| Library / Tipiṭaka / д̇ибидага • Tipiṭaka / сам̣яуд̇д̇анигааяа (дийгаа) • Saṃyuttanikāya (ṭīkā) |
6. д̣̇угкаваг̇г̇о
6. Dukkhavaggo
1. баривиймам̣санасуд̇д̇аван̣н̣анаа
1. Parivīmaṃsanasuttavaṇṇanā
51. убабаригкамаанод̇и бавад̇д̇ибавад̇д̇ихзд̇ум̣, нивад̇д̇инивад̇д̇ихзд̇ун̃жа барид̇улзнд̇о. гуд̇о банзд̇анд̇и? ‘‘саммаа д̣̇угкагкаяаа’’д̇и важанад̇о. на хи саб̣б̣ад̣̇угкабаривиймам̣сам̣ винаа саммаа д̣̇угкагкаяо самбхавад̇и. гасмаад̇иаад̣̇инаа ж̇араамаран̣ассзва г̇ахан̣з гааран̣ам̣ бужчад̇и. ж̇аад̇иаад̣̇ийнамби бавад̇д̇и д̣̇угкабхаавинийд̇и ад̇хиббааяо. яасмаа ж̇араамаран̣з г̇ахид̇з сад̇и ж̇аад̇иби г̇ахид̇аа ход̇и, д̇ассаа абхаавз ж̇араамаран̣ассзва абхаавад̇о. зса наяо бхаваад̣̇ийсуби. звам̣ яаава ж̇аад̇ид̇хаммо ж̇араамаран̣з г̇ахид̇з г̇ахид̇ова ход̇и, ж̇араамаран̣абад̣̇зсзна д̇аб̣б̣игаараванд̇о саб̣б̣з д̇збхуумагаа сан̇каараа г̇ахид̇аад̇и звамби ж̇араамаран̣аг̇г̇ахан̣зна саб̣б̣амби ваддад̣̇угкам̣ г̇ахид̇амзва ход̇и. д̇знааха ‘‘д̇асмим̣ г̇ахид̇з саб̣б̣ад̣̇угкасса г̇ахид̇ад̇д̇аа’’д̇и. анзгавид̇ханд̇и б̣ахувид̇хам̣ б̣ахугодтаасам̣. ‘‘анзга’’нд̇и ваа баато . анзганд̇и б̣ахулаважанам̣. вид̇ханд̇и кан̣д̣ижжабаалижжаад̣̇ивасзна вибарийд̇агодтаасам̣. наанаббагаараганд̇и д̇ад̇о зва наанаббагаарам̣. нхад̇ваа тид̇ам̣ бурисам̣ вияаад̇и б̣аалаанам̣ ад̇д̇абхаавасса субхаагаарзна убадтаанам̣ санд̇хааяааха.
51.Upaparikkhamānoti pavattipavattihetuṃ, nivattinivattihetuñca paritulento. Kuto panetanti? ‘‘Sammā dukkhakkhayā’’ti vacanato. Na hi sabbadukkhaparivīmaṃsaṃ vinā sammā dukkhakkhayo sambhavati. Kasmātiādinā jarāmaraṇasseva gahaṇe kāraṇaṃ pucchati. Jātiādīnampi pavatti dukkhabhāvinīti adhippāyo. Yasmā jarāmaraṇe gahite sati jātipi gahitā hoti, tassā abhāve jarāmaraṇasseva abhāvato. Esa nayo bhavādīsupi. Evaṃ yāva jātidhammo jarāmaraṇe gahite gahitova hoti, jarāmaraṇapadesena tabbikāravanto sabbe tebhūmakā saṅkhārā gahitāti evampi jarāmaraṇaggahaṇena sabbampi vaṭṭadukkhaṃ gahitameva hoti. Tenāha ‘‘tasmiṃ gahite sabbadukkhassa gahitattā’’ti. Anekavidhanti bahuvidhaṃ bahukoṭṭhāsaṃ. ‘‘Aneka’’nti vā pāṭho . Anekanti bahulavacanaṃ. Vidhanti khaṇḍiccapāliccādivasena viparītakoṭṭhāsaṃ. Nānappakārakanti tato eva nānappakāraṃ. Nhatvā ṭhitaṃ purisaṃ viyāti bālānaṃ attabhāvassa subhākārena upaṭṭhānaṃ sandhāyāha.
‘‘сааруббабхаавзнаа’’д̇и вуд̇д̇ам̣, гим̣ саб̣б̣ат̇аа сааруббабхаавзнаад̇и ааха ‘‘ниггилзсад̇ааяа барисуд̣̇д̇хад̇ааяаа’’д̇и. на хи д̇ассзсаа асан̇кад̇ад̇аад̣̇ибхаавзна сад̣̇исаа. бадибаннод̇и бадимуко абхисан̇каарамуко худ̇ваа банно ад̇хиг̇ад̇о. ануг̇ад̇анд̇и анужчавигабхаавзна г̇ад̇ам̣, яат̇аа жа ниб̣б̣аанасса ад̇хиг̇амо ход̇и, звам̣ д̇ад̣̇ануруубабхаавзна г̇ад̇ам̣. зд̇т̇а жа баал̣ияам̣ ‘‘баж̇аанаад̇ий’’д̇и буб̣б̣абхааг̇авасзна баж̇аананаа вуд̇д̇аа, ‘‘д̇ат̇аа бадибанно жа ход̇ий’’д̇и нияад̇авасзна. ‘‘абарабхааг̇авасзнаа’’д̇и абарз. гзжи бана ‘‘яат̇аа бадибаннасса ж̇араамаран̣ам̣ нируж̇жхад̇и, д̇ат̇аа бадибанно’’д̇и вад̣̇анд̇и. бад̣̇авиймам̣санаа буб̣б̣абхааг̇авасзна взд̣̇ид̇аб̣б̣аа, на маг̇г̇агкан̣авасзна. сан̇кааранирод̇хааяаад̇и зд̇т̇а наяид̣̇ам̣ авиж̇ж̇аабажжаяасан̇каараг̇г̇ахан̣ам̣, ат̇а ко сан̇кад̇асан̇каараг̇г̇ахан̣анд̇и ааха ‘‘сан̇каарад̣̇угкасса нирод̇хад̇т̇ааяаа’’д̇и. д̇знааха ‘‘зд̇д̇аавад̇аа яаава арахад̇д̇аа д̣̇зсанаа гат̇ид̇аа’’д̇и.
‘‘Sāruppabhāvenā’’ti vuttaṃ, kiṃ sabbathā sāruppabhāvenāti āha ‘‘nikkilesatāya parisuddhatāyā’’ti. Na hi tassesā asaṅkhatatādibhāvena sadisā. Paṭipannoti paṭimukho abhisaṅkhāramukho hutvā panno adhigato. Anugatanti anucchavikabhāvena gataṃ, yathā ca nibbānassa adhigamo hoti, evaṃ tadanurūpabhāvena gataṃ. Ettha ca pāḷiyaṃ ‘‘pajānātī’’ti pubbabhāgavasena pajānanā vuttā, ‘‘tathā paṭipanno ca hotī’’ti niyatavasena. ‘‘Aparabhāgavasenā’’ti apare. Keci pana ‘‘yathā paṭipannassa jarāmaraṇaṃ nirujjhati, tathā paṭipanno’’ti vadanti. Padavīmaṃsanā pubbabhāgavasena veditabbā, na maggakkhaṇavasena. Saṅkhāranirodhāyāti ettha nayidaṃ avijjāpaccayasaṅkhāraggahaṇaṃ, atha kho saṅkhatasaṅkhāraggahaṇanti āha ‘‘saṅkhāradukkhassa nirodhatthāyā’’ti. Tenāha ‘‘ettāvatā yāva arahattā desanā kathitā’’ti.
‘‘бажжад̇д̇ам̣язва бариниб̣б̣ааяад̇ий’’д̇иаад̣̇инаа арахад̇д̇апалабажжавзгкан̣ам̣, ‘‘со сукан̃жа взд̣̇анам̣ взд̣̇аяад̇ий’’д̇иаад̣̇инаа сад̇ад̇авихааран̃жа д̣̇ассзд̇ваа д̣̇зсанаа саб̣б̣ат̇аава ваддад̣̇зсанаад̇о нивад̇д̇зд̇аб̣б̣аа сияаа. авиж̇ж̇ааг̇ад̇од̇и зд̇т̇а ид̇и-сад̣̇д̣̇о аад̣̇иад̇т̇о, д̇зна звамаад̣̇игам̣ ид̣̇ам̣ ваддавиваддагат̇анам̣ буна г̇ан̣хаад̇и. буг̇г̇аласад̣̇д̣̇о ид̇араасам̣ д̣̇виннам̣ багад̇ийнам̣ ваажагод̇и д̇ад̇о висзсзд̇ваа г̇ахан̣з батамабагад̇имзва д̣̇ассзнд̇о ‘‘бурисабуг̇г̇ало’’д̇и авожаад̇и ааха ‘‘бурисоязва буг̇г̇ало’’д̇и. убхаязнаад̇и бурисабуг̇г̇алаг̇г̇ахан̣зна. саммуд̇ияаа авиж̇ж̇амаанааяа гат̇аа д̣̇зсанаа саммуд̇игат̇аа. барамад̇т̇асса гат̇аа д̣̇зсанаа барамад̇т̇агат̇аа. д̇ад̇т̇аад̇и саммуд̇ибарамад̇т̇агат̇аасу, на саммуд̇ибарамад̇т̇зсу. д̇знааха ‘‘звам̣ бавад̇д̇аа саммуд̇игат̇аа наамаа’’д̇иаад̣̇и. д̇ад̇рид̣̇ам̣ саммуд̇ибарамад̇т̇аанам̣ лагкан̣ам̣ – яасмим̣ бхиннз б̣уд̣̇д̇хияаа ваа аваяававиниб̣бхог̇з гад̇з на д̇ам̣саман̃н̃аа, саа гхадабадаад̣̇иббабхзд̣̇аа саммуд̇и, д̇аб̣б̣ибарияааяад̇о барамад̇т̇о. на хи гагкал̣апусанаад̣̇исабхаавз аяам̣ наяо лаб̣бхад̇и. д̇ад̇т̇а руубаад̣̇ид̇хаммам̣ самуухасанд̇аанавасзна бавад̇д̇амаанам̣ убаад̣̇ааяа ‘‘сад̇д̇о’’д̇иаад̣̇и вохаарод̇и ааха ‘‘сад̇д̇о наро…бз… саммуд̇игат̇аа наамаа’’д̇и . яасмаа руубаад̣̇аяо барамад̇т̇ад̇хаммаа ‘‘канд̇хаа д̇хаад̇уяо’’д̇иаад̣̇инаа вужжанд̇и, на вохаарамад̇д̇ам̣, д̇асмаа ‘‘канд̇хаа…бз… барамад̇т̇агат̇аа наамаа’’д̇и вуд̇д̇ам̣. нану канд̇хагат̇ааби саммуд̇игат̇аава, саммуд̇и хи сан̇гзд̇о канд̇хадто раасадто ваа годтаасадто ваад̇и? сажжамзд̇ам̣, аяам̣ бана канд̇хасаман̃н̃аа пассаад̣̇ийсу д̇аж̇ж̇аабан̃н̃ад̇д̇и вияа барамад̇т̇асанниссаяаа д̇асса аасаннад̇араа буг̇г̇аласаман̃н̃аад̣̇аяо вияа на д̣̇уурзд̇и барамад̇т̇асан̇г̇ахад̇аа вуд̇д̇аа. канд̇хасийсзна ваа д̇ад̣̇убаад̣̇аанаа сабхаавад̇хаммаа зва г̇ахид̇аа. нану жа саб̣б̣зби сабхаавад̇хаммаа саммуд̇имукзнзва д̣̇зсанам̣ аароханд̇и, на саммукзнаад̇и саб̣б̣ааби д̣̇зсанаа саммуд̇ид̣̇зсанаава сияаад̇и? наяид̣̇амзвам̣ д̣̇зсзд̇аб̣б̣ад̇хаммавибхааг̇зна д̣̇зсанаавибхааг̇асса ад̇хиббзд̇ад̇д̇аа, на жа сад̣̇д̣̇о гзнажи бавад̇д̇инимид̇д̇зна винаа ад̇т̇ам̣ багаасзд̇ийд̇и. д̇знааха ‘‘барамад̇т̇ам̣ гат̇знд̇ааби саммуд̇им̣ амун̃жид̇ваава гат̇знд̇ий’’д̇и. сажжамзва авибарийд̇амзва гат̇знд̇и.
‘‘Paccattaṃyeva parinibbāyatī’’tiādinā arahattaphalapaccavekkhaṇaṃ, ‘‘so sukhañca vedanaṃ vedayatī’’tiādinā satatavihārañca dassetvā desanā sabbathāva vaṭṭadesanāto nivattetabbā siyā. Avijjāgatoti ettha iti-saddo ādiattho, tena evamādikaṃ idaṃ vaṭṭavivaṭṭakathanaṃ puna gaṇhāti. Puggalasaddo itarāsaṃ dvinnaṃ pakatīnaṃ vācakoti tato visesetvā gahaṇe paṭhamapakatimeva dassento ‘‘purisapuggalo’’ti avocāti āha ‘‘purisoyeva puggalo’’ti. Ubhayenāti purisapuggalaggahaṇena. Sammutiyā avijjamānāya kathā desanā sammutikathā. Paramatthassa kathā desanā paramatthakathā. Tatthāti sammutiparamatthakathāsu, na sammutiparamatthesu. Tenāha ‘‘evaṃ pavattā sammutikathā nāmā’’tiādi. Tatridaṃ sammutiparamatthānaṃ lakkhaṇaṃ – yasmiṃ bhinne buddhiyā vā avayavavinibbhoge kate na taṃsamaññā, sā ghaṭapaṭādippabhedā sammuti, tabbipariyāyato paramattho. Na hi kakkhaḷaphusanādisabhāve ayaṃ nayo labbhati. Tattha rūpādidhammaṃ samūhasantānavasena pavattamānaṃ upādāya ‘‘satto’’tiādi vohāroti āha ‘‘satto naro…pe… sammutikathā nāmā’’ti . Yasmā rūpādayo paramatthadhammā ‘‘khandhā dhātuyo’’tiādinā vuccanti, na vohāramattaṃ, tasmā ‘‘khandhā…pe… paramatthakathā nāmā’’ti vuttaṃ. Nanu khandhakathāpi sammutikathāva, sammuti hi saṅketo khandhaṭṭho rāsaṭṭho vā koṭṭhāsaṭṭho vāti? Saccametaṃ, ayaṃ pana khandhasamaññā phassādīsu tajjāpaññatti viya paramatthasannissayā tassa āsannatarā puggalasamaññādayo viya na dūreti paramatthasaṅgahatā vuttā. Khandhasīsena vā tadupādānā sabhāvadhammā eva gahitā. Nanu ca sabbepi sabhāvadhammā sammutimukheneva desanaṃ ārohanti, na sammukhenāti sabbāpi desanā sammutidesanāva siyāti? Nayidamevaṃ desetabbadhammavibhāgena desanāvibhāgassa adhippetattā, na ca saddo kenaci pavattinimittena vinā atthaṃ pakāsetīti. Tenāha ‘‘paramatthaṃ kathentāpi sammutiṃ amuñcitvāva kathentī’’ti. Saccameva aviparītameva kathenti.
саммуд̇ийд̇и саман̃н̃аа. барамо уд̇д̇амо ад̇т̇од̇и барамад̇т̇о, д̇хаммаанам̣ яат̇аабхууд̇асабхааво. д̇ам̣ барамад̇т̇ам̣, саммуд̇и бана логасса сан̇гзд̇амад̇д̇асид̣̇д̇хаа. яад̣̇и звам̣ гат̇ам̣ саммуд̇игат̇ааяа сажжад̇аад̇и ааха ‘‘логасаммуд̇игааран̣а’’нд̇и логасаман̃н̃ам̣ ниссааяа бавад̇д̇анад̇о. логасаман̃н̃ааяа хи абхинивзсанам̣ винаа бан̃н̃аабанаа згажжасса суд̇асса сааванаа вияа, на мусаа анад̇иггамид̇аб̣б̣ад̇о д̇ассаа. д̇знааха бхаг̇аваа ‘‘ж̇анабад̣̇анируд̇д̇им̣ наабхинивзсзяяа, саман̃н̃ам̣ наад̇ид̇хаавзяяаа’’д̇и. д̇хаммаанам̣ сабхаавад̇хаммаанам̣. бхууд̇алагкан̣ам̣ бхаавасса лагкан̣ам̣ д̣̇ийбзнд̇ийд̇и гад̇ваа.
Sammutīti samaññā. Paramo uttamo atthoti paramattho, dhammānaṃ yathābhūtasabhāvo. Taṃ paramatthaṃ, sammuti pana lokassa saṅketamattasiddhā. Yadi evaṃ kathaṃ sammutikathāya saccatāti āha ‘‘lokasammutikāraṇa’’nti lokasamaññaṃ nissāya pavattanato. Lokasamaññāya hi abhinivesanaṃ vinā paññāpanā ekaccassa sutassa sāvanā viya, na musā anatikkamitabbato tassā. Tenāha bhagavā ‘‘janapadaniruttiṃ nābhiniveseyya, samaññaṃ nātidhāveyyā’’ti. Dhammānaṃ sabhāvadhammānaṃ. Bhūtalakkhaṇaṃ bhāvassa lakkhaṇaṃ dīpentīti katvā.
д̇зрасажзд̇анаабхзд̣̇анд̇и адтагаамааважарагусалажзд̇анаабан̃жаруубааважарагусалажзд̇анаабхзд̣̇ам̣. ад̇д̇ано санд̇аанасса бунанад̇о буж̇ж̇абхавапаласса абхисан̇каран̣ад̇о бун̃н̃аабхисан̇каарам̣. гаммабун̃н̃знаад̇и гаммабхууд̇зна. вибаагабун̃н̃знаад̇и вибаагасан̇каад̇зна. бун̃н̃апаламби хи уд̇д̇арабад̣̇алобзна ‘‘бун̃н̃а’’нд̇и вужжад̇и ‘‘звамид̣̇ам̣ бун̃н̃ам̣ бавад̣дхад̇ий’’д̇иаад̣̇ийсу вияа. ‘‘абун̃н̃уубаг̇ам̣ ход̇и вин̃н̃аан̣а’’нд̇и ид̣̇ам̣ ‘‘бун̃н̃уубаг̇ам̣ ход̇и вин̃н̃аан̣а’’нд̇и зд̇т̇а вуд̇д̇анаяамзваад̇и на уд̣̇д̇хад̇ам̣. абун̃н̃апалам̣ уд̇д̇арабад̣̇алобзна ‘‘абун̃н̃а’’нд̇и вужжад̇и. сан̇кааранд̇и сан̇каарасса г̇ахид̇ад̇д̇аа ‘‘авиж̇ж̇ааг̇ад̇ояа’’нд̇и иминаа сан̇каарасса бажжаяо г̇ахид̇о, ‘‘бун̃н̃уубаг̇ам̣ ход̇и вин̃н̃аан̣а’’нд̇иаад̣̇инаа бажжаяуббаннам̣ вин̃н̃аан̣ам̣. д̇асмин̃жа г̇ахид̇з наамаруубаад̣̇и саб̣б̣ам̣ г̇ахид̇амзва ход̇и. д̇знааха ‘‘д̣̇ваад̣̇асабад̣̇иго бажжаяаагааро г̇ахид̇ова ход̇ий’’д̇и.
Terasacetanābhedanti aṭṭhakāmāvacarakusalacetanāpañcarūpāvacarakusalacetanābhedaṃ. Attano santānassa punanato pujjabhavaphalassa abhisaṅkharaṇato puññābhisaṅkhāraṃ. Kammapuññenāti kammabhūtena. Vipākapuññenāti vipākasaṅkhātena. Puññaphalampi hi uttarapadalopena ‘‘puñña’’nti vuccati ‘‘evamidaṃ puññaṃ pavaḍḍhatī’’tiādīsu viya. ‘‘Apuññūpagaṃ hoti viññāṇa’’nti idaṃ ‘‘puññūpagaṃ hoti viññāṇa’’nti ettha vuttanayamevāti na uddhataṃ. Apuññaphalaṃ uttarapadalopena ‘‘apuñña’’nti vuccati. Saṅkhāranti saṅkhārassa gahitattā ‘‘avijjāgatoya’’nti iminā saṅkhārassa paccayo gahito, ‘‘puññūpagaṃ hoti viññāṇa’’ntiādinā paccayuppannaṃ viññāṇaṃ. Tasmiñca gahite nāmarūpādi sabbaṃ gahitameva hoti. Tenāha ‘‘dvādasapadiko paccayākāro gahitova hotī’’ti.
виж̇ж̇аад̇и арахад̇д̇амаг̇г̇ан̃аан̣ам̣ уггадтанид̣̇д̣̇зсзна. д̇ассаа хи уббаад̣̇аа саб̣б̣асо авиж̇ж̇аа бахийнаа ход̇и. батамамзваад̇и ид̣̇ам̣ авиж̇ж̇аабахаанавиж̇ж̇уббаад̣̇аанам̣ самаанагаалад̇аад̣̇ассанам̣. д̇знааха ‘‘яат̇аа банаа’’д̇иаад̣̇и. бад̣̇ийбуж̇ж̇алзнаад̇и бад̣̇ийбуж̇ж̇аланахзд̇унаа сахзва. виж̇ж̇уббаад̣̇аад̇и виж̇ж̇уббаад̣̇ахзд̇у, звам̣ сад̇ийби самагаалад̇д̇зд̇и ад̇хиббааяо. на г̇ан̣хаад̇ийд̇и ‘‘зд̇ам̣ мамаа’’д̇иаад̣̇инаа на г̇ан̣хаад̇и. на д̇ан̣хааяад̇и на бхааяад̇и д̇ан̣хаавуд̇д̇ино абхааваа, д̇ад̇о зва бхаяавад̇т̇уно жа абхааваа.
Vijjāti arahattamaggañāṇaṃ ukkaṭṭhaniddesena. Tassā hi uppādā sabbaso avijjā pahīnā hoti. Paṭhamamevāti idaṃ avijjāpahānavijjuppādānaṃ samānakālatādassanaṃ. Tenāha ‘‘yathā panā’’tiādi. Padīpujjalenāti padīpujjalanahetunā saheva. Vijjuppādāti vijjuppādahetu, evaṃ satīpi samakālatteti adhippāyo. Na gaṇhātīti ‘‘etaṃ mamā’’tiādinā na gaṇhāti. Na taṇhāyati na bhāyati taṇhāvuttino abhāvā, tato eva bhayavatthuno ca abhāvā.
г̇илид̇ваа баринидтаабзд̇ваад̇и г̇илид̇ваа вияа ан̃н̃асса ависаяам̣ вияа гаран̣зна баринидтаабзд̇ваа. саамисасукасса анзгад̣̇угкаануб̣анд̇хабхаавад̇о, сукаабхинанд̣̇асса д̣̇угкахзд̇убхаавад̇о жа сукам̣ абхинанд̣̇анд̇оязва д̣̇угкам̣ абхинанд̣̇ад̇и наама аг̇г̇исанд̇аабасукам̣ ижчанд̇о д̇хуумад̣̇угкаанун̃н̃аад̇о вияа. д̣̇угкам̣ бад̇ваа сукам̣ бад̇т̇анад̇од̇и зд̇т̇а д̣̇уб̣б̣алаг̇ахан̣игаад̣̇аяо нид̣̇ассанабхаавзна взд̣̇ид̇аб̣б̣аа. д̇з хи яаава сааяанхасамаяааби абхуд̇ваа сааяамаасаад̣̇ийни гаронд̇о ж̇игхажчаад̣̇им̣ уббаад̣̇зд̇ваа бхун̃ж̇анаад̣̇ийни гаронд̇и. сукасса вибарин̣аамад̣̇угкад̇о сукам̣ абхинанд̣̇анд̇о д̣̇угкам̣ абхинанд̣̇ад̇и наамаад̇и яож̇анаа. гзжи бана д̣̇угкасса абхаавад̇о вибарин̣аамасукад̇о д̇ам̣ сукам̣ абхинанд̣̇анд̇о д̣̇угкам̣ абхинанд̣̇ад̇ийд̇и вад̣̇анд̇и. д̇ам̣ на, на хи д̇аад̣̇исам̣ суканимид̇д̇ам̣ гожи д̣̇угкам̣ абхинанд̣̇анд̇о д̣̇идто, д̣̇угкахзд̇ум̣ бана саамисам̣ сукам̣ абхинанд̣̇анд̇о д̣̇идто. д̣̇угкахзд̇ум̣ саамисам̣ сукам̣ абхинанд̣̇анд̇о ад̇т̇ад̇о д̣̇угкам̣ абхинанд̣̇ад̇и наамаад̇и вуд̇д̇овааяамад̇т̇о. гааяод̇и бан̃жад̣̇ваарагааяо, со барияанд̇о авасаанам̣ зд̇ассаад̇и гааяабарияанд̇игам̣. д̇знааха ‘‘яаава бан̃жад̣̇ваарагааяо бавад̇д̇ад̇и, д̇аава бавад̇д̇а’’нд̇и. ж̇ийвид̇абарияанд̇иганд̇и зд̇т̇ааби зсзва наяо.
Gilitvā pariniṭṭhāpetvāti gilitvā viya aññassa avisayaṃ viya karaṇena pariniṭṭhāpetvā. Sāmisasukhassa anekadukkhānubandhabhāvato, sukhābhinandassa dukkhahetubhāvato ca sukhaṃ abhinandantoyeva dukkhaṃ abhinandati nāma aggisantāpasukhaṃ icchanto dhūmadukkhānuññāto viya. Dukkhaṃ patvā sukhaṃ patthanatoti ettha dubbalagahaṇikādayo nidassanabhāvena veditabbā. Te hi yāva sāyanhasamayāpi abhutvā sāyamāsādīni karonto jighacchādiṃ uppādetvā bhuñjanādīni karonti. Sukhassa vipariṇāmadukkhato sukhaṃ abhinandanto dukkhaṃ abhinandati nāmāti yojanā. Keci pana dukkhassa abhāvato vipariṇāmasukhato taṃ sukhaṃ abhinandanto dukkhaṃ abhinandatīti vadanti. Taṃ na, na hi tādisaṃ sukhanimittaṃ koci dukkhaṃ abhinandanto diṭṭho, dukkhahetuṃ pana sāmisaṃ sukhaṃ abhinandanto diṭṭho. Dukkhahetuṃ sāmisaṃ sukhaṃ abhinandanto atthato dukkhaṃ abhinandati nāmāti vuttovāyamattho. Kāyoti pañcadvārakāyo, so pariyanto avasānaṃ etassāti kāyapariyantikaṃ. Tenāha ‘‘yāva pañcadvārakāyo pavattati, tāva pavatta’’nti. Jīvitapariyantikanti etthāpi eseva nayo.
бажчаа уббаж̇ж̇ид̇ваа батамам̣ нируж̇жхад̇ийд̇и згасмим̣ ад̇д̇абхаавз манод̣̇вааригавзд̣̇анаад̇о бажчаа уббаж̇ж̇ид̇ваа д̇ад̇о батамам̣ нируж̇жхад̇и, д̇ад̇о зва сид̣̇д̇хамад̇т̇ам̣ саруубзнзва д̣̇ассзд̇ум̣ ‘‘манод̣̇вааригавзд̣̇анаа батамам̣ уббаж̇ж̇ид̇ваа бажчаа нируж̇жхад̇ий’’д̇и вуд̇д̇ам̣. ид̣̇аани д̇амзва сан̇кзбзна вуд̇д̇ам̣ виварид̇ум̣ ‘‘саа хий’’д̇иаад̣̇имааха. яаава д̇зд̇д̇им̣савассааби батамаваяо. бан̣н̣аасавассагаалзд̇и батамаваяад̇о яаава бан̃н̃аасавассагаалаа, д̇аава тид̇аа ход̇ийд̇и вуд̣дхихаанияо анубаг̇анд̇ваа саруубзнзва тид̇аа ход̇и. манд̣̇аад̇и муд̣̇угаа ад̇икин̣аа. д̇ад̣̇аад̇и асийд̇инавуд̇ивассагаалз. д̇ат̇аа жирабаривид̇аггзби. бхаг̇г̇аа нид̇д̇зж̇аа бхаг̇г̇авибхаг̇г̇аа д̣̇уб̣б̣алаа. хад̣̇аяагодим̣язваад̇и жагкаад̣̇ивад̇т̇уусу авад̇д̇зд̇ваа д̇зсам̣ кийн̣ад̇д̇аа годибхууд̇ам̣ хад̣̇аяавад̇т̇ум̣язва. яаава зсаа взд̣̇анаа вад̇д̇ад̇и.
Pacchā uppajjitvā paṭhamaṃ nirujjhatīti ekasmiṃ attabhāve manodvārikavedanāto pacchā uppajjitvā tato paṭhamaṃ nirujjhati, tato eva siddhamatthaṃ sarūpeneva dassetuṃ ‘‘manodvārikavedanā paṭhamaṃ uppajjitvā pacchā nirujjhatī’’ti vuttaṃ. Idāni tameva saṅkhepena vuttaṃ vivarituṃ ‘‘sā hī’’tiādimāha. Yāva tettiṃsavassāpi paṭhamavayo. Paṇṇāsavassakāleti paṭhamavayato yāva paññāsavassakālā, tāva ṭhitā hotīti vuḍḍhihāniyo anupagantvā sarūpeneva ṭhitā hoti. Mandāti mudukā atikhiṇā. Tadāti asītinavutivassakāle. Tathā ciraparivitakkepi. Bhaggā nittejā bhaggavibhaggā dubbalā. Hadayakoṭiṃyevāti cakkhādivatthūsu avattetvā tesaṃ khīṇattā koṭibhūtaṃ hadayavatthuṃyeva. Yāva esā vedanā vattati.
ваабияаад̇и махаад̇ал̣аагзна. бан̃жауд̣̇агамаг̇г̇асамбаннанд̇и бан̃жахи уд̣̇агасса бависананигкаманамаг̇г̇зхи яуд̇д̇ам̣. д̇ад̇о д̇ад̇о виссанд̣̇амаанам̣ саб̣б̣асо бун̣н̣ад̇д̇аа.
Vāpiyāti mahātaḷākena. Pañcaudakamaggasampannanti pañcahi udakassa pavisananikkhamanamaggehi yuttaṃ. Tato tato vissandamānaṃ sabbaso puṇṇattā.
батамам̣ д̣̇звз вассанд̇зд̇иаад̣̇и убамаасам̣санд̣̇анам̣. имам̣ взд̣̇анам̣ санд̇хааяаад̇и имам̣ яат̇аавуд̇д̇ам̣ барияосаанаббад̇д̇ам̣ манод̣̇вааригавзд̣̇анам̣ санд̇хааяа.
Paṭhamaṃdeve vassantetiādi upamāsaṃsandanaṃ. Imaṃ vedanaṃ sandhāyāti imaṃ yathāvuttaṃ pariyosānappattaṃ manodvārikavedanaṃ sandhāya.
гааяасса бхзд̣̇аад̇и ад̇д̇абхаавасса винаасад̇о. ‘‘уд̣̇д̇хам̣ ж̇ийвид̇абарияаад̣̇аанаа’’д̇и баал̣и, адтагат̇ааяам̣ бана ж̇ийвид̇абарияаад̣̇аанаа уд̣̇д̇ханд̇и бад̣̇уд̣̇д̇хааро гад̇о. баралогавасзна аг̇анд̇ваа. взд̣̇анаанам̣ сийд̇ибхааво наама сан̇каарад̣̇арат̇абарил̣аахабхааво, со банааяам̣ аббавад̇д̇ивасзнаад̇и ааха ‘‘бавад̇д̇и…бз… бхависсанд̇ий’’д̇и. д̇хаад̇усарийраанийд̇и адтиган̇галасан̇каад̇ад̇хаад̇усарийраани. сарийрзгад̣̇зсз хи сарийрасаман̃н̃аа.
Kāyassa bhedāti attabhāvassa vināsato. ‘‘Uddhaṃ jīvitapariyādānā’’ti pāḷi, aṭṭhakathāyaṃ pana jīvitapariyādānā uddhanti paduddhāro kato. Paralokavasena agantvā. Vedanānaṃ sītibhāvo nāma saṅkhāradarathapariḷāhabhāvo, so panāyaṃ appavattivasenāti āha ‘‘pavatti…pe… bhavissantī’’ti. Dhātusarīrānīti aṭṭhikaṅkalasaṅkhātadhātusarīrāni. Sarīrekadese hi sarīrasamaññā.
гумбхагаарабаагаад̇и гумбхагаарабаагад̇о. зд̇т̇а бажжад̇ийд̇и бааго, бажанадтаанам̣. д̇ад̣̇зва баажанавасзна аавасанд̇и зд̇т̇аад̇и ааваасо, д̇асмаа гумбхагаарааваасад̇о. авиг̇ад̇авуубасамам̣ сан̇карид̇ам̣ гумбхам̣ уд̣̇д̇харид̇ваа табзнд̇о чааригааяа сад̇и бид̇хаанавасзна табзд̇и. д̇ат̇аа табанам̣ бана санд̇хааяа вуд̇д̇ам̣ ‘‘бадисиссзяяаа’’д̇и. гумбхасса бад̣̇зсабхууд̇ад̇ааяа ааб̣ад̣̇д̇хаа аваяаваа ‘‘гумбхагабаалааний’’д̇и ад̇хиббзд̇аани, на чиннабхиннаани. аваяавамукзна хи самуд̣̇ааяо вуд̇д̇о. д̇ад̇т̇а габааласамуд̣̇ааяо хи гхадо. д̇знааха ‘‘мукаваддияаа згаб̣ад̣̇д̇хааний’’д̇и. авасиссзяяунд̇и ван̣н̣ависзсаун̣хабхааваабаг̇ад̇аа гхадагаараанзва д̇идтзяяунд̇и. аад̣̇ид̇д̇а…бз… д̇аяо бхаваа д̣̇адтаб̣б̣аа згаад̣̇асахи аг̇г̇ийхи аад̣̇ид̇д̇абхаавад̇о. яат̇аа гумбхагааро гумбхагаарааваасам̣ аад̣̇ид̇д̇ам̣ бажжавзгкад̇и, звам̣ аарад̣̇д̇хавибассагобзса бхавад̇д̇аяам̣ рааг̇аад̣̇ийхи аад̣̇ид̇д̇анд̇и ааха ‘‘гумбхагааро вияа яог̇ааважаро’’д̇и. нийхаран̣ад̣̇ан̣д̣аго вияа арахад̇д̇амаг̇г̇ан̃аан̣ам̣ бхавад̇д̇аяабаагад̇о нийхаран̣ад̇о. само бхуумибхааг̇о вияа ниб̣б̣аанад̇алам̣ саб̣б̣ависамаа нивад̇д̇анад̇о.
Kumbhakārapākāti kumbhakārapākato. Ettha paccatīti pāko, pacanaṭṭhānaṃ. Tadeva pācanavasena āvasanti etthāti āvāso, tasmā kumbhakārāvāsato. Avigatavūpasamaṃ saṅkharitaṃ kumbhaṃ uddharitvā ṭhapento chārikāya sati pidhānavasena ṭhapeti. Tathā ṭhapanaṃ pana sandhāya vuttaṃ ‘‘paṭisisseyyā’’ti. Kumbhassa padesabhūtatāya ābaddhā avayavā ‘‘kumbhakapālānī’’ti adhippetāni, na chinnabhinnāni. Avayavamukhena hi samudāyo vutto. Tattha kapālasamudāyo hi ghaṭo. Tenāha ‘‘mukhavaṭṭiyā ekabaddhānī’’ti. Avasisseyyunti vaṇṇavisesauṇhabhāvāpagatā ghaṭakārāneva tiṭṭheyyunti. Āditta…pe… tayo bhavā daṭṭhabbā ekādasahi aggīhi ādittabhāvato. Yathā kumbhakāro kumbhakārāvāsaṃ ādittaṃ paccavekkhati, evaṃ āraddhavipassakopesa bhavattayaṃ rāgādīhi ādittanti āha ‘‘kumbhakāro viya yogāvacaro’’ti. Nīharaṇadaṇḍakoviya arahattamaggañāṇaṃ bhavattayapākato nīharaṇato. Samo bhūmibhāgo viya nibbānatalaṃ sabbavisamā nivattanato.
‘‘аад̣̇аананигкзбанад̇о, ваяовуд̣̇д̇хад̇т̇ан̇г̇амад̇о, аахаарамаяад̇о, уд̇умаяад̇о, жид̇д̇асамудтаанад̇о, гаммаж̇ад̇о, д̇хаммад̇ааруубад̇о’’д̇и (висуд̣̇д̇хи. 2.706) имзхи сад̇д̇ахи аагаарзхи саммасанд̇о руубасад̇д̇агам̣ вибассад̇и наама. ‘‘галаабад̇о, яамагад̇о, кан̣игад̇о, бадибаадид̇о, д̣̇идтиуг̇гхааданад̇о, маанасамуг̇гхаадад̇о, ниганд̇ибарияаад̣̇аанад̇о’’д̇и (висуд̣̇д̇хи. 2.717) имзхи сад̇д̇ахи аагаарзхи саммасанд̇о аруубасад̇д̇агам̣ вибассад̇и наама, д̇асмаа яат̇аавуд̇д̇ам̣ имам̣ руубасад̇д̇агам̣ аруубасад̇д̇аган̃жа нийхарид̇ваа вибассанд̇асса. яад̣̇иби арахад̇о ад̇д̇абхааво саб̣б̣абхавзхиби уд̣̇д̇хадо, яаава бана анубаад̣̇исзсабариниб̣б̣аанам̣ на баабун̣аад̇и, д̇аава д̇асмимби суг̇ад̇ибхавз тид̇оязваад̇и вад̇д̇аб̣б̣ад̇ам̣ лаб̣бхад̇ийд̇и ‘‘жад̇уухи абааязхи ад̇д̇абхаавам̣ уд̣̇д̇харид̇ваа’’ижжзва вуд̇д̇ам̣. д̇знааха ‘‘кийн̣аасаво банаа’’д̇иаад̣̇и. д̇ат̇аа жа вагкад̇и ‘‘анубаад̣̇исзсааяа ниб̣б̣аанад̇хаад̇уяаа бариниб̣б̣уд̇асса ваддавуубасамо взд̣̇ид̇аб̣б̣о’’д̇и. на бариниб̣б̣аад̇и анубаад̣̇исзсааяа ниб̣б̣аанад̇хаад̇уяаад̇и ад̇хиббааяо, саубаад̣̇исзсааяа бана ниб̣б̣аанад̇хаад̇уяаа бариниб̣б̣аанам̣ арахад̇д̇аббад̇д̇иязва. абхисан̇каарахзд̇уд̇о хзд̇т̇а барил̣аахавуубасамасса убасамабхаавзна ад̇хиббзд̇ад̇д̇аа ун̣хагумбханиб̣б̣аананид̣̇ассанамби на вируж̇жхад̇и. анубаад̣̇иннагасарийраанийд̇и уд̇усамудтаанигаруубагалаабз вад̣̇анд̇и. бхигкавзд̇и зд̇т̇а ид̇и-сад̣̇д̣̇о аад̣̇иад̇т̇о. ид̣̇ам̣ бана важанам̣. ануяог̇ааробанад̇т̇анд̇и гааяабарияанд̇игам̣ взд̣̇анам̣ взд̣̇аяамаано кийн̣аасаво аби ну бун̃н̃аабхисан̇каараад̣̇игаммам̣ гарзяяаад̇и бан̃хам̣ гаад̇ум̣. ат̇а ваа ануяог̇ааробанад̇т̇анд̇и ‘‘аби ну ко кийн̣аасаво бхигку бун̃н̃аабхисан̇каарам̣ ваа абхисан̇карзяяаа’’д̇иаад̣̇инаа ануяог̇ам̣ ааробзд̇ум̣ вуд̇д̇ам̣, на д̇аава яат̇аарад̣̇д̇хад̣̇зсанам̣ нидтаабзд̇унд̇и ад̇т̇о.
‘‘Ādānanikkhepanato, vayovuddhatthaṅgamato, āhāramayato, utumayato, cittasamuṭṭhānato, kammajato, dhammatārūpato’’ti (visuddhi. 2.706) imehi sattahi ākārehi sammasanto rūpasattakaṃ vipassati nāma. ‘‘Kalāpato, yamakato, khaṇikato, paṭipāṭito, diṭṭhiugghāṭanato, mānasamugghāṭato, nikantipariyādānato’’ti (visuddhi. 2.717) imehi sattahi ākārehi sammasanto arūpasattakaṃ vipassati nāma, tasmā yathāvuttaṃ imaṃ rūpasattakaṃ arūpasattakañca nīharitvā vipassantassa. Yadipi arahato attabhāvo sabbabhavehipi uddhaṭo, yāva pana anupādisesaparinibbānaṃ na pāpuṇāti, tāva tasmimpi sugatibhave ṭhitoyevāti vattabbataṃ labbhatīti ‘‘catūhi apāyehi attabhāvaṃ uddharitvā’’icceva vuttaṃ. Tenāha ‘‘khīṇāsavo panā’’tiādi. Tathā ca vakkhati ‘‘anupādisesāya nibbānadhātuyā parinibbutassa vaṭṭavūpasamo veditabbo’’ti. Na parinibbāti anupādisesāya nibbānadhātuyāti adhippāyo, saupādisesāya pana nibbānadhātuyā parinibbānaṃ arahattappattiyeva. Abhisaṅkhārahetuto hettha pariḷāhavūpasamassa upasamabhāvena adhippetattā uṇhakumbhanibbānanidassanampi na virujjhati. Anupādinnakasarīrānīti utusamuṭṭhānikarūpakalāpe vadanti. Bhikkhaveti ettha iti-saddo ādiattho. Idaṃ pana vacanaṃ. Anuyogāropanatthanti kāyapariyantikaṃ vedanaṃ vedayamāno khīṇāsavo api nu puññābhisaṅkhārādikammaṃ kareyyāti pañhaṃ kātuṃ. Atha vā anuyogāropanatthanti ‘‘api nu kho khīṇāsavo bhikkhu puññābhisaṅkhāraṃ vā abhisaṅkhareyyā’’tiādinā anuyogaṃ āropetuṃ vuttaṃ, na tāva yathāraddhadesanaṃ niṭṭhāpetunti attho.
бадисанд̇хивин̃н̃аан̣з сид̣̇д̇хз д̇асмим̣ бхавз уббаж̇ж̇анаарахаанам̣ вин̃н̃аан̣аанам̣ сияаа самбхаво, наасад̇ийд̇и вуд̇д̇ам̣ ‘‘вин̃н̃аан̣ам̣ бан̃н̃ааязт̇аад̇и бадисанд̇хивин̃н̃аан̣ам̣ бан̃н̃ааязт̇аа’’д̇и. саб̣б̣асо сан̇каарзсу асанд̇зсу бадисанд̇хивин̃н̃аан̣ам̣ аби ну ко бан̃н̃ааязяяа. д̇асмин̃хи абан̃н̃ааяамаанз саб̣б̣ам̣ вин̃н̃аан̣ам̣ на бан̃н̃ааязяяа. т̇зраананд̇и ‘‘бхигкавз’’д̇и аалабид̇ад̇т̇зраанам̣ . бан̃хаб̣яаагаран̣ам̣ самбахам̣сад̇и д̇асса саб̣б̣ан̃н̃уд̇ан̃н̃аан̣зна сам̣санд̣̇анад̇о. аббан̃н̃аан̣анд̇и аббан̃н̃ааяанам̣. аад̣̇и-сад̣̇д̣̇зна вин̃н̃аан̣з асад̇и наамаруубасса аббан̃н̃аан̣анд̇и звамаад̣̇им̣ сан̇г̇ан̣хаад̇и. саннидтаанасан̇каад̇анд̇и сад̣̇д̣̇аханаагаарзна бавад̇д̇асаннидтаанасан̇каад̇ам̣. ад̇химогканд̇и нижчаяаагааравимогкам̣ сад̣̇д̇хаавимогкан̃жа. д̇знааха баал̣ияам̣ ‘‘сад̣̇д̣̇ахат̇а мзд̇ам̣, бхигкавз’’д̇и. сад̣̇д̇хаасахид̇ан̃хи нижчаяаагааравимогкам̣ санд̇хааяааха ‘‘саннидтаанасан̇каад̇ам̣ ад̇химогка’’нд̇и. анд̇од̇и барияанд̇о. барид̇о чиж̇ж̇ад̇и зд̇т̇аад̇и барижчзд̣̇о.
Paṭisandhiviññāṇe siddhe tasmiṃ bhave uppajjanārahānaṃ viññāṇānaṃ siyā sambhavo, nāsatīti vuttaṃ ‘‘viññāṇaṃ paññāyethāti paṭisandhiviññāṇaṃ paññāyethā’’ti. Sabbaso saṅkhāresu asantesu paṭisandhiviññāṇaṃ api nu kho paññāyeyya. Tasmiñhi apaññāyamāne sabbaṃ viññāṇaṃ na paññāyeyya. Therānanti ‘‘bhikkhave’’ti ālapitattherānaṃ . Pañhabyākaraṇaṃ sampahaṃsati tassa sabbaññutaññāṇena saṃsandanato. Appaññāṇanti appaññāyanaṃ. Ādi-saddena viññāṇe asati nāmarūpassa appaññāṇanti evamādiṃ saṅgaṇhāti. Sanniṭṭhānasaṅkhātanti saddahanākārena pavattasanniṭṭhānasaṅkhātaṃ. Adhimokkhanti nicchayākāravimokkhaṃ saddhāvimokkhañca. Tenāha pāḷiyaṃ ‘‘saddahatha metaṃ, bhikkhave’’ti. Saddhāsahitañhi nicchayākāravimokkhaṃ sandhāyāha ‘‘sanniṭṭhānasaṅkhātaṃ adhimokkha’’nti. Antoti pariyanto. Parito chijjati etthāti paricchedo.
баривиймам̣санасуд̇д̇аван̣н̣анаа нидтид̇аа.
Parivīmaṃsanasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 1. баривиймам̣санасуд̇д̇ам̣ • 1. Parivīmaṃsanasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) / 1. баривиймам̣санасуд̇д̇аван̣н̣анаа • 1. Parivīmaṃsanasuttavaṇṇanā
