| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
২. পারিৰাসিকক্খন্ধকং
2. Pārivāsikakkhandhakaṃ
পারিৰাসিকৰত্তকথাৰণ্ণনা
Pārivāsikavattakathāvaṇṇanā
৭৫. পারিৰাসিকক্খন্ধকে নৰকতরং পারিৰাসিকন্তি অত্তনো নৰকতরং পারিৰাসিকং। পারিৰাসিকস্স হি অত্তনো নৰকতরং পারিৰাসিকং ঠপেত্ৰা অঞ্ঞে মূলাযপটিকস্সনারহমানত্তারহমানত্তচারিকঅব্ভানারহাপি পকতত্তট্ঠানেযেৰ তিট্ঠন্তি। তেনাহ ‘‘অন্তমসো মূলাযপঅকস্সনারহাদীনম্পী’’তি। পাদে ঘংসেন্তি এতেনাতি পাদঘংসনং, সক্খরকথলাদি। ‘‘অনুজানামি, ভিক্খৰে, তিস্সো পাদঘংসনিযো সক্খরং কথলং সমুদ্দফেণক’’ন্তি (চূল়ৰ॰ ২৬৯) হি ৰুত্তং। সদ্ধিৰিহারিকাদীনম্পি সাদিযন্তস্সাতি সদ্ধিৰিহারিকানম্পি অভিৰাদনাদিং সাদিযন্তস্স। ‘‘মা মং গামপ্পৰেসনং আপুচ্ছথা’’তি ৰুত্তে অনাপুচ্ছাপি গামং পৰিসিতুং ৰট্টতি। যো যো ৰুড্ঢোতি পারিৰাসিকেসু ভিক্খূসু যো যো ৰুড্ঢো। নৰকতরস্স সাদিতুন্তি পারিৰাসিকনৰকতরস্স অভিৰাদনাদিং সাদিতুং।
75. Pārivāsikakkhandhake navakataraṃ pārivāsikanti attano navakataraṃ pārivāsikaṃ. Pārivāsikassa hi attano navakataraṃ pārivāsikaṃ ṭhapetvā aññe mūlāyapaṭikassanārahamānattārahamānattacārikaabbhānārahāpi pakatattaṭṭhāneyeva tiṭṭhanti. Tenāha ‘‘antamaso mūlāyapaakassanārahādīnampī’’ti. Pāde ghaṃsenti etenāti pādaghaṃsanaṃ, sakkharakathalādi. ‘‘Anujānāmi, bhikkhave, tisso pādaghaṃsaniyo sakkharaṃ kathalaṃ samuddapheṇaka’’nti (cūḷava. 269) hi vuttaṃ. Saddhivihārikādīnampi sādiyantassāti saddhivihārikānampi abhivādanādiṃ sādiyantassa. ‘‘Mā maṃ gāmappavesanaṃ āpucchathā’’ti vutte anāpucchāpi gāmaṃ pavisituṃ vaṭṭati. Yo yo vuḍḍhoti pārivāsikesu bhikkhūsu yo yo vuḍḍho. Navakatarassa sāditunti pārivāsikanavakatarassa abhivādanādiṃ sādituṃ.
তত্থেৰাতি সঙ্ঘনৰকট্ঠানেযেৰ। অত্তনো পাল়িযা পৰারেতব্বন্তি অত্তনো ৰস্সগ্গেন পত্তপাল়িযা পৰারেতব্বং, ন পন সব্বেসু পৰারিতেসূতি অত্থো। যদি পন ন গণ্হাতি ন ৰিস্সজ্জেতীতি যদি পুরিমদিৰসে অত্তনো ন গণ্হাতি গহেত্ৰা চ ন ৰিস্সজ্জেতি। চতুস্সালভত্তন্তি ভোজনসালাযং পটিপাটিযা দিয্যমানভত্তং। হত্থপাসে ঠিতেনাতি দাযকস্স হত্থপাসে ঠিতেন।
Tatthevāti saṅghanavakaṭṭhāneyeva. Attano pāḷiyā pavāretabbanti attano vassaggena pattapāḷiyā pavāretabbaṃ, na pana sabbesu pavāritesūti attho. Yadi pana na gaṇhāti na vissajjetīti yadi purimadivase attano na gaṇhāti gahetvā ca na vissajjeti. Catussālabhattanti bhojanasālāyaṃ paṭipāṭiyā diyyamānabhattaṃ. Hatthapāse ṭhitenāti dāyakassa hatthapāse ṭhitena.
৭৬. অঞ্ঞো সামণেরো ন গহেতব্বোতি উপজ্ঝাযেন হুত্ৰা অঞ্ঞো সামণেরো ন গহেতব্বো। উপজ্ঝং দত্ৰা গহিতসামণেরাপীতি পকতত্তকালে উপজ্ঝং দত্ৰা গহিতসামণেরাপি। লদ্ধসম্মুতিকেন আণত্তোপি গরুধম্মেহি অঞ্ঞেহি ৰা ওৰদিতুং লভতীতি আহ ‘‘পটিবলস্স ৰা ভিক্খুস্স ভারো কাতব্বো’’তি। আগতা ভিক্খুনিযো ৰত্তব্বাতি সম্বন্ধো। সৰচনীযন্তি সদোসং । জেট্ঠকট্ঠানং ন কাতব্বন্তি পধানট্ঠানং ন কাতব্বং। কিং তন্তি আহ ‘‘পাতিমোক্খুদ্দেসকেন ৰা’’তিআদি।
76.Añño sāmaṇero na gahetabboti upajjhāyena hutvā añño sāmaṇero na gahetabbo. Upajjhaṃ datvā gahitasāmaṇerāpīti pakatattakāle upajjhaṃ datvā gahitasāmaṇerāpi. Laddhasammutikena āṇattopi garudhammehi aññehi vā ovadituṃ labhatīti āha ‘‘paṭibalassa vā bhikkhussa bhāro kātabbo’’ti. Āgatā bhikkhuniyo vattabbāti sambandho. Savacanīyanti sadosaṃ . Jeṭṭhakaṭṭhānaṃ na kātabbanti padhānaṭṭhānaṃ na kātabbaṃ. Kiṃ tanti āha ‘‘pātimokkhuddesakena vā’’tiādi.
রজেহি হতা উপহতা ভূমি এতিস্সাতি রজোহতভূমি, রজোকিণ্ণভূমীতি অত্থো। পচ্চযন্তি ৰস্সাৰাসিকলাভং সন্ধায ৰুত্তং। একপস্সে ঠত্ৰাতি পাল়িং ৰিহায ভিক্খূনং পচ্ছতো ঠত্ৰা। সেনাসনং ন লভতীতি সেয্যাপরিযন্তভাগিতায ৰস্সগ্গেন গণ্হিতুং ন লভতি। অস্সাতি ভৰেয্য। ‘‘আগন্তুকেন আরোচেতব্বং, আগন্তুকস্স আরোচেতব্ব’’ন্তি অৰিসেসেন ৰুত্তত্তা সচে দ্ৰে পারিৰাসিকা গতট্ঠানে অঞ্ঞমঞ্ঞং পস্সন্তি, উভোহিপি অঞ্ঞমঞ্ঞস্স আরোচেতব্বং। যথা বহি দিস্ৰা আরোচিতস্স ভিক্খুনো ৰিহারং আগতে পুন আরোচনকিচ্চং নত্থি, এৰং অঞ্ঞং ৰিহারং গতেনপি তত্থ পুব্বে আরোচিতস্স পুন আরোচনকিচ্চং নত্থীতি ৰদন্তি।
Rajehi hatā upahatā bhūmi etissāti rajohatabhūmi, rajokiṇṇabhūmīti attho. Paccayanti vassāvāsikalābhaṃ sandhāya vuttaṃ. Ekapasse ṭhatvāti pāḷiṃ vihāya bhikkhūnaṃ pacchato ṭhatvā. Senāsanaṃ na labhatīti seyyāpariyantabhāgitāya vassaggena gaṇhituṃ na labhati. Assāti bhaveyya. ‘‘Āgantukena ārocetabbaṃ, āgantukassa ārocetabba’’nti avisesena vuttattā sace dve pārivāsikā gataṭṭhāne aññamaññaṃ passanti, ubhohipi aññamaññassa ārocetabbaṃ. Yathā bahi disvā ārocitassa bhikkhuno vihāraṃ āgate puna ārocanakiccaṃ natthi, evaṃ aññaṃ vihāraṃ gatenapi tattha pubbe ārocitassa puna ārocanakiccaṃ natthīti vadanti.
৮১. অৰিসেসেনাতি পারিৰাসিকস্স উক্খিত্তকস্স চ অৰিসেসেন। ওবদ্ধন্তি পলিবুদ্ধং।
81.Avisesenāti pārivāsikassa ukkhittakassa ca avisesena. Obaddhanti palibuddhaṃ.
৮৩. সহৰাসোতি ৰুত্তপ্পকারে ছন্নে পকতত্তেন ভিক্খুনা সদ্ধিং সযনমেৰ অধিপ্পেতং, ন সেসইরিযাপথকপ্পনং। সেসমেত্থ সুৰিঞ্ঞেয্যমেৰ।
83.Sahavāsoti vuttappakāre channe pakatattena bhikkhunā saddhiṃ sayanameva adhippetaṃ, na sesairiyāpathakappanaṃ. Sesamettha suviññeyyameva.
পারিৰাসিকক্খন্ধকৰণ্ণনা নিট্ঠিতা।
Pārivāsikakkhandhakavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi / ১. পারিৰাসিকৰত্তং • 1. Pārivāsikavattaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / পারিৰাসিকৰত্তকথা • Pārivāsikavattakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পারিৰাসিকৰত্তকথাৰণ্ণনা • Pārivāsikavattakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পারিৰাসিকৰত্তকথাৰণ্ণনা • Pārivāsikavattakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১. পারিৰাসিকৰত্তকথা • 1. Pārivāsikavattakathā
