| Library / Tipiṭaka / තිපිටක • Tipiṭaka / පඤ්‌චපකරණ-අට්‌ඨකථා • Pañcapakaraṇa-aṭṭhakathā |
7. පරියාපන්‌නකථාවණ්‌ණනා
7. Pariyāpannakathāvaṇṇanā
703-705. ඉදානි පරියාපන්‌නකථා නාම හොති. තත්‌ථ යස්‌මා කාමරාගො කාමධාතුං අනුසෙති, කාමධාතුපරියාපන්‌නොති ච වුච්‌චති, තස්‌මා රූපරාගාරූපරාගාපි රූපධාතුඅරූපධාතුයො අනුසෙන්‌ති. රූපධාතුඅරූපධාතුපරියාපන්‌නායෙව ච නාම හොන්‌තීති යෙසං ලද්‌ධි, සෙය්‍යථාපි අන්‌ධකානඤ්‌චෙව සම්‌මිතියානඤ්‌ච; තෙ සන්‌ධාය රූපරාගොති පුච්‌ඡා සකවාදිස්‌ස, පටිඤ්‌ඤා ඉතරස්‌ස . තත්‌ථ අනුසෙතීති යථා කාමරාගො කාමවිතක්‌කසඞ්‌ඛාතං කාමධාතුං සහජාතවසෙන අනුසෙති, කිං තෙ එවං රූපරාගො රූපධාතුන්‌ති පුච්‌ඡති. පරියාපන්‌නොති යථා ච සො තිවිධාය කාමධාතුයා කිලෙසකාමවසෙන පරියාපන්‌නත්‌තා කාමධාතුපරියාපන්‌නො, කිං තෙ එවං රූපරාගොපි රූපධාතුපරියාපන්‌නොති පුච්‌ඡති. ඉතරො පනස්‌ස අධිප්‌පායං අසල්‌ලක්‌ඛෙන්‌තො කෙවලං ලද්‌ධිවසෙන ආමන්‌තාති පටිජානාති. අථ නං තමත්‌ථං සල්‌ලක්‌ඛාපෙතුං කුසලවිපාකකිරියසඞ්‌ඛාතෙහි සමාපත්‌තෙසියාදීහි සංසන්‌දිත්‌වා පුච්‌ඡිතුං සමාපත්‌තෙසියොතිආදිමාහ. සෙසමෙත්‌ථ යථාපාළිමෙව නිය්‍යාති. නනු කාමරාගොතිආදිවචනම්‌පි කාමරාගස්‌සෙව කාමධාතුයං අනුසයභාවං පරියාපන්‌නතඤ්‌ච දීපෙති, න ඉතරෙසං ඉතරධාතූසූති.
703-705. Idāni pariyāpannakathā nāma hoti. Tattha yasmā kāmarāgo kāmadhātuṃ anuseti, kāmadhātupariyāpannoti ca vuccati, tasmā rūparāgārūparāgāpi rūpadhātuarūpadhātuyo anusenti. Rūpadhātuarūpadhātupariyāpannāyeva ca nāma hontīti yesaṃ laddhi, seyyathāpi andhakānañceva sammitiyānañca; te sandhāya rūparāgoti pucchā sakavādissa, paṭiññā itarassa . Tattha anusetīti yathā kāmarāgo kāmavitakkasaṅkhātaṃ kāmadhātuṃ sahajātavasena anuseti, kiṃ te evaṃ rūparāgo rūpadhātunti pucchati. Pariyāpannoti yathā ca so tividhāya kāmadhātuyā kilesakāmavasena pariyāpannattā kāmadhātupariyāpanno, kiṃ te evaṃ rūparāgopi rūpadhātupariyāpannoti pucchati. Itaro panassa adhippāyaṃ asallakkhento kevalaṃ laddhivasena āmantāti paṭijānāti. Atha naṃ tamatthaṃ sallakkhāpetuṃ kusalavipākakiriyasaṅkhātehi samāpattesiyādīhi saṃsanditvā pucchituṃ samāpattesiyotiādimāha. Sesamettha yathāpāḷimeva niyyāti. Nanu kāmarāgotiādivacanampi kāmarāgasseva kāmadhātuyaṃ anusayabhāvaṃ pariyāpannatañca dīpeti, na itaresaṃ itaradhātūsūti.
පරියාපන්‌නකථාවණ්‌ණනා.
Pariyāpannakathāvaṇṇanā.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / කථාවත්‌ථුපාළි • Kathāvatthupāḷi / (142) 7. පරියාපන්‌නකථා • (142) 7. Pariyāpannakathā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 7. පරියාපන්‌නකථාවණ්‌ණනා • 7. Pariyāpannakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 7. පරියාපන්‌නකථාවණ්‌ණනා • 7. Pariyāpannakathāvaṇṇanā
