| Library / Tipiṭaka / တိပိဋက • Tipiṭaka / နေတ္တိပ္ပကရဏပာဠိ • Nettippakaraṇapāḷi |
၉. ပရိဝတ္တနဟာရဝိဘင္ဂော
9. Parivattanahāravibhaṅgo
၃၅. တတ္ထ ကတမော ပရိဝတ္တနော ဟာရော? ‘‘ကုသလာကုသလေ ဓမ္မေ’’တိ။ သမ္မာဒိဋ္ဌိသ္သ ပုရိသပုဂ္ဂလသ္သ မိစ္ဆာဒိဋ္ဌိ နိဇ္ဇိဏ္ဏာ ဘဝတိ။ ယေ စသ္သ မိစ္ဆာဒိဋ္ဌိပစ္စယာ ဥပ္ပဇ္ဇေယ္ယုံ အနေကေ 1 ပာပကာ အကုသလာ ဓမ္မာ, တေ စသ္သ နိဇ္ဇိဏ္ဏာ ဟောန္တိ။ သမ္မာဒိဋ္ဌိပစ္စယာ စသ္သ အနေကေ ကုသလာ ဓမ္မာ သမ္ဘဝန္တိ, တေ စသ္သ ဘာဝနာပာရိပူရိံ ဂစ္ဆန္တိ။ သမ္မာသင္ကပ္ပသ္သ ပုရိသပုဂ္ဂလသ္သ မိစ္ဆာသင္ကပ္ပော နိဇ္ဇိဏ္ဏော ဘဝတိ။ ယေ စသ္သ မိစ္ဆာသင္ကပ္ပပစ္စယာ ဥပ္ပဇ္ဇေယ္ယုံ အနေကေ ပာပကာ အကုသလာ ဓမ္မာ, တေ စသ္သ နိဇ္ဇိဏ္ဏာ ဟောန္တိ။ သမ္မာသင္ကပ္ပပစ္စယာ စသ္သ အနေကေ ကုသလာ ဓမ္မာ သမ္ဘဝန္တိ။ တေ စသ္သ ဘာဝနာပာရိပူရိံ ဂစ္ဆန္တိ။ ဧဝံ သမ္မာဝာစသ္သ သမ္မာကမ္မန္တသ္သ သမ္မာအာဇီဝသ္သ သမ္မာဝာယာမသ္သ သမ္မာသတိသ္သ သမ္မာသမာဓိသ္သ သမ္မာဝိမုတ္တသ္သ သမ္မာဝိမုတ္တိဉာဏဒသ္သနသ္သ ပုရိသပုဂ္ဂလသ္သ မိစ္ဆာဝိမုတ္တိဉာဏဒသ္သနံ နိဇ္ဇိဏ္ဏံ ဘဝတိ။ ယေ စသ္သ မိစ္ဆာဝိမုတ္တိဉာဏဒသ္သနပစ္စယာ ဥပ္ပဇ္ဇေယ္ယုံ အနေကေ ပာပကာ အကုသလာ ဓမ္မာ, တေ စသ္သ နိဇ္ဇိဏ္ဏာ ဟောန္တိ။ သမ္မာဝိမုတ္တိဉာဏဒသ္သနပစ္စယာ စသ္သ အနေကေ ကုသလာ ဓမ္မာ သမ္ဘဝန္တိ, တေ စသ္သ ဘာဝနာပာရိပူရိံ ဂစ္ဆန္တိ။
35. Tattha katamo parivattano hāro? ‘‘Kusalākusale dhamme’’ti. Sammādiṭṭhissa purisapuggalassa micchādiṭṭhi nijjiṇṇā bhavati. Ye cassa micchādiṭṭhipaccayā uppajjeyyuṃ aneke 2 pāpakā akusalā dhammā, te cassa nijjiṇṇā honti. Sammādiṭṭhipaccayā cassa aneke kusalā dhammā sambhavanti, te cassa bhāvanāpāripūriṃ gacchanti. Sammāsaṅkappassa purisapuggalassa micchāsaṅkappo nijjiṇṇo bhavati. Ye cassa micchāsaṅkappapaccayā uppajjeyyuṃ aneke pāpakā akusalā dhammā, te cassa nijjiṇṇā honti. Sammāsaṅkappapaccayā cassa aneke kusalā dhammā sambhavanti. Te cassa bhāvanāpāripūriṃ gacchanti. Evaṃ sammāvācassa sammākammantassa sammāājīvassa sammāvāyāmassa sammāsatissa sammāsamādhissa sammāvimuttassa sammāvimuttiñāṇadassanassa purisapuggalassa micchāvimuttiñāṇadassanaṃ nijjiṇṇaṃ bhavati. Ye cassa micchāvimuttiñāṇadassanapaccayā uppajjeyyuṃ aneke pāpakā akusalā dhammā, te cassa nijjiṇṇā honti. Sammāvimuttiñāṇadassanapaccayā cassa aneke kusalā dhammā sambhavanti, te cassa bhāvanāpāripūriṃ gacchanti.
၃၆. ယသ္သ ဝာ ပာဏာတိပာတာ ပဋိဝိရတသ္သ ပာဏာတိပာတော ပဟီနော ဟောတိ။ အဒိန္နာဒာနာ ပဋိဝိရတသ္သ အဒိန္နာဒာနံ ပဟီနံ ဟောတိ။ ဗ္ရဟ္မစာရိသ္သ အဗ္ရဟ္မစရိယံ ပဟီနံ ဟောတိ။ သစ္စဝာဒိသ္သ မုသာဝာဒော ပဟီနော ဟောတိ။ အပိသုဏဝာစသ္သ ပိသုဏာ ဝာစာ ပဟီနာ ဟောတိ။ သဏ္ဟဝာစသ္သ ဖရုသာ ဝာစာ ပဟီနာ ဟောတိ။ ကာလဝာဒိသ္သ သမ္ဖပ္ပလာပော ပဟီနော ဟောတိ။ အနဘိဇ္ဈာလုသ္သ 3 အဘိဇ္ဈာ ပဟီနာ ဟောတိ။ အဗ္ယာပန္နစိတ္တသ္သ ဗ္ယာပာဒော ပဟီနော ဟောတိ။ သမ္မာဒိဋ္ဌိသ္သ မိစ္ဆာဒိဋ္ဌိ ပဟီနာ ဟောတိ။
36. Yassa vā pāṇātipātā paṭiviratassa pāṇātipāto pahīno hoti. Adinnādānā paṭiviratassa adinnādānaṃ pahīnaṃ hoti. Brahmacārissa abrahmacariyaṃ pahīnaṃ hoti. Saccavādissa musāvādo pahīno hoti. Apisuṇavācassa pisuṇā vācā pahīnā hoti. Saṇhavācassa pharusā vācā pahīnā hoti. Kālavādissa samphappalāpo pahīno hoti. Anabhijjhālussa 4 abhijjhā pahīnā hoti. Abyāpannacittassa byāpādo pahīno hoti. Sammādiṭṭhissa micchādiṭṭhi pahīnā hoti.
ယေ စ ခော ကေစိ အရိယံ အဋ္ဌင္ဂိကံ မဂ္ဂံ ဂရဟန္တိ, နေသံ သန္ဒိဋ္ဌိကာ သဟဓမ္မိကာ ဂာရယ္ဟာ ဝာဒာနုဝာဒာ အာဂစ္ဆန္တိ။ သမ္မာဒိဋ္ဌိဉ္စ တေ ဘဝန္တော ဓမ္မံ ဂရဟန္တိ။ တေန ဟိ ယေ မိစ္ဆာဒိဋ္ဌိကာ, တေသံ ဘဝန္တာနံ ပုဇ္ဇာ စ ပာသံသာ စ။ ဧဝံ သမ္မာသင္ကပ္ပံ သမ္မာဝာစံ သမ္မာကမ္မန္တံ သမ္မာအာဇီဝံ သမ္မာဝာယာမံ သမ္မာသတိံ သမ္မာသမာဓိံ သမ္မာဝိမုတ္တိံ သမ္မာဝိမုတ္တိဉာဏဒသ္သနဉ္စ တေ ဘဝန္တော ဓမ္မံ ဂရဟန္တိ။ တေန ဟိ ယေ မိစ္ဆာဝိမုတ္တိဉာဏဒသ္သနာ, တေသံ ဘဝန္တာနံ ပုဇ္ဇာ စ ပာသံသာ စ။
Ye ca kho keci ariyaṃ aṭṭhaṅgikaṃ maggaṃ garahanti, nesaṃ sandiṭṭhikā sahadhammikā gārayhā vādānuvādā āgacchanti. Sammādiṭṭhiñca te bhavanto dhammaṃ garahanti. Tena hi ye micchādiṭṭhikā, tesaṃ bhavantānaṃ pujjā ca pāsaṃsā ca. Evaṃ sammāsaṅkappaṃ sammāvācaṃ sammākammantaṃ sammāājīvaṃ sammāvāyāmaṃ sammāsatiṃ sammāsamādhiṃ sammāvimuttiṃ sammāvimuttiñāṇadassanañca te bhavanto dhammaṃ garahanti. Tena hi ye micchāvimuttiñāṇadassanā, tesaṃ bhavantānaṃ pujjā ca pāsaṃsā ca.
ယေ စ ခော ကေစိ ဧဝမာဟံသု ‘‘ဘုဉ္ဇိတဗ္ဗာ ကာမာ, ပရိဘုဉ္ဇိတဗ္ဗာ ကာမာ, အာသေဝိတဗ္ဗာ ကာမာ, နိသေဝိတဗ္ဗာ ကာမာ, ဘာဝယိတဗ္ဗာ ကာမာ, ဗဟုလီကာတဗ္ဗာ ကာမာ’’တိ။ ကာမေဟိ ဝေရမဏီ တေသံ အဓမ္မော။
Ye ca kho keci evamāhaṃsu ‘‘bhuñjitabbā kāmā, paribhuñjitabbā kāmā, āsevitabbā kāmā, nisevitabbā kāmā, bhāvayitabbā kāmā, bahulīkātabbā kāmā’’ti. Kāmehi veramaṇī tesaṃ adhammo.
ယေ ဝာ ပန ကေစိ ဧဝမာဟံသု ‘‘အတ္တကိလမထာနုယောဂော ဓမ္မော’’တိ။ နိယ္ယာနိကော တေသံ ဓမ္မော အဓမ္မော။ ယေ စ ခော ကေစိ ဧဝမာဟံသု ‘‘ဒုက္ခော ဓမ္မော’’တိ။ သုခော တေသံ ဓမ္မော အဓမ္မော။ ယထာ ဝာ ပန ဘိက္ခုနော သဗ္ဗသင္ခာရေသု အသုဘာနုပသ္သိနော ဝိဟရတော သုဘသညာ ပဟီယန္တိ။ ဒုက္ခာနုပသ္သိနော ဝိဟရတော သုခသညာ ပဟီယန္တိ။ အနိစ္စာနုပသ္သိနော ဝိဟရတော နိစ္စသညာ ပဟီယန္တိ။ အနတ္တာနုပသ္သိနော ဝိဟရတော အတ္တသညာ ပဟီယန္တိ။ ယံ ယံ ဝာ ပန ဓမ္မံ ရောစယတိ ဝာ ဥပဂစ္ဆတိ ဝာ, တသ္သ တသ္သ ဓမ္မသ္သ ယော ပဋိပက္ခော, သ္ဝသ္သ အနိဋ္ဌတော အဇ္ဈာပန္နော ဘဝတိ။ တေနာဟ အာယသ္မာ မဟာကစ္စာယနော ‘‘ကုသလာကုသလဓမ္မေ’’တိ။
Ye vā pana keci evamāhaṃsu ‘‘attakilamathānuyogo dhammo’’ti. Niyyāniko tesaṃ dhammo adhammo. Ye ca kho keci evamāhaṃsu ‘‘dukkho dhammo’’ti. Sukho tesaṃ dhammo adhammo. Yathā vā pana bhikkhuno sabbasaṅkhāresu asubhānupassino viharato subhasaññā pahīyanti. Dukkhānupassino viharato sukhasaññā pahīyanti. Aniccānupassino viharato niccasaññā pahīyanti. Anattānupassino viharato attasaññā pahīyanti. Yaṃ yaṃ vā pana dhammaṃ rocayati vā upagacchati vā, tassa tassa dhammassa yo paṭipakkho, svassa aniṭṭhato ajjhāpanno bhavati. Tenāha āyasmā mahākaccāyano ‘‘kusalākusaladhamme’’ti.
နိယုတ္တော ပရိဝတ္တနော ဟာရော။
Niyutto parivattano hāro.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / နေတ္တိပ္ပကရဏ-အဋ္ဌကထာ • Nettippakaraṇa-aṭṭhakathā / ၉. ပရိဝတ္တနဟာရဝိဘင္ဂဝဏ္ဏနာ • 9. Parivattanahāravibhaṅgavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / ခုဒ္ဒကနိကာယ (ဋီကာ) • Khuddakanikāya (ṭīkā) / နေတ္တိပ္ပကရဏ-ဋီကာ • Nettippakaraṇa-ṭīkā / ၉. ပရိဝတ္တနဟာရဝိဘင္ဂဝဏ္ဏနာ • 9. Parivattanahāravibhaṅgavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / ခုဒ္ဒကနိကာယ (ဋီကာ) • Khuddakanikāya (ṭīkā) / နေတ္တိဝိဘာဝိနီ • Nettivibhāvinī / ၉. ပရိဝတ္တနဟာရဝိဘင္ဂဝိဘာဝနာ • 9. Parivattanahāravibhaṅgavibhāvanā
