| Library / Tipiṭaka / තිපිටක • Tipiṭaka / නෙත්‌තිප්‌පකරණ-ටීකා • Nettippakaraṇa-ṭīkā |
9. පරිවත්‌තනහාරවිභඞ්‌ගවණ්‌ණනා
9. Parivattanahāravibhaṅgavaṇṇanā
35. සම්‌මාදිට්‌ඨිස්‌ස…පෙ.… නිජ්‌ජිණ්‌ණා භවතීති එත්‌ථ යථා මග්‌ගසම්‌මාදිට්‌ඨිවසෙනත්‌ථො වුත්‌තො, එවං කම්‌මස්‌සකතාකම්‌මපථසම්‌මාදිට්‌ඨීනම්‌පි වසෙන අත්‌ථො ලබ්‌භතෙව. කම්‌මපථකථා හෙසා. යථාවුත්‌තෙනාකාරෙනාති ‘‘අවිමුත්‌තාව සමානා’’ති, ‘‘අවිමුත්‌තිය’’න්‌ති ච වුත්‌තප්‌පකාරෙන. මිච්‌ඡාභිනිවෙසවසෙනාති අසම්‌මාසම්‌බුද්‌ධං එව සම්‌මාසම්‌බුද්‌ධොති, අනිය්‍යානිකං එව නිය්‍යානිකොති, අසන්‌තං එව පන සන්‌තන්‌ති, අනරියං එව අරියොති විපරීතාභිනිවෙසවසෙන . මිච්‌ඡාධිමොක්‌ඛොති අයාථාවපසාදො, අයාථාවසන්‌නිට්‌ඨානං වා. උප්‌පන්‌නමොහො මිච්‌ඡාවිමුත්‌තිඤාණදස්‌සනන්‌ති සම්‌බන්‌ධො.
35.Sammādiṭṭhissa…pe… nijjiṇṇā bhavatīti ettha yathā maggasammādiṭṭhivasenattho vutto, evaṃ kammassakatākammapathasammādiṭṭhīnampi vasena attho labbhateva. Kammapathakathā hesā. Yathāvuttenākārenāti ‘‘avimuttāva samānā’’ti, ‘‘avimuttiya’’nti ca vuttappakārena. Micchābhinivesavasenāti asammāsambuddhaṃ eva sammāsambuddhoti, aniyyānikaṃ eva niyyānikoti, asantaṃ eva pana santanti, anariyaṃ eva ariyoti viparītābhinivesavasena . Micchādhimokkhoti ayāthāvapasādo, ayāthāvasanniṭṭhānaṃ vā. Uppannamoho micchāvimuttiñāṇadassananti sambandho.
36. වාදානං වා අනුවාදා වාදානුවාදා, තෙසං වාදානං උපාදාති අත්‌ථො. වාදානුපවත්‌තියොති වාදානං දොසානං අනුපවත්‌තියො.
36. Vādānaṃ vā anuvādā vādānuvādā, tesaṃ vādānaṃ upādāti attho. Vādānupavattiyoti vādānaṃ dosānaṃ anupavattiyo.
අන්‌තද්‌වයපරිවත්‌තනන්‌ති කාමසුඛඅත්‌තකිලමථානුයොගසඞ්‌ඛාතස්‌ස අන්‌තද්‌වයස්‌ස පටිපක්‌ඛවසෙන පරිවත්‌තනං.
Antadvayaparivattananti kāmasukhaattakilamathānuyogasaṅkhātassa antadvayassa paṭipakkhavasena parivattanaṃ.
එතෙසුපි වාරෙසූති ‘‘නිය්‍යානිකො ධම්‌මො තෙසං අධම්‌මො, සුඛො තෙසං අධම්‌මො’’ති ච ඉමෙසු වාරෙසු. වුත්‌තනයෙනාති යදි අත්‌තපරිතාපනං අත්‌තනො දුක්‌ඛාපනං ධම්‌මො, ධම්‌මස්‌ස පටිවිරුද්‌ධො අධම්‌මො සියා, දුක්‌ඛස්‌ස ච සුඛපටිවිරුද්‌ධන්‌ති ඣානමග්‌ගඵලසුඛස්‌ස, අනවජ්‌ජපච්‌චයපරිභොගසුඛස්‌ස ච තෙසං අධම්‌මභාවො ආපජ්‌ජතීති එවං වත්‌තබ්‌බා. ‘‘යං යං වා පනාතිආදිනා’’ති ඉදං අවසෙසපාඨාමසනං. එත්‌ථ යං යං වා පන ධම්‌මන්‌ති යං වා තං වා ධම්‌මං, කුසලං වා අකුසලං වා ඉට්‌ඨං වා අනිට්‌ඨං වාති වුත්‌තං හොති. රොචයති වා උපගච්‌ඡති වාති චිත්‌තෙන රොචති, දිට්‌ඨියා උපගච්‌ඡතීති. තස්‌ස තස්‌ස ධම්‌මස්‌ස යො පටිපක්‌ඛොති තස්‌ස තස්‌ස රුචිතස්‌ස, උපගතස්‌ස වා ධම්‌මස්‌ස යො පටිපක්‌ඛො නාම. ස්‌වස්‌ස අනිට්‌ඨතො අජ්‌ඣාපන්‌නො භවතීති යො ධම්‌මො අස්‌ස රුචිතස්‌ස, උපගතස්‌ස වා ධම්‌මස්‌ස අනිට්‌ඨතො පච්‌චනීකතො අබ්‌භුපගතො හොති, තෙන පටිපක්‌ඛෙන දෙසනාය පරිවත්‌තනං පරිවත්‌තනො හාරොති අත්‌ථො. තෙනාහ ‘‘පටිපක්‌ඛස්‌ස ලක්‌ඛණං විභාවෙතී’’ති.
Etesupi vāresūti ‘‘niyyāniko dhammo tesaṃ adhammo, sukho tesaṃ adhammo’’ti ca imesu vāresu. Vuttanayenāti yadi attaparitāpanaṃ attano dukkhāpanaṃ dhammo, dhammassa paṭiviruddho adhammo siyā, dukkhassa ca sukhapaṭiviruddhanti jhānamaggaphalasukhassa, anavajjapaccayaparibhogasukhassa ca tesaṃ adhammabhāvo āpajjatīti evaṃ vattabbā. ‘‘Yaṃ yaṃ vā panātiādinā’’ti idaṃ avasesapāṭhāmasanaṃ. Ettha yaṃ yaṃ vā pana dhammanti yaṃ vā taṃ vā dhammaṃ, kusalaṃ vā akusalaṃ vā iṭṭhaṃ vā aniṭṭhaṃ vāti vuttaṃ hoti. Rocayati vā upagacchati vāti cittena rocati, diṭṭhiyā upagacchatīti. Tassa tassa dhammassa yo paṭipakkhoti tassa tassa rucitassa, upagatassa vā dhammassa yo paṭipakkho nāma. Svassa aniṭṭhato ajjhāpanno bhavatīti yo dhammo assa rucitassa, upagatassa vā dhammassa aniṭṭhato paccanīkato abbhupagato hoti, tena paṭipakkhena desanāya parivattanaṃ parivattano hāroti attho. Tenāha ‘‘paṭipakkhassa lakkhaṇaṃ vibhāvetī’’ti.
පරිවත්‌තනහාරවිභඞ්‌ගවණ්‌ණනා නිට්‌ඨිතා.
Parivattanahāravibhaṅgavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / නෙත්‌තිප්‌පකරණපාළි • Nettippakaraṇapāḷi / 9. පරිවත්‌තනහාරවිභඞ්‌ගො • 9. Parivattanahāravibhaṅgo
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / නෙත්‌තිප්‌පකරණ-අට්‌ඨකථා • Nettippakaraṇa-aṭṭhakathā / 9. පරිවත්‌තනහාරවිභඞ්‌ගවණ්‌ණනා • 9. Parivattanahāravibhaṅgavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / ඛුද්‌දකනිකාය (ටීකා) • Khuddakanikāya (ṭīkā) / නෙත්‌තිවිභාවිනී • Nettivibhāvinī / 9. පරිවත්‌තනහාරවිභඞ්‌ගවිභාවනා • 9. Parivattanahāravibhaṅgavibhāvanā
