| Library / Tipiṭaka / තිපිටක • Tipiṭaka / නෙත්‌තිවිභාවිනී • Nettivibhāvinī |
9. පරිවත්‌තනහාරසම්‌පාතවිභාවනා
9. Parivattanahārasampātavibhāvanā
71. යෙන යෙන විභත්‌තිහාරසම්‌පාතෙන සුත්‌තප්‌පදෙසත්‌ථා විභත්‌තා, සො විභත්‌තිහාරසම්‌පාතො පරිපුණ්‌ණො, ‘‘කතමො පරිවත්‌තනහාරසම්‌පාතො’’ති පුච්‌ඡිතබ්‌බත්‌තා ‘‘තත්‌ථ කතමො පරිවත්‌තනො හාරසම්‌පාතො’’තිආදි වුත්‌තං.
71. Yena yena vibhattihārasampātena suttappadesatthā vibhattā, so vibhattihārasampāto paripuṇṇo, ‘‘katamo parivattanahārasampāto’’ti pucchitabbattā ‘‘tattha katamo parivattano hārasampāto’’tiādi vuttaṃ.
‘‘කතමෙ සුත්‌තප්‌පදෙසත්‌ථා කථං පරිවත්‌තෙතබ්‌බා’’ති පුච්‌ඡිතබ්‌බත්‌තා ‘‘තස්‌මා’’තිආදි වුත්‌තං. යා ‘‘තස්‌මා…පෙ.… ගොචරො’’ති ගාථා වුත්‌තා, තාය ගාථාය යා සමථවිපස්‌සනා නිද්‌ධාරිතා, තාය සමථවිපස්‌සනාය භාවිතාය අකුසලානං නිරොධො ඵලං පයොජනං හොති, පරිඤ්‌ඤාතං දුක්‌ඛං හොති, සමුදයො පහීනො හොති, මග්‌ගො භාවිතො හොතීති පරිවත්‌තෙතබ්‌බො. පටිපක්‌ඛෙන පන සමථවිපස්‌සනාය අභාවිතාය අකුසලානං අනිරොධො, අපරිඤ්‌ඤාතං දුක්‌ඛං, සමුදයො අප්‌පහීනො, මග්‌ගො අභාවිතො හොතීති පරිවත්‌තෙතබ්‌බො.
‘‘Katame suttappadesatthā kathaṃ parivattetabbā’’ti pucchitabbattā ‘‘tasmā’’tiādi vuttaṃ. Yā ‘‘tasmā…pe… gocaro’’ti gāthā vuttā, tāya gāthāya yā samathavipassanā niddhāritā, tāya samathavipassanāya bhāvitāya akusalānaṃ nirodho phalaṃ payojanaṃ hoti, pariññātaṃ dukkhaṃ hoti, samudayo pahīno hoti, maggo bhāvito hotīti parivattetabbo. Paṭipakkhena pana samathavipassanāya abhāvitāya akusalānaṃ anirodho, apariññātaṃ dukkhaṃ, samudayo appahīno, maggo abhāvito hotīti parivattetabbo.
‘‘එත්‌තකොව පරිවත්‌තනහාරසම්‌පාතො පරිපුණ්‌ණො’’ති වත්‌තබ්‌බත්‌තා ‘‘නියුත්‌තො පරිවත්‌තනො හාරසම්‌පාතො’’ති වුත්‌තං. යෙන යෙන සංවණ්‌ණනාවිසෙසභූතෙන පරිවත්‌තනහාරසම්‌පාතෙන සුත්‌තප්‌පදෙසත්‌ථා පරිවත්‌තෙතබ්‌බා, සො සො සංවණ්‌ණනාවිසෙසභූතො පරිවත්‌තනහාරසම්‌පාතො නියුත්‌තො යථාරහං නීහරිත්‌වා යුජ්‌ජිතබ්‌බොති අත්‌ථො ගහෙතබ්‌බොති.
‘‘Ettakova parivattanahārasampāto paripuṇṇo’’ti vattabbattā ‘‘niyutto parivattano hārasampāto’’ti vuttaṃ. Yena yena saṃvaṇṇanāvisesabhūtena parivattanahārasampātena suttappadesatthā parivattetabbā, so so saṃvaṇṇanāvisesabhūto parivattanahārasampāto niyutto yathārahaṃ nīharitvā yujjitabboti attho gahetabboti.
ඉති පරිවත්‌තනහාරසම්‌පාතෙ සත්‌තිබලානුරූපා රචිතා
Iti parivattanahārasampāte sattibalānurūpā racitā
විභාවනා නිට්‌ඨිතා.
Vibhāvanā niṭṭhitā.
පණ්‌ඩිතෙහි පන…පෙ.… ගහෙතබ්‌බොති.
Paṇḍitehi pana…pe… gahetabboti.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / නෙත්‌තිප්‌පකරණපාළි • Nettippakaraṇapāḷi / 9. පරිවත්‌තනහාරසම්‌පාතො • 9. Parivattanahārasampāto
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / නෙත්‌තිප්‌පකරණ-අට්‌ඨකථා • Nettippakaraṇa-aṭṭhakathā / 9. පරිවත්‌තනහාරසම්‌පාතවණ්‌ණනා • 9. Parivattanahārasampātavaṇṇanā
