| Library / Tipiṭaka / திபிடக • Tipiṭaka / நெத்திப்பகரணபாளி • Nettippakaraṇapāḷi |
9. பரிவத்தனஹாரவிப⁴ங்கோ³
9. Parivattanahāravibhaṅgo
35. தத்த² கதமோ பரிவத்தனோ ஹாரோ? ‘‘குஸலாகுஸலே த⁴ம்மே’’தி. ஸம்மாதி³ட்டி²ஸ்ஸ புரிஸபுக்³க³லஸ்ஸ மிச்சா²தி³ட்டி² நிஜ்ஜிண்ணா ப⁴வதி. யே சஸ்ஸ மிச்சா²தி³ட்டி²பச்சயா உப்பஜ்ஜெய்யுங் அனேகே 1 பாபகா அகுஸலா த⁴ம்மா, தே சஸ்ஸ நிஜ்ஜிண்ணா ஹொந்தி. ஸம்மாதி³ட்டி²பச்சயா சஸ்ஸ அனேகே குஸலா த⁴ம்மா ஸம்ப⁴வந்தி, தே சஸ்ஸ பா⁴வனாபாரிபூரிங் க³ச்ச²ந்தி. ஸம்மாஸங்கப்பஸ்ஸ புரிஸபுக்³க³லஸ்ஸ மிச்சா²ஸங்கப்போ நிஜ்ஜிண்ணோ ப⁴வதி. யே சஸ்ஸ மிச்சா²ஸங்கப்பபச்சயா உப்பஜ்ஜெய்யுங் அனேகே பாபகா அகுஸலா த⁴ம்மா, தே சஸ்ஸ நிஜ்ஜிண்ணா ஹொந்தி. ஸம்மாஸங்கப்பபச்சயா சஸ்ஸ அனேகே குஸலா த⁴ம்மா ஸம்ப⁴வந்தி. தே சஸ்ஸ பா⁴வனாபாரிபூரிங் க³ச்ச²ந்தி. ஏவங் ஸம்மாவாசஸ்ஸ ஸம்மாகம்மந்தஸ்ஸ ஸம்மாஆஜீவஸ்ஸ ஸம்மாவாயாமஸ்ஸ ஸம்மாஸதிஸ்ஸ ஸம்மாஸமாதி⁴ஸ்ஸ ஸம்மாவிமுத்தஸ்ஸ ஸம்மாவிமுத்திஞாணத³ஸ்ஸனஸ்ஸ புரிஸபுக்³க³லஸ்ஸ மிச்சா²விமுத்திஞாணத³ஸ்ஸனங் நிஜ்ஜிண்ணங் ப⁴வதி. யே சஸ்ஸ மிச்சா²விமுத்திஞாணத³ஸ்ஸனபச்சயா உப்பஜ்ஜெய்யுங் அனேகே பாபகா அகுஸலா த⁴ம்மா, தே சஸ்ஸ நிஜ்ஜிண்ணா ஹொந்தி. ஸம்மாவிமுத்திஞாணத³ஸ்ஸனபச்சயா சஸ்ஸ அனேகே குஸலா த⁴ம்மா ஸம்ப⁴வந்தி, தே சஸ்ஸ பா⁴வனாபாரிபூரிங் க³ச்ச²ந்தி.
35. Tattha katamo parivattano hāro? ‘‘Kusalākusale dhamme’’ti. Sammādiṭṭhissa purisapuggalassa micchādiṭṭhi nijjiṇṇā bhavati. Ye cassa micchādiṭṭhipaccayā uppajjeyyuṃ aneke 2 pāpakā akusalā dhammā, te cassa nijjiṇṇā honti. Sammādiṭṭhipaccayā cassa aneke kusalā dhammā sambhavanti, te cassa bhāvanāpāripūriṃ gacchanti. Sammāsaṅkappassa purisapuggalassa micchāsaṅkappo nijjiṇṇo bhavati. Ye cassa micchāsaṅkappapaccayā uppajjeyyuṃ aneke pāpakā akusalā dhammā, te cassa nijjiṇṇā honti. Sammāsaṅkappapaccayā cassa aneke kusalā dhammā sambhavanti. Te cassa bhāvanāpāripūriṃ gacchanti. Evaṃ sammāvācassa sammākammantassa sammāājīvassa sammāvāyāmassa sammāsatissa sammāsamādhissa sammāvimuttassa sammāvimuttiñāṇadassanassa purisapuggalassa micchāvimuttiñāṇadassanaṃ nijjiṇṇaṃ bhavati. Ye cassa micchāvimuttiñāṇadassanapaccayā uppajjeyyuṃ aneke pāpakā akusalā dhammā, te cassa nijjiṇṇā honti. Sammāvimuttiñāṇadassanapaccayā cassa aneke kusalā dhammā sambhavanti, te cassa bhāvanāpāripūriṃ gacchanti.
36. யஸ்ஸ வா பாணாதிபாதா படிவிரதஸ்ஸ பாணாதிபாதோ பஹீனோ ஹோதி. அதி³ன்னாதா³னா படிவிரதஸ்ஸ அதி³ன்னாதா³னங் பஹீனங் ஹோதி. ப்³ரஹ்மசாரிஸ்ஸ அப்³ரஹ்மசரியங் பஹீனங் ஹோதி. ஸச்சவாதி³ஸ்ஸ முஸாவாதோ³ பஹீனோ ஹோதி. அபிஸுணவாசஸ்ஸ பிஸுணா வாசா பஹீனா ஹோதி. ஸண்ஹவாசஸ்ஸ ப²ருஸா வாசா பஹீனா ஹோதி. காலவாதி³ஸ்ஸ ஸம்ப²ப்பலாபோ பஹீனோ ஹோதி. அனபி⁴ஜ்ஜா²லுஸ்ஸ 3 அபி⁴ஜ்ஜா² பஹீனா ஹோதி. அப்³யாபன்னசித்தஸ்ஸ ப்³யாபாதோ³ பஹீனோ ஹோதி. ஸம்மாதி³ட்டி²ஸ்ஸ மிச்சா²தி³ட்டி² பஹீனா ஹோதி.
36. Yassa vā pāṇātipātā paṭiviratassa pāṇātipāto pahīno hoti. Adinnādānā paṭiviratassa adinnādānaṃ pahīnaṃ hoti. Brahmacārissa abrahmacariyaṃ pahīnaṃ hoti. Saccavādissa musāvādo pahīno hoti. Apisuṇavācassa pisuṇā vācā pahīnā hoti. Saṇhavācassa pharusā vācā pahīnā hoti. Kālavādissa samphappalāpo pahīno hoti. Anabhijjhālussa 4 abhijjhā pahīnā hoti. Abyāpannacittassa byāpādo pahīno hoti. Sammādiṭṭhissa micchādiṭṭhi pahīnā hoti.
யே ச கோ² கேசி அரியங் அட்ட²ங்கி³கங் மக்³க³ங் க³ரஹந்தி, நேஸங் ஸந்தி³ட்டி²கா ஸஹத⁴ம்மிகா கா³ரய்ஹா வாதா³னுவாதா³ ஆக³ச்ச²ந்தி. ஸம்மாதி³ட்டி²ஞ்ச தே ப⁴வந்தோ த⁴ம்மங் க³ரஹந்தி. தேன ஹி யே மிச்சா²தி³ட்டி²கா, தேஸங் ப⁴வந்தானங் புஜ்ஜா ச பாஸங்ஸா ச. ஏவங் ஸம்மாஸங்கப்பங் ஸம்மாவாசங் ஸம்மாகம்மந்தங் ஸம்மாஆஜீவங் ஸம்மாவாயாமங் ஸம்மாஸதிங் ஸம்மாஸமாதி⁴ங் ஸம்மாவிமுத்திங் ஸம்மாவிமுத்திஞாணத³ஸ்ஸனஞ்ச தே ப⁴வந்தோ த⁴ம்மங் க³ரஹந்தி. தேன ஹி யே மிச்சா²விமுத்திஞாணத³ஸ்ஸனா, தேஸங் ப⁴வந்தானங் புஜ்ஜா ச பாஸங்ஸா ச.
Ye ca kho keci ariyaṃ aṭṭhaṅgikaṃ maggaṃ garahanti, nesaṃ sandiṭṭhikā sahadhammikā gārayhā vādānuvādā āgacchanti. Sammādiṭṭhiñca te bhavanto dhammaṃ garahanti. Tena hi ye micchādiṭṭhikā, tesaṃ bhavantānaṃ pujjā ca pāsaṃsā ca. Evaṃ sammāsaṅkappaṃ sammāvācaṃ sammākammantaṃ sammāājīvaṃ sammāvāyāmaṃ sammāsatiṃ sammāsamādhiṃ sammāvimuttiṃ sammāvimuttiñāṇadassanañca te bhavanto dhammaṃ garahanti. Tena hi ye micchāvimuttiñāṇadassanā, tesaṃ bhavantānaṃ pujjā ca pāsaṃsā ca.
யே ச கோ² கேசி ஏவமாஹங்ஸு ‘‘பு⁴ஞ்ஜிதப்³பா³ காமா, பரிபு⁴ஞ்ஜிதப்³பா³ காமா, ஆஸேவிதப்³பா³ காமா, நிஸேவிதப்³பா³ காமா, பா⁴வயிதப்³பா³ காமா, ப³ஹுலீகாதப்³பா³ காமா’’தி. காமேஹி வேரமணீ தேஸங் அத⁴ம்மோ.
Ye ca kho keci evamāhaṃsu ‘‘bhuñjitabbā kāmā, paribhuñjitabbā kāmā, āsevitabbā kāmā, nisevitabbā kāmā, bhāvayitabbā kāmā, bahulīkātabbā kāmā’’ti. Kāmehi veramaṇī tesaṃ adhammo.
யே வா பன கேசி ஏவமாஹங்ஸு ‘‘அத்தகிலமதா²னுயோகோ³ த⁴ம்மோ’’தி. நிய்யானிகோ தேஸங் த⁴ம்மோ அத⁴ம்மோ. யே ச கோ² கேசி ஏவமாஹங்ஸு ‘‘து³க்கோ² த⁴ம்மோ’’தி. ஸுகோ² தேஸங் த⁴ம்மோ அத⁴ம்மோ. யதா² வா பன பி⁴க்கு²னோ ஸப்³ப³ஸங்கா²ரேஸு அஸுபா⁴னுபஸ்ஸினோ விஹரதோ ஸுப⁴ஸஞ்ஞா பஹீயந்தி. து³க்கா²னுபஸ்ஸினோ விஹரதோ ஸுக²ஸஞ்ஞா பஹீயந்தி. அனிச்சானுபஸ்ஸினோ விஹரதோ நிச்சஸஞ்ஞா பஹீயந்தி. அனத்தானுபஸ்ஸினோ விஹரதோ அத்தஸஞ்ஞா பஹீயந்தி. யங் யங் வா பன த⁴ம்மங் ரோசயதி வா உபக³ச்ச²தி வா, தஸ்ஸ தஸ்ஸ த⁴ம்மஸ்ஸ யோ படிபக்கோ², ஸ்வஸ்ஸ அனிட்ட²தோ அஜ்ஜா²பன்னோ ப⁴வதி. தேனாஹ ஆயஸ்மா மஹாகச்சாயனோ ‘‘குஸலாகுஸலத⁴ம்மே’’தி.
Ye vā pana keci evamāhaṃsu ‘‘attakilamathānuyogo dhammo’’ti. Niyyāniko tesaṃ dhammo adhammo. Ye ca kho keci evamāhaṃsu ‘‘dukkho dhammo’’ti. Sukho tesaṃ dhammo adhammo. Yathā vā pana bhikkhuno sabbasaṅkhāresu asubhānupassino viharato subhasaññā pahīyanti. Dukkhānupassino viharato sukhasaññā pahīyanti. Aniccānupassino viharato niccasaññā pahīyanti. Anattānupassino viharato attasaññā pahīyanti. Yaṃ yaṃ vā pana dhammaṃ rocayati vā upagacchati vā, tassa tassa dhammassa yo paṭipakkho, svassa aniṭṭhato ajjhāpanno bhavati. Tenāha āyasmā mahākaccāyano ‘‘kusalākusaladhamme’’ti.
நியுத்தோ பரிவத்தனோ ஹாரோ.
Niyutto parivattano hāro.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / நெத்திப்பகரண-அட்ட²கதா² • Nettippakaraṇa-aṭṭhakathā / 9. பரிவத்தனஹாரவிப⁴ங்க³வண்ணனா • 9. Parivattanahāravibhaṅgavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திப்பகரண-டீகா • Nettippakaraṇa-ṭīkā / 9. பரிவத்தனஹாரவிப⁴ங்க³வண்ணனா • 9. Parivattanahāravibhaṅgavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திவிபா⁴வினீ • Nettivibhāvinī / 9. பரிவத்தனஹாரவிப⁴ங்க³விபா⁴வனா • 9. Parivattanahāravibhaṅgavibhāvanā
