| Library / Tipiṭaka / திபிடக • Tipiṭaka / நெத்திவிபா⁴வினீ • Nettivibhāvinī |
9. பரிவத்தனஹாரஸம்பாதவிபா⁴வனா
9. Parivattanahārasampātavibhāvanā
71. யேன யேன விப⁴த்திஹாரஸம்பாதேன ஸுத்தப்பதே³ஸத்தா² விப⁴த்தா, ஸோ விப⁴த்திஹாரஸம்பாதோ பரிபுண்ணோ, ‘‘கதமோ பரிவத்தனஹாரஸம்பாதோ’’தி புச்சி²தப்³ப³த்தா ‘‘தத்த² கதமோ பரிவத்தனோ ஹாரஸம்பாதோ’’திஆதி³ வுத்தங்.
71. Yena yena vibhattihārasampātena suttappadesatthā vibhattā, so vibhattihārasampāto paripuṇṇo, ‘‘katamo parivattanahārasampāto’’ti pucchitabbattā ‘‘tattha katamo parivattano hārasampāto’’tiādi vuttaṃ.
‘‘கதமே ஸுத்தப்பதே³ஸத்தா² கத²ங் பரிவத்தேதப்³பா³’’தி புச்சி²தப்³ப³த்தா ‘‘தஸ்மா’’திஆதி³ வுத்தங். யா ‘‘தஸ்மா…பே॰… கோ³சரோ’’தி கா³தா² வுத்தா, தாய கா³தா²ய யா ஸமத²விபஸ்ஸனா நித்³தா⁴ரிதா, தாய ஸமத²விபஸ்ஸனாய பா⁴விதாய அகுஸலானங் நிரோதோ⁴ ப²லங் பயோஜனங் ஹோதி, பரிஞ்ஞாதங் து³க்க²ங் ஹோதி, ஸமுத³யோ பஹீனோ ஹோதி, மக்³கோ³ பா⁴விதோ ஹோதீதி பரிவத்தேதப்³போ³. படிபக்கே²ன பன ஸமத²விபஸ்ஸனாய அபா⁴விதாய அகுஸலானங் அனிரோதோ⁴, அபரிஞ்ஞாதங் து³க்க²ங், ஸமுத³யோ அப்பஹீனோ, மக்³கோ³ அபா⁴விதோ ஹோதீதி பரிவத்தேதப்³போ³.
‘‘Katame suttappadesatthā kathaṃ parivattetabbā’’ti pucchitabbattā ‘‘tasmā’’tiādi vuttaṃ. Yā ‘‘tasmā…pe… gocaro’’ti gāthā vuttā, tāya gāthāya yā samathavipassanā niddhāritā, tāya samathavipassanāya bhāvitāya akusalānaṃ nirodho phalaṃ payojanaṃ hoti, pariññātaṃ dukkhaṃ hoti, samudayo pahīno hoti, maggo bhāvito hotīti parivattetabbo. Paṭipakkhena pana samathavipassanāya abhāvitāya akusalānaṃ anirodho, apariññātaṃ dukkhaṃ, samudayo appahīno, maggo abhāvito hotīti parivattetabbo.
‘‘எத்தகோவ பரிவத்தனஹாரஸம்பாதோ பரிபுண்ணோ’’தி வத்தப்³ப³த்தா ‘‘நியுத்தோ பரிவத்தனோ ஹாரஸம்பாதோ’’தி வுத்தங். யேன யேன ஸங்வண்ணனாவிஸேஸபூ⁴தேன பரிவத்தனஹாரஸம்பாதேன ஸுத்தப்பதே³ஸத்தா² பரிவத்தேதப்³பா³, ஸோ ஸோ ஸங்வண்ணனாவிஸேஸபூ⁴தோ பரிவத்தனஹாரஸம்பாதோ நியுத்தோ யதா²ரஹங் நீஹரித்வா யுஜ்ஜிதப்³போ³தி அத்தோ² க³ஹேதப்³போ³தி.
‘‘Ettakova parivattanahārasampāto paripuṇṇo’’ti vattabbattā ‘‘niyutto parivattano hārasampāto’’ti vuttaṃ. Yena yena saṃvaṇṇanāvisesabhūtena parivattanahārasampātena suttappadesatthā parivattetabbā, so so saṃvaṇṇanāvisesabhūto parivattanahārasampāto niyutto yathārahaṃ nīharitvā yujjitabboti attho gahetabboti.
இதி பரிவத்தனஹாரஸம்பாதே ஸத்திப³லானுரூபா ரசிதா
Iti parivattanahārasampāte sattibalānurūpā racitā
விபா⁴வனா நிட்டி²தா.
Vibhāvanā niṭṭhitā.
பண்டி³தேஹி பன…பே॰… க³ஹேதப்³போ³தி.
Paṇḍitehi pana…pe… gahetabboti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / நெத்திப்பகரணபாளி • Nettippakaraṇapāḷi / 9. பரிவத்தனஹாரஸம்பாதோ • 9. Parivattanahārasampāto
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / நெத்திப்பகரண-அட்ட²கதா² • Nettippakaraṇa-aṭṭhakathā / 9. பரிவத்தனஹாரஸம்பாதவண்ணனா • 9. Parivattanahārasampātavaṇṇanā
