| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā |
೨. ದುತಿಯವಗ್ಗೋ
2. Dutiyavaggo
೧. ಪರೂಪಹಾರವಣ್ಣನಾ
1. Parūpahāravaṇṇanā
೩೦೭. ಇದಾನಿ ಪರೂಪಹಾರಕಥಾ ನಾಮ ಹೋತಿ। ತತ್ಥ ಯೇ ಅರಹತ್ತಂ ಪಟಿಜಾನನ್ತಾನಂ ಅಪ್ಪತ್ತೇ ಪತ್ತಸಞ್ಞೀನಂ ಅಧಿಮಾನಿಕಾನಂ ಕುಹಕಾನಂ ವಾ ಅರಹತ್ತಂ ಪಟಿಜಾನನ್ತಾನಂ ಸುಕ್ಕವಿಸ್ಸಟ್ಠಿಂ ದಿಸ್ವಾ ‘‘ಮಾರಕಾಯಿಕಾ ದೇವತಾ ಅರಹತೋ ಅಸುಚಿಂ ಉಪಸಂಹರನ್ತೀ’’ತಿ ಮಞ್ಞನ್ತಿ; ಸೇಯ್ಯಥಾಪಿ ಏತರಹಿ ಪುಬ್ಬಸೇಲಿಯಾ ಚ ಅಪರಸೇಲಿಯಾ ಚ; ತೇ ಸನ್ಧಾಯ ಅತ್ಥಿ ಅರಹತೋತಿ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ। ಇದಾನಿ ಯಸ್ಮಾ ಸುಕ್ಕವಿಸ್ಸಟ್ಠಿ ನಾಮ ರಾಗಸಮುಟ್ಠಾನಾ ಹೋತಿ, ತಸ್ಮಾ ಅತ್ಥಿ ಅರಹತೋ ರಾಗೋತಿ ಅನುಯೋಗೋ ಆರದ್ಧೋ। ಸೋ ಸಬ್ಬೋಪಿ ಉತ್ತಾನತ್ಥೋಯೇವ।
307. Idāni parūpahārakathā nāma hoti. Tattha ye arahattaṃ paṭijānantānaṃ appatte pattasaññīnaṃ adhimānikānaṃ kuhakānaṃ vā arahattaṃ paṭijānantānaṃ sukkavissaṭṭhiṃ disvā ‘‘mārakāyikā devatā arahato asuciṃ upasaṃharantī’’ti maññanti; seyyathāpi etarahi pubbaseliyā ca aparaseliyā ca; te sandhāya atthi arahatoti pucchā sakavādissa, paṭiññā itarassa. Idāni yasmā sukkavissaṭṭhi nāma rāgasamuṭṭhānā hoti, tasmā atthi arahato rāgoti anuyogo āraddho. So sabbopi uttānatthoyeva.
ಮಾರಕಾಯಿಕಾ ದೇವತಾ ಅತ್ತನೋತಿಆದಿಪಞ್ಹೇ ಯಸ್ಮಾ ತಾಸಂ ದೇವತಾನಂ ಸುಕ್ಕವಿಸ್ಸಟ್ಠಿ ನಾಮ ನತ್ಥಿ, ಅಞ್ಞೇಸಮ್ಪಿ ಸುಕ್ಕಂ ಗಹೇತ್ವಾ ನ ಉಪಸಂಹರನ್ತಿ, ಅರಹತೋ ಪನ ಸುಕ್ಕಮೇವ ನತ್ಥಿ, ತಸ್ಮಾ ನ ಹೇವನ್ತಿ ಪಟಿಕ್ಖಿಪತಿ।
Mārakāyikā devatā attanotiādipañhe yasmā tāsaṃ devatānaṃ sukkavissaṭṭhi nāma natthi, aññesampi sukkaṃ gahetvā na upasaṃharanti, arahato pana sukkameva natthi, tasmā na hevanti paṭikkhipati.
ನೇವ ಅತ್ತನೋತಿಪಞ್ಹೇ ಪನ ನಿಮ್ಮಿನಿತ್ವಾ ಉಪಸಂಹರನ್ತೀತಿ ಲದ್ಧಿಯಾ ಪಟಿಜಾನಾತಿ। ಲೋಮಕೂಪೇಹೀತಿಪಞ್ಹೇ ಸಪ್ಪಿತೇಲಾನಂ ವಿಯ ಲೋಮಕೂಪೇಹಿ ಉಪಸಂಹರಣಾಭಾವಂ ದಿಸ್ವಾ ಪಟಿಕ್ಖಿಪತಿ।
Neva attanotipañhe pana nimminitvā upasaṃharantīti laddhiyā paṭijānāti. Lomakūpehītipañhe sappitelānaṃ viya lomakūpehi upasaṃharaṇābhāvaṃ disvā paṭikkhipati.
೩೦೮. ಹನ್ದ ಹೀತಿ ವಚಸಾಯತ್ಥೇ ನಿಪಾತೋ। ‘‘ಅರಹಾ ನು ಖೋ ಅಹಂ, ನೋ’’ತಿ ಏವಂ ವಿಮತಿಂ ಗಾಹಯಿಸ್ಸಾಮಾತಿ ಏವಂ ವಚಸಾಯಂ ಕತ್ವಾ ಉಪಸಂಹರನ್ತೀತಿ ಅತ್ಥೋ। ಅತ್ಥಿ ಅರಹತೋ ವಿಮತೀತಿ ಪುಟ್ಠೋ ಅಟ್ಠವತ್ಥುಕಂ ವಿಚಿಕಿಚ್ಛಂ ಸನ್ಧಾಯ ಪಟಿಕ್ಖಿಪತಿ, ದುತಿಯಂ ಪುಟ್ಠೋ ಇತ್ಥಿಪುರಿಸಾನಂ ನಾಮಗೋತ್ತಾದೀಸು ಸನ್ನಿಟ್ಠಾನಾಭಾವಂ ಸನ್ಧಾಯ ಪಟಿಜಾನಾತಿ।
308. Handahīti vacasāyatthe nipāto. ‘‘Arahā nu kho ahaṃ, no’’ti evaṃ vimatiṃ gāhayissāmāti evaṃ vacasāyaṃ katvā upasaṃharantīti attho. Atthi arahato vimatīti puṭṭho aṭṭhavatthukaṃ vicikicchaṃ sandhāya paṭikkhipati, dutiyaṃ puṭṭho itthipurisānaṃ nāmagottādīsu sanniṭṭhānābhāvaṃ sandhāya paṭijānāti.
೩೦೯. ಅತ್ಥಿ ತಸ್ಸ ಆಸಯೋತಿ ತಸ್ಸ ಸುಕ್ಕಸ್ಸ ಉಚ್ಚಾರಪಸ್ಸಾವಾನಂ ವಿಯ ಪತಿಟ್ಠಾನೋಕಾಸೋ ಅತ್ಥೀತಿ ಪುಚ್ಛತಿ।
309. Atthi tassa āsayoti tassa sukkassa uccārapassāvānaṃ viya patiṭṭhānokāso atthīti pucchati.
೩೧೨. ಸಧಮ್ಮಕುಸಲಸ್ಸಾತಿ ಅತ್ತನೋ ಅರಹತ್ತಧಮ್ಮಮತ್ತೇಯೇವ ಕುಸಲಸ್ಸ। ಪಞ್ಞಾವಿಮುತ್ತಂ ಸನ್ಧಾಯೇವಂ ವದತಿ। ಪರಧಮ್ಮಕುಸಲಸ್ಸಾತಿ ಸಧಮ್ಮತೋ ಪರಸ್ಮಿಂ ಅಟ್ಠಸಮಾಪತ್ತಿಧಮ್ಮೇಪಿ ಕುಸಲಸ್ಸ। ಉಭತೋಭಾಗವಿಮುತ್ತಂ ಸನ್ಧಾಯೇವಂ ವದತಿ। ಸೇಸಮೇತ್ಥ ಪಾಳಿಅನುಸಾರೇನೇವ ವೇದಿತಬ್ಬನ್ತಿ।
312. Sadhammakusalassāti attano arahattadhammamatteyeva kusalassa. Paññāvimuttaṃ sandhāyevaṃ vadati. Paradhammakusalassāti sadhammato parasmiṃ aṭṭhasamāpattidhammepi kusalassa. Ubhatobhāgavimuttaṃ sandhāyevaṃ vadati. Sesamettha pāḷianusāreneva veditabbanti.
ಪರೂಪಹಾರಕಥಾವಣ್ಣನಾ।
Parūpahārakathāvaṇṇanā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಕಥಾವತ್ಥುಪಾಳಿ • Kathāvatthupāḷi / (೧೦) ೧. ಪರೂಪಹಾರಕಥಾ • (10) 1. Parūpahārakathā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೧. ಪರೂಪಹಾರವಣ್ಣನಾ • 1. Parūpahāravaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā / ೧. ಪರೂಪಹಾರವಣ್ಣನಾ • 1. Parūpahāravaṇṇanā
