| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
২. দুতিযৰগ্গো
2. Dutiyavaggo
১. পরূপহারৰণ্ণনা
1. Parūpahāravaṇṇanā
৩০৭. ইদানি পরূপহারকথা নাম হোতি। তত্থ যে অরহত্তং পটিজানন্তানং অপ্পত্তে পত্তসঞ্ঞীনং অধিমানিকানং কুহকানং ৰা অরহত্তং পটিজানন্তানং সুক্কৰিস্সট্ঠিং দিস্ৰা ‘‘মারকাযিকা দেৰতা অরহতো অসুচিং উপসংহরন্তী’’তি মঞ্ঞন্তি; সেয্যথাপি এতরহি পুব্বসেলিযা চ অপরসেলিযা চ; তে সন্ধায অত্থি অরহতোতি পুচ্ছা সকৰাদিস্স, পটিঞ্ঞা ইতরস্স। ইদানি যস্মা সুক্কৰিস্সট্ঠি নাম রাগসমুট্ঠানা হোতি, তস্মা অত্থি অরহতো রাগোতি অনুযোগো আরদ্ধো। সো সব্বোপি উত্তানত্থোযেৰ।
307. Idāni parūpahārakathā nāma hoti. Tattha ye arahattaṃ paṭijānantānaṃ appatte pattasaññīnaṃ adhimānikānaṃ kuhakānaṃ vā arahattaṃ paṭijānantānaṃ sukkavissaṭṭhiṃ disvā ‘‘mārakāyikā devatā arahato asuciṃ upasaṃharantī’’ti maññanti; seyyathāpi etarahi pubbaseliyā ca aparaseliyā ca; te sandhāya atthi arahatoti pucchā sakavādissa, paṭiññā itarassa. Idāni yasmā sukkavissaṭṭhi nāma rāgasamuṭṭhānā hoti, tasmā atthi arahato rāgoti anuyogo āraddho. So sabbopi uttānatthoyeva.
মারকাযিকা দেৰতা অত্তনোতিআদিপঞ্হে যস্মা তাসং দেৰতানং সুক্কৰিস্সট্ঠি নাম নত্থি, অঞ্ঞেসম্পি সুক্কং গহেত্ৰা ন উপসংহরন্তি, অরহতো পন সুক্কমেৰ নত্থি, তস্মা ন হেৰন্তি পটিক্খিপতি।
Mārakāyikā devatā attanotiādipañhe yasmā tāsaṃ devatānaṃ sukkavissaṭṭhi nāma natthi, aññesampi sukkaṃ gahetvā na upasaṃharanti, arahato pana sukkameva natthi, tasmā na hevanti paṭikkhipati.
নেৰ অত্তনোতিপঞ্হে পন নিম্মিনিত্ৰা উপসংহরন্তীতি লদ্ধিযা পটিজানাতি। লোমকূপেহীতিপঞ্হে সপ্পিতেলানং ৰিয লোমকূপেহি উপসংহরণাভাৰং দিস্ৰা পটিক্খিপতি।
Neva attanotipañhe pana nimminitvā upasaṃharantīti laddhiyā paṭijānāti. Lomakūpehītipañhe sappitelānaṃ viya lomakūpehi upasaṃharaṇābhāvaṃ disvā paṭikkhipati.
৩০৮. হন্দ হীতি ৰচসাযত্থে নিপাতো। ‘‘অরহা নু খো অহং, নো’’তি এৰং ৰিমতিং গাহযিস্সামাতি এৰং ৰচসাযং কত্ৰা উপসংহরন্তীতি অত্থো। অত্থি অরহতো ৰিমতীতি পুট্ঠো অট্ঠৰত্থুকং ৰিচিকিচ্ছং সন্ধায পটিক্খিপতি, দুতিযং পুট্ঠো ইত্থিপুরিসানং নামগোত্তাদীসু সন্নিট্ঠানাভাৰং সন্ধায পটিজানাতি।
308. Handahīti vacasāyatthe nipāto. ‘‘Arahā nu kho ahaṃ, no’’ti evaṃ vimatiṃ gāhayissāmāti evaṃ vacasāyaṃ katvā upasaṃharantīti attho. Atthi arahato vimatīti puṭṭho aṭṭhavatthukaṃ vicikicchaṃ sandhāya paṭikkhipati, dutiyaṃ puṭṭho itthipurisānaṃ nāmagottādīsu sanniṭṭhānābhāvaṃ sandhāya paṭijānāti.
৩০৯. অত্থি তস্স আসযোতি তস্স সুক্কস্স উচ্চারপস্সাৰানং ৰিয পতিট্ঠানোকাসো অত্থীতি পুচ্ছতি।
309. Atthi tassa āsayoti tassa sukkassa uccārapassāvānaṃ viya patiṭṭhānokāso atthīti pucchati.
৩১২. সধম্মকুসলস্সাতি অত্তনো অরহত্তধম্মমত্তেযেৰ কুসলস্স। পঞ্ঞাৰিমুত্তং সন্ধাযেৰং ৰদতি। পরধম্মকুসলস্সাতি সধম্মতো পরস্মিং অট্ঠসমাপত্তিধম্মেপি কুসলস্স। উভতোভাগৰিমুত্তং সন্ধাযেৰং ৰদতি। সেসমেত্থ পাল়িঅনুসারেনেৰ ৰেদিতব্বন্তি।
312. Sadhammakusalassāti attano arahattadhammamatteyeva kusalassa. Paññāvimuttaṃ sandhāyevaṃ vadati. Paradhammakusalassāti sadhammato parasmiṃ aṭṭhasamāpattidhammepi kusalassa. Ubhatobhāgavimuttaṃ sandhāyevaṃ vadati. Sesamettha pāḷianusāreneva veditabbanti.
পরূপহারকথাৰণ্ণনা।
Parūpahārakathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (১০) ১. পরূপহারকথা • (10) 1. Parūpahārakathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ১. পরূপহারৰণ্ণনা • 1. Parūpahāravaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ১. পরূপহারৰণ্ণনা • 1. Parūpahāravaṇṇanā
