| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
২. পারিৰাসিকক্খন্ধকো
2. Pārivāsikakkhandhako
পারিৰাসিকৰত্তকথাৰণ্ণনা
Pārivāsikavattakathāvaṇṇanā
৭৫. পারিৰাসিকক্খন্ধকে অন্তমসো মূলাযপটিকস্সনারহাদীনম্পীতি আদি-সদ্দেন মানত্তারহমানত্তচারিকঅব্ভানারহে সঙ্গণ্হাতি। তে হি পারিৰাসিকানং, পারিৰাসিকা চ তেসং পকতত্তট্ঠানে এৰ তিট্ঠন্তি। অধোতপাদট্ঠপনকন্তি যত্থ ঠত্ৰা পাদে ধোৰন্তি, তাদিসং দারুফলকখণ্ডাদিং। পাদঘংসনন্তি সক্খরকথলাদিং। ‘‘ৰত্তং করোন্তী’’তি এত্তকমত্তস্সেৰ ৰুত্তত্তা সদ্ধিৰিহারিকাদীহিপি অভিৰাদনাদিং কাতুং ন ৰট্টতি।
75. Pārivāsikakkhandhake antamaso mūlāyapaṭikassanārahādīnampīti ādi-saddena mānattārahamānattacārikaabbhānārahe saṅgaṇhāti. Te hi pārivāsikānaṃ, pārivāsikā ca tesaṃ pakatattaṭṭhāne eva tiṭṭhanti. Adhotapādaṭṭhapanakanti yattha ṭhatvā pāde dhovanti, tādisaṃ dāruphalakakhaṇḍādiṃ. Pādaghaṃsananti sakkharakathalādiṃ. ‘‘Vattaṃ karontī’’ti ettakamattasseva vuttattā saddhivihārikādīhipi abhivādanādiṃ kātuṃ na vaṭṭati.
‘‘পারিসুদ্ধিউপোসথে করিযমানে’’তি ইদং পৰারণাদিৰসেসু সঙ্ঘে পৰারেন্তে অনুপগতছিন্নৰস্সাদীহি করিযমানপারিসুদ্ধিউপোসথম্পি সন্ধায ৰুত্তং। অত্তনো পাল়িযাতি নৰকানং পুরতো।
‘‘Pārisuddhiuposathe kariyamāne’’ti idaṃ pavāraṇādivasesu saṅghe pavārente anupagatachinnavassādīhi kariyamānapārisuddhiuposathampi sandhāya vuttaṃ. Attano pāḷiyāti navakānaṃ purato.
‘‘পারিৰাসিকস্সেৰা’’তি ইদং অব্ভানারহপরিযোসানে সব্বে গরুকট্ঠে সন্ধায ৰুত্তং। তেসম্পি পচ্চেকং ওণোজনস্স অনুঞ্ঞাতত্তা তদৰসেসা পকতত্তা এৰ তং ন লভন্তি।
‘‘Pārivāsikassevā’’ti idaṃ abbhānārahapariyosāne sabbe garukaṭṭhe sandhāya vuttaṃ. Tesampi paccekaṃ oṇojanassa anuññātattā tadavasesā pakatattā eva taṃ na labhanti.
চতুস্সালভত্তন্তি ভোজনসালায পটিপাটিযা দিয্যমানভত্তং। হত্থপাসে ঠিতেনাতি দাযকস্স হত্থপাসে পটিগ্গহণরুহনট্ঠানেতি অধিপ্পাযো। মহাপেল়ভত্তেপীতি মহন্তেসু ভত্তপচ্ছিআদিভাজনেসু ঠপেত্ৰা দিয্যমানভত্তেসুপি।
Catussālabhattanti bhojanasālāya paṭipāṭiyā diyyamānabhattaṃ. Hatthapāse ṭhitenāti dāyakassa hatthapāse paṭiggahaṇaruhanaṭṭhāneti adhippāyo. Mahāpeḷabhattepīti mahantesu bhattapacchiādibhājanesu ṭhapetvā diyyamānabhattesupi.
৭৬. পাপিট্ঠতরাতি পারাজিকাপত্তীতি উক্কংসৰসেন ৰুত্তং। সঞ্চরিত্তাদিপণ্ণত্তিৰজ্জতো পন সুক্কৰিস্সট্ঠাদিকা লোকৰজ্জাৰ, তত্থাপি সঙ্ঘভেদাদিকা পাপিট্ঠতরা এৰ।
76.Pāpiṭṭhatarāti pārājikāpattīti ukkaṃsavasena vuttaṃ. Sañcarittādipaṇṇattivajjato pana sukkavissaṭṭhādikā lokavajjāva, tatthāpi saṅghabhedādikā pāpiṭṭhatarā eva.
‘‘কম্মন্তি পারিৰাসিককম্মৰাচা’’তি এতেন কম্মভূতা ৰাচাতি কম্মৰাচা-সদ্দস্স অত্থোপি সিদ্ধোতি ৰেদিতব্বো। সৰচনীযন্তি এত্থ ‘‘সদোস’’ন্তি (সারত্থ॰ টী॰ চূল়ৰগ্গ॰ ৩.৭৬) অত্থং ৰদতি। অত্তনো ৰচনে পৰত্তনকম্মন্তি এৰমেত্থ অত্থো দট্ঠব্বো, ‘‘মা পক্কমাহী’’তি ৰা ‘‘এহি ৰিনযধরানং সম্মুখীভাৰ’’ন্তি ৰা এৰং অত্তনো আণায পৰত্তনককম্মং ন কাতব্বন্তি অধিপ্পাযো। এৰঞ্হি কেনচি সৰচনীযে কতে অনাদরেন অতিক্কমিতুং ন ৰট্টতি, বুদ্ধস্স সঙ্ঘস্স আণা অতিক্কন্তা নাম হোতি।
‘‘Kammantipārivāsikakammavācā’’ti etena kammabhūtā vācāti kammavācā-saddassa atthopi siddhoti veditabbo. Savacanīyanti ettha ‘‘sadosa’’nti (sārattha. ṭī. cūḷavagga. 3.76) atthaṃ vadati. Attano vacane pavattanakammanti evamettha attho daṭṭhabbo, ‘‘mā pakkamāhī’’ti vā ‘‘ehi vinayadharānaṃ sammukhībhāva’’nti vā evaṃ attano āṇāya pavattanakakammaṃ na kātabbanti adhippāyo. Evañhi kenaci savacanīye kate anādarena atikkamituṃ na vaṭṭati, buddhassa saṅghassa āṇā atikkantā nāma hoti.
রজোহতভূমীতি পণ্ণসালাৰিসেসনং। পচ্চযন্তি ৰস্সাৰাসিকচীৰরং। সেনাসনং ন লভতীতি ৰস্সগ্গেন ন লভতি।
Rajohatabhūmīti paṇṇasālāvisesanaṃ. Paccayanti vassāvāsikacīvaraṃ. Senāsanaṃ na labhatīti vassaggena na labhati.
অপণ্ণকপটিপদাতি অৰিরদ্ধপটিপদা। সচে ৰাযমন্তোপীতি এত্থ অৰিসযভাৰং ঞত্ৰা অৰাযমন্তোপি সঙ্গয্হতি।
Apaṇṇakapaṭipadāti aviraddhapaṭipadā. Sace vāyamantopīti ettha avisayabhāvaṃ ñatvā avāyamantopi saṅgayhati.
৮১. অৰিসেসেনাতি পারিৰাসিকুক্খিত্তকানং সামঞ্ঞেন। পঞ্চৰণ্ণচ্ছদনবদ্ধট্ঠানেসূতি পঞ্চপ্পকারচ্ছদনেহি ছন্নট্ঠানেসু।
81.Avisesenāti pārivāsikukkhittakānaṃ sāmaññena. Pañcavaṇṇacchadanabaddhaṭṭhānesūti pañcappakāracchadanehi channaṭṭhānesu.
ওবদ্ধন্তি উট্ঠানাদিব্যাপারপটিবদ্ধং। পীল়িতন্তি অত্থো। মঞ্চে ৰা পীঠে ৰাতি এত্থ ৰা-সদ্দো সমুচ্চযত্থো, তেন তট্টিকাচম্মখণ্ডাদীসু দীঘাসনেসুপি নিসীদিতুং ন ৰট্টতীতি দীপিতং হোতি।
Obaddhanti uṭṭhānādibyāpārapaṭibaddhaṃ. Pīḷitanti attho. Mañce vā pīṭhe vāti ettha vā-saddo samuccayattho, tena taṭṭikācammakhaṇḍādīsu dīghāsanesupi nisīdituṃ na vaṭṭatīti dīpitaṃ hoti.
ন ৰত্তভেদদুক্কটন্তি ৰুড্ঢতরস্স জানন্তস্সাপি ৰত্তভেদে দুক্কটং নত্থীতি দস্সেতি। ‘‘ৰত্তং নিক্খিপাপেত্ৰা’’তি ইদং পারিৰাসাদিমেৰ সন্ধায ৰুত্তং।
Na vattabhedadukkaṭanti vuḍḍhatarassa jānantassāpi vattabhede dukkaṭaṃ natthīti dasseti. ‘‘Vattaṃ nikkhipāpetvā’’ti idaṃ pārivāsādimeva sandhāya vuttaṃ.
পারিৰাসিকৰত্তকথাৰণ্ণনা নিট্ঠিতা।
Pārivāsikavattakathāvaṇṇanā niṭṭhitā.
পারিৰাসিকক্খন্ধকৰণ্ণনানযো নিট্ঠিতো।
Pārivāsikakkhandhakavaṇṇanānayo niṭṭhito.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi / ১. পারিৰাসিকৰত্তং • 1. Pārivāsikavattaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / পারিৰাসিকৰত্তকথা • Pārivāsikavattakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / পারিৰাসিকৰত্তকথাৰণ্ণনা • Pārivāsikavattakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পারিৰাসিকৰত্তকথাৰণ্ণনা • Pārivāsikavattakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১. পারিৰাসিকৰত্তকথা • 1. Pārivāsikavattakathā
