| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
2. பரியாயஸுத்தவண்ணனா
2. Pariyāyasuttavaṇṇanā
233. து³தியே ஸம்ப³ஹுலாதி வினயபரியாயேன தயோ ஜனா ஸம்ப³ஹுலாதி வுச்சந்தி, ததோ பரங் ஸங்கோ⁴. ஸுத்தந்தபரியாயேன தயோ தயோ ஏவ, ததோ உத்³த⁴ங் ஸம்ப³ஹுலா. இத⁴ ஸுத்தந்தபரியாயேன ஸம்ப³ஹுலாதி வேதி³தப்³பா³. பிண்டா³ய பவிஸிங்ஸூதி பிண்டா³ய பவிட்டா². தே பன ந தாவ பவிட்டா², ‘‘பவிஸிஸ்ஸாமா’’தி நிக்க²ந்தத்தா பன பவிஸிங்ஸூதி வுத்தா. யதா² கிங்? யதா² ‘‘கா³மங் க³மிஸ்ஸாமீ’’தி நிக்க²ந்தபுரிஸோ தங் கா³மங் அபத்தோபி ‘‘கஹங் இத்த²ன்னாமோ’’தி வுத்தே ‘‘கா³மங் க³தோ’’தி வுச்சதி, ஏவங். பரிப்³பா³ஜகானங் ஆராமோதி ஜேதவனஸ்ஸ அவிதூ³ரே அஞ்ஞதித்தி²யானங் பரிப்³பா³ஜகானங் ஆராமோ அத்தி², தங் ஸந்தா⁴யேதங் வுத்தங். ஸமணோ ஆவுஸோதி ஆவுஸோ தும்ஹாகங் ஸத்தா² ஸமணோ கோ³தமோ.
233. Dutiye sambahulāti vinayapariyāyena tayo janā sambahulāti vuccanti, tato paraṃ saṅgho. Suttantapariyāyena tayo tayo eva, tato uddhaṃ sambahulā. Idha suttantapariyāyena sambahulāti veditabbā. Piṇḍāya pavisiṃsūti piṇḍāya paviṭṭhā. Te pana na tāva paviṭṭhā, ‘‘pavisissāmā’’ti nikkhantattā pana pavisiṃsūti vuttā. Yathā kiṃ? Yathā ‘‘gāmaṃ gamissāmī’’ti nikkhantapuriso taṃ gāmaṃ apattopi ‘‘kahaṃ itthannāmo’’ti vutte ‘‘gāmaṃ gato’’ti vuccati, evaṃ. Paribbājakānaṃ ārāmoti jetavanassa avidūre aññatitthiyānaṃ paribbājakānaṃ ārāmo atthi, taṃ sandhāyetaṃ vuttaṃ. Samaṇo āvusoti āvuso tumhākaṃ satthā samaṇo gotamo.
மயம்பி கோ² ஆவுஸோ ஸாவகானங் ஏவங் த⁴ம்மங் தே³ஸேமாதி தித்தி²யானங் ஸமயே ‘‘பஞ்ச நீவரணா பஹாதப்³பா³, ஸத்த பொ³ஜ்ஜ²ங்கா³ பா⁴வேதப்³பா³’’தி ஏதங் நத்தி² . தே பன ஆராமங் க³ந்த்வா பரிஸபரியந்தே ட²த்வா அஞ்ஞங் ஓலோகெந்தோ விய அஞ்ஞவிஹிதகா விய ஹுத்வா ப⁴க³வதோ த⁴ம்மதே³ஸனங் ஸுணந்தி. ததோ ‘‘ஸமணோ கோ³தமோ ‘இத³ங் பஜஹத² இத³ங் பா⁴வேதா²’தி வத³தீ’’தி ஸல்லக்கெ²த்வா அத்தனோ ஆராமங் க³ந்த்வா ஆராமமஜ்ஜே² ஆஸனங் பஞ்ஞாபெத்வா உபட்டா²யகஉபட்டா²யிகாஹி பரிவுதா ஸீஸங் உக்கி²பித்வா காயங் உன்னாமெத்வா அத்தனோ ஸயம்பூ⁴ஞாணேன படிவித்³தா⁴காரங் த³ஸ்ஸெந்தா – ‘‘பஞ்ச நீவரணா நாம பஹாதப்³பா³, ஸத்த பொ³ஜ்ஜ²ங்கா³ நாம பா⁴வேதப்³பா³’’தி கதெ²ந்தி.
Mayampi kho āvuso sāvakānaṃ evaṃ dhammaṃ desemāti titthiyānaṃ samaye ‘‘pañca nīvaraṇā pahātabbā, satta bojjhaṅgā bhāvetabbā’’ti etaṃ natthi . Te pana ārāmaṃ gantvā parisapariyante ṭhatvā aññaṃ olokento viya aññavihitakā viya hutvā bhagavato dhammadesanaṃ suṇanti. Tato ‘‘samaṇo gotamo ‘idaṃ pajahatha idaṃ bhāvethā’ti vadatī’’ti sallakkhetvā attano ārāmaṃ gantvā ārāmamajjhe āsanaṃ paññāpetvā upaṭṭhāyakaupaṭṭhāyikāhi parivutā sīsaṃ ukkhipitvā kāyaṃ unnāmetvā attano sayambhūñāṇena paṭividdhākāraṃ dassentā – ‘‘pañca nīvaraṇā nāma pahātabbā, satta bojjhaṅgā nāma bhāvetabbā’’ti kathenti.
இத⁴ நோ ஆவுஸோதி எத்த² இதா⁴தி இமஸ்மிங் பஞ்ஞாபனே. கோ விஸேஸோதி கிங் அதி⁴கங்? கோ அதி⁴ப்பயாஸோதி கோ அதி⁴கப்பயோகோ³? கிங் நானாகரணந்தி கிங் நானத்தங்? த⁴ம்மதே³ஸனாய வா த⁴ம்மதே³ஸனந்தி யதி³த³ங் ஸமணஸ்ஸ வா கோ³தமஸ்ஸ த⁴ம்மதே³ஸனாய ஸத்³தி⁴ங் அம்ஹாகங் த⁴ம்மதே³ஸனங், அம்ஹாகங் வா த⁴ம்மதே³ஸனாய ஸத்³தி⁴ங் ஸமணஸ்ஸ கோ³தமஸ்ஸ த⁴ம்மதே³ஸனங் ஆரப்³ப⁴ நானாகரணங் வுச்செய்ய, தங் கின்னாமாதி வத³ந்தி. து³தியபதே³பி ஏஸேவ நயோ.
Idha no āvusoti ettha idhāti imasmiṃ paññāpane. Ko visesoti kiṃ adhikaṃ? Ko adhippayāsoti ko adhikappayogo? Kiṃ nānākaraṇanti kiṃ nānattaṃ? Dhammadesanāya vā dhammadesananti yadidaṃ samaṇassa vā gotamassa dhammadesanāya saddhiṃ amhākaṃ dhammadesanaṃ, amhākaṃ vā dhammadesanāya saddhiṃ samaṇassa gotamassa dhammadesanaṃ ārabbha nānākaraṇaṃ vucceyya, taṃ kinnāmāti vadanti. Dutiyapadepi eseva nayo.
நேவ அபி⁴னந்தி³ங்ஸூதி ‘‘ஏவமேவ’’ந்தி ந ஸம்படிச்சி²ங்ஸு. நப்படிக்கோஸிங்ஸூதி ‘‘நயித³ங் ஏவ’’ந்தி ந படிஸேதி⁴ங்ஸு. கிங் பன தே பஹொந்தா ஏவங் அகங்ஸு, உதா³ஹு அப்பஹொந்தாதி? பஹொந்தா. ந ஹி தே எத்தகங் கத²ங் கதே²துங் ந ஸக்கொந்தி ‘‘ஆவுஸோ தும்ஹாகங் ஸமயே பஞ்ச நீவரணா பஹாதப்³பா³ நாம நத்தி², ஸத்த பொ³ஜ்ஜ²ங்கா³ பா⁴வேதப்³பா³ நாம நத்தீ²’’தி. ஏவங் பன தேஸங் அஹோஸி – ‘‘அத்தி² நோ ஏதங் கதா²பாப⁴தங், மயங் ஏதங் ஸத்து² ஆரோசெஸ்ஸாம, அத² நோ ஸத்தா² மது⁴ரத⁴ம்மதே³ஸனங் தே³ஸெஸ்ஸதீ’’தி.
Neva abhinandiṃsūti ‘‘evameva’’nti na sampaṭicchiṃsu. Nappaṭikkosiṃsūti ‘‘nayidaṃ eva’’nti na paṭisedhiṃsu. Kiṃ pana te pahontā evaṃ akaṃsu, udāhu appahontāti? Pahontā. Na hi te ettakaṃ kathaṃ kathetuṃ na sakkonti ‘‘āvuso tumhākaṃ samaye pañca nīvaraṇā pahātabbā nāma natthi, satta bojjhaṅgā bhāvetabbā nāma natthī’’ti. Evaṃ pana tesaṃ ahosi – ‘‘atthi no etaṃ kathāpābhataṃ, mayaṃ etaṃ satthu ārocessāma, atha no satthā madhuradhammadesanaṃ desessatī’’ti.
பரியாயோதி காரணங். ந சேவ ஸம்பாயிஸ்ஸந்தீதி ஸம்பாதெ³த்வா கதே²துங் ந ஸக்கி²ஸ்ஸந்தி. உத்தரிஞ்ச விகா⁴தந்தி அஸம்பாயனதோ உத்தரிம்பி து³க்க²ங் ஆபஜ்ஜிஸ்ஸந்தி. ஸம்பாதெ³த்வா கதே²துங் அஸக்கொந்தானஞ்ஹி து³க்க²ங் உப்பஜ்ஜதி. யதா² தங், பி⁴க்க²வே, அவிஸயஸ்மிந்தி எத்த² தந்தி நிபாதமத்தங், யதா²தி காரணவசனங், யஸ்மா அவிஸயே பஞ்ஹோ புச்சி²தோதி அத்தோ². ஸதே³வகேதி ஸஹ தே³வேஹி ஸதே³வகே. ஸமாரகாதீ³ஸுபி ஏஸேவ நயோ. ஏவங் தீணி டா²னானி லோகே பக்கி²பித்வா த்³வே பஜாயாதி, பஞ்சஹிபி ஸத்தலோகமேவ பரியாதி³யித்வா ஏதஸ்மிங் ஸதே³வகாதி³பே⁴தே³ லோகே தே³வங் வா மனுஸ்ஸங் வா ந ஸமனுபஸ்ஸாமீதி தீ³பேதி. இதோ வா பன ஸுத்வாதி இதோ வா பன மம ஸாஸனதோ ஸுத்வா. இதோ ஸுத்வா ஹி ததா²க³தோ ததா²க³தஸாவகோபி ஆராதெ⁴ய்ய, பரிதோஸெய்ய, அஞ்ஞதா² ஆராத⁴னா நாம நத்தீ²தி த³ஸ்ஸேதி.
Pariyāyoti kāraṇaṃ. Na ceva sampāyissantīti sampādetvā kathetuṃ na sakkhissanti. Uttariñca vighātanti asampāyanato uttarimpi dukkhaṃ āpajjissanti. Sampādetvā kathetuṃ asakkontānañhi dukkhaṃ uppajjati. Yathā taṃ, bhikkhave, avisayasminti ettha tanti nipātamattaṃ, yathāti kāraṇavacanaṃ, yasmā avisaye pañho pucchitoti attho. Sadevaketi saha devehi sadevake. Samārakādīsupi eseva nayo. Evaṃ tīṇi ṭhānāni loke pakkhipitvā dve pajāyāti, pañcahipi sattalokameva pariyādiyitvā etasmiṃ sadevakādibhede loke devaṃ vā manussaṃ vā na samanupassāmīti dīpeti. Ito vā pana sutvāti ito vā pana mama sāsanato sutvā. Ito sutvā hi tathāgato tathāgatasāvakopi ārādheyya, paritoseyya, aññathā ārādhanā nāma natthīti dasseti.
இதா³னி அத்தனோ தேஸங் பஞ்ஹானங் வெய்யாகரணேன சித்தாராத⁴னங் த³ஸ்ஸெந்தோ கதமோ ச பி⁴க்க²வே பரியாயோதிஆதி³மாஹ. தத்த² அஜ்ஜ²த்தங் காமச்ச²ந்தோ³தி அத்தனோ பஞ்சக்க²ந்தே⁴ ஆரப்³ப⁴ உப்பன்னச²ந்த³ராகோ³ . ப³ஹித்³தா⁴ காமச்ச²ந்தோ³தி பரேஸங் பஞ்சக்க²ந்தே⁴ ஆரப்³ப⁴ உப்பன்னச²ந்த³ராகோ³. உத்³தே³ஸங் க³ச்ச²தீதி க³ணனங் க³ச்ச²தி. அஜ்ஜ²த்தங் ப்³யாபாதோ³தி அத்தனோ ஹத்த²பாதா³தீ³ஸு உப்பன்னபடிகோ⁴. ப³ஹித்³தா⁴ ப்³யாபாதோ³தி பரேஸங் தேஸு உப்பன்னபடிகோ⁴. அஜ்ஜ²த்தங் த⁴ம்மேஸு விசிகிச்சா²தி அத்தனோ க²ந்தே⁴ஸு விமதி. ப³ஹித்³தா⁴ த⁴ம்மேஸு விசிகிச்சா²தி ப³ஹித்³தா⁴ அட்ட²ஸு டா²னேஸு மஹாவிசிகிச்சா². அஜ்ஜ²த்தங் த⁴ம்மேஸு ஸதீதி அஜ்ஜ²த்திகே ஸங்கா²ரே படிக்³க³ண்ஹந்தஸ்ஸ உப்பன்னா ஸதி. ப³ஹித்³தா⁴ த⁴ம்மேஸு ஸதீதி ப³ஹித்³தா⁴ ஸங்கா²ரே பரிக்³க³ண்ஹந்தஸ்ஸ உப்பன்னா ஸதி. த⁴ம்மவிசயஸம்பொ³ஜ்ஜ²ங்கே³பி ஏஸேவ நயோ.
Idāni attano tesaṃ pañhānaṃ veyyākaraṇena cittārādhanaṃ dassento katamo ca bhikkhave pariyāyotiādimāha. Tattha ajjhattaṃ kāmacchandoti attano pañcakkhandhe ārabbha uppannachandarāgo . Bahiddhā kāmacchandoti paresaṃ pañcakkhandhe ārabbha uppannachandarāgo. Uddesaṃ gacchatīti gaṇanaṃ gacchati. Ajjhattaṃ byāpādoti attano hatthapādādīsu uppannapaṭigho. Bahiddhā byāpādoti paresaṃ tesu uppannapaṭigho. Ajjhattaṃ dhammesu vicikicchāti attano khandhesu vimati. Bahiddhā dhammesu vicikicchāti bahiddhā aṭṭhasu ṭhānesu mahāvicikicchā. Ajjhattaṃ dhammesu satīti ajjhattike saṅkhāre paṭiggaṇhantassa uppannā sati. Bahiddhā dhammesu satīti bahiddhā saṅkhāre pariggaṇhantassa uppannā sati. Dhammavicayasambojjhaṅgepi eseva nayo.
காயிகந்தி சங்கமங் அதி⁴ட்ட²ஹந்தஸ்ஸ உப்பன்னவீரியங். சேதஸிகந்தி – ‘‘ந தாவாஹங் இமங் பல்லங்கங் பி⁴ந்தி³ஸ்ஸாமி, யாவ மே அனுபாதா³ய ஆஸவேஹி சித்தங் விமுச்சிஸ்ஸதீ’’தி ஏவங் காயபயோக³ங் வினா உப்பன்னவீரியங். காயப்பஸ்ஸத்³தீ⁴தி திண்ணங் க²ந்தா⁴னங் த³ரத²பஸ்ஸத்³தி⁴. சித்தப்பஸ்ஸத்³தீ⁴தி விஞ்ஞாணக்க²ந்த⁴ஸ்ஸ த³ரத²பஸ்ஸத்³தி⁴. உபெக்கா²ஸம்பொ³ஜ்ஜ²ங்கே³ ஸதிஸம்பொ³ஜ்ஜ²ங்க³ஸதி³ஸோவ வினிச்ச²யோ.
Kāyikanti caṅkamaṃ adhiṭṭhahantassa uppannavīriyaṃ. Cetasikanti – ‘‘na tāvāhaṃ imaṃ pallaṅkaṃ bhindissāmi, yāva me anupādāya āsavehi cittaṃ vimuccissatī’’ti evaṃ kāyapayogaṃ vinā uppannavīriyaṃ. Kāyappassaddhīti tiṇṇaṃ khandhānaṃ darathapassaddhi. Cittappassaddhīti viññāṇakkhandhassa darathapassaddhi. Upekkhāsambojjhaṅge satisambojjhaṅgasadisova vinicchayo.
இமஸ்மிங் ஸுத்தே மிஸ்ஸகஸம்பொ³ஜ்ஜ²ங்கா³ கதி²தா. ஏதேஸு ஹி அஜ்ஜ²த்தத⁴ம்மேஸு ஸதி, பவிசயோ, உபெக்கா²தி இமே அத்தனோ க²ந்தா⁴ரம்மணத்தா லோகியாவ ஹொந்தி, ததா² மக்³க³ங் அபத்தங் காயிகவீரியங். அவிதக்கஅவிசாரா பன பீதிஸமாதீ⁴ கிஞ்சாபி ரூபாவசரா ஹொந்தி, ரூபாவசரே பன பொ³ஜ்ஜ²ங்கா³ ந லப்³ப⁴ந்தீதி லோகுத்தராவ ஹொந்தி. யே ச தே²ரா ப்³ரஹ்மவிஹாரவிபஸ்ஸனாபாத³கஜ்ஜா²னாதீ³ஸு பொ³ஜ்ஜ²ங்கே³ உத்³த⁴ரந்தி, தேஸங் மதேன ரூபாவசராபி அரூபாவசராபி ஹொந்தி. பொ³ஜ்ஜ²ங்கே³ஸு ஹி அரூபாவசரே பீதியேவ ஏகந்தேன ந லப்³ப⁴தி, ஸேஸா ச² மிஸ்ஸகாவ ஹொந்தீதி. தே³ஸனாபரியோஸானே கேசி பி⁴க்கூ² ஸோதாபன்னா ஜாதா, கேசி ஸகதா³கா³மீ, கேசி அனாகா³மீ, கேசி அரஹந்தோதி.
Imasmiṃ sutte missakasambojjhaṅgā kathitā. Etesu hi ajjhattadhammesu sati, pavicayo, upekkhāti ime attano khandhārammaṇattā lokiyāva honti, tathā maggaṃ apattaṃ kāyikavīriyaṃ. Avitakkaavicārā pana pītisamādhī kiñcāpi rūpāvacarā honti, rūpāvacare pana bojjhaṅgā na labbhantīti lokuttarāva honti. Ye ca therā brahmavihāravipassanāpādakajjhānādīsu bojjhaṅge uddharanti, tesaṃ matena rūpāvacarāpi arūpāvacarāpi honti. Bojjhaṅgesu hi arūpāvacare pītiyeva ekantena na labbhati, sesā cha missakāva hontīti. Desanāpariyosāne keci bhikkhū sotāpannā jātā, keci sakadāgāmī, keci anāgāmī, keci arahantoti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. பரியாயஸுத்தங் • 2. Pariyāyasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. பரியாயஸுத்தவண்ணனா • 2. Pariyāyasuttavaṇṇanā
