| Library / Tipiṭaka / তিপিটক • Tipiṭaka / নেত্তিপ্পকরণপাল়ি • Nettippakaraṇapāḷi |
৯. পরিৰত্তনহারৰিভঙ্গো
9. Parivattanahāravibhaṅgo
৩৫. তত্থ কতমো পরিৰত্তনো হারো? ‘‘কুসলাকুসলে ধম্মে’’তি। সম্মাদিট্ঠিস্স পুরিসপুগ্গলস্স মিচ্ছাদিট্ঠি নিজ্জিণ্ণা ভৰতি। যে চস্স মিচ্ছাদিট্ঠিপচ্চযা উপ্পজ্জেয্যুং অনেকে 1 পাপকা অকুসলা ধম্মা, তে চস্স নিজ্জিণ্ণা হোন্তি। সম্মাদিট্ঠিপচ্চযা চস্স অনেকে কুসলা ধম্মা সম্ভৰন্তি, তে চস্স ভাৰনাপারিপূরিং গচ্ছন্তি। সম্মাসঙ্কপ্পস্স পুরিসপুগ্গলস্স মিচ্ছাসঙ্কপ্পো নিজ্জিণ্ণো ভৰতি। যে চস্স মিচ্ছাসঙ্কপ্পপচ্চযা উপ্পজ্জেয্যুং অনেকে পাপকা অকুসলা ধম্মা, তে চস্স নিজ্জিণ্ণা হোন্তি। সম্মাসঙ্কপ্পপচ্চযা চস্স অনেকে কুসলা ধম্মা সম্ভৰন্তি। তে চস্স ভাৰনাপারিপূরিং গচ্ছন্তি। এৰং সম্মাৰাচস্স সম্মাকম্মন্তস্স সম্মাআজীৰস্স সম্মাৰাযামস্স সম্মাসতিস্স সম্মাসমাধিস্স সম্মাৰিমুত্তস্স সম্মাৰিমুত্তিঞাণদস্সনস্স পুরিসপুগ্গলস্স মিচ্ছাৰিমুত্তিঞাণদস্সনং নিজ্জিণ্ণং ভৰতি। যে চস্স মিচ্ছাৰিমুত্তিঞাণদস্সনপচ্চযা উপ্পজ্জেয্যুং অনেকে পাপকা অকুসলা ধম্মা, তে চস্স নিজ্জিণ্ণা হোন্তি। সম্মাৰিমুত্তিঞাণদস্সনপচ্চযা চস্স অনেকে কুসলা ধম্মা সম্ভৰন্তি, তে চস্স ভাৰনাপারিপূরিং গচ্ছন্তি।
35. Tattha katamo parivattano hāro? ‘‘Kusalākusale dhamme’’ti. Sammādiṭṭhissa purisapuggalassa micchādiṭṭhi nijjiṇṇā bhavati. Ye cassa micchādiṭṭhipaccayā uppajjeyyuṃ aneke 2 pāpakā akusalā dhammā, te cassa nijjiṇṇā honti. Sammādiṭṭhipaccayā cassa aneke kusalā dhammā sambhavanti, te cassa bhāvanāpāripūriṃ gacchanti. Sammāsaṅkappassa purisapuggalassa micchāsaṅkappo nijjiṇṇo bhavati. Ye cassa micchāsaṅkappapaccayā uppajjeyyuṃ aneke pāpakā akusalā dhammā, te cassa nijjiṇṇā honti. Sammāsaṅkappapaccayā cassa aneke kusalā dhammā sambhavanti. Te cassa bhāvanāpāripūriṃ gacchanti. Evaṃ sammāvācassa sammākammantassa sammāājīvassa sammāvāyāmassa sammāsatissa sammāsamādhissa sammāvimuttassa sammāvimuttiñāṇadassanassa purisapuggalassa micchāvimuttiñāṇadassanaṃ nijjiṇṇaṃ bhavati. Ye cassa micchāvimuttiñāṇadassanapaccayā uppajjeyyuṃ aneke pāpakā akusalā dhammā, te cassa nijjiṇṇā honti. Sammāvimuttiñāṇadassanapaccayā cassa aneke kusalā dhammā sambhavanti, te cassa bhāvanāpāripūriṃ gacchanti.
৩৬. যস্স ৰা পাণাতিপাতা পটিৰিরতস্স পাণাতিপাতো পহীনো হোতি। অদিন্নাদানা পটিৰিরতস্স অদিন্নাদানং পহীনং হোতি। ব্রহ্মচারিস্স অব্রহ্মচরিযং পহীনং হোতি। সচ্চৰাদিস্স মুসাৰাদো পহীনো হোতি। অপিসুণৰাচস্স পিসুণা ৰাচা পহীনা হোতি। সণ্হৰাচস্স ফরুসা ৰাচা পহীনা হোতি। কালৰাদিস্স সম্ফপ্পলাপো পহীনো হোতি। অনভিজ্ঝালুস্স 3 অভিজ্ঝা পহীনা হোতি। অব্যাপন্নচিত্তস্স ব্যাপাদো পহীনো হোতি। সম্মাদিট্ঠিস্স মিচ্ছাদিট্ঠি পহীনা হোতি।
36. Yassa vā pāṇātipātā paṭiviratassa pāṇātipāto pahīno hoti. Adinnādānā paṭiviratassa adinnādānaṃ pahīnaṃ hoti. Brahmacārissa abrahmacariyaṃ pahīnaṃ hoti. Saccavādissa musāvādo pahīno hoti. Apisuṇavācassa pisuṇā vācā pahīnā hoti. Saṇhavācassa pharusā vācā pahīnā hoti. Kālavādissa samphappalāpo pahīno hoti. Anabhijjhālussa 4 abhijjhā pahīnā hoti. Abyāpannacittassa byāpādo pahīno hoti. Sammādiṭṭhissa micchādiṭṭhi pahīnā hoti.
যে চ খো কেচি অরিযং অট্ঠঙ্গিকং মগ্গং গরহন্তি, নেসং সন্দিট্ঠিকা সহধম্মিকা গারয্হা ৰাদানুৰাদা আগচ্ছন্তি। সম্মাদিট্ঠিঞ্চ তে ভৰন্তো ধম্মং গরহন্তি। তেন হি যে মিচ্ছাদিট্ঠিকা, তেসং ভৰন্তানং পুজ্জা চ পাসংসা চ। এৰং সম্মাসঙ্কপ্পং সম্মাৰাচং সম্মাকম্মন্তং সম্মাআজীৰং সম্মাৰাযামং সম্মাসতিং সম্মাসমাধিং সম্মাৰিমুত্তিং সম্মাৰিমুত্তিঞাণদস্সনঞ্চ তে ভৰন্তো ধম্মং গরহন্তি। তেন হি যে মিচ্ছাৰিমুত্তিঞাণদস্সনা, তেসং ভৰন্তানং পুজ্জা চ পাসংসা চ।
Ye ca kho keci ariyaṃ aṭṭhaṅgikaṃ maggaṃ garahanti, nesaṃ sandiṭṭhikā sahadhammikā gārayhā vādānuvādā āgacchanti. Sammādiṭṭhiñca te bhavanto dhammaṃ garahanti. Tena hi ye micchādiṭṭhikā, tesaṃ bhavantānaṃ pujjā ca pāsaṃsā ca. Evaṃ sammāsaṅkappaṃ sammāvācaṃ sammākammantaṃ sammāājīvaṃ sammāvāyāmaṃ sammāsatiṃ sammāsamādhiṃ sammāvimuttiṃ sammāvimuttiñāṇadassanañca te bhavanto dhammaṃ garahanti. Tena hi ye micchāvimuttiñāṇadassanā, tesaṃ bhavantānaṃ pujjā ca pāsaṃsā ca.
যে চ খো কেচি এৰমাহংসু ‘‘ভুঞ্জিতব্বা কামা, পরিভুঞ্জিতব্বা কামা, আসেৰিতব্বা কামা, নিসেৰিতব্বা কামা, ভাৰযিতব্বা কামা, বহুলীকাতব্বা কামা’’তি। কামেহি ৰেরমণী তেসং অধম্মো।
Ye ca kho keci evamāhaṃsu ‘‘bhuñjitabbā kāmā, paribhuñjitabbā kāmā, āsevitabbā kāmā, nisevitabbā kāmā, bhāvayitabbā kāmā, bahulīkātabbā kāmā’’ti. Kāmehi veramaṇī tesaṃ adhammo.
যে ৰা পন কেচি এৰমাহংসু ‘‘অত্তকিলমথানুযোগো ধম্মো’’তি। নিয্যানিকো তেসং ধম্মো অধম্মো। যে চ খো কেচি এৰমাহংসু ‘‘দুক্খো ধম্মো’’তি। সুখো তেসং ধম্মো অধম্মো। যথা ৰা পন ভিক্খুনো সব্বসঙ্খারেসু অসুভানুপস্সিনো ৰিহরতো সুভসঞ্ঞা পহীযন্তি। দুক্খানুপস্সিনো ৰিহরতো সুখসঞ্ঞা পহীযন্তি। অনিচ্চানুপস্সিনো ৰিহরতো নিচ্চসঞ্ঞা পহীযন্তি। অনত্তানুপস্সিনো ৰিহরতো অত্তসঞ্ঞা পহীযন্তি। যং যং ৰা পন ধম্মং রোচযতি ৰা উপগচ্ছতি ৰা, তস্স তস্স ধম্মস্স যো পটিপক্খো, স্ৰস্স অনিট্ঠতো অজ্ঝাপন্নো ভৰতি। তেনাহ আযস্মা মহাকচ্চাযনো ‘‘কুসলাকুসলধম্মে’’তি।
Ye vā pana keci evamāhaṃsu ‘‘attakilamathānuyogo dhammo’’ti. Niyyāniko tesaṃ dhammo adhammo. Ye ca kho keci evamāhaṃsu ‘‘dukkho dhammo’’ti. Sukho tesaṃ dhammo adhammo. Yathā vā pana bhikkhuno sabbasaṅkhāresu asubhānupassino viharato subhasaññā pahīyanti. Dukkhānupassino viharato sukhasaññā pahīyanti. Aniccānupassino viharato niccasaññā pahīyanti. Anattānupassino viharato attasaññā pahīyanti. Yaṃ yaṃ vā pana dhammaṃ rocayati vā upagacchati vā, tassa tassa dhammassa yo paṭipakkho, svassa aniṭṭhato ajjhāpanno bhavati. Tenāha āyasmā mahākaccāyano ‘‘kusalākusaladhamme’’ti.
নিযুত্তো পরিৰত্তনো হারো।
Niyutto parivattano hāro.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / নেত্তিপ্পকরণ-অট্ঠকথা • Nettippakaraṇa-aṭṭhakathā / ৯. পরিৰত্তনহারৰিভঙ্গৰণ্ণনা • 9. Parivattanahāravibhaṅgavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / খুদ্দকনিকায (টীকা) • Khuddakanikāya (ṭīkā) / নেত্তিপ্পকরণ-টীকা • Nettippakaraṇa-ṭīkā / ৯. পরিৰত্তনহারৰিভঙ্গৰণ্ণনা • 9. Parivattanahāravibhaṅgavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / খুদ্দকনিকায (টীকা) • Khuddakanikāya (ṭīkā) / নেত্তিৰিভাৰিনী • Nettivibhāvinī / ৯. পরিৰত্তনহারৰিভঙ্গৰিভাৰনা • 9. Parivattanahāravibhaṅgavibhāvanā
