| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
2. து³தியவக்³கோ³
2. Dutiyavaggo
1. பரூபஹாரவண்ணனா
1. Parūpahāravaṇṇanā
307. இதா³னி பரூபஹாரகதா² நாம ஹோதி. தத்த² யே அரஹத்தங் படிஜானந்தானங் அப்பத்தே பத்தஸஞ்ஞீனங் அதி⁴மானிகானங் குஹகானங் வா அரஹத்தங் படிஜானந்தானங் ஸுக்கவிஸ்ஸட்டி²ங் தி³ஸ்வா ‘‘மாரகாயிகா தே³வதா அரஹதோ அஸுசிங் உபஸங்ஹரந்தீ’’தி மஞ்ஞந்தி; ஸெய்யதா²பி ஏதரஹி புப்³ப³ஸேலியா ச அபரஸேலியா ச; தே ஸந்தா⁴ய அத்தி² அரஹதோதி புச்சா² ஸகவாதி³ஸ்ஸ, படிஞ்ஞா இதரஸ்ஸ. இதா³னி யஸ்மா ஸுக்கவிஸ்ஸட்டி² நாம ராக³ஸமுட்டா²னா ஹோதி, தஸ்மா அத்தி² அரஹதோ ராகோ³தி அனுயோகோ³ ஆரத்³தோ⁴. ஸோ ஸப்³போ³பி உத்தானத்தோ²யேவ.
307. Idāni parūpahārakathā nāma hoti. Tattha ye arahattaṃ paṭijānantānaṃ appatte pattasaññīnaṃ adhimānikānaṃ kuhakānaṃ vā arahattaṃ paṭijānantānaṃ sukkavissaṭṭhiṃ disvā ‘‘mārakāyikā devatā arahato asuciṃ upasaṃharantī’’ti maññanti; seyyathāpi etarahi pubbaseliyā ca aparaseliyā ca; te sandhāya atthi arahatoti pucchā sakavādissa, paṭiññā itarassa. Idāni yasmā sukkavissaṭṭhi nāma rāgasamuṭṭhānā hoti, tasmā atthi arahato rāgoti anuyogo āraddho. So sabbopi uttānatthoyeva.
மாரகாயிகா தே³வதா அத்தனோதிஆதி³பஞ்ஹே யஸ்மா தாஸங் தே³வதானங் ஸுக்கவிஸ்ஸட்டி² நாம நத்தி², அஞ்ஞேஸம்பி ஸுக்கங் க³ஹெத்வா ந உபஸங்ஹரந்தி, அரஹதோ பன ஸுக்கமேவ நத்தி², தஸ்மா ந ஹேவந்தி படிக்கி²பதி.
Mārakāyikā devatā attanotiādipañhe yasmā tāsaṃ devatānaṃ sukkavissaṭṭhi nāma natthi, aññesampi sukkaṃ gahetvā na upasaṃharanti, arahato pana sukkameva natthi, tasmā na hevanti paṭikkhipati.
நேவ அத்தனோதிபஞ்ஹே பன நிம்மினித்வா உபஸங்ஹரந்தீதி லத்³தி⁴யா படிஜானாதி. லோமகூபேஹீதிபஞ்ஹே ஸப்பிதேலானங் விய லோமகூபேஹி உபஸங்ஹரணாபா⁴வங் தி³ஸ்வா படிக்கி²பதி.
Neva attanotipañhe pana nimminitvā upasaṃharantīti laddhiyā paṭijānāti. Lomakūpehītipañhe sappitelānaṃ viya lomakūpehi upasaṃharaṇābhāvaṃ disvā paṭikkhipati.
308. ஹந்த³ ஹீதி வசஸாயத்தே² நிபாதோ. ‘‘அரஹா நு கோ² அஹங், நோ’’தி ஏவங் விமதிங் கா³ஹயிஸ்ஸாமாதி ஏவங் வசஸாயங் கத்வா உபஸங்ஹரந்தீதி அத்தோ². அத்தி² அரஹதோ விமதீதி புட்டோ² அட்ட²வத்து²கங் விசிகிச்ச²ங் ஸந்தா⁴ய படிக்கி²பதி, து³தியங் புட்டோ² இத்தி²புரிஸானங் நாமகொ³த்தாதீ³ஸு ஸன்னிட்டா²னாபா⁴வங் ஸந்தா⁴ய படிஜானாதி.
308. Handahīti vacasāyatthe nipāto. ‘‘Arahā nu kho ahaṃ, no’’ti evaṃ vimatiṃ gāhayissāmāti evaṃ vacasāyaṃ katvā upasaṃharantīti attho. Atthi arahato vimatīti puṭṭho aṭṭhavatthukaṃ vicikicchaṃ sandhāya paṭikkhipati, dutiyaṃ puṭṭho itthipurisānaṃ nāmagottādīsu sanniṭṭhānābhāvaṃ sandhāya paṭijānāti.
309. அத்தி² தஸ்ஸ ஆஸயோதி தஸ்ஸ ஸுக்கஸ்ஸ உச்சாரபஸ்ஸாவானங் விய பதிட்டா²னோகாஸோ அத்தீ²தி புச்ச²தி.
309. Atthi tassa āsayoti tassa sukkassa uccārapassāvānaṃ viya patiṭṭhānokāso atthīti pucchati.
312. ஸத⁴ம்மகுஸலஸ்ஸாதி அத்தனோ அரஹத்தத⁴ம்மமத்தேயேவ குஸலஸ்ஸ. பஞ்ஞாவிமுத்தங் ஸந்தா⁴யேவங் வத³தி. பரத⁴ம்மகுஸலஸ்ஸாதி ஸத⁴ம்மதோ பரஸ்மிங் அட்ட²ஸமாபத்தித⁴ம்மேபி குஸலஸ்ஸ. உப⁴தோபா⁴க³விமுத்தங் ஸந்தா⁴யேவங் வத³தி. ஸேஸமெத்த² பாளிஅனுஸாரேனேவ வேதி³தப்³ப³ந்தி.
312. Sadhammakusalassāti attano arahattadhammamatteyeva kusalassa. Paññāvimuttaṃ sandhāyevaṃ vadati. Paradhammakusalassāti sadhammato parasmiṃ aṭṭhasamāpattidhammepi kusalassa. Ubhatobhāgavimuttaṃ sandhāyevaṃ vadati. Sesamettha pāḷianusāreneva veditabbanti.
பரூபஹாரகதா²வண்ணனா.
Parūpahārakathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (10) 1. பரூபஹாரகதா² • (10) 1. Parūpahārakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 1. பரூபஹாரவண்ணனா • 1. Parūpahāravaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 1. பரூபஹாரவண்ணனா • 1. Parūpahāravaṇṇanā
