| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
2. පරියෙසනාසුත්‌තං
2. Pariyesanāsuttaṃ
255. ‘‘චතස්‌සො ඉමා, භික්‌ඛවෙ, අනරියපරියෙසනා. කතමා චතස්‌සො? ඉධ, භික්‌ඛවෙ, එකච්‌චො අත්‌තනා ජරාධම්‌මො සමානො ජරාධම්‌මංයෙව පරියෙසති; අත්‌තනා බ්‍යාධිධම්‌මො සමානො බ්‍යාධිධම්‌මංයෙව පරියෙසති; අත්‌තනා මරණධම්‌මො සමානො මරණධම්‌මංයෙව පරියෙසති; අත්‌තනා සංකිලෙසධම්‌මො සමානො සංකිලෙසධම්‌මංයෙව පරියෙසති. ඉමා ඛො, භික්‌ඛවෙ, චතස්‌සො අනරියපරියෙසනා.
255. ‘‘Catasso imā, bhikkhave, anariyapariyesanā. Katamā catasso? Idha, bhikkhave, ekacco attanā jarādhammo samāno jarādhammaṃyeva pariyesati; attanā byādhidhammo samāno byādhidhammaṃyeva pariyesati; attanā maraṇadhammo samāno maraṇadhammaṃyeva pariyesati; attanā saṃkilesadhammo samāno saṃkilesadhammaṃyeva pariyesati. Imā kho, bhikkhave, catasso anariyapariyesanā.
‘‘චතස්‌සො ඉමා, භික්‌ඛවෙ, අරියපරියෙසනා. කතමා චතස්‌සො? ඉධ, භික්‌ඛවෙ, එකච්‌චො අත්‌තනා ජරාධම්‌මො සමානො ජරාධම්‌මෙ ආදීනවං විදිත්‌වා අජරං අනුත්‌තරං යොගක්‌ඛෙමං නිබ්‌බානං පරියෙසති; අත්‌තනා බ්‍යාධිධම්‌මො සමානො බ්‍යාධිධම්‌මෙ ආදීනවං විදිත්‌වා අබ්‍යාධිං අනුත්‌තරං යොගක්‌ඛෙමං නිබ්‌බානං පරියෙසති; අත්‌තනා මරණධම්‌මො සමානො මරණධම්‌මෙ ආදීනවං විදිත්‌වා අමතං අනුත්‌තරං යොගක්‌ඛෙමං නිබ්‌බානං පරියෙසති; අත්‌තනා සංකිලෙසධම්‌මො සමානො සංකිලෙසධම්‌මෙ ආදීනවං විදිත්‌වා අසංකිලිට්‌ඨං අනුත්‌තරං යොගක්‌ඛෙමං නිබ්‌බානං පරියෙසති. ඉමා ඛො, භික්‌ඛවෙ , චතස්‌සො අරියපරියෙසනා’’ති. දුතියං.
‘‘Catasso imā, bhikkhave, ariyapariyesanā. Katamā catasso? Idha, bhikkhave, ekacco attanā jarādhammo samāno jarādhamme ādīnavaṃ viditvā ajaraṃ anuttaraṃ yogakkhemaṃ nibbānaṃ pariyesati; attanā byādhidhammo samāno byādhidhamme ādīnavaṃ viditvā abyādhiṃ anuttaraṃ yogakkhemaṃ nibbānaṃ pariyesati; attanā maraṇadhammo samāno maraṇadhamme ādīnavaṃ viditvā amataṃ anuttaraṃ yogakkhemaṃ nibbānaṃ pariyesati; attanā saṃkilesadhammo samāno saṃkilesadhamme ādīnavaṃ viditvā asaṃkiliṭṭhaṃ anuttaraṃ yogakkhemaṃ nibbānaṃ pariyesati. Imā kho, bhikkhave , catasso ariyapariyesanā’’ti. Dutiyaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 1-3. අභිඤ්‌ඤාසුත්‌තාදිවණ්‌ණනා • 1-3. Abhiññāsuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-3. අභිඤ්‌ඤාසුත්‌තාදිවණ්‌ණනා • 1-3. Abhiññāsuttādivaṇṇanā
