| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৮. পরোসহস্সসুত্তং
8. Parosahassasuttaṃ
২১৬. একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে মহতা ভিক্খুসঙ্ঘেন সদ্ধিং অড্ঢতেলসেহি ভিক্খুসতেহি। তেন খো পন সমযেন ভগৰা ভিক্খূ নিব্বানপটিসংযুত্তায ধম্মিযা কথায সন্দস্সেতি সমাদপেতি সমুত্তেজেতি সম্পহংসেতি। তে চ ভিক্খূ অট্ঠিং কত্ৰা মনসি কত্ৰা সব্বচেতসা সমন্নাহরিত্ৰা ওহিতসোতা ধম্মং সুণন্তি। অথ খো আযস্মতো ৰঙ্গীসস্স এতদহোসি – ‘‘অযং খো ভগৰা ভিক্খূ নিব্বানপটিসংযুত্তায ধম্মিযা কথায সন্দস্সেতি সমাদপেতি সমুত্তেজেতি সম্পহংসেতি। তে চ ভিক্খূ অট্ঠিং কত্ৰা মনসি কত্ৰা সব্বচেতসা সমন্নাহরিত্ৰা ওহিতসোতা ধম্মং সুণন্তি। যংনূনাহং ভগৰন্তং সম্মুখা সারুপ্পাহি গাথাহি অভিত্থৰেয্য’’ন্তি।
216. Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme mahatā bhikkhusaṅghena saddhiṃ aḍḍhatelasehi bhikkhusatehi. Tena kho pana samayena bhagavā bhikkhū nibbānapaṭisaṃyuttāya dhammiyā kathāya sandasseti samādapeti samuttejeti sampahaṃseti. Te ca bhikkhū aṭṭhiṃ katvā manasi katvā sabbacetasā samannāharitvā ohitasotā dhammaṃ suṇanti. Atha kho āyasmato vaṅgīsassa etadahosi – ‘‘ayaṃ kho bhagavā bhikkhū nibbānapaṭisaṃyuttāya dhammiyā kathāya sandasseti samādapeti samuttejeti sampahaṃseti. Te ca bhikkhū aṭṭhiṃ katvā manasi katvā sabbacetasā samannāharitvā ohitasotā dhammaṃ suṇanti. Yaṃnūnāhaṃ bhagavantaṃ sammukhā sāruppāhi gāthāhi abhitthaveyya’’nti.
অথ খো আযস্মা ৰঙ্গীসো উট্ঠাযাসনা একংসং উত্তরাসঙ্গং করিত্ৰা যেন ভগৰা তেনঞ্জলিং পণামেত্ৰা ভগৰন্তং এতদৰোচ – ‘‘পটিভাতি মং ভগৰা, পটিভাতি মং সুগতা’’তি। ‘‘পটিভাতু তং, ৰঙ্গীসা’’তি ভগৰা অৰোচ। অথ খো আযস্মা ৰঙ্গীসো ভগৰন্তং সম্মুখা সারুপ্পাহি গাথাহি অভিত্থৰি –
Atha kho āyasmā vaṅgīso uṭṭhāyāsanā ekaṃsaṃ uttarāsaṅgaṃ karitvā yena bhagavā tenañjaliṃ paṇāmetvā bhagavantaṃ etadavoca – ‘‘paṭibhāti maṃ bhagavā, paṭibhāti maṃ sugatā’’ti. ‘‘Paṭibhātu taṃ, vaṅgīsā’’ti bhagavā avoca. Atha kho āyasmā vaṅgīso bhagavantaṃ sammukhā sāruppāhi gāthāhi abhitthavi –
‘‘পরোসহস্সং ভিক্খূনং, সুগতং পযিরুপাসতি।
‘‘Parosahassaṃ bhikkhūnaṃ, sugataṃ payirupāsati;
দেসেন্তং ৰিরজং ধম্মং, নিব্বানং অকুতোভযং॥
Desentaṃ virajaṃ dhammaṃ, nibbānaṃ akutobhayaṃ.
‘‘সুণন্তি ধম্মং ৰিমলং, সম্মাসম্বুদ্ধদেসিতং।
‘‘Suṇanti dhammaṃ vimalaṃ, sammāsambuddhadesitaṃ;
সোভতি ৰত সম্বুদ্ধো, ভিক্খুসঙ্ঘপুরক্খতো॥
Sobhati vata sambuddho, bhikkhusaṅghapurakkhato.
‘‘নাগনামোসি ভগৰা, ইসীনং ইসিসত্তমো।
‘‘Nāganāmosi bhagavā, isīnaṃ isisattamo;
মহামেঘোৰ হুত্ৰান, সাৰকে অভিৰস্সতি॥
Mahāmeghova hutvāna, sāvake abhivassati.
সাৰকো তে মহাৰীর, পাদে ৰন্দতি ৰঙ্গীসো’’তি॥
Sāvako te mahāvīra, pāde vandati vaṅgīso’’ti.
‘‘কিং নু তে, ৰঙ্গীস, ইমা গাথাযো পুব্বে পরিৰিতক্কিতা, উদাহু ঠানসোৰ তং পটিভন্তী’’তি? ‘ন খো মে, ভন্তে, ইমা গাথাযো পুব্বে পরিৰিতক্কিতা, অথ খো ঠানসোৰ মং পটিভন্তী’তি। ‘তেন হি তং, ৰঙ্গীস, ভিয্যোসোমত্তায পুব্বে অপরিৰিতক্কিতা গাথাযো পটিভন্তূ’তি। ‘এৰং, ভন্তে’তি খো আযস্মা ৰঙ্গীসো ভগৰতো পটিস্সুত্ৰা ভিয্যোসোমত্তায ভগৰন্তং পুব্বে অপরিৰিতক্কিতাহি গাথাহি অভিত্থৰি –
‘‘Kiṃ nu te, vaṅgīsa, imā gāthāyo pubbe parivitakkitā, udāhu ṭhānasova taṃ paṭibhantī’’ti? ‘Na kho me, bhante, imā gāthāyo pubbe parivitakkitā, atha kho ṭhānasova maṃ paṭibhantī’ti. ‘Tena hi taṃ, vaṅgīsa, bhiyyosomattāya pubbe aparivitakkitā gāthāyo paṭibhantū’ti. ‘Evaṃ, bhante’ti kho āyasmā vaṅgīso bhagavato paṭissutvā bhiyyosomattāya bhagavantaṃ pubbe aparivitakkitāhi gāthāhi abhitthavi –
‘‘উম্মগ্গপথং 3 মারস্স অভিভুয্য, চরতি পভিজ্জ খিলানি।
‘‘Ummaggapathaṃ 4 mārassa abhibhuyya, carati pabhijja khilāni;
তং পস্সথ বন্ধপমুঞ্চকরং, অসিতং ভাগসো পৰিভজং॥
Taṃ passatha bandhapamuñcakaraṃ, asitaṃ bhāgaso pavibhajaṃ.
‘‘ওঘস্স নিত্থরণত্থং, অনেকৰিহিতং মগ্গং অক্খাসি।
‘‘Oghassa nittharaṇatthaṃ, anekavihitaṃ maggaṃ akkhāsi;
তস্মিঞ্চে অমতে অক্খাতে, ধম্মদ্দসা ঠিতা অসংহীরা॥
Tasmiñce amate akkhāte, dhammaddasā ṭhitā asaṃhīrā.
‘‘পজ্জোতকরো অতিৰিজ্ঝ 5, সব্বট্ঠিতীনং অতিক্কমমদ্দস।
‘‘Pajjotakaro ativijjha 6, sabbaṭṭhitīnaṃ atikkamamaddasa;
ঞত্ৰা চ সচ্ছিকত্ৰা চ, অগ্গং সো দেসযি দসদ্ধানং॥
Ñatvā ca sacchikatvā ca, aggaṃ so desayi dasaddhānaṃ.
‘‘এৰং সুদেসিতে ধম্মে,
‘‘Evaṃ sudesite dhamme,
তস্মা হি তস্স ভগৰতো সাসনে।
Tasmā hi tassa bhagavato sāsane;
অপ্পমত্তো সদা নমস্সমনুসিক্খে’’তি॥
Appamatto sadā namassamanusikkhe’’ti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৮. পরোসহস্সসুত্তৰণ্ণনা • 8. Parosahassasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৮. পরোসহস্সসুত্তৰণ্ণনা • 8. Parosahassasuttavaṇṇanā
