| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၂. ဒုတိယဝဂ္ဂော
2. Dutiyavaggo
၁. ပရူပဟာရဝဏ္ဏနာ
1. Parūpahāravaṇṇanā
၃၀၇. ဣဒာနိ ပရူပဟာရကထာ နာမ ဟောတိ။ တတ္ထ ယေ အရဟတ္တံ ပဋိဇာနန္တာနံ အပ္ပတ္တေ ပတ္တသညီနံ အဓိမာနိကာနံ ကုဟကာနံ ဝာ အရဟတ္တံ ပဋိဇာနန္တာနံ သုက္ကဝိသ္သဋ္ဌိံ ဒိသ္ဝာ ‘‘မာရကာယိကာ ဒေဝတာ အရဟတော အသုစိံ ဥပသံဟရန္တီ’’တိ မညန္တိ; သေယ္ယထာပိ ဧတရဟိ ပုဗ္ဗသေလိယာ စ အပရသေလိယာ စ; တေ သန္ဓာယ အတ္ထိ အရဟတောတိ ပုစ္ဆာ သကဝာဒိသ္သ, ပဋိညာ ဣတရသ္သ။ ဣဒာနိ ယသ္မာ သုက္ကဝိသ္သဋ္ဌိ နာမ ရာဂသမုဋ္ဌာနာ ဟောတိ, တသ္မာ အတ္ထိ အရဟတော ရာဂောတိ အနုယောဂော အာရဒ္ဓော။ သော သဗ္ဗောပိ ဥတ္တာနတ္ထောယေဝ။
307. Idāni parūpahārakathā nāma hoti. Tattha ye arahattaṃ paṭijānantānaṃ appatte pattasaññīnaṃ adhimānikānaṃ kuhakānaṃ vā arahattaṃ paṭijānantānaṃ sukkavissaṭṭhiṃ disvā ‘‘mārakāyikā devatā arahato asuciṃ upasaṃharantī’’ti maññanti; seyyathāpi etarahi pubbaseliyā ca aparaseliyā ca; te sandhāya atthi arahatoti pucchā sakavādissa, paṭiññā itarassa. Idāni yasmā sukkavissaṭṭhi nāma rāgasamuṭṭhānā hoti, tasmā atthi arahato rāgoti anuyogo āraddho. So sabbopi uttānatthoyeva.
မာရကာယိကာ ဒေဝတာ အတ္တနောတိအာဒိပဉ္ဟေ ယသ္မာ တာသံ ဒေဝတာနံ သုက္ကဝိသ္သဋ္ဌိ နာမ နတ္ထိ, အညေသမ္ပိ သုက္ကံ ဂဟေတ္ဝာ န ဥပသံဟရန္တိ, အရဟတော ပန သုက္ကမေဝ နတ္ထိ, တသ္မာ န ဟေဝန္တိ ပဋိက္ခိပတိ။
Mārakāyikā devatā attanotiādipañhe yasmā tāsaṃ devatānaṃ sukkavissaṭṭhi nāma natthi, aññesampi sukkaṃ gahetvā na upasaṃharanti, arahato pana sukkameva natthi, tasmā na hevanti paṭikkhipati.
နေဝ အတ္တနောတိပဉ္ဟေ ပန နိမ္မိနိတ္ဝာ ဥပသံဟရန္တီတိ လဒ္ဓိယာ ပဋိဇာနာတိ။ လောမကူပေဟီတိပဉ္ဟေ သပ္ပိတေလာနံ ဝိယ လောမကူပေဟိ ဥပသံဟရဏာဘာဝံ ဒိသ္ဝာ ပဋိက္ခိပတိ။
Neva attanotipañhe pana nimminitvā upasaṃharantīti laddhiyā paṭijānāti. Lomakūpehītipañhe sappitelānaṃ viya lomakūpehi upasaṃharaṇābhāvaṃ disvā paṭikkhipati.
၃၀၈. ဟန္ဒ ဟီတိ ဝစသာယတ္ထေ နိပာတော။ ‘‘အရဟာ နု ခော အဟံ, နော’’တိ ဧဝံ ဝိမတိံ ဂာဟယိသ္သာမာတိ ဧဝံ ဝစသာယံ ကတ္ဝာ ဥပသံဟရန္တီတိ အတ္ထော။ အတ္ထိ အရဟတော ဝိမတီတိ ပုဋ္ဌော အဋ္ဌဝတ္ထုကံ ဝိစိကိစ္ဆံ သန္ဓာယ ပဋိက္ခိပတိ, ဒုတိယံ ပုဋ္ဌော ဣတ္ထိပုရိသာနံ နာမဂောတ္တာဒီသု သန္နိဋ္ဌာနာဘာဝံ သန္ဓာယ ပဋိဇာနာတိ။
308. Handahīti vacasāyatthe nipāto. ‘‘Arahā nu kho ahaṃ, no’’ti evaṃ vimatiṃ gāhayissāmāti evaṃ vacasāyaṃ katvā upasaṃharantīti attho. Atthi arahato vimatīti puṭṭho aṭṭhavatthukaṃ vicikicchaṃ sandhāya paṭikkhipati, dutiyaṃ puṭṭho itthipurisānaṃ nāmagottādīsu sanniṭṭhānābhāvaṃ sandhāya paṭijānāti.
၃၀၉. အတ္ထိ တသ္သ အာသယောတိ တသ္သ သုက္ကသ္သ ဥစ္စာရပသ္သာဝာနံ ဝိယ ပတိဋ္ဌာနောကာသော အတ္ထီတိ ပုစ္ဆတိ။
309. Atthi tassa āsayoti tassa sukkassa uccārapassāvānaṃ viya patiṭṭhānokāso atthīti pucchati.
၃၁၂. သဓမ္မကုသလသ္သာတိ အတ္တနော အရဟတ္တဓမ္မမတ္တေယေဝ ကုသလသ္သ။ ပညာဝိမုတ္တံ သန္ဓာယေဝံ ဝဒတိ။ ပရဓမ္မကုသလသ္သာတိ သဓမ္မတော ပရသ္မိံ အဋ္ဌသမာပတ္တိဓမ္မေပိ ကုသလသ္သ။ ဥဘတောဘာဂဝိမုတ္တံ သန္ဓာယေဝံ ဝဒတိ။ သေသမေတ္ထ ပာဠိအနုသာရေနေဝ ဝေဒိတဗ္ဗန္တိ။
312. Sadhammakusalassāti attano arahattadhammamatteyeva kusalassa. Paññāvimuttaṃ sandhāyevaṃ vadati. Paradhammakusalassāti sadhammato parasmiṃ aṭṭhasamāpattidhammepi kusalassa. Ubhatobhāgavimuttaṃ sandhāyevaṃ vadati. Sesamettha pāḷianusāreneva veditabbanti.
ပရူပဟာရကထာဝဏ္ဏနာ။
Parūpahārakathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၁၀) ၁. ပရူပဟာရကထာ • (10) 1. Parūpahārakathā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၁. ပရူပဟာရဝဏ္ဏနာ • 1. Parūpahāravaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၁. ပရူပဟာရဝဏ္ဏနာ • 1. Parūpahāravaṇṇanā
