| Library / Tipiṭaka / तिपिटक • Tipiṭaka / पञ्चपकरण-अट्ठकथा • Pañcapakaraṇa-aṭṭhakathā |
७. परियापन्नकथावण्णना
7. Pariyāpannakathāvaṇṇanā
७०३-७०५. इदानि परियापन्नकथा नाम होति। तत्थ यस्मा कामरागो कामधातुं अनुसेति, कामधातुपरियापन्नोति च वुच्चति, तस्मा रूपरागारूपरागापि रूपधातुअरूपधातुयो अनुसेन्ति। रूपधातुअरूपधातुपरियापन्नायेव च नाम होन्तीति येसं लद्धि, सेय्यथापि अन्धकानञ्चेव सम्मितियानञ्च; ते सन्धाय रूपरागोति पुच्छा सकवादिस्स, पटिञ्ञा इतरस्स । तत्थ अनुसेतीति यथा कामरागो कामवितक्कसङ्खातं कामधातुं सहजातवसेन अनुसेति, किं ते एवं रूपरागो रूपधातुन्ति पुच्छति। परियापन्नोति यथा च सो तिविधाय कामधातुया किलेसकामवसेन परियापन्नत्ता कामधातुपरियापन्नो, किं ते एवं रूपरागोपि रूपधातुपरियापन्नोति पुच्छति। इतरो पनस्स अधिप्पायं असल्लक्खेन्तो केवलं लद्धिवसेन आमन्ताति पटिजानाति। अथ नं तमत्थं सल्लक्खापेतुं कुसलविपाककिरियसङ्खातेहि समापत्तेसियादीहि संसन्दित्वा पुच्छितुं समापत्तेसियोतिआदिमाह। सेसमेत्थ यथापाळिमेव निय्याति। ननु कामरागोतिआदिवचनम्पि कामरागस्सेव कामधातुयं अनुसयभावं परियापन्नतञ्च दीपेति, न इतरेसं इतरधातूसूति।
703-705. Idāni pariyāpannakathā nāma hoti. Tattha yasmā kāmarāgo kāmadhātuṃ anuseti, kāmadhātupariyāpannoti ca vuccati, tasmā rūparāgārūparāgāpi rūpadhātuarūpadhātuyo anusenti. Rūpadhātuarūpadhātupariyāpannāyeva ca nāma hontīti yesaṃ laddhi, seyyathāpi andhakānañceva sammitiyānañca; te sandhāya rūparāgoti pucchā sakavādissa, paṭiññā itarassa . Tattha anusetīti yathā kāmarāgo kāmavitakkasaṅkhātaṃ kāmadhātuṃ sahajātavasena anuseti, kiṃ te evaṃ rūparāgo rūpadhātunti pucchati. Pariyāpannoti yathā ca so tividhāya kāmadhātuyā kilesakāmavasena pariyāpannattā kāmadhātupariyāpanno, kiṃ te evaṃ rūparāgopi rūpadhātupariyāpannoti pucchati. Itaro panassa adhippāyaṃ asallakkhento kevalaṃ laddhivasena āmantāti paṭijānāti. Atha naṃ tamatthaṃ sallakkhāpetuṃ kusalavipākakiriyasaṅkhātehi samāpattesiyādīhi saṃsanditvā pucchituṃ samāpattesiyotiādimāha. Sesamettha yathāpāḷimeva niyyāti. Nanu kāmarāgotiādivacanampi kāmarāgasseva kāmadhātuyaṃ anusayabhāvaṃ pariyāpannatañca dīpeti, na itaresaṃ itaradhātūsūti.
परियापन्नकथावण्णना।
Pariyāpannakathāvaṇṇanā.
Related texts:
तिपिटक (मूल) • Tipiṭaka (Mūla) / अभिधम्मपिटक • Abhidhammapiṭaka / कथावत्थुपाळि • Kathāvatthupāḷi / (१४२) ७. परियापन्नकथा • (142) 7. Pariyāpannakathā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-मूलटीका • Pañcapakaraṇa-mūlaṭīkā / ७. परियापन्नकथावण्णना • 7. Pariyāpannakathāvaṇṇanā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-अनुटीका • Pañcapakaraṇa-anuṭīkā / ७. परियापन्नकथावण्णना • 7. Pariyāpannakathāvaṇṇanā
