³போ³’’தி. ஆக³தா பி⁴க்கு²னியோ வத்தப்³பா³தி ஸம்ப³ந்தோ⁴. ஸவசனீயந்தி ஸதோ³ஸங் . ஜெட்ட²கட்டா²னங் ந காதப்³ப³ந்தி பதா⁴னட்டா²னங் ந காதப்³ப³ங். கிங் தந்தி ஆஹ ‘‘பாதிமொக்கு²த்³தே³ஸகேன வா’’திஆதி³.
76.Añño sāmaṇero na gahetabboti upajjhāyena hutvā añño sāmaṇero na gahetabbo. Upajjhaṃ datvā gahitasāmaṇerāpīti pakatattakāle upajjhaṃ datvā gahitasāmaṇerāpi. Laddhasammutikena āṇattopi garudhammehi aññehi vā ovadituṃ labhatīti āha ‘‘paṭibalassa vā bhikkhussa bhāro kātabbo’’ti. Āgatā bhikkhuniyo vattabbāti sambandho. Savacanīyanti sadosaṃ . Jeṭṭhakaṭṭhānaṃ na kātabbanti padhānaṭṭhānaṃ na kātabbaṃ. Kiṃ tanti āha ‘‘pātimokkhuddesakena vā’’tiādi.
ரஜேஹி ஹதா உபஹதா பூ⁴மி ஏதிஸ்ஸாதி ரஜோஹதபூ⁴மி, ரஜோகிண்ணபூ⁴மீதி அத்தோ². பச்சயந்தி வஸ்ஸாவாஸிகலாப⁴ங் ஸந்தா⁴ய வுத்தங். ஏகபஸ்ஸே ட²த்வாதி பாளிங் விஹாய பி⁴க்கூ²னங் பச்ச²தோ ட²த்வா. ஸேனாஸனங் ந லப⁴தீதி ஸெய்யாபரியந்தபா⁴கி³தாய வஸ்ஸக்³கே³ன க³ண்ஹிதுங் ந லப⁴தி. அஸ்ஸாதி ப⁴வெய்ய. ‘‘ஆக³ந்துகேன ஆரோசேதப்³ப³ங், ஆக³ந்துகஸ்ஸ ஆரோசேதப்³ப³’’ந்தி அவிஸேஸேன வுத்தத்தா ஸசே த்³வே பாரிவாஸிகா க³தட்டா²னே அஞ்ஞமஞ்ஞங் பஸ்ஸந்தி, உபோ⁴ஹிபி அஞ்ஞமஞ்ஞஸ்ஸ ஆரோசேதப்³ப³ங். யதா² ப³ஹி தி³ஸ்வா ஆரோசிதஸ்ஸ பி⁴க்கு²னோ விஹாரங் ஆக³தே புன ஆரோசனகிச்சங் நத்தி², ஏவங் அஞ்ஞங் விஹாரங் க³தேனபி தத்த² புப்³பே³ ஆரோசிதஸ்ஸ புன ஆரோசனகிச்சங் நத்தீ²தி வத³ந்தி.
Rajehi hatā upahatā bhūmi etissāti rajohatabhūmi, rajokiṇṇabhūmīti attho. Paccayanti vassāvāsikalābhaṃ sandhāya vuttaṃ. Ekapasse ṭhatvāti pāḷiṃ vihāya bhikkhūnaṃ pacchato ṭhatvā. Senāsanaṃ na labhatīti seyyāpariyantabhāgitāya vassaggena gaṇhituṃ na labhati. Assāti bhaveyya. ‘‘Āgantukena ārocetabbaṃ, āgantukassa ārocetabba’’nti avisesena vuttattā sace dve pārivāsikā gataṭṭhāne aññamaññaṃ passanti, ubhohipi aññamaññassa ārocetabbaṃ. Yathā bahi disvā ārocitassa bhikkhuno vihāraṃ āgate puna ārocanakiccaṃ natthi, evaṃ aññaṃ vihāraṃ gatenapi tattha pubbe ārocitassa puna ārocanakiccaṃ natthīti vadanti.
81. அவிஸேஸேனாதி பாரிவாஸிகஸ்ஸ உக்கி²த்தகஸ்ஸ ச அவிஸேஸேன. ஓப³த்³த⁴ந்தி பலிபு³த்³த⁴ங்.
81.Avisesenāti pārivāsikassa ukkhittakassa ca avisesena. Obaddhanti palibuddhaṃ.
83. ஸஹவாஸோதி வுத்தப்பகாரே ச²ன்னே பகதத்தேன பி⁴க்கு²னா ஸத்³தி⁴ங் ஸயனமேவ அதி⁴ப்பேதங், ந ஸேஸஇரியாபத²கப்பனங். ஸேஸமெத்த² ஸுவிஞ்ஞெய்யமேவ.
83.Sahavāsoti vuttappakāre channe pakatattena bhikkhunā saddhiṃ sayanameva adhippetaṃ, na sesairiyāpathakappanaṃ. Sesamettha suviññeyyameva.
பாரிவாஸிகக்க²ந்த⁴கவண்ணனா நிட்டி²தா.
Pārivāsikakkhandhakavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi / 1. பாரிவாஸிகவத்தங் • 1. Pārivāsikavattaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / பாரிவாஸிகவத்தகதா² • Pārivāsikavattakathā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பாரிவாஸிகவத்தகதா²வண்ணனா • Pārivāsikavattakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பாரிவாஸிகவத்தகதா²வண்ணனா • Pārivāsikavattakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 1. பாரிவாஸிகவத்தகதா² • 1. Pārivāsikavattakathā
