| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) |
೮. ಪರೋಸಹಸ್ಸಸುತ್ತವಣ್ಣನಾ
8. Parosahassasuttavaṇṇanā
೨೧೬. ಅಟ್ಠಮೇ ಪರೋಸಹಸ್ಸನ್ತಿ ಅತಿರೇಕಸಹಸ್ಸಂ। ಅಕುತೋಭಯನ್ತಿ ನಿಬ್ಬಾನೇ ಕುತೋಚಿ ಭಯಂ ನತ್ಥಿ, ನಿಬ್ಬಾನಪ್ಪತ್ತಸ್ಸ ವಾ ಕುತೋಚಿ ಭಯಂ ನತ್ಥೀತಿ ನಿಬ್ಬಾನಂ ಅಕುತೋಭಯಂ ನಾಮ। ಇಸೀನಂ ಇಸಿಸತ್ತಮೋತಿ ವಿಪಸ್ಸಿತೋ ಪಟ್ಠಾಯ ಇಸೀನಂ ಸತ್ತಮಕೋ ಇಸಿ।
216. Aṭṭhame parosahassanti atirekasahassaṃ. Akutobhayanti nibbāne kutoci bhayaṃ natthi, nibbānappattassa vā kutoci bhayaṃ natthīti nibbānaṃ akutobhayaṃ nāma. Isīnaṃ isisattamoti vipassito paṭṭhāya isīnaṃ sattamako isi.
ಕಿಂ ನು ತೇ ವಙ್ಗೀಸಾತಿ ಇದಂ ಭಗವಾ ಅತ್ಥುಪ್ಪತ್ತಿವಸೇನ ಆಹ। ಸಙ್ಘಮಜ್ಝೇ ಕಿರ ಕಥಾ ಉದಪಾದಿ ‘‘ವಙ್ಗೀಸತ್ಥೇರೋ ವಿಸ್ಸಟ್ಠವತ್ತೋ , ನೇವ ಉದ್ದೇಸೇ, ನ ಪರಿಪುಚ್ಛಾಯ, ನ ಯೋನಿಸೋಮನಸಿಕಾರೇ ಕಮ್ಮಂ ಕರೋತಿ, ಗಾಥಾ ಬನ್ಧನ್ತೋ ಚುಣ್ಣಿಯಪದಾನಿ ಕರೋನ್ತೋ ವಿಚರತೀ’’ತಿ। ಅಥ ಭಗವಾ ಚಿನ್ತೇಸಿ – ‘‘ಇಮೇ ಭಿಕ್ಖೂ ವಙ್ಗೀಸಸ್ಸ ಪಟಿಭಾನಸಮ್ಪತ್ತಿಂ ನ ಜಾನನ್ತಿ, ಚಿನ್ತೇತ್ವಾ ಚಿನ್ತೇತ್ವಾ ವದತೀತಿ ಮಞ್ಞನ್ತಿ, ಪಟಿಭಾನಸಮ್ಪತ್ತಿಮಸ್ಸ ಜಾನಾಪೇಸ್ಸಾಮೀ’’ತಿ ಚಿನ್ತೇತ್ವಾ, ‘‘ಕಿಂ ನು ತೇ ವಙ್ಗೀಸಾ’’ತಿಆದಿಮಾಹ।
Kiṃ nu te vaṅgīsāti idaṃ bhagavā atthuppattivasena āha. Saṅghamajjhe kira kathā udapādi ‘‘vaṅgīsatthero vissaṭṭhavatto , neva uddese, na paripucchāya, na yonisomanasikāre kammaṃ karoti, gāthā bandhanto cuṇṇiyapadāni karonto vicaratī’’ti. Atha bhagavā cintesi – ‘‘ime bhikkhū vaṅgīsassa paṭibhānasampattiṃ na jānanti, cintetvā cintetvā vadatīti maññanti, paṭibhānasampattimassa jānāpessāmī’’ti cintetvā, ‘‘kiṃ nu te vaṅgīsā’’tiādimāha.
ಉಮ್ಮಗ್ಗಪಥನ್ತಿ ಅನೇಕಾನಿ ಕಿಲೇಸುಮ್ಮುಜ್ಜನಸತಾನಿ, ವಟ್ಟಪಥತ್ತಾ ಪನ ಪಥನ್ತಿ ವುತ್ತಂ। ಪಭಿಜ್ಜ ಖಿಲಾನೀತಿ ರಾಗಖಿಲಾದೀನಿ ಪಞ್ಚ ಭಿನ್ದಿತ್ವಾ ಚರಸಿ। ತಂ ಪಸ್ಸಥಾತಿ ತಂ ಏವಂ ಅಭಿಭುಯ್ಯ ಭಿನ್ದಿತ್ವಾ ಚರನ್ತಂ ಬುದ್ಧಂ ಪಸ್ಸಥ। ಬನ್ಧಪಮುಞ್ಚಕರನ್ತಿ ಬನ್ಧನಮೋಚನಕರಂ। ಅಸಿತನ್ತಿ ಅನಿಸ್ಸಿತಂ। ಭಾಗಸೋ ಪವಿಭಜನ್ತಿ ಸತಿಪಟ್ಠಾನಾದಿಕೋಟ್ಠಾಸವಸೇನ ಧಮ್ಮಂ ವಿಭಜನ್ತಂ। ಪವಿಭಜ್ಜಾತಿ ವಾ ಪಾಠೋ, ಅಙ್ಗಪಚ್ಚಙ್ಗಕೋಟ್ಠಾಸವಸೇನ ವಿಭಜಿತ್ವಾ ವಿಭಜಿತ್ವಾ ಪಸ್ಸಥಾತಿ ಅತ್ಥೋ।
Ummaggapathanti anekāni kilesummujjanasatāni, vaṭṭapathattā pana pathanti vuttaṃ. Pabhijja khilānīti rāgakhilādīni pañca bhinditvā carasi. Taṃ passathāti taṃ evaṃ abhibhuyya bhinditvā carantaṃ buddhaṃ passatha. Bandhapamuñcakaranti bandhanamocanakaraṃ. Asitanti anissitaṃ. Bhāgaso pavibhajanti satipaṭṭhānādikoṭṭhāsavasena dhammaṃ vibhajantaṃ. Pavibhajjāti vā pāṭho, aṅgapaccaṅgakoṭṭhāsavasena vibhajitvā vibhajitvā passathāti attho.
ಓಘಸ್ಸಾತಿ ಚತುರೋಘಸ್ಸ। ಅನೇಕವಿಹಿತನ್ತಿ ಸತಿಪಟ್ಠಾನಾದಿವಸೇನ ಅನೇಕವಿಧಂ। ತಸ್ಮಿಂ ಚ ಅಮತೇ ಅಕ್ಖಾತೇತಿ ತಸ್ಮಿಂ ತೇನ ಅಕ್ಖಾತೇ ಅಮತೇ। ಧಮ್ಮದ್ದಸಾತಿ ಧಮ್ಮಸ್ಸ ಪಸ್ಸಿತಾರೋ। ಠಿತಾ ಅಸಂಹೀರಾತಿ ಅಸಂಹಾರಿಯಾ ಹುತ್ವಾ ಪತಿಟ್ಠಿತಾ।
Oghassāti caturoghassa. Anekavihitanti satipaṭṭhānādivasena anekavidhaṃ. Tasmiṃ ca amate akkhāteti tasmiṃ tena akkhāte amate. Dhammaddasāti dhammassa passitāro. Ṭhitā asaṃhīrāti asaṃhāriyā hutvā patiṭṭhitā.
ಅತಿವಿಜ್ಝಾತಿ ಅತಿವಿಜ್ಝಿತ್ವಾ। ಸಬ್ಬಟ್ಠಿತೀನನ್ತಿ ಸಬ್ಬೇಸಂ ದಿಟ್ಠಿಟ್ಠಾನಾನಂ ವಿಞ್ಞಾಣಟ್ಠಿತೀನಂ ವಾ । ಅತಿಕ್ಕಮಮದ್ದಸಾತಿ ಅತಿಕ್ಕಮಭೂತಂ ನಿಬ್ಬಾನಮದ್ದಸ। ಅಗ್ಗನ್ತಿ ಉತ್ತಮಧಮ್ಮಂ। ಅಗ್ಗೇತಿ ವಾ ಪಾಠೋ, ಪಠಮತರನ್ತಿ ಅತ್ಥೋ। ದಸದ್ಧಾನನ್ತಿ ಪಞ್ಚನ್ನಂ, ಅಗ್ಗಧಮ್ಮಂ ಪಞ್ಚವಗ್ಗಿಯಾನಂ, ಅಗ್ಗೇ ವಾ ಪಞ್ಚವಗ್ಗಿಯಾನಂ ಧಮ್ಮಂ ದೇಸೇಸೀತಿ ಅತ್ಥೋ। ತಸ್ಮಾತಿ ಯಸ್ಮಾ ಏಸ ಧಮ್ಮೋ ಸುದೇಸಿತೋತಿ ಜಾನನ್ತೇನ ಚ ಪಮಾದೋ ನ ಕಾತಬ್ಬೋ, ತಸ್ಮಾ। ಅನುಸಿಕ್ಖೇತಿ ತಿಸ್ಸೋ ಸಿಕ್ಖಾ ಸಿಕ್ಖೇಯ್ಯ। ಅಟ್ಠಮಂ।
Ativijjhāti ativijjhitvā. Sabbaṭṭhitīnanti sabbesaṃ diṭṭhiṭṭhānānaṃ viññāṇaṭṭhitīnaṃ vā . Atikkamamaddasāti atikkamabhūtaṃ nibbānamaddasa. Agganti uttamadhammaṃ. Aggeti vā pāṭho, paṭhamataranti attho. Dasaddhānanti pañcannaṃ, aggadhammaṃ pañcavaggiyānaṃ, agge vā pañcavaggiyānaṃ dhammaṃ desesīti attho. Tasmāti yasmā esa dhammo sudesitoti jānantena ca pamādo na kātabbo, tasmā. Anusikkheti tisso sikkhā sikkheyya. Aṭṭhamaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೮. ಪರೋಸಹಸ್ಸಸುತ್ತಂ • 8. Parosahassasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೮. ಪರೋಸಹಸ್ಸಸುತ್ತವಣ್ಣನಾ • 8. Parosahassasuttavaṇṇanā
