| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৮. পরোসহস্সসুত্তৰণ্ণনা
8. Parosahassasuttavaṇṇanā
২১৬. অট্ঠমে পরোসহস্সন্তি অতিরেকসহস্সং। অকুতোভযন্তি নিব্বানে কুতোচি ভযং নত্থি, নিব্বানপ্পত্তস্স ৰা কুতোচি ভযং নত্থীতি নিব্বানং অকুতোভযং নাম। ইসীনং ইসিসত্তমোতি ৰিপস্সিতো পট্ঠায ইসীনং সত্তমকো ইসি।
216. Aṭṭhame parosahassanti atirekasahassaṃ. Akutobhayanti nibbāne kutoci bhayaṃ natthi, nibbānappattassa vā kutoci bhayaṃ natthīti nibbānaṃ akutobhayaṃ nāma. Isīnaṃ isisattamoti vipassito paṭṭhāya isīnaṃ sattamako isi.
কিং নু তে ৰঙ্গীসাতি ইদং ভগৰা অত্থুপ্পত্তিৰসেন আহ। সঙ্ঘমজ্ঝে কির কথা উদপাদি ‘‘ৰঙ্গীসত্থেরো ৰিস্সট্ঠৰত্তো , নেৰ উদ্দেসে, ন পরিপুচ্ছায, ন যোনিসোমনসিকারে কম্মং করোতি, গাথা বন্ধন্তো চুণ্ণিযপদানি করোন্তো ৰিচরতী’’তি। অথ ভগৰা চিন্তেসি – ‘‘ইমে ভিক্খূ ৰঙ্গীসস্স পটিভানসম্পত্তিং ন জানন্তি, চিন্তেত্ৰা চিন্তেত্ৰা ৰদতীতি মঞ্ঞন্তি, পটিভানসম্পত্তিমস্স জানাপেস্সামী’’তি চিন্তেত্ৰা, ‘‘কিং নু তে ৰঙ্গীসা’’তিআদিমাহ।
Kiṃ nu te vaṅgīsāti idaṃ bhagavā atthuppattivasena āha. Saṅghamajjhe kira kathā udapādi ‘‘vaṅgīsatthero vissaṭṭhavatto , neva uddese, na paripucchāya, na yonisomanasikāre kammaṃ karoti, gāthā bandhanto cuṇṇiyapadāni karonto vicaratī’’ti. Atha bhagavā cintesi – ‘‘ime bhikkhū vaṅgīsassa paṭibhānasampattiṃ na jānanti, cintetvā cintetvā vadatīti maññanti, paṭibhānasampattimassa jānāpessāmī’’ti cintetvā, ‘‘kiṃ nu te vaṅgīsā’’tiādimāha.
উম্মগ্গপথন্তি অনেকানি কিলেসুম্মুজ্জনসতানি, ৰট্টপথত্তা পন পথন্তি ৰুত্তং। পভিজ্জ খিলানীতি রাগখিলাদীনি পঞ্চ ভিন্দিত্ৰা চরসি। তং পস্সথাতি তং এৰং অভিভুয্য ভিন্দিত্ৰা চরন্তং বুদ্ধং পস্সথ। বন্ধপমুঞ্চকরন্তি বন্ধনমোচনকরং। অসিতন্তি অনিস্সিতং। ভাগসো পৰিভজন্তি সতিপট্ঠানাদিকোট্ঠাসৰসেন ধম্মং ৰিভজন্তং। পৰিভজ্জাতি ৰা পাঠো, অঙ্গপচ্চঙ্গকোট্ঠাসৰসেন ৰিভজিত্ৰা ৰিভজিত্ৰা পস্সথাতি অত্থো।
Ummaggapathanti anekāni kilesummujjanasatāni, vaṭṭapathattā pana pathanti vuttaṃ. Pabhijja khilānīti rāgakhilādīni pañca bhinditvā carasi. Taṃ passathāti taṃ evaṃ abhibhuyya bhinditvā carantaṃ buddhaṃ passatha. Bandhapamuñcakaranti bandhanamocanakaraṃ. Asitanti anissitaṃ. Bhāgaso pavibhajanti satipaṭṭhānādikoṭṭhāsavasena dhammaṃ vibhajantaṃ. Pavibhajjāti vā pāṭho, aṅgapaccaṅgakoṭṭhāsavasena vibhajitvā vibhajitvā passathāti attho.
ওঘস্সাতি চতুরোঘস্স। অনেকৰিহিতন্তি সতিপট্ঠানাদিৰসেন অনেকৰিধং। তস্মিং চ অমতে অক্খাতেতি তস্মিং তেন অক্খাতে অমতে। ধম্মদ্দসাতি ধম্মস্স পস্সিতারো। ঠিতা অসংহীরাতি অসংহারিযা হুত্ৰা পতিট্ঠিতা।
Oghassāti caturoghassa. Anekavihitanti satipaṭṭhānādivasena anekavidhaṃ. Tasmiṃ ca amate akkhāteti tasmiṃ tena akkhāte amate. Dhammaddasāti dhammassa passitāro. Ṭhitā asaṃhīrāti asaṃhāriyā hutvā patiṭṭhitā.
অতিৰিজ্ঝাতি অতিৰিজ্ঝিত্ৰা। সব্বট্ঠিতীনন্তি সব্বেসং দিট্ঠিট্ঠানানং ৰিঞ্ঞাণট্ঠিতীনং ৰা । অতিক্কমমদ্দসাতি অতিক্কমভূতং নিব্বানমদ্দস। অগ্গন্তি উত্তমধম্মং। অগ্গেতি ৰা পাঠো, পঠমতরন্তি অত্থো। দসদ্ধানন্তি পঞ্চন্নং, অগ্গধম্মং পঞ্চৰগ্গিযানং, অগ্গে ৰা পঞ্চৰগ্গিযানং ধম্মং দেসেসীতি অত্থো। তস্মাতি যস্মা এস ধম্মো সুদেসিতোতি জানন্তেন চ পমাদো ন কাতব্বো, তস্মা। অনুসিক্খেতি তিস্সো সিক্খা সিক্খেয্য। অট্ঠমং।
Ativijjhāti ativijjhitvā. Sabbaṭṭhitīnanti sabbesaṃ diṭṭhiṭṭhānānaṃ viññāṇaṭṭhitīnaṃ vā . Atikkamamaddasāti atikkamabhūtaṃ nibbānamaddasa. Agganti uttamadhammaṃ. Aggeti vā pāṭho, paṭhamataranti attho. Dasaddhānanti pañcannaṃ, aggadhammaṃ pañcavaggiyānaṃ, agge vā pañcavaggiyānaṃ dhammaṃ desesīti attho. Tasmāti yasmā esa dhammo sudesitoti jānantena ca pamādo na kātabbo, tasmā. Anusikkheti tisso sikkhā sikkheyya. Aṭṭhamaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৮. পরোসহস্সসুত্তং • 8. Parosahassasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৮. পরোসহস্সসুত্তৰণ্ণনা • 8. Parosahassasuttavaṇṇanā
