| Library / Tipiṭaka / ཏིཔིཊཀ • Tipiṭaka / ནེཏྟིཔྤཀརཎཔཱལི༹ • Nettippakaraṇapāḷi |
༩. པརིཝཏྟནཧཱརཝིབྷངྒོ
9. Parivattanahāravibhaṅgo
༣༥. ཏཏྠ ཀཏམོ པརིཝཏྟནོ ཧཱརོ? ‘‘ཀུསལཱཀུསལེ དྷམྨེ’’ཏི། སམྨཱདིཊྛིསྶ པུརིསཔུགྒལསྶ མིཙྪཱདིཊྛི ནིཛྫིཎྞཱ བྷཝཏི། ཡེ ཙསྶ མིཙྪཱདིཊྛིཔཙྩཡཱ ཨུཔྤཛྫེཡྻུཾ ཨནེཀེ 1 པཱཔཀཱ ཨཀུསལཱ དྷམྨཱ, ཏེ ཙསྶ ནིཛྫིཎྞཱ ཧོནྟི། སམྨཱདིཊྛིཔཙྩཡཱ ཙསྶ ཨནེཀེ ཀུསལཱ དྷམྨཱ སམྦྷཝནྟི, ཏེ ཙསྶ བྷཱཝནཱཔཱརིཔཱུརིཾ གཙྪནྟི། སམྨཱསངྐཔྤསྶ པུརིསཔུགྒལསྶ མིཙྪཱསངྐཔྤོ ནིཛྫིཎྞོ བྷཝཏི། ཡེ ཙསྶ མིཙྪཱསངྐཔྤཔཙྩཡཱ ཨུཔྤཛྫེཡྻུཾ ཨནེཀེ པཱཔཀཱ ཨཀུསལཱ དྷམྨཱ, ཏེ ཙསྶ ནིཛྫིཎྞཱ ཧོནྟི། སམྨཱསངྐཔྤཔཙྩཡཱ ཙསྶ ཨནེཀེ ཀུསལཱ དྷམྨཱ སམྦྷཝནྟི། ཏེ ཙསྶ བྷཱཝནཱཔཱརིཔཱུརིཾ གཙྪནྟི། ཨེཝཾ སམྨཱཝཱཙསྶ སམྨཱཀམྨནྟསྶ སམྨཱཨཱཛཱིཝསྶ སམྨཱཝཱཡཱམསྶ སམྨཱསཏིསྶ སམྨཱསམཱདྷིསྶ སམྨཱཝིམུཏྟསྶ སམྨཱཝིམུཏྟིཉཱཎདསྶནསྶ པུརིསཔུགྒལསྶ མིཙྪཱཝིམུཏྟིཉཱཎདསྶནཾ ནིཛྫིཎྞཾ བྷཝཏི། ཡེ ཙསྶ མིཙྪཱཝིམུཏྟིཉཱཎདསྶནཔཙྩཡཱ ཨུཔྤཛྫེཡྻུཾ ཨནེཀེ པཱཔཀཱ ཨཀུསལཱ དྷམྨཱ, ཏེ ཙསྶ ནིཛྫིཎྞཱ ཧོནྟི། སམྨཱཝིམུཏྟིཉཱཎདསྶནཔཙྩཡཱ ཙསྶ ཨནེཀེ ཀུསལཱ དྷམྨཱ སམྦྷཝནྟི, ཏེ ཙསྶ བྷཱཝནཱཔཱརིཔཱུརིཾ གཙྪནྟི།
35. Tattha katamo parivattano hāro? ‘‘Kusalākusale dhamme’’ti. Sammādiṭṭhissa purisapuggalassa micchādiṭṭhi nijjiṇṇā bhavati. Ye cassa micchādiṭṭhipaccayā uppajjeyyuṃ aneke 2 pāpakā akusalā dhammā, te cassa nijjiṇṇā honti. Sammādiṭṭhipaccayā cassa aneke kusalā dhammā sambhavanti, te cassa bhāvanāpāripūriṃ gacchanti. Sammāsaṅkappassa purisapuggalassa micchāsaṅkappo nijjiṇṇo bhavati. Ye cassa micchāsaṅkappapaccayā uppajjeyyuṃ aneke pāpakā akusalā dhammā, te cassa nijjiṇṇā honti. Sammāsaṅkappapaccayā cassa aneke kusalā dhammā sambhavanti. Te cassa bhāvanāpāripūriṃ gacchanti. Evaṃ sammāvācassa sammākammantassa sammāājīvassa sammāvāyāmassa sammāsatissa sammāsamādhissa sammāvimuttassa sammāvimuttiñāṇadassanassa purisapuggalassa micchāvimuttiñāṇadassanaṃ nijjiṇṇaṃ bhavati. Ye cassa micchāvimuttiñāṇadassanapaccayā uppajjeyyuṃ aneke pāpakā akusalā dhammā, te cassa nijjiṇṇā honti. Sammāvimuttiñāṇadassanapaccayā cassa aneke kusalā dhammā sambhavanti, te cassa bhāvanāpāripūriṃ gacchanti.
༣༦. ཡསྶ ཝཱ པཱཎཱཏིཔཱཏཱ པཊིཝིརཏསྶ པཱཎཱཏིཔཱཏོ པཧཱིནོ ཧོཏི། ཨདིནྣཱདཱནཱ པཊིཝིརཏསྶ ཨདིནྣཱདཱནཾ པཧཱིནཾ ཧོཏི། བྲཧྨཙཱརིསྶ ཨབྲཧྨཙརིཡཾ པཧཱིནཾ ཧོཏི། སཙྩཝཱདིསྶ མུསཱཝཱདོ པཧཱིནོ ཧོཏི། ཨཔིསུཎཝཱཙསྶ པིསུཎཱ ཝཱཙཱ པཧཱིནཱ ཧོཏི། སཎྷཝཱཙསྶ ཕརུསཱ ཝཱཙཱ པཧཱིནཱ ཧོཏི། ཀཱལཝཱདིསྶ སམྥཔྤལཱཔོ པཧཱིནོ ཧོཏི། ཨནབྷིཛ྄ཛྷཱལུསྶ 3 ཨབྷིཛ྄ཛྷཱ པཧཱིནཱ ཧོཏི། ཨབྱཱཔནྣཙིཏྟསྶ བྱཱཔཱདོ པཧཱིནོ ཧོཏི། སམྨཱདིཊྛིསྶ མིཙྪཱདིཊྛི པཧཱིནཱ ཧོཏི།
36. Yassa vā pāṇātipātā paṭiviratassa pāṇātipāto pahīno hoti. Adinnādānā paṭiviratassa adinnādānaṃ pahīnaṃ hoti. Brahmacārissa abrahmacariyaṃ pahīnaṃ hoti. Saccavādissa musāvādo pahīno hoti. Apisuṇavācassa pisuṇā vācā pahīnā hoti. Saṇhavācassa pharusā vācā pahīnā hoti. Kālavādissa samphappalāpo pahīno hoti. Anabhijjhālussa 4 abhijjhā pahīnā hoti. Abyāpannacittassa byāpādo pahīno hoti. Sammādiṭṭhissa micchādiṭṭhi pahīnā hoti.
ཡེ ཙ ཁོ ཀེཙི ཨརིཡཾ ཨཊྛངྒིཀཾ མགྒཾ གརཧནྟི, ནེསཾ སནྡིཊྛིཀཱ སཧདྷམྨིཀཱ གཱརཡ྄ཧཱ ཝཱདཱནུཝཱདཱ ཨཱགཙྪནྟི། སམྨཱདིཊྛིཉྩ ཏེ བྷཝནྟོ དྷམྨཾ གརཧནྟི། ཏེན ཧི ཡེ མིཙྪཱདིཊྛིཀཱ, ཏེསཾ བྷཝནྟཱནཾ པུཛྫཱ ཙ པཱསཾསཱ ཙ། ཨེཝཾ སམྨཱསངྐཔྤཾ སམྨཱཝཱཙཾ སམྨཱཀམྨནྟཾ སམྨཱཨཱཛཱིཝཾ སམྨཱཝཱཡཱམཾ སམྨཱསཏིཾ སམྨཱསམཱདྷིཾ སམྨཱཝིམུཏྟིཾ སམྨཱཝིམུཏྟིཉཱཎདསྶནཉྩ ཏེ བྷཝནྟོ དྷམྨཾ གརཧནྟི། ཏེན ཧི ཡེ མིཙྪཱཝིམུཏྟིཉཱཎདསྶནཱ, ཏེསཾ བྷཝནྟཱནཾ པུཛྫཱ ཙ པཱསཾསཱ ཙ།
Ye ca kho keci ariyaṃ aṭṭhaṅgikaṃ maggaṃ garahanti, nesaṃ sandiṭṭhikā sahadhammikā gārayhā vādānuvādā āgacchanti. Sammādiṭṭhiñca te bhavanto dhammaṃ garahanti. Tena hi ye micchādiṭṭhikā, tesaṃ bhavantānaṃ pujjā ca pāsaṃsā ca. Evaṃ sammāsaṅkappaṃ sammāvācaṃ sammākammantaṃ sammāājīvaṃ sammāvāyāmaṃ sammāsatiṃ sammāsamādhiṃ sammāvimuttiṃ sammāvimuttiñāṇadassanañca te bhavanto dhammaṃ garahanti. Tena hi ye micchāvimuttiñāṇadassanā, tesaṃ bhavantānaṃ pujjā ca pāsaṃsā ca.
ཡེ ཙ ཁོ ཀེཙི ཨེཝམཱཧཾསུ ‘‘བྷུཉྫིཏབྦཱ ཀཱམཱ, པརིབྷུཉྫིཏབྦཱ ཀཱམཱ, ཨཱསེཝིཏབྦཱ ཀཱམཱ, ནིསེཝིཏབྦཱ ཀཱམཱ, བྷཱཝཡིཏབྦཱ ཀཱམཱ, བཧུལཱིཀཱཏབྦཱ ཀཱམཱ’’ཏི། ཀཱམེཧི ཝེརམཎཱི ཏེསཾ ཨདྷམྨོ།
Ye ca kho keci evamāhaṃsu ‘‘bhuñjitabbā kāmā, paribhuñjitabbā kāmā, āsevitabbā kāmā, nisevitabbā kāmā, bhāvayitabbā kāmā, bahulīkātabbā kāmā’’ti. Kāmehi veramaṇī tesaṃ adhammo.
ཡེ ཝཱ པན ཀེཙི ཨེཝམཱཧཾསུ ‘‘ཨཏྟཀིལམཐཱནུཡོགོ དྷམྨོ’’ཏི། ནིཡྻཱནིཀོ ཏེསཾ དྷམྨོ ཨདྷམྨོ། ཡེ ཙ ཁོ ཀེཙི ཨེཝམཱཧཾསུ ‘‘དུཀྑོ དྷམྨོ’’ཏི། སུཁོ ཏེསཾ དྷམྨོ ཨདྷམྨོ། ཡཐཱ ཝཱ པན བྷིཀྑུནོ སབྦསངྑཱརེསུ ཨསུབྷཱནུཔསྶིནོ ཝིཧརཏོ སུབྷསཉྙཱ པཧཱིཡནྟི། དུཀྑཱནུཔསྶིནོ ཝིཧརཏོ སུཁསཉྙཱ པཧཱིཡནྟི། ཨནིཙྩཱནུཔསྶིནོ ཝིཧརཏོ ནིཙྩསཉྙཱ པཧཱིཡནྟི། ཨནཏྟཱནུཔསྶིནོ ཝིཧརཏོ ཨཏྟསཉྙཱ པཧཱིཡནྟི། ཡཾ ཡཾ ཝཱ པན དྷམྨཾ རོཙཡཏི ཝཱ ཨུཔགཙྪཏི ཝཱ, ཏསྶ ཏསྶ དྷམྨསྶ ཡོ པཊིཔཀྑོ, སྭསྶ ཨནིཊྛཏོ ཨཛ྄ཛྷཱཔནྣོ བྷཝཏི། ཏེནཱཧ ཨཱཡསྨཱ མཧཱཀཙྩཱཡནོ ‘‘ཀུསལཱཀུསལདྷམྨེ’’ཏི།
Ye vā pana keci evamāhaṃsu ‘‘attakilamathānuyogo dhammo’’ti. Niyyāniko tesaṃ dhammo adhammo. Ye ca kho keci evamāhaṃsu ‘‘dukkho dhammo’’ti. Sukho tesaṃ dhammo adhammo. Yathā vā pana bhikkhuno sabbasaṅkhāresu asubhānupassino viharato subhasaññā pahīyanti. Dukkhānupassino viharato sukhasaññā pahīyanti. Aniccānupassino viharato niccasaññā pahīyanti. Anattānupassino viharato attasaññā pahīyanti. Yaṃ yaṃ vā pana dhammaṃ rocayati vā upagacchati vā, tassa tassa dhammassa yo paṭipakkho, svassa aniṭṭhato ajjhāpanno bhavati. Tenāha āyasmā mahākaccāyano ‘‘kusalākusaladhamme’’ti.
ནིཡུཏྟོ པརིཝཏྟནོ ཧཱརོ།
Niyutto parivattano hāro.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / ནེཏྟིཔྤཀརཎ-ཨཊྛཀཐཱ • Nettippakaraṇa-aṭṭhakathā / ༩. པརིཝཏྟནཧཱརཝིབྷངྒཝཎྞནཱ • 9. Parivattanahāravibhaṅgavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཁུདྡཀནིཀཱཡ (ཊཱིཀཱ) • Khuddakanikāya (ṭīkā) / ནེཏྟིཔྤཀརཎ-ཊཱིཀཱ • Nettippakaraṇa-ṭīkā / ༩. པརིཝཏྟནཧཱརཝིབྷངྒཝཎྞནཱ • 9. Parivattanahāravibhaṅgavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཁུདྡཀནིཀཱཡ (ཊཱིཀཱ) • Khuddakanikāya (ṭīkā) / ནེཏྟིཝིབྷཱཝིནཱི • Nettivibhāvinī / ༩. པརིཝཏྟནཧཱརཝིབྷངྒཝིབྷཱཝནཱ • 9. Parivattanahāravibhaṅgavibhāvanā
