| Library / Tipiṭaka / ਤਿਪਿਟਕ • Tipiṭaka / ਪਞ੍ਚਪਕਰਣ-ਅਟ੍ਠਕਥਾ • Pañcapakaraṇa-aṭṭhakathā |
੨. ਦੁਤਿਯવਗ੍ਗੋ
2. Dutiyavaggo
੧. ਪਰੂਪਹਾਰવਣ੍ਣਨਾ
1. Parūpahāravaṇṇanā
੩੦੭. ਇਦਾਨਿ ਪਰੂਪਹਾਰਕਥਾ ਨਾਮ ਹੋਤਿ। ਤਤ੍ਥ ਯੇ ਅਰਹਤ੍ਤਂ ਪਟਿਜਾਨਨ੍ਤਾਨਂ ਅਪ੍ਪਤ੍ਤੇ ਪਤ੍ਤਸਞ੍ਞੀਨਂ ਅਧਿਮਾਨਿਕਾਨਂ ਕੁਹਕਾਨਂ વਾ ਅਰਹਤ੍ਤਂ ਪਟਿਜਾਨਨ੍ਤਾਨਂ ਸੁਕ੍ਕવਿਸ੍ਸਟ੍ਠਿਂ ਦਿਸ੍વਾ ‘‘ਮਾਰਕਾਯਿਕਾ ਦੇવਤਾ ਅਰਹਤੋ ਅਸੁਚਿਂ ਉਪਸਂਹਰਨ੍ਤੀ’’ਤਿ ਮਞ੍ਞਨ੍ਤਿ; ਸੇਯ੍ਯਥਾਪਿ ਏਤਰਹਿ ਪੁਬ੍ਬਸੇਲਿਯਾ ਚ ਅਪਰਸੇਲਿਯਾ ਚ; ਤੇ ਸਨ੍ਧਾਯ ਅਤ੍ਥਿ ਅਰਹਤੋਤਿ ਪੁਚ੍ਛਾ ਸਕવਾਦਿਸ੍ਸ, ਪਟਿਞ੍ਞਾ ਇਤਰਸ੍ਸ। ਇਦਾਨਿ ਯਸ੍ਮਾ ਸੁਕ੍ਕવਿਸ੍ਸਟ੍ਠਿ ਨਾਮ ਰਾਗਸਮੁਟ੍ਠਾਨਾ ਹੋਤਿ, ਤਸ੍ਮਾ ਅਤ੍ਥਿ ਅਰਹਤੋ ਰਾਗੋਤਿ ਅਨੁਯੋਗੋ ਆਰਦ੍ਧੋ। ਸੋ ਸਬ੍ਬੋਪਿ ਉਤ੍ਤਾਨਤ੍ਥੋਯੇવ।
307. Idāni parūpahārakathā nāma hoti. Tattha ye arahattaṃ paṭijānantānaṃ appatte pattasaññīnaṃ adhimānikānaṃ kuhakānaṃ vā arahattaṃ paṭijānantānaṃ sukkavissaṭṭhiṃ disvā ‘‘mārakāyikā devatā arahato asuciṃ upasaṃharantī’’ti maññanti; seyyathāpi etarahi pubbaseliyā ca aparaseliyā ca; te sandhāya atthi arahatoti pucchā sakavādissa, paṭiññā itarassa. Idāni yasmā sukkavissaṭṭhi nāma rāgasamuṭṭhānā hoti, tasmā atthi arahato rāgoti anuyogo āraddho. So sabbopi uttānatthoyeva.
ਮਾਰਕਾਯਿਕਾ ਦੇવਤਾ ਅਤ੍ਤਨੋਤਿਆਦਿਪਞ੍ਹੇ ਯਸ੍ਮਾ ਤਾਸਂ ਦੇવਤਾਨਂ ਸੁਕ੍ਕવਿਸ੍ਸਟ੍ਠਿ ਨਾਮ ਨਤ੍ਥਿ, ਅਞ੍ਞੇਸਮ੍ਪਿ ਸੁਕ੍ਕਂ ਗਹੇਤ੍વਾ ਨ ਉਪਸਂਹਰਨ੍ਤਿ, ਅਰਹਤੋ ਪਨ ਸੁਕ੍ਕਮੇવ ਨਤ੍ਥਿ, ਤਸ੍ਮਾ ਨ ਹੇવਨ੍ਤਿ ਪਟਿਕ੍ਖਿਪਤਿ।
Mārakāyikā devatā attanotiādipañhe yasmā tāsaṃ devatānaṃ sukkavissaṭṭhi nāma natthi, aññesampi sukkaṃ gahetvā na upasaṃharanti, arahato pana sukkameva natthi, tasmā na hevanti paṭikkhipati.
ਨੇવ ਅਤ੍ਤਨੋਤਿਪਞ੍ਹੇ ਪਨ ਨਿਮ੍ਮਿਨਿਤ੍વਾ ਉਪਸਂਹਰਨ੍ਤੀਤਿ ਲਦ੍ਧਿਯਾ ਪਟਿਜਾਨਾਤਿ। ਲੋਮਕੂਪੇਹੀਤਿਪਞ੍ਹੇ ਸਪ੍ਪਿਤੇਲਾਨਂ વਿਯ ਲੋਮਕੂਪੇਹਿ ਉਪਸਂਹਰਣਾਭਾવਂ ਦਿਸ੍વਾ ਪਟਿਕ੍ਖਿਪਤਿ।
Neva attanotipañhe pana nimminitvā upasaṃharantīti laddhiyā paṭijānāti. Lomakūpehītipañhe sappitelānaṃ viya lomakūpehi upasaṃharaṇābhāvaṃ disvā paṭikkhipati.
੩੦੮. ਹਨ੍ਦ ਹੀਤਿ વਚਸਾਯਤ੍ਥੇ ਨਿਪਾਤੋ। ‘‘ਅਰਹਾ ਨੁ ਖੋ ਅਹਂ, ਨੋ’’ਤਿ ਏવਂ વਿਮਤਿਂ ਗਾਹਯਿਸ੍ਸਾਮਾਤਿ ਏવਂ વਚਸਾਯਂ ਕਤ੍વਾ ਉਪਸਂਹਰਨ੍ਤੀਤਿ ਅਤ੍ਥੋ। ਅਤ੍ਥਿ ਅਰਹਤੋ વਿਮਤੀਤਿ ਪੁਟ੍ਠੋ ਅਟ੍ਠવਤ੍ਥੁਕਂ વਿਚਿਕਿਚ੍ਛਂ ਸਨ੍ਧਾਯ ਪਟਿਕ੍ਖਿਪਤਿ, ਦੁਤਿਯਂ ਪੁਟ੍ਠੋ ਇਤ੍ਥਿਪੁਰਿਸਾਨਂ ਨਾਮਗੋਤ੍ਤਾਦੀਸੁ ਸਨ੍ਨਿਟ੍ਠਾਨਾਭਾવਂ ਸਨ੍ਧਾਯ ਪਟਿਜਾਨਾਤਿ।
308. Handahīti vacasāyatthe nipāto. ‘‘Arahā nu kho ahaṃ, no’’ti evaṃ vimatiṃ gāhayissāmāti evaṃ vacasāyaṃ katvā upasaṃharantīti attho. Atthi arahato vimatīti puṭṭho aṭṭhavatthukaṃ vicikicchaṃ sandhāya paṭikkhipati, dutiyaṃ puṭṭho itthipurisānaṃ nāmagottādīsu sanniṭṭhānābhāvaṃ sandhāya paṭijānāti.
੩੦੯. ਅਤ੍ਥਿ ਤਸ੍ਸ ਆਸਯੋਤਿ ਤਸ੍ਸ ਸੁਕ੍ਕਸ੍ਸ ਉਚ੍ਚਾਰਪਸ੍ਸਾવਾਨਂ વਿਯ ਪਤਿਟ੍ਠਾਨੋਕਾਸੋ ਅਤ੍ਥੀਤਿ ਪੁਚ੍ਛਤਿ।
309. Atthi tassa āsayoti tassa sukkassa uccārapassāvānaṃ viya patiṭṭhānokāso atthīti pucchati.
੩੧੨. ਸਧਮ੍ਮਕੁਸਲਸ੍ਸਾਤਿ ਅਤ੍ਤਨੋ ਅਰਹਤ੍ਤਧਮ੍ਮਮਤ੍ਤੇਯੇવ ਕੁਸਲਸ੍ਸ। ਪਞ੍ਞਾવਿਮੁਤ੍ਤਂ ਸਨ੍ਧਾਯੇવਂ વਦਤਿ। ਪਰਧਮ੍ਮਕੁਸਲਸ੍ਸਾਤਿ ਸਧਮ੍ਮਤੋ ਪਰਸ੍ਮਿਂ ਅਟ੍ਠਸਮਾਪਤ੍ਤਿਧਮ੍ਮੇਪਿ ਕੁਸਲਸ੍ਸ। ਉਭਤੋਭਾਗવਿਮੁਤ੍ਤਂ ਸਨ੍ਧਾਯੇવਂ વਦਤਿ। ਸੇਸਮੇਤ੍ਥ ਪਾਲ਼ਿਅਨੁਸਾਰੇਨੇવ વੇਦਿਤਬ੍ਬਨ੍ਤਿ।
312. Sadhammakusalassāti attano arahattadhammamatteyeva kusalassa. Paññāvimuttaṃ sandhāyevaṃ vadati. Paradhammakusalassāti sadhammato parasmiṃ aṭṭhasamāpattidhammepi kusalassa. Ubhatobhāgavimuttaṃ sandhāyevaṃ vadati. Sesamettha pāḷianusāreneva veditabbanti.
ਪਰੂਪਹਾਰਕਥਾવਣ੍ਣਨਾ।
Parūpahārakathāvaṇṇanā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਅਭਿਧਮ੍ਮਪਿਟਕ • Abhidhammapiṭaka / ਕਥਾવਤ੍ਥੁਪਾਲ਼ਿ • Kathāvatthupāḷi / (੧੦) ੧. ਪਰੂਪਹਾਰਕਥਾ • (10) 1. Parūpahārakathā
ਟੀਕਾ • Tīkā / ਅਭਿਧਮ੍ਮਪਿਟਕ (ਟੀਕਾ) • Abhidhammapiṭaka (ṭīkā) / ਪਞ੍ਚਪਕਰਣ-ਮੂਲਟੀਕਾ • Pañcapakaraṇa-mūlaṭīkā / ੧. ਪਰੂਪਹਾਰવਣ੍ਣਨਾ • 1. Parūpahāravaṇṇanā
ਟੀਕਾ • Tīkā / ਅਭਿਧਮ੍ਮਪਿਟਕ (ਟੀਕਾ) • Abhidhammapiṭaka (ṭīkā) / ਪਞ੍ਚਪਕਰਣ-ਅਨੁਟੀਕਾ • Pañcapakaraṇa-anuṭīkā / ੧. ਪਰੂਪਹਾਰવਣ੍ਣਨਾ • 1. Parūpahāravaṇṇanā
