| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၇. ပရိယာပန္နကထာဝဏ္ဏနာ
7. Pariyāpannakathāvaṇṇanā
၇၀၃-၇၀၅. ဣဒာနိ ပရိယာပန္နကထာ နာမ ဟောတိ။ တတ္ထ ယသ္မာ ကာမရာဂော ကာမဓာတုံ အနုသေတိ, ကာမဓာတုပရိယာပန္နောတိ စ ဝုစ္စတိ, တသ္မာ ရူပရာဂာရူပရာဂာပိ ရူပဓာတုအရူပဓာတုယော အနုသေန္တိ။ ရူပဓာတုအရူပဓာတုပရိယာပန္နာယေဝ စ နာမ ဟောန္တီတိ ယေသံ လဒ္ဓိ, သေယ္ယထာပိ အန္ဓကာနဉ္စေဝ သမ္မိတိယာနဉ္စ; တေ သန္ဓာယ ရူပရာဂောတိ ပုစ္ဆာ သကဝာဒိသ္သ, ပဋိညာ ဣတရသ္သ ။ တတ္ထ အနုသေတီတိ ယထာ ကာမရာဂော ကာမဝိတက္ကသင္ခာတံ ကာမဓာတုံ သဟဇာတဝသေန အနုသေတိ, ကိံ တေ ဧဝံ ရူပရာဂော ရူပဓာတုန္တိ ပုစ္ဆတိ။ ပရိယာပန္နောတိ ယထာ စ သော တိဝိဓာယ ကာမဓာတုယာ ကိလေသကာမဝသေန ပရိယာပန္နတ္တာ ကာမဓာတုပရိယာပန္နော, ကိံ တေ ဧဝံ ရူပရာဂောပိ ရူပဓာတုပရိယာပန္နောတိ ပုစ္ဆတိ။ ဣတရော ပနသ္သ အဓိပ္ပာယံ အသလ္လက္ခေန္တော ကေဝလံ လဒ္ဓိဝသေန အာမန္တာတိ ပဋိဇာနာတိ။ အထ နံ တမတ္ထံ သလ္လက္ခာပေတုံ ကုသလဝိပာကကိရိယသင္ခာတေဟိ သမာပတ္တေသိယာဒီဟိ သံသန္ဒိတ္ဝာ ပုစ္ဆိတုံ သမာပတ္တေသိယောတိအာဒိမာဟ။ သေသမေတ္ထ ယထာပာဠိမေဝ နိယ္ယာတိ။ နနု ကာမရာဂောတိအာဒိဝစနမ္ပိ ကာမရာဂသ္သေဝ ကာမဓာတုယံ အနုသယဘာဝံ ပရိယာပန္နတဉ္စ ဒီပေတိ, န ဣတရေသံ ဣတရဓာတူသူတိ။
703-705. Idāni pariyāpannakathā nāma hoti. Tattha yasmā kāmarāgo kāmadhātuṃ anuseti, kāmadhātupariyāpannoti ca vuccati, tasmā rūparāgārūparāgāpi rūpadhātuarūpadhātuyo anusenti. Rūpadhātuarūpadhātupariyāpannāyeva ca nāma hontīti yesaṃ laddhi, seyyathāpi andhakānañceva sammitiyānañca; te sandhāya rūparāgoti pucchā sakavādissa, paṭiññā itarassa . Tattha anusetīti yathā kāmarāgo kāmavitakkasaṅkhātaṃ kāmadhātuṃ sahajātavasena anuseti, kiṃ te evaṃ rūparāgo rūpadhātunti pucchati. Pariyāpannoti yathā ca so tividhāya kāmadhātuyā kilesakāmavasena pariyāpannattā kāmadhātupariyāpanno, kiṃ te evaṃ rūparāgopi rūpadhātupariyāpannoti pucchati. Itaro panassa adhippāyaṃ asallakkhento kevalaṃ laddhivasena āmantāti paṭijānāti. Atha naṃ tamatthaṃ sallakkhāpetuṃ kusalavipākakiriyasaṅkhātehi samāpattesiyādīhi saṃsanditvā pucchituṃ samāpattesiyotiādimāha. Sesamettha yathāpāḷimeva niyyāti. Nanu kāmarāgotiādivacanampi kāmarāgasseva kāmadhātuyaṃ anusayabhāvaṃ pariyāpannatañca dīpeti, na itaresaṃ itaradhātūsūti.
ပရိယာပန္နကထာဝဏ္ဏနာ။
Pariyāpannakathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၁၄၂) ၇. ပရိယာပန္နကထာ • (142) 7. Pariyāpannakathā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၇. ပရိယာပန္နကထာဝဏ္ဏနာ • 7. Pariyāpannakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၇. ပရိယာပန္နကထာဝဏ္ဏနာ • 7. Pariyāpannakathāvaṇṇanā
