| Library / Tipiṭaka / திபிடக • Tipiṭaka / நெத்திப்பகரண-டீகா • Nettippakaraṇa-ṭīkā |
9. பரிவத்தனஹாரவிப⁴ங்க³வண்ணனா
9. Parivattanahāravibhaṅgavaṇṇanā
35. ஸம்மாதி³ட்டி²ஸ்ஸ…பே॰… நிஜ்ஜிண்ணா ப⁴வதீதி எத்த² யதா² மக்³க³ஸம்மாதி³ட்டி²வஸேனத்தோ² வுத்தோ, ஏவங் கம்மஸ்ஸகதாகம்மபத²ஸம்மாதி³ட்டீ²னம்பி வஸேன அத்தோ² லப்³ப⁴தேவ. கம்மபத²கதா² ஹேஸா. யதா²வுத்தேனாகாரேனாதி ‘‘அவிமுத்தாவ ஸமானா’’தி, ‘‘அவிமுத்திய’’ந்தி ச வுத்தப்பகாரேன. மிச்சா²பி⁴னிவேஸவஸேனாதி அஸம்மாஸம்பு³த்³த⁴ங் ஏவ ஸம்மாஸம்பு³த்³தோ⁴தி, அனிய்யானிகங் ஏவ நிய்யானிகோதி, அஸந்தங் ஏவ பன ஸந்தந்தி, அனரியங் ஏவ அரியோதி விபரீதாபி⁴னிவேஸவஸேன . மிச்சா²தி⁴மொக்கோ²தி அயாதா²வபஸாதோ³, அயாதா²வஸன்னிட்டா²னங் வா. உப்பன்னமோஹோ மிச்சா²விமுத்திஞாணத³ஸ்ஸனந்தி ஸம்ப³ந்தோ⁴.
35.Sammādiṭṭhissa…pe… nijjiṇṇā bhavatīti ettha yathā maggasammādiṭṭhivasenattho vutto, evaṃ kammassakatākammapathasammādiṭṭhīnampi vasena attho labbhateva. Kammapathakathā hesā. Yathāvuttenākārenāti ‘‘avimuttāva samānā’’ti, ‘‘avimuttiya’’nti ca vuttappakārena. Micchābhinivesavasenāti asammāsambuddhaṃ eva sammāsambuddhoti, aniyyānikaṃ eva niyyānikoti, asantaṃ eva pana santanti, anariyaṃ eva ariyoti viparītābhinivesavasena . Micchādhimokkhoti ayāthāvapasādo, ayāthāvasanniṭṭhānaṃ vā. Uppannamoho micchāvimuttiñāṇadassananti sambandho.
36. வாதா³னங் வா அனுவாதா³ வாதா³னுவாதா³, தேஸங் வாதா³னங் உபாதா³தி அத்தோ². வாதா³னுபவத்தியோதி வாதா³னங் தோ³ஸானங் அனுபவத்தியோ.
36. Vādānaṃ vā anuvādā vādānuvādā, tesaṃ vādānaṃ upādāti attho. Vādānupavattiyoti vādānaṃ dosānaṃ anupavattiyo.
அந்தத்³வயபரிவத்தனந்தி காமஸுக²அத்தகிலமதா²னுயோக³ஸங்கா²தஸ்ஸ அந்தத்³வயஸ்ஸ படிபக்க²வஸேன பரிவத்தனங்.
Antadvayaparivattananti kāmasukhaattakilamathānuyogasaṅkhātassa antadvayassa paṭipakkhavasena parivattanaṃ.
ஏதேஸுபி வாரேஸூதி ‘‘நிய்யானிகோ த⁴ம்மோ தேஸங் அத⁴ம்மோ, ஸுகோ² தேஸங் அத⁴ம்மோ’’தி ச இமேஸு வாரேஸு. வுத்தனயேனாதி யதி³ அத்தபரிதாபனங் அத்தனோ து³க்கா²பனங் த⁴ம்மோ, த⁴ம்மஸ்ஸ படிவிருத்³தோ⁴ அத⁴ம்மோ ஸியா, து³க்க²ஸ்ஸ ச ஸுக²படிவிருத்³த⁴ந்தி ஜா²னமக்³க³ப²லஸுக²ஸ்ஸ, அனவஜ்ஜபச்சயபரிபோ⁴க³ஸுக²ஸ்ஸ ச தேஸங் அத⁴ம்மபா⁴வோ ஆபஜ்ஜதீதி ஏவங் வத்தப்³பா³. ‘‘யங் யங் வா பனாதிஆதி³னா’’தி இத³ங் அவஸேஸபாடா²மஸனங். எத்த² யங் யங் வா பன த⁴ம்மந்தி யங் வா தங் வா த⁴ம்மங், குஸலங் வா அகுஸலங் வா இட்ட²ங் வா அனிட்ட²ங் வாதி வுத்தங் ஹோதி. ரோசயதி வா உபக³ச்ச²தி வாதி சித்தேன ரோசதி, தி³ட்டி²யா உபக³ச்ச²தீதி. தஸ்ஸ தஸ்ஸ த⁴ம்மஸ்ஸ யோ படிபக்கோ²தி தஸ்ஸ தஸ்ஸ ருசிதஸ்ஸ, உபக³தஸ்ஸ வா த⁴ம்மஸ்ஸ யோ படிபக்கோ² நாம. ஸ்வஸ்ஸ அனிட்ட²தோ அஜ்ஜா²பன்னோ ப⁴வதீதி யோ த⁴ம்மோ அஸ்ஸ ருசிதஸ்ஸ, உபக³தஸ்ஸ வா த⁴ம்மஸ்ஸ அனிட்ட²தோ பச்சனீகதோ அப்³பு⁴பக³தோ ஹோதி, தேன படிபக்கே²ன தே³ஸனாய பரிவத்தனங் பரிவத்தனோ ஹாரோதி அத்தோ². தேனாஹ ‘‘படிபக்க²ஸ்ஸ லக்க²ணங் விபா⁴வேதீ’’தி.
Etesupi vāresūti ‘‘niyyāniko dhammo tesaṃ adhammo, sukho tesaṃ adhammo’’ti ca imesu vāresu. Vuttanayenāti yadi attaparitāpanaṃ attano dukkhāpanaṃ dhammo, dhammassa paṭiviruddho adhammo siyā, dukkhassa ca sukhapaṭiviruddhanti jhānamaggaphalasukhassa, anavajjapaccayaparibhogasukhassa ca tesaṃ adhammabhāvo āpajjatīti evaṃ vattabbā. ‘‘Yaṃ yaṃ vā panātiādinā’’ti idaṃ avasesapāṭhāmasanaṃ. Ettha yaṃ yaṃ vā pana dhammanti yaṃ vā taṃ vā dhammaṃ, kusalaṃ vā akusalaṃ vā iṭṭhaṃ vā aniṭṭhaṃ vāti vuttaṃ hoti. Rocayati vā upagacchati vāti cittena rocati, diṭṭhiyā upagacchatīti. Tassa tassa dhammassa yo paṭipakkhoti tassa tassa rucitassa, upagatassa vā dhammassa yo paṭipakkho nāma. Svassa aniṭṭhato ajjhāpanno bhavatīti yo dhammo assa rucitassa, upagatassa vā dhammassa aniṭṭhato paccanīkato abbhupagato hoti, tena paṭipakkhena desanāya parivattanaṃ parivattano hāroti attho. Tenāha ‘‘paṭipakkhassa lakkhaṇaṃ vibhāvetī’’ti.
பரிவத்தனஹாரவிப⁴ங்க³வண்ணனா நிட்டி²தா.
Parivattanahāravibhaṅgavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / நெத்திப்பகரணபாளி • Nettippakaraṇapāḷi / 9. பரிவத்தனஹாரவிப⁴ங்கோ³ • 9. Parivattanahāravibhaṅgo
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / நெத்திப்பகரண-அட்ட²கதா² • Nettippakaraṇa-aṭṭhakathā / 9. பரிவத்தனஹாரவிப⁴ங்க³வண்ணனா • 9. Parivattanahāravibhaṅgavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திவிபா⁴வினீ • Nettivibhāvinī / 9. பரிவத்தனஹாரவிப⁴ங்க³விபா⁴வனா • 9. Parivattanahāravibhaṅgavibhāvanā
