| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
2. பாரிவாஸிகக்க²ந்த⁴கோ
2. Pārivāsikakkhandhako
பாரிவாஸிகவத்தகதா²வண்ணனா
Pārivāsikavattakathāvaṇṇanā
75. பாரிவாஸிகக்க²ந்த⁴கே அந்தமஸோ மூலாயபடிகஸ்ஸனாரஹாதீ³னம்பீதி ஆதி³-ஸத்³தே³ன மானத்தாரஹமானத்தசாரிகஅப்³பா⁴னாரஹே ஸங்க³ண்ஹாதி. தே ஹி பாரிவாஸிகானங், பாரிவாஸிகா ச தேஸங் பகதத்தட்டா²னே ஏவ திட்ட²ந்தி. அதோ⁴தபாத³ட்ட²பனகந்தி யத்த² ட²த்வா பாதே³ தோ⁴வந்தி, தாதி³ஸங் தா³ருப²லகக²ண்டா³தி³ங். பாத³க⁴ங்ஸனந்தி ஸக்க²ரகத²லாதி³ங். ‘‘வத்தங் கரொந்தீ’’தி எத்தகமத்தஸ்ஸேவ வுத்தத்தா ஸத்³தி⁴விஹாரிகாதீ³ஹிபி அபி⁴வாத³னாதி³ங் காதுங் ந வட்டதி.
75. Pārivāsikakkhandhake antamaso mūlāyapaṭikassanārahādīnampīti ādi-saddena mānattārahamānattacārikaabbhānārahe saṅgaṇhāti. Te hi pārivāsikānaṃ, pārivāsikā ca tesaṃ pakatattaṭṭhāne eva tiṭṭhanti. Adhotapādaṭṭhapanakanti yattha ṭhatvā pāde dhovanti, tādisaṃ dāruphalakakhaṇḍādiṃ. Pādaghaṃsananti sakkharakathalādiṃ. ‘‘Vattaṃ karontī’’ti ettakamattasseva vuttattā saddhivihārikādīhipi abhivādanādiṃ kātuṃ na vaṭṭati.
‘‘பாரிஸுத்³தி⁴உபோஸதே² கரியமானே’’தி இத³ங் பவாரணாதி³வஸேஸு ஸங்கே⁴ பவாரெந்தே அனுபக³தசி²ன்னவஸ்ஸாதீ³ஹி கரியமானபாரிஸுத்³தி⁴உபோஸத²ம்பி ஸந்தா⁴ய வுத்தங். அத்தனோ பாளியாதி நவகானங் புரதோ.
‘‘Pārisuddhiuposathe kariyamāne’’ti idaṃ pavāraṇādivasesu saṅghe pavārente anupagatachinnavassādīhi kariyamānapārisuddhiuposathampi sandhāya vuttaṃ. Attano pāḷiyāti navakānaṃ purato.
‘‘பாரிவாஸிகஸ்ஸேவா’’தி இத³ங் அப்³பா⁴னாரஹபரியோஸானே ஸப்³பே³ க³ருகட்டே² ஸந்தா⁴ய வுத்தங். தேஸம்பி பச்சேகங் ஓணோஜனஸ்ஸ அனுஞ்ஞாதத்தா தத³வஸேஸா பகதத்தா ஏவ தங் ந லப⁴ந்தி.
‘‘Pārivāsikassevā’’ti idaṃ abbhānārahapariyosāne sabbe garukaṭṭhe sandhāya vuttaṃ. Tesampi paccekaṃ oṇojanassa anuññātattā tadavasesā pakatattā eva taṃ na labhanti.
சதுஸ்ஸாலப⁴த்தந்தி போ⁴ஜனஸாலாய படிபாடியா தி³ய்யமானப⁴த்தங். ஹத்த²பாஸே டி²தேனாதி தா³யகஸ்ஸ ஹத்த²பாஸே படிக்³க³ஹணருஹனட்டா²னேதி அதி⁴ப்பாயோ. மஹாபேளப⁴த்தேபீதி மஹந்தேஸு ப⁴த்தபச்சி²ஆதி³பா⁴ஜனேஸு ட²பெத்வா தி³ய்யமானப⁴த்தேஸுபி.
Catussālabhattanti bhojanasālāya paṭipāṭiyā diyyamānabhattaṃ. Hatthapāse ṭhitenāti dāyakassa hatthapāse paṭiggahaṇaruhanaṭṭhāneti adhippāyo. Mahāpeḷabhattepīti mahantesu bhattapacchiādibhājanesu ṭhapetvā diyyamānabhattesupi.
76. பாபிட்ட²தராதி பாராஜிகாபத்தீதி உக்கங்ஸவஸேன வுத்தங். ஸஞ்சரித்தாதி³பண்ணத்திவஜ்ஜதோ பன ஸுக்கவிஸ்ஸட்டா²தி³கா லோகவஜ்ஜாவ, தத்தா²பி ஸங்க⁴பே⁴தா³தி³கா பாபிட்ட²தரா ஏவ.
76.Pāpiṭṭhatarāti pārājikāpattīti ukkaṃsavasena vuttaṃ. Sañcarittādipaṇṇattivajjato pana sukkavissaṭṭhādikā lokavajjāva, tatthāpi saṅghabhedādikā pāpiṭṭhatarā eva.
‘‘கம்மந்தி பாரிவாஸிககம்மவாசா’’தி ஏதேன கம்மபூ⁴தா வாசாதி கம்மவாசா-ஸத்³த³ஸ்ஸ அத்தோ²பி ஸித்³தோ⁴தி வேதி³தப்³போ³. ஸவசனீயந்தி எத்த² ‘‘ஸதோ³ஸ’’ந்தி (ஸாரத்த²॰ டீ॰ சூளவக்³க³॰ 3.76) அத்த²ங் வத³தி. அத்தனோ வசனே பவத்தனகம்மந்தி ஏவமெத்த² அத்தோ² த³ட்ட²ப்³போ³, ‘‘மா பக்கமாஹீ’’தி வா ‘‘ஏஹி வினயத⁴ரானங் ஸம்முகீ²பா⁴வ’’ந்தி வா ஏவங் அத்தனோ ஆணாய பவத்தனககம்மங் ந காதப்³ப³ந்தி அதி⁴ப்பாயோ. ஏவஞ்ஹி கேனசி ஸவசனீயே கதே அனாத³ரேன அதிக்கமிதுங் ந வட்டதி, பு³த்³த⁴ஸ்ஸ ஸங்க⁴ஸ்ஸ ஆணா அதிக்கந்தா நாம ஹோதி.
‘‘Kammantipārivāsikakammavācā’’ti etena kammabhūtā vācāti kammavācā-saddassa atthopi siddhoti veditabbo. Savacanīyanti ettha ‘‘sadosa’’nti (sārattha. ṭī. cūḷavagga. 3.76) atthaṃ vadati. Attano vacane pavattanakammanti evamettha attho daṭṭhabbo, ‘‘mā pakkamāhī’’ti vā ‘‘ehi vinayadharānaṃ sammukhībhāva’’nti vā evaṃ attano āṇāya pavattanakakammaṃ na kātabbanti adhippāyo. Evañhi kenaci savacanīye kate anādarena atikkamituṃ na vaṭṭati, buddhassa saṅghassa āṇā atikkantā nāma hoti.
ரஜோஹதபூ⁴மீதி பண்ணஸாலாவிஸேஸனங். பச்சயந்தி வஸ்ஸாவாஸிகசீவரங். ஸேனாஸனங் ந லப⁴தீதி வஸ்ஸக்³கே³ன ந லப⁴தி.
Rajohatabhūmīti paṇṇasālāvisesanaṃ. Paccayanti vassāvāsikacīvaraṃ. Senāsanaṃ na labhatīti vassaggena na labhati.
அபண்ணகபடிபதா³தி அவிரத்³த⁴படிபதா³. ஸசே வாயமந்தோபீதி எத்த² அவிஸயபா⁴வங் ஞத்வா அவாயமந்தோபி ஸங்க³ய்ஹதி.
Apaṇṇakapaṭipadāti aviraddhapaṭipadā. Sace vāyamantopīti ettha avisayabhāvaṃ ñatvā avāyamantopi saṅgayhati.
81. அவிஸேஸேனாதி பாரிவாஸிகுக்கி²த்தகானங் ஸாமஞ்ஞேன. பஞ்சவண்ணச்ச²த³னப³த்³த⁴ட்டா²னேஸூதி பஞ்சப்பகாரச்ச²த³னேஹி ச²ன்னட்டா²னேஸு.
81.Avisesenāti pārivāsikukkhittakānaṃ sāmaññena. Pañcavaṇṇacchadanabaddhaṭṭhānesūti pañcappakāracchadanehi channaṭṭhānesu.
ஓப³த்³த⁴ந்தி உட்டா²னாதி³ப்³யாபாரபடிப³த்³த⁴ங். பீளிதந்தி அத்தோ². மஞ்சே வா பீடே² வாதி எத்த² வா-ஸத்³தோ³ ஸமுச்சயத்தோ², தேன தட்டிகாசம்மக²ண்டா³தீ³ஸு தீ³கா⁴ஸனேஸுபி நிஸீதி³துங் ந வட்டதீதி தீ³பிதங் ஹோதி.
Obaddhanti uṭṭhānādibyāpārapaṭibaddhaṃ. Pīḷitanti attho. Mañce vā pīṭhe vāti ettha vā-saddo samuccayattho, tena taṭṭikācammakhaṇḍādīsu dīghāsanesupi nisīdituṃ na vaṭṭatīti dīpitaṃ hoti.
ந வத்தபே⁴த³து³க்கடந்தி வுட்³ட⁴தரஸ்ஸ ஜானந்தஸ்ஸாபி வத்தபே⁴தே³ து³க்கடங் நத்தீ²தி த³ஸ்ஸேதி. ‘‘வத்தங் நிக்கி²பாபெத்வா’’தி இத³ங் பாரிவாஸாதி³மேவ ஸந்தா⁴ய வுத்தங்.
Na vattabhedadukkaṭanti vuḍḍhatarassa jānantassāpi vattabhede dukkaṭaṃ natthīti dasseti. ‘‘Vattaṃ nikkhipāpetvā’’ti idaṃ pārivāsādimeva sandhāya vuttaṃ.
பாரிவாஸிகவத்தகதா²வண்ணனா நிட்டி²தா.
Pārivāsikavattakathāvaṇṇanā niṭṭhitā.
பாரிவாஸிகக்க²ந்த⁴கவண்ணனானயோ நிட்டி²தோ.
Pārivāsikakkhandhakavaṇṇanānayo niṭṭhito.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi / 1. பாரிவாஸிகவத்தங் • 1. Pārivāsikavattaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / பாரிவாஸிகவத்தகதா² • Pārivāsikavattakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பாரிவாஸிகவத்தகதா²வண்ணனா • Pārivāsikavattakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பாரிவாஸிகவத்தகதா²வண்ணனா • Pārivāsikavattakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 1. பாரிவாஸிகவத்தகதா² • 1. Pārivāsikavattakathā
